Shanxay hamkorlik tashkilotiga a’zo davlatlar xalqaro tinchlik va xavfsizlik, davlatlarning hududiy yaxlitligi, davlatlar o‘rtasidagi do‘stona aloqalarning rivojlanishi, shuningdek asosiy inson huquqlari va erkinligini ta’minlashga tahdid solayotgan terrorizmning kuchayishidan chuqur xavotirda bo‘lgan holda,

2002-yil 7-iyundagi Shanxay hamkorlik tashkiloti Xartiyasi va Birlashgan Millatlar Tashkiloti Nizomining maqsad va tamoyillariga amal qilgan holda,

2001-yil 15-iyundagi terrorizm, separatizm va ekstremizm bilan kurashish to‘g‘risidagi Shanxay konvensiyasining, 2005-yil 5-iyuldagi Shanxay hamkorlik tashkilotiga a’zo davlatlarning terrorizm, separatizm va ekstremizm bilan kurashishda Hamkorlik konsepsiyasining qoidalarini rivojlantirgan holda,

mazkur Konvensiya o‘z ichiga qamrab olgan jinoyatlar hech qanday holatlarda oqlab bo‘lmasligini, shunday qilmishlarni sodir etgan va (yoki) ular sodir etilishiga aloqador bo‘lgan aybdor jismoniy va yuridik shaxslar javobgarlikka tortilishi lozimligini e’tirof etgan holda,

terrorizm tarkibida, ko‘lamida va terroristik aktlarning xususiyatida sodir bo‘lgan o‘zgarishlar va hamkorlikni faollashtirish muhimligini inobatga olgan holda,

terrorizmga qarshi harakatlarni kuchaytirish zarurligini tushunib va terrorizmni oldini olish va ular bilan kurash bo‘yicha barcha chora-tadbirlar huquq ustuvorligi va demokratik qadriyatlar, insonning asosiy huquq va erkinliklariga, shuningdek xalqaro huquq me’yorlariga rioya qilgan holda qabul qilinishi lozimligini yana bir bor ta’kidlagan holda,

faqat birgalikdagi harakatlar bilan terrorizmning samarali oldini olish va ular bilan kurashishga erishish mumkinligini anglab yetgan holda,

quyidagilar to‘g‘risida kelishib olindi:

Mazkur Konvensiya terrorizmga qarshi hamkorlikning samaradorligini oshirish maqsadida tuzilmoqda.

1. Mazkur Konvensiya maqsadlari uchun, unda foydalaniladigan atamalar va tushunchalar quyidagilarni bildiradi:

1) “Tomon” — mazkur Konvensiya ishtirokchi davlati;

2) “terrorizm” — aholini qo‘rqitish bilan bog‘liq hamda shaxsga, jamiyatga va davlatga zarar yetkazishga yo‘naltirilgan, zo‘ravonlik va (yoki) boshqa jinoiy harakatlarni sodir etish yoki sodir etish bilan tahdid qilish yo‘li bilan hukumat organlari yoki xalqaro tashkilotlar tomonidan qaror qabul qilinishiga ta’sir o‘tkazish zo‘ravonlik mafkurasi va amaliyoti;

3) “terroristik akt” — siyosiy, diniy, mafkuraviy va boshqa maqsadlarga erishish uchun hukumat organlari yoki xalqaro tashkilotlar tomonidan qaror qabul qilinishiga ta’sir o‘tkazish, shuningdek ko‘rsatilgan harakatlarni sodir etish bilan tahdid qilish yo‘li bilan katta miqdorda boyliklarga zarar yetkazish yoki ekologik fojia yuz berishi yoki boshqa og‘ir oqibatlar keltirib chiqarishga qaratilgan, aholini qo‘rqitish bilan bog‘liq hamda inson hayoti va sog‘ligiga xavf tug‘diruvchi qilmish;

4) “terroristik tashkilot”:

a) mazkur Konvensiya qamrab olgan jinoyatlarni sodir etish va (yoki) sodir etilayotgan jinoyatlar uchun tashkil etiladigan jinoiy guruh, noqonuniy qurolli tuzilma, banda, jinoiy uyushma;

b) mazkur Konvensiya qamrab olgan jinoyatlardan bittasini bo‘lsa ham uning nomidan, ko‘rsatmasiga ko‘ra yoki rejalashtirish, tashkillashtirish, tayyorlash va sodir etishni amalga oshirishda manfaatdor bo‘lgan yuridik shaxs;

5) “yuridik shaxs” — Tomonlarning milliy qonunchiligida o‘rnatilgan tartibda tashkil etilgan va faoliyat yurituvchi tashkilot.

2. Mazkur modda hech qaysi xalqaro shartnoma yoki mazkur moddada foydalaniladigan atama va tushunchalarni keng ma’noda qo‘llash to‘g‘risidagi qoidalarni o‘z ichiga oladi yoki olishi mumkin bo‘lgan Tomonlarning milliy qonunchiligiga zarar yetkazmaydi.

Ushbu Konvensiya qamrab olgan jinoyatlarni aniqlash, oldini olish va tergov qilish bittadan ortiq Tomonning yurisdiksiyasiga aloqador bo‘lganda, mazkur Konvensiya qo‘llaniladi.

Tomonlar o‘zlarining huquq va majburiyatlarini mazkur Konvensiyaga ko‘ra davlatlarning suveren tengligi, hududiy yaxlitligi va boshqa davlatlarning ichki ishlariga aralashmaslik tamoyillariga muvofiq amalga oshiradilar.

1. Tomonlar mazkur Konvensiya qamrab olgan jinoyatlarga nisbatan o‘zining yurisdiksiyasini o‘rnatish uchun, zarur chora-tadbirlarni qabul qiladi, agar:

1) jinoyat ushbu Tomon hududida sodir etilgan bo‘lsa;

2) jinoyat ushbu Tomon bayrog‘i ostidagi kema bortida yoki ushbu Tomon qonunlariga muvofiq ro‘yxatga olingan havo kemasi bortida sodir etilgan bo‘lsa;

3) jinoyat ushbu Tomon fuqarosi tomonidan sodir etilgan bo‘lsa.

2. Har bir Tomon mazkur Konvensiya qamrab olgan jinoyatlarga nisbatan o‘zining yurisdiksiyasini o‘rnatishi ham mumkin, agar:

1) jinoyat ushbu Tomon hududida yoki fuqarosiga nisbatan terroristik akt sodir etishga qaratilgan yoki olib kelgan bo‘lsa;

2) jinoyat ushbu Tomonning xorijdagi obyektiga, shuningdek diplomatik vakolatxona binolari va konsullik muassasalariga nisbatan terroristik akt sodir etishga qaratilgan yoki olib kelgan bo‘lsa;

3) jinoyat ushbu Tomonni qandaydir harakatlarni sodir etish yoki etmaslikka majburlash maqsadida terroristik akt sodir etishga qaratilgan yoki olib kelgan bo‘lsa;

4) jinoyat ushbu Tomon hududida doimiy yashovchi, fuqaroligi bo‘lmagan shaxs tomonidan sodir etilgan bo‘lsa;

5) jinoyat ushbu Tomon foydalanayotgan kema bortida sodir etilgan bo‘lsa.

