“Buxgalteriya hisobi toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-yil, 9-son, 142-modda) va “Qimmatli qogʻozlar bozori toʻgʻrisida”gi (Oʻzbekiston Respublikasi Oliy Majlisi palatalarining Axborotnomasi, 2008-yil, 7-son, 354-modda) Oʻzbekiston Respublikasining qonunlari va Oʻzbekiston Respublikasi Vazirlar Mahkamasining 1998-yil 25-sentabrdagi 410-son “Investitsiya va xususiylashtirish investitsiya fondlari faoliyatini takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Moliya vazirligi va Davlat mulkini boshqarish davlat qoʻmitasi qaror qiladilar:

1. Oʻzbekiston Respublikasi Moliya vazirligi va Oʻzbekiston Respublikasi Davlat mulkini boshqarish davlat qoʻmitasining 2006-yil 14-dekabrdagi 102, 01/KKBFMNM-18/07-sonli “Investitsiya va xususiylashtirish investitsiya fondlarida buxgalteriya hisobi va hisoboti toʻgʻrisidagi nizomni tasdiqlash haqida”gi qaroriga (roʻyxat raqami 1662, 2007-yil 13-mart) (Oʻzbekiston Respublikasi qonun hujjatlari toʻplami, 2007-yil, 11-son, 101-modda) ilovaga muvofiq oʻzgartirishlar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

1. Muqaddimadagi “Qimmatli qogʻozlar bozorining faoliyat koʻrsatish mexanizmi toʻgʻrisida”gi (Oʻzbekiston Respublikasi Oliy Majlisi Axborotnomasi, 1996-y., 5-6-son, 24-modda)” soʻzlari “Qimmatli qogʻozlar bozori toʻgʻrisida”gi (Oʻzbekiston Respublikasi Oliy Majlisi palatalarining Axborotnomasi, 2008-yil, 7-son, 354-modda)” soʻzlari bilan almashtirilsin.

2. Nizomda:

a) muqaddimadagi “Qimmatli qogʻozlar bozorining faoliyat koʻrsatish mexanizmi toʻgʻrisida”gi (Oʻzbekiston Respublikasi Oliy Majlisi Axborotnomasi, 1996-y., 5-6-son, 24-modda)” soʻzlari “Qimmatli qogʻozlar bozori toʻgʻrisida”gi (Oʻzbekiston Respublikasi Oliy Majlisi palatalarining Axborotnomasi, 2008-yil, 7-son, 354-modda)” soʻzlari bilan almashtirilsin;

b) 2-bandning toʻrtinchi xatboshisi quyidagi tahrirda bayon etilsin:

“investitsiya aktivlarini ishonchli boshqaruvchi — ishonchli boshqaruvning belgilangan muddati mobaynida, unga egalik qilish uchun topshirilgan