3. Agar gumon qilinayotgan jinoyatchi uning hududida joylashgan va bir Tomon uni u yoki boshqa Tomonga bermayotgan bo‘lsa, har bir Tomon mazkur Konvensiya qamrab olgan jinoyatlarga nisbatan o‘zining yurisdiksiyasini o‘rnatish uchun kerak bo‘ladigan chora-tadbirlarni qabul qiladi.

4. Mazkur Konvensiya bir Tomonning milliy qonunchiligiga muvofiq istalgan jinoiy yurisdiksiyani amalga oshirishni inkor qilmaydi.

5. Agar mazkur Konvensiya qamrab olgan jinoyatga nisbatan yurisdiksiyaga bittadan ortiq Tomon talabgorlik qilsa, tegishli Tomonlar zarurat tug‘ilganda maslahatlashuvlar o‘tkazadi.

1. Mazkur Konvensiyada nazarda tutilgan hamkorlik har bir Tomon vakolatli organlari tomonidan belgilangan holda amalga oshiriladi.

2. Mazkur Konvensiyani ratifikatsiya qilish to‘g‘risidagi hujjatni topshirishda yoki unga qo‘shilish to‘g‘risidagi xabarni Tomon mazkur Konvensiyani bajarish uchun javobgar bo‘lgan o‘zining vakolatli organlari ro‘yxatini depozitariyga taqdim qiladi, u depozitariy hujjatni boshqa Tomonlarga jo‘natadi. Tomonlar o‘zlarining vakolatli organlarining ro‘yxatidagi barcha o‘zgarishlar to‘g‘risida darhol depozitariyga xabar beradi, depozitariy bu haqida boshqa Tomonlarni xabardor qiladi.

3. Mazkur Konvensiyada nazarda tutilgan masalalar bo‘yicha Tomonlarning vakolatli organlari o‘zlarining vakolatlari doirasida bevosita bir biri bilan hamkorlik qiladi. Tomonlarning vakolatli organlarining hududiy va boshqa bo‘linmalari mazkur Konvensiyani bajarish maqsadida, Tomonlarning vakolatli organlari tomonidan belgilangan tartibda bevosita aloqalar o‘rnatishlari mumkin.

4. Tomonlarning vakolatli organlari o‘rtasida hamkorlik yordam berish to‘g‘risidagi so‘rovnoma asosida ikki tomonlama va ko‘p tomonlama hajmda, shuningdek Tomonlardan birining vakolatli organi tashabbusi bo‘yicha axborot berish yo‘li bilan amalga oshiriladi.

5. Hamkorlik jarayonida diplomatik kanallar, Jinoiy politsiya xalqaro tashkilotining kanallari yoki Shanxay hamkorlik tashkilotining Mintaqaviy aksilterror tuzilmasi Ijroiya qo‘mitasining kanallaridan foydalanish mumkin.

1. Tomonlar, zarur joylarda nohukumat tashkilotlar va boshqa fuqarolik jamiyati institutlarni o‘z ichiga oladigan, mazkur Konvensiya qamrab olgan jinoyatlarni sodir etishga olib keladigan, vaziyatlar keskinlashishining oldini olish maqsadida milliy qonunchilikka rioya qilish sharti bilan dinlararo va madaniyatlararo muloqotni rag‘batlantirishadi.

2. Har bir Tomon uning huquqiy tizimining asosiy tamoyillariga muvofiq terrorizmga qarshi kurashish bo‘yicha milliy miqyosdagi chora-tadbirlarni ishlab chiqish va amalga oshirish quyidagilarni o‘z ichiga olishi mumkin:

1) terrorizmga qarshi kurashishni tartibga soluvchi huquqiy hujjatlarni va ularning samaradorligi nuqtai nazaridan amaliy chora-tadbirlarni davriy baholash;

2) terrorizmga qarshi kurashish bo‘yicha chora-tadbirlarni ishlab chiqish va amalga oshirishda tegishli xalqaro va mintaqaviy tashkilotlar bilan hamkorlik qilish, shuningdek terroristik aktlarga to‘sqinlik qilish bo‘yicha mashg‘ulotlar o‘tkazish;

3) terrorizmga qarshi kurashish bo‘yicha Tomonning tegishli organlari faoliyatini muvofiqlashtirishni amalga oshiruvchi organ yoki organlarni tashkil etish;

4) terrorizmga qarshi kurashishni amalga oshiruvchi huquqni muhofaza qilish va boshqa organ xodimlarining kasbiy darajasini oshirish, shuningdek ushbu organlar va ular xodimlarining faoliyatini yetarlicha moliyaviy, moddiy va boshqalar bilan ta’minlash;

5) mazkur Konvensiya qamrab olgan jinoyatlar haqida ogohlantirish va to‘sqinlik qilishda va shunday jinoyatlarga tayyorgarlik ko‘rayotgan yoki sodir etgan shaxslarni aniqlashda davlat organlariga ko‘mak beruvchi shaxslarga tegishli mukofot pullarni to‘lash;

6) terroristik aktlar haqida ogohlantirish maqsadida kiritishga yo‘l qo‘yiladigan qonuniy cheklovlarni belgilash;

7) tegishli yuridik shaxslar bilan huquqni muhofaza qiluvchi organlarning hamkorlik samaradorligini oshirish, jismoniy shaxslar va obyektlarning himoyalanganligini oshirish uchun mo‘ljallangan standartlarni joriy etishni o‘z ichiga oladigan, jismoniy shaxslar va obyektlarning himoyasini yaxshilash;

8) jinoyat ishlari bo‘yicha sud ishlarini yuritish jarayonida jabrlanuvchi, guvoh va boshqa ishtirokchilarini, shuningdek, zarurat tug‘ilganda, terrorizmga qarshi kurashish masalalari bo‘yicha boshqa shaxslarni himoya qilish;

9) mazkur Konvensiya qamrab olgan jinoyatlarni sodir etishga aloqador jismoniy va yuridik shaxslarni identifikatsiyalash mezonlarini yaratish va joriy etish;

10) mazkur Konvensiya qamrab olgan, sodir etishga tayyorlanayotgan yoki sodir etilgan jinoyatlarni oldini olish va aniqlashda davlatga va ularning obyektlarida yordam berish bo‘yicha yuridik shaxslarni yetarlicha imkoniyatlar bilan ta’minlash;

11) terrorizmga qarshi kurashda va jamiyatda terrorizmni rad qilishni shakllantirishda nohukumat tashkilotlar, alohida guruhlar va shaxslarning ishtirokiga ko‘mak berish;

12) terrorizmning xavfliligi va uning salbiy oqibatlari, shuningdek mazkur Konvensiya qamrab olgan jinoyatlarni sodir etganlik uchun javobgarlik to‘g‘risida jamoatchilikning bilimini oshirish;

13) mazkur Konvensiya qamrab olgan jinoyatlar sifatida qaralishi mumkin bo‘lgan istalgan qilmishlar to‘g‘risida davlat organlarini xabardor etish uchun, shu jumladan anonim tarzda, imkoniyatlar yaratish.

3. Tomonlar mazkur Konvensiyada nazarda tutilgangan chora-tadbirlarga nisbatan qat’iy chora-tadbirlar qabul qilishlari mumkin.

Tomonlar o‘zining huquqiy tizimlarining asosiy tamoyillaridan kelib chiqib terrorizmni moliyalashtirishga qarshi kurash bo‘yicha zaruriy qonuniy va boshqa chora-tadbirlarni qabul qilishadi, xususan, ular quyidagilarni o‘zi ichiga oladi:

1) mijozlar to‘g‘risidagi ma’lumotlarni, moliyaviy operatsiyalarni ro‘yxatga olish va ushbu ma’lumotlarni saqlash;

2) Tomonlar orqali vakolatli organlarga shubhali va iqtisodiy jihatdan nomaqbul operatsiyalar va bitimlar to‘g‘risida ma’lumotlarni taqdim qilish;

1) Huquqni muhofaza qilish yoki boshqa ma’lum organlarning ko‘rsatmasi bo‘yicha Tomonlar orqali noqonuniy, shubhali yoki iqtisodiy jihatdan nomaqbul xususiyatga ega moliyaviy operatsiyalarni to‘xtatib qo‘yish;

2) Tomonlarning sud, prokuratura organlari, dastlabki tergov va boshqa vakolatli organlarning so‘rovnomasiga ko‘ra ma’lumotlar va hujjatlarni taqdim qilish.

1. Tomonlar quyidagilarni qasddan qilingan jinoiy jazolanadigan qilmishlar sifatida e’tirof etish uchun zarur qonuniy chora-tadbirlar qabul qiladi:

1) terroristik akt;

2) barcha Tomonlar ishtirokchilari tomonidan terrorizmga qarshi kurashish sohasida xalqaro shartnomalardan birida jinoyat sifatida tan olingan qilmish;

3) mazkur bandning 1, 2 va 4 — 10 kichik bandlarida ko‘rsatilgan jinoyatlardan birini rejalashtirish, tashkil etish, tayyorlash va sodir etish maqsadida yuridik shaxs tashkil etish va undan foydalanish yoki shunday maqsadlar uchun jinoiy guruh, noqonuniy qurollangan tuzilma, banda va jinoiy uyushma tashkil etish;

4) terrorizmga ochiqdan-ochiq da’vat qilish yoki terrorizmni ommaviy oqlash, ya’ni mazkur bandning 1 — 3 va 5 — 10 kichik bandlarida ko‘rsatilgan jinoyatlardan birini sodir etishga undash maqsadida jamoatchilikka qandaydir murojaatni tarqatish yoki terrorizmni qo‘llab-quvvatlash va taqlid qilishda ehtiyoj borligini e’tirof etish to‘g‘risida ommaviy bayonotlar berish;

5) mazkur bandning 1 — 4 va 6 — 10 kichik bandlarida ko‘rsatilgan jinoyatlardan birini sodir etishga tayyorgarlik ko‘rishda yoki sodir etishda ishtirok etish uchun yollash yoki shaxslarni jalb qilishning boshqa usullarini qo‘llash;

6) mazkur bandning 1 — 5 va 7 — 10 kichik bandlarida ko‘rsatilgan jinoyatlardan birini sodir etish uchun shaxslarni tayyorlash yoki sodir etishda ko‘maklashish;

7) terroristik tashkilotda ishtirok etish;

8) terrorizmni moliyalashtirish, ya’ni mazkur bandning 1 — 7, 9 va 10 kichik bandlarida ko‘rsatilgan jinoyatlardan birini bo‘lsa ham tashkillashtirish, tayyorlash va sodir etish bo‘yicha faoliyatni moliyalashtirish uchun oldindan mo‘ljallangan mablag‘larni yig‘ish yoki moliyaviy xizmatlarni taqdim qilish;

9) mazkur bandning 1 — 8 va 10 kichik bandlarida ko‘rsatilgan jinoyatlarni sodir etish uchun shaxslarni qurol-yaroq, portlovchi moddalar va boshqa vositalar bilan ta’minlash;

10) mazkur bandning 1 — 9 kichik bandlarida ko‘rsatilgan jinoyatlardan birini sodir etishda gumon qilinayotgan yoki ayblanayotgan shaxslarga boshpana, moliyaviy yordam berish hamda qochishida ko‘mak berish, shuningdek ularga nisbatan yolg‘on ko‘rsatuvlar berish.

2. Tomonlar o‘zlarining milliy qonunchiligiga muvofiq mazkur moddaning 1-bandida ko‘rsatilgan jinoyatlardan birini sodir etishda gumon qilinayotgan yoki ayblanayotgan shaxslarga tegishli mol-mulkni qasddan yashirish, tashish, sotib olish yoki sotishda vositachilik qilishni ham jinoiy jazolanadigan qilmish sifatida e’tirof etishi mumkin.

3) Mazkur moddaning 1-bandi 3 — 10 kichik bandlarida ko‘rsatilgan qilmishlar haqiqatda terroristik akt sodir etilishi yoki yollanuvchi va (yoki) o‘qitilayotgan shaxs tomonidan o‘zining terroristik xususiyatdagi harakatlarini anglashidan qat’iy nazar jinoyat hisoblanadi.

4) Tomonlar mazkur moddaning 1-bandida nazarda tutilgan biror bir jinoyatni sodir etishda ishtirok etish, jinoyatga tayyorgarlik ko‘rish va jinoyat sodir etishga suiqasd qilish bilan bog‘liq jinoiy jazolanadigan qilmishlar sifatida belgilash uchun zarur qonuniy chora-tadbirlarni qabul qilishlari shart.

1. Tomonlar mazkur Konvensiya qamrab olgan jinoyatlardan biri bo‘lib hisoblanadigan qilmishlarga yuridik shaxslarning aloqador bo‘lib qolishlariga o‘zining hududida yo‘l qo‘ymaslik uchun o‘zlarining huquqiy tamoyillaridan kelib chiqib, zarur qonuniy va boshqa chora-tadbirlarni ko‘rishadi.

2. Har bir Tomon mazkur Konvensiya qamrab olgan jinoyatlardan biriga yuridik shaxslarning aloqadorligi uchun ularning javobgarligini belgilash uchun kerak bo‘ladigan barcha chora-tadbirlarni qabul qilishlari lozim.

3. Tomonlarning huquqiy tamoyillariga rioya qilgan holda yuridik shaxslarning javobgarligi jinoiy, fuqarolik-huquqiy yoki ma’muriy bo‘lishi mumkin.

4. Yuridik shaxslarning javobgarligini belgilash, ushbu Konvensiya qamrab olgan jinoyatni sodir etgan, shu faoliyatda ishtirok etgan jismoniy shaxslarning jinoiy javobgarligini istisno qilmaydi.

5. Tomonlar mazkur Konvensiya qamrab olgan jinoyatlarga aloqadorlik uchun javobgarlikka tortiladigan yuridik shaxslarga nisbatan quyidagi choralarni qo‘llashni ta’minlaydi, xususan:

1) ogohlantirish;

2) jarima;

3) yuridik shaxsning mol-mulkini musodara qilish;

4) yuridik shaxsning faoliyatini to‘xtatish;

5) yuridik shaxsning alohida turdagi faoliyatiga taqiq qo‘yish;

6) yuridik shaxsni tugatish.

6. Mazkur Konvensiya qamrab olgan jinoyatlardan biri bilan bog‘lik qilmishlarni yuridik shaxs tomonidan rejalashtirilishi, tashkil etilishi, tayyorgarlik ko‘rilishi va sodir etilishi amalga oshirilsa, Tomonlar uni sud yoki Tomonning boshqa vakolatli milliy qonunchilik organi qaroriga ko‘ra yuridik shaxsni terroristik tashkilot deb tan olinishiga va uni tugatishga imkon beruvchi qonuniy choralar qabul qiladi. Agar mazkur Konvensiya qamrab olgan jinoyatlarni rejalashtirish, tayyorgarlik ko‘rish va sodir etish yuridik shaxs tomonidan uning huquq va majburiyatlarini bajarilishini nazorat qiladigan shaxs tomonidan amalga oshirilsa, shu kabi choralar qabul qilinishi mumkin.

7. Tomon hududida faoliyat yurituvchi, mazkur Konvensiya qamrab olgan jinoyatlarga aloqador bo‘lgan, xorijiy yuridik shaxslarining tuzilmaviy bo‘linmalariga (vakolatxona, filiallariga) nisbatan mazkur modda qoidalari tatbiq qilinadi.

1. Tomonlar mazkur Konvensiya qamrab olgan jinoyatlar sifatida topshirishni nazarda tutadigan qilmishlarni, shuningdek sudlanganlarni topshirish va huquqiy yordam ko‘rsatishni ko‘rib chiqadilar.

2. Istalgan Tomonlar o‘rtasida amal qiluvchi, mazkur Konvensiya qamrab olgan jinoyatlarni topshirish to‘g‘risidagi har qanday shartnomada topshirish talab etiladigan jinoyat sifatida ko‘rib chiqiladi. Tomonlar bunday jinoyatlarni topshirish to‘g‘risidagi shartnomalarda topshirilishi talab etiladigan jinoyatlar sifatida ular o‘rtasida keyinchalik tuziladigan barcha shartnomalarda tan olinishi lozim.

3. Agar bir Tomon mavjud shartnomasida topshirish shart qilib qo‘yilgan bo‘lsa va topshirish to‘g‘risida shartnomasi bo‘lmagan boshqa Tomondan topshirish to‘g‘risida so‘rovnoma olsa, so‘rovnoma olgan Tomon mazkur Konvensiya qamrab olgan jinoyatlarni topshirish uchun huquqiy asos sifatida mazkur Konvensiyaga tayanadi. Topshirish to‘g‘risida so‘rovnoma olgan Tomonning qonunchiligida nazarda tutilgan boshqa shartlarga rioya qilgan holda amalga oshiriladi.

4. Mavjud shartnomada topshirish shart qilinmagan Tomonlar mazkur Konvensiya qamrab olgan jinoyatlarni o‘zaro munosabatlarda topshirish talab etiladigan jinoyatlar sifatida so‘rovnoma olgan Tomon qonunchiligida nazarda tutilgan shartlarga rioya qilgan holda ko‘rib chiqiladi.

5. Topshirish va huquqiy yordamga aloqador masalalarda tegishli qilmishlarni jinoyat sifatida ikki tomonlama tan olish tamoyiliga rioya qilish talab etiladi, so‘rovnoma olgan Tomon qonunchiligiga tegishli qilmishni o‘sha jinoyat toifasiga kiritilgani yoki so‘rovnoma yuboruvchi Tomon singari jinoyatni shunday atamalar yordamida tavsiflanganligi yoki yuqligidan qat’iy nazar, agar mazkur qilmish huquqiy yordam va topshirish talab etilgani tufayli, Tomonlar milliy qonunchiligiga muvofiq jinoiy jazolanishi lozim deb tan olinsa, bu tamoyilga rioya qilingan hisoblanadi.

6. Mazkur Konvensiya qamrab olgan jinoyatlar, tegishli Tomonning hududida sodir etilgan deb ushbu jinoyatlarning haqiqiy sodir etilgan joyidan qat’iy nazar mazkur Tomonning yurisdiksiyasi doirasida, mazkur Konvensiyaning 5-moddasiga muvofiq topshirish maqsadida qo‘rib chiqiladi.

7. Mazkur Konvensiya qamrab olgan jinoyatlarni va ularni sodir etishga aloqador yuridik shaxslar javobgarligi asoslarini aniqlash Tomonlar milliy qonunchiligi sohasiga kiradi.

8. Hukm chiqargan Tomon talabiga ko‘ra yoki mazkur Konvensiya qamrab olgan jinoyatlardan biri uchun sudlangan Tomon fuqaroligi bo‘lgan shaxs — o‘sha Tomon roziligi bilan amaldagi shartnomalar yoki o‘zaro kelishuv asosida uni jazoni o‘tash uchun fuqaroligi bo‘lgan Tomonga jo‘natilishi mumkin bo‘lgan shaxsdir.

9. Agar mazkur Konvensiya qamrab olgan jinoyatlardan birini sodir etgan shaxs so‘rovnoma olgan Tomon joylashgan hududda bo‘lsa va shu Tomon fuqarosi hisoblansa, o‘sha shaxsni topshirmaslik huquqiga ega, bunda u Tomon unda bor materiallar, shu jumladan so‘rovnoma olgan Tomonga yuborilgan jinoyat ishi materiallari asosida mazkur shaxsga nisbatan o‘z qonunchiligiga muvofiq jinoiy ta’qibni amalga oshiradi.

1. Terrorizmning oldini olish va u bilan kurashish maqsadida Tomonlarning vakolatli organlari so‘rovnoma bo‘yicha yoki o‘zining tashabbusi bo‘yicha bir-biriga mazkur Konvensiya qamrab olgan masalalar to‘g‘risida ma’lumot (hujjatlar, materiallar, boshqa ma’lumotlar) taqdim etadilar.

2. Mazkur moddaning 1-bandida ko‘rsatilgan ma’lumot so‘rovnoma yuborgan Tomonning vakolatli organi so‘rovnomasi bo‘yicha shu shart bilan taqdim qilinadiki, ma’lumot so‘rovnoma olgan Tomon vakolatli organining oldindan yozma roziligisiz hech kimga berilmasligi lozim.

3. Agar so‘rovnoma yuborgan vakolatli organlar oldindan kelishgan bo‘lishsa, Tomonlarning vakolatli organlari so‘rovnomani va uning mazmunini oshkor qilishmaydi hamda undan faqat so‘rovnomani bajarish maqsadida foydalanishadi, shuningdek so‘rovnoma olgan Tomonga yuborilgan ma’lumotlarning maxfiyligini ta’minlaydi va ulardan faqat so‘rovnomada nazarda tutilgan tergovni amalga oshirish, sudda ishni ko‘rib chiqish yoki harakatlarni bajarish uchun zarur darajada foydalaniladi.

1. So‘rovnomani ijro etish mazkur Konvensiya va so‘rovnoma olgan Tomon qonunchiligi asosida amalga oshiriladi.

2. Agar so‘rovnoma olgan Tomon qonunchiligida boshqa qoidalar o‘rnatilmagan bo‘lsa, so‘rovnoma yuborgan Tomon vakolatli organining so‘rovnomasini ijro etishda ushbu Tomon qonunchiligi qo‘llanishi mumkin. So‘rovnoma yuborgan Tomon qonunchiligini qo‘llash so‘rovnoma olgan Tomon suverenitetiga va milliy xavfsizligiga zarar yetkazmasligi lozim.

1. So‘rovnoma yozma ravishda tuziladi va quyidagilardan iborat bo‘ladi:

1) so‘rovnoma yuborgan va olgan Tomonlar vakolatli organlarining nomi;

2) so‘rovnoma sababi va asosi;

3) ish mohiyati, shuningdek tezkor-qidiruv tadbirlari bo‘yicha o‘tkaziladigan, tergov yoki sudda ko‘rib chiqishga doir faktlar (sanasi, joyi va jinoyat holati);

4) tegishli normativ-huquqiy hujjatlar matnlari yoki, agar buning imkoni bo‘lmasa, ularning qoidalarini bayon qilish, shuningdek bir xil natijalarga olib boradigan talab qilinayotgan chora-tadbir yoki boshqa istalgan chora-tadbir to‘g‘risidagi bayonot so‘rovnoma yuborgan Tomon hududida uning qonunchiligiga muvofiq qabul qilinishi mumkin;

5) agar zarurat bo‘lsa, undan foydalanishni cheklash darajasini ko‘rsatish.

2. Mazkur moddaning 1-bandida ko‘rsatilgan ma’lumotdan tashqari yuridik shaxslarga nisbatan javobgarlik choralarini qo‘llash to‘g‘risida so‘rovnoma quyidagilardan iborat bo‘lishi lozim:

1) yuridik shaxs nomi, uning joylashgan o‘rni to‘g‘risida ma’lumot, yuridik manzili, rahbarlar to‘g‘risida ma’lumotlar;

2) javobgarlik choralari;

3) so‘rovnoma yuborgan Tomon so‘rovnomasi bo‘yicha amal qilish ma’qul bo‘lgan aniq protsedura to‘g‘risidagi ma’lumotlar;

4) xatlash yoki musodara qilinishi mumkin bo‘lgan mol-mulk to‘g‘risidagi ma’lumot (uning joylashgan o‘rni, tegishli jinoyatga daxldorligi, shuningdek ushbu mol-mulkka boshqa shaxslarning huquqlari to‘g‘risidagi har qanday mavjud ma’lumotlar);

5) sud yoki so‘rovnoma yuborgan Tomon boshqa vakolatli organi qarorining tasdiqlangan nusxasi va ushbu qaror uchun asoslarni bayon qilish;

6) so‘rovnoma yuborgan Tomon asos qilib olgan va so‘rovnoma olgan Tomon o‘z qonunchiligi asosida ijro etish uchun qaror qabul qilish to‘g‘risidagi masalani ko‘tara olishi uchun yetarli bo‘lishi lozim bo‘lgan faktlarni bayon qilish.

3. Shubha ostidagi yoki aybdor shaxslarni so‘roqdan o‘tkazish to‘g‘risida so‘rovnoma yuborilgan taqdirda unga jinoyat ishi zarur materiallarining tasdiqlangan nusxalari ilova qilinishi lozim.

4. So‘rovnoma olgan Tomon so‘rovnoma yuborgan Tomonni, agar har bir aniq holatda boshqa narsaga kelishilmasa, so‘rovnoma kelib tushgan sanadan 30 kundan kechiktirmasdan quyidagilar to‘g‘risida axborot beradi:

1) so‘rovnoma bo‘yicha bajarilgan ishlar va ularning natijalari to‘g‘risida;

2) so‘rovnomani ijro etishga to‘sqinlik qiluvchi yoki uning bajarilishini sezilarli kechiktiradigan har qanday holatlar to‘g‘risida.

5. So‘rovnoma yuborgan Tomon quyidagilar to‘g‘risida kechiktirmasdan so‘rovnoma olgan Tomonga xabar beradi:

1) yuridik shaxslarga nisbatan javobgarlik choralarini qo‘llash to‘g‘risidagi qaror tufayli to‘liq yoki qisman o‘z kuchini yo‘qotadigan qarorni qayta ko‘rib chiqish yoki boshqa holatlar to‘g‘risida;

2) mazkur Konvensiyaga muvofiq harakatlar o‘zini oqlamaydigan bo‘lib qolgani uchun o‘zgarishlar to‘g‘risida.

6. Bir xil qaror asosida bir qancha Tomonlar oldida yuridik shaxsga nisbatan javobgarlik choralarini qo‘llash to‘g‘risida ariza bergan Tomon bu haqida ushbu qaror ijro etilishida manfaatdor bo‘lgan barcha Tomonlarni xabardor qiladi.

1. Tomonlarning vakolatli organlari quyidagi so‘rovnomalarni ijro etishadi:

1) jinoiy javobgarlikka tortish yoki sud hukmini ijro etish uchun shaxslarni topshirish to‘g‘risida;

2) tezkor-qidiruv tadbirlarni o‘tkazish to‘g‘risida;

3) ayrim protsessual harakatlarni amalga oshirish to‘g‘risida, xususan:

a) ekspertizalar;

b) gumon qilinuvchi, ayblanuvchi, guvoh, jabrlanuvchi va boshqa shaxslarni so‘roq qilish;

v) tintuv, olib qo‘yish;

g) ashyoviy dalillarni berish;

d) mol-mulkni xatlash;

e) hujjatlarni topshirish va jo‘natish;

j) ularning vakolatlariga oid boshqa harakatlar;

4) dalillar bilan ta’minlash to‘g‘risida;

5) yuridik shaxslarga nisbatan javobgarlik choralarini qo‘llash to‘g‘risida;

6) mazkur Konvensiya qamrab olgan jinoyatlardan birini sodir etishda gumon qilinayotgan jismoniy shaxslarning joylashgan joyi aniqlanganligi to‘g‘risida;

7) musodara qilinishi kerak bo‘lgan mol-mulkning joylashgan o‘rnini aniqlash to‘g‘risida;

8) mazkur Konvensiyani qo‘llash sohasiga kiruvchi boshqa holatlar va masalalar bo‘yicha.

1. So‘rovnoma uni so‘ragan Tomon vakolatli organining rahbari yoki ularni o‘rnini bosuvchi shaxslar tomonidan imzolanadi va (yoki) gerbli muhr bilan tasdiqlanadi.

2. Kechiktirib bo‘lmaydigan holatlarda so‘rovnoma og‘zaki ravishda berilishi mumkin, lekin 72 soatdan kechiktirmasdan so‘rovnoma va unga ilova qilinadigan hujjatlar yozma ravishda tasdiqlanishi, zarurat tug‘ilganda matnni texnik vositalardan foydalangan holda jo‘natish lozim.

3. So‘rovnomaning haqiqiyligiga shubhalar yuzaga kelganda, uning mazmunini qo‘shimcha tasdiqlash yoki tushuntirish so‘ralishi mumkin.

4. Mazkur Konvensiyaga muvofiq kelib tushgan so‘rovnomalar ko‘p bo‘lganda va bir xil holatlarni qamrab olsa, so‘rovnoma olgan Tomon so‘rovnomalar ichidan qaysi biri birinchi navbatda bajarilishi kerakligini mustaqil ravishda belgilaydi.

5. Agar so‘rovnomani bajarish so‘rovnoma olgan Tomon vakolatli organining vakolatiga kirmasa, u kechiktirmasdan so‘rovnomani o‘z davlatining boshqa vakolatli organiga bajarish uchun jo‘natadi va bu haqda so‘rovnoma yuborgan Tomonning vakolatli organi tezda xabardor qilinadi.

6. So‘rovnoma olgan Tomon vakolatli organi so‘rovnomani bajarish uchun, uning fikriga ko‘ra zarur bo‘lgan qo‘shimcha ma’lumotlarni so‘rashi mumkin.

1. Agar chora-tadbirlar so‘rovnoma olgan Tomon vakolatli organlari amalga oshiradigan tezkor-qidiruv tadbirlarini o‘tkazishga, tergov yoki sudda ishni ko‘rib chiqishga zarar yetkazishi mumkin bo‘lsa, so‘rovnoma olgan Tomon vakolatli organi so‘rovnoma bo‘yicha chora-tadbirlarni qabul qilishni kechiktirishi mumkin.

2. Agar so‘rovnoma olgan Tomonning suvereniteti, milliy xavfsizligiga zarar yetkazishi mumkin bo‘lsa yoki qonunchiligiga zid bo‘lsa, so‘rovnoma olgan Tomon vakolatli organi so‘rovnomani bajarishni rad qilishi mumkin.

3. So‘rovnomani bajarishni rad qilish yoki kechiktirishdan oldin, so‘rovnoma olgan Tomonning vakolatli organi zarur hollarda so‘rovnoma jo‘natgan Tomonning vakolatli organi bilan maslahatlashadi.

4. So‘rovnomani bajarish kechiktirilgan yoki rad qilingan taqdirda, so‘rovnoma olgan Tomonning vakolatli organi bu to‘g‘risida so‘rovnoma tashabbuskorini shunday qarorga kelishining sabablarini ko‘rsatgan holda tezda xabardor qiladi.

1. Mazkur Konvensiya qamrab olgan jinoyatlarni sodir etishda gumon qilinayotgan yoki ayblanuvchilarni jinoiy taqib qilishni amalga oshiradigan va ushbu shaxslar boshqa Tomon hududida joylashganini aniqlagan Tomon o‘sha Tomon vakolatli organlarining ruxsatini olgandan so‘ng o‘zlarining xodimlarini so‘rovnoma olgan Tomon hududiga tegishli tezkor-qidiruv tadbirlari va tergov harakatlarida ishtirok etish uchun yuborishi mumkin.

2. So‘rovnoma yuborgan Tomon vakolatli organlarining jo‘natilgan xodimlari so‘rovnoma olgan Tomon hududida uning qonunchiligiga va Tomonlar ishtirokchi bo‘lgan xalqaro shartnomalarga muvofiq tezkor-qidiruv tadbirlari va tergov harakatlarida qatnashishlari mumkin.

3. So‘rovnoma olgan Tomon so‘rovnoma yuborgan Tomon xodimlarining mazkur Konvensiyaning 14 — 18 moddalariga muvofiq rasmiylashtirilgan so‘rovnoma asosida tezkor-qidiruv tadbirlari va tergov harakatlarida ishtirok etish uchun ruxsatnomalar berish tartibini belgilaydi.

4. Vakolatli organlarning xodimlarini tezkor-qidiruv tadbirlari va tergov harakatlarida ishtirok etish uchun yuborilgan taqdirda, jo‘natish to‘g‘risidagi so‘rovnomada qo‘shimcha ravishda quyidagi ma’lumotlar ko‘rsatilishi lozim:

1) jo‘natilgan xodimlar to‘g‘risida ma’lumot;

2) safarga jo‘natish maqsadi, tezkor-qidiruv tadbirlari va tergov harakatlarining ro‘yxati, tartibi va ularni bajarish muddatlari;

3) transportdan foydalanilganda, u haqida ma’lumotlar, shuningdek transport vositalarining turi, ularning soni va ro‘yxatga olingan raqami;

4) boshqa zarur ma’lumotlar.

5. So‘rovnoma bo‘yicha qaror so‘rovnoma olgan Tomon vakolatli organi tomonidan so‘rovnoma kelib tushgan vaqtdan 5 kundan kechiktirmasdan qabul qilinadi, bu to‘g‘risida so‘rovnoma yuborgan Tomon vakolatli organi darhol xabardor qilinadi. Bunday qaror so‘rovnoma olgan Tomonning ma’lum vakolatli organlari tomonidan oldindan kelishib olinishi mumkin.

6. Agar ruxsatnoma olish uchun so‘rovnoma mazkur moddaning 4-bandida ko‘rsatilgan talablarni hisobga olmasdan tuzilgan yoki ma’lumot to‘liq hajmda taqdim qilinmagan bo‘lsa, unda so‘rovnoma olgan Tomon vakolatli organi qo‘shimcha ma’lumotlarni so‘rashga haqli.

7. So‘rovnoma olgan Tomon hududiga o‘rnatilgan tartibda kelgan so‘rovnoma yuborgan Tomon vakolatli organlarining xodimlari o‘sha Tomonda bo‘lish qonunchiligiga va ularning shu erda bo‘lishi va topshiriqni bajarishini tartibga soladigan shartlarga muvofiq o‘zlarining funksiyalarini bajarishadi.

8. So‘rovnoma olgan Tomon hududida, So‘rovnoma olgan Tomon vakolatli organlarining xodimlari tomonidan o‘tkaziladigan tezkor-qidiruv tadbirlari va tergov harakatlarida ishtirok etuvchi so‘rovnoma yuborgan Tomon vakolatli organlarining xodimlari quyidagilarga majbur:

1) ular o‘zlari joylashgan hududdagi Tomonning qonunchiligiga rioya qilishlari, shuningdek vaqtincha yashaydigan Tomon organlarining qonuniy talablariga bo‘ysunishga;

2) so‘rovnoma olgan Tomonga ular tomonidan olingan ma’lumotni taqdim qilish.

9. Hududida tezkor-qidiruv tadbirlari va tergov harakatlari o‘tkazilayotgan Tomon vakolatli organi barcha harakatlarni to‘xtatishni talab qilgan zahoti to‘xtatiladi.

10. Mazkur moddada nazarda tutilgan qoidalar bo‘yicha Tomonlar o‘zaro alohida kelishuvlar tuzishlari mumkin.

So‘rovnoma olgan Tomon vakolatli organlari tomonidan uning qonunchiligiga muvofiq so‘rovnomani bajarish natijasida olingan dalillar so‘rovnoma yuborgan Tomonda ham shunday dalil bo‘lib xizmat qiladi.

1. Mazkur Konvensiya qamrab olgan jinoyatlarni sodir etishga aloqador bo‘lgan jismoniy va yuridik shaxslarning mol-mulkini musodara qilish to‘g‘risida qarorni ijro etishda uchinchi shaxslarning huquqlariga nisbatan so‘rovnoma yuborgan Tomon orqali chiqarilgan sud qarorini so‘rovnoma olgan Tomon tan oladi.

2. Bunday tan olinish quyidagi holatlardan birida rad qilinishi mumkin:

1) agar uchinchi shaxslar o‘zlarining huquqlari to‘g‘risida bildirish uchun yetarlicha imkoniyatlar bo‘lmasa;

2) agar uchinchi shaxs o‘zlarining huquqlari to‘g‘risida aniq va asosli da’vo qilsa;

3) agar ushbu masala bo‘yicha qaror so‘rovnoma olgan Tomon oldin chiqargan qarorga zid kelsa;

4) agar qaror so‘rovnoma olgan Tomon qonunchiligiga zid kelsa;

5) agar qaror so‘rovnoma olgan Tomon qonunchiligida nazarda tutilgan alohida yurisdiksiyaga oid qoidalarga qarshi chiqarilgan bo‘lsa.

1. Mazkur Konvensiyaga muvofiq yuboriladigan hujjatlar ularni qonuniylashtirish bo‘yicha barcha rasmiyatchiliklardan ozod qilinadi.

2. Tomonlardan birining hududida berilgan yoki vakolatli organ tomonidan yoki shunga maxsus vakolati bo‘lgan shaxsning vakolati doirasida va o‘rnatilgan shaklda tasdiqlangan, shuningdek gerbli muhr bilan tasdiqlangan hujjatlar boshqa barcha Tomonlarning hududlarida hech qanday maxsus guvohnomasiz qabul qilinadi.

3. Tomonlardan birining hududida rasmiy hujjat sifatida ko‘rib chiqiluvchi hujjatlar boshqa Tomonlarning hududlarida ham rasmiy hujjatlar kuchiga ega.

1. Mazkur Konvensiya qamrab oladigan sohaga kiradigan masalalar bo‘yicha Tomonlarning vakolatli organlari boshqa Tomon hududida joylashgan jismoniy va yuridik shaxslar bo‘yicha rasmiy hujjatlarni diplomatik kanallar yoki boshqa usul bilan, shuningdek boshqa Tomon vakolatli organi orqali yuborishi mumkin.

2. Mazkur Konvensiya qamrab oladigan sohaga kiradigan masalalar bo‘yicha Tomonlarning vakolatli organlari rasmiy hujjatlarni jismoniy va yuridik shaxslarga topshirishda bir-biriga yordam berishadi.

Tomonlar mazkur Konvensiya qamrab olgan jinoyatlarga aloqador shaxslarga qochoq maqomi va uni tasdiqlovchi hujjatlarni taqdim qilishga yo‘l qo‘ymaslik bo‘yicha zarur choralar qabul qiladi.

1. Bir Tomon boshqa Tomon so‘rovnomasi bo‘yicha mazkur Konvensiya qamrab olgan jinoyatlarga aloqador yuridik shaxslar javobgarligini ta’minlashning zaruriy chora-tadbirlarni qabul qiladi, xususan:

1) keyinchalik musodara obyekti bo‘lishi mumkin bo‘lgan mol-mulkni xatlash;

2) moliyaviy operatsiyalarni to‘xtatish (muzlatish);

3) yuridik shaxsning alohida turdagi faoliyatini to‘xtatish (radio va teleko‘rsatuvlar, ommaviy axborot vositalarini nashr etish, shu jumladan elektron shaklda).

2. Mazkur moddaning 1-bandida nazarda tutilgan chora-tadbirlar so‘rovnoma olgan Tomon qonunchiligiga va mazkur Konvensiyaga muvofiq amalga oshiriladi.

3. Mazkur Konvensiyada nazarda tutilgan choralarni bekor qilishdan oldin so‘rovnoma olgan Tomon so‘rovnoma yuborgan Tomonga ushbu choralarni bajarish foydasiga o‘zlarining vajlarini bayon qilish huquqini taqdim qiladi.

1. Mazkur Konvensiya qamrab olgan jinoyatlardan birini sodir etishda aloqador bo‘lgan va uning hududida bo‘lgan yoki mol-mulki bo‘lgan yoki uning hududida faoliyatini amalga oshiruvchi yuridik shaxsga (uning tuzilmaviy bo‘linmasiga) nisbatan javobgarlik choralarini qo‘llash bilan bog‘liq so‘rovnoma olgan Tomon:

1) sud yoki so‘rovnoma yuborgan Tomonning boshqa vakolatli organining so‘ralgan javobgarlik choralarini qo‘llash to‘g‘risida qarorini ijro etadi;

2) so‘rovnoma olgan Tomon qarorida keltirilgan faktlar va xulosalar asosida so‘ralgan javobgarlik choralarini qo‘llash to‘g‘risida o‘zining qonunchiligiga muvofiq sud muhokamasini amalga oshiradi.

2. Javobgarlik choralari yuridik shaxsga nisbatan so‘rovnoma olgan Tomon qonunchiligiga muvofiq qo‘llanadi.

Tomonlar milliy qonunchiligiga muvofiq musodara qilishni ta’minlash maqsadida quyidagi choralarni qabul qilishadi:

1) mazkur Konvensiya qamrab olgan jinoyatlarni sodir etish quroli sifatida foydalanish uchun yoki jinoyatlardan birini moliyalashtirish uchun mo‘ljallangan pul mablag‘lari, qimmatli qog‘ozlar, boyliklar, qurol-yarog‘, uning tarkibiy (zaxira) qismlari, o‘q-dorilar, portlovchi moddalar va boshqa mol-mulkni xatlaydi;

2) agar mazkur moddada ko‘rsatilgan mulkni xatlashning imkoni bo‘lmasa, unda bunday mulkning qiymatiga mos pul mablag‘ini olib qo‘yilishini ta’minlash.

1. Mazkur Konvensiyaga muvofiq jo‘natilgan jismoniy yoki yuridik shaxslarning mulkini musodara qilish bilan bog‘liq so‘rovnoma ushbu jismoniy va yuridik shaxslarning mulkiga nisbatan musodara qilish to‘g‘risidagi so‘rovnoma olgan Tomonning o‘z qarorini ijro etish huquqiga daxli yo‘q.

2. So‘rovnoma bo‘yicha musodara etilayotgan mulkning umumiy qiymati musodara qilish to‘g‘risidagi qarorda ko‘rsatilgan summadan ortiq bo‘lmasligi lozim. Agar u yoki bu Tomon bu sodir bo‘lishi mumkin degan xulosaga kelsa, unda Tomonlar bunday oqibatlarga yo‘l qo‘ymaslik maqsadida maslahatlashuv o‘tkazadi.

3. Kreditorlarning talablari qondirilganidan so‘ng, mazkur Konvensiyada nazarda tutilgan asoslarga ko‘ra tugatilgan yuridik shaxsning qolgan mol-mulki ham musodara qilinishi kerak.

4. So‘rovnoma bo‘yicha mol-mulkni musodara qilgan Tomon uning saqlanishini ta’minlaydi va o‘z qonunchiligiga muvofiq musodara qilingan mol-mulkni tasarruf etadi.

5. Shunday mol-mulkning qiymatiga mos bo‘lgan musodara qilingan mol-mulk yoki pul mablag‘i tegishli Tomonlarning kelishuviga ko‘ra, musodara qilish to‘g‘risida qaror chiqargan Tomonga to‘liq yoki qisman berilishi mumkin.

Agar oldindan boshqacha kelishilmagan bo‘lsa, mazkur Konvensiyani bajarilishi bilan bog‘liq xarajatlarni Tomonlar mustaqil ravishda qoplaydi.

1. Agar, mazkur Konvensiyaga muvofiq hamkorlik tufayli, g‘ayriqonuniy harakatlar yoki harakatsizlik oqibatida yetkazilgan zararni qoplash to‘g‘risida da’vo qilinsa, unda Tomonlar ushbu zararni qoplash uchun to‘lanishi lozim bo‘lgan summani taqsimlash to‘g‘risida kelishib olish maqsadida bir-birlari bilan maslahatlashuv o‘tkazish imkoniyatini ko‘rib chiqishadi.

2. Zararni qoplash to‘g‘risida da’vo qilingan Tomon bu to‘g‘risida boshqa manfaatdor Tomonni xabardor qiladi.

Mazkur Konvensiya Tomonlarning mazkur Konvensiya predmeti hamda uning maqsadlariga va obyektiga zid bo‘lmagan, shuningdek ular ishtirokchilari bo‘lgan boshqa xalqaro shartnomalardan kelib chiqadigan Tomonlarning huquq va majburiyatlariga aloqasi bo‘lmagan masalalar bo‘yicha boshqa xalqaro shartnomalar tuzish huquqlarini cheklamaydi.

1. Mazkur Konvensiya nomuayyan muddatga tuziladi.

2. Mazkur Konvensiya uni imzolagan davlatlar tomonidan tasdiqlanishi lozim. Ratifikatsiya yorlig‘i depozitariyga saqlashga topshiriladi. Konvensiya to‘rtinchi ratifikatsiya yorlig‘ini depozitariyga saqlashga topshirilgan sanadan o‘ttizinchi kuni kuchga kiradi.

3. Mazkur Konvensiyani tasdiqlagan Tomon uchun to‘rtinchi ratifikatsiya yorlig‘ini depozitariyga saqlashga topshirish sanasidan so‘ng, u o‘zining ratifikatsiya yorlig‘ini depozitariyga saqlashga topshirgan sanadan o‘ttizinchi kuni kuchga kiradi.

4. Mazkur Konvensiya depozitariysi Shanxay hamkorlik tashkiloti Kotibiyati hisoblanadi.

1. Mazkur Konvensiya uning qoidalariga rozi bo‘lgan barcha davlatlar qo‘shilishi uchun ochiq. Shunday qo‘shilish to‘g‘risida depozitariyga xabar berish yo‘li bilan Shanxay hamkorlik tashkilotining barcha a’zo davlatlarning roziligi bilan amalga oshiriladi.

2. Mazkur Konvensiya qo‘shiluvchi davlatlar uchun qo‘shilish to‘g‘risida xabar depozitariyga saqlashga topshirilgan sanadan o‘ttizinchi kuni kuchga kiradi.

Mazkur Konvensiya Birlashgan Millatlar Tashkiloti Nizomining 102-moddasiga muvofiq Birlashgan Millatlar Tashkilotining Kotibiyatida ro‘yxatga qo‘yilishi lozim.

Mazkur Konvensiyaga alohida bayonnomalar bilan rasmiylashtiriladigan uning ajralmas qismi hisoblanadigan o‘zgartirish va qo‘shimchalar kiritilishi mumkin. O‘zgartirish va qo‘shimchalar tegishli xabarni depozitariyga jo‘natish yo‘li bilan istalgan Tomonlardan biri orqali taklif etilishi mumkin, bu takliflar depozitariy tomonidan darhol boshqa Tomonlarga ko‘rib chiqishga yuboriladi.

Har bir Tomon mazkur Konvensiyadan chiqishi mumkin, buning uchun ular depozitariyga bu haqida taxminiy chiqish sanasigacha olti oydan kam bo‘lmagan vaqtda yozma xabar yuboradi. Chiqish to‘g‘risida xabar olingan sanadan 30 kun davomida depozitariy boshqa Tomonlarni bu haqida xabardor qiladi.

Tomonlar o‘rtasida mazkur Konvensiya qoidalarini qo‘llash yoki izohlash bilan bog‘liq bahslar va tushunmovchiliklar yuzaga kelganda, manfaatdor Tomonlar ularni konsultatsiya va muzokaralar yo‘li bilan hal qilishadi.

1. Mazkur Konvensiya doirasida Tomonlar hamkorlikni oshirishda rus va xitoy tillari ishchi til hisoblanadi.

2. Mazkur Konvensiyaning asl nusxasi depozitariyga saqlashga topshiriladi, depozitariy mazkur Kovensiyani imzolagan barcha davlatlarga tasdiqlangan nusxalarini tarqatadi.

2009-yil 16-iyunda Ekaterinburg shahrida bitta nusxada rus va xitoy tillarida tuzilgan va ikkalasi ham bir xil kuchga ega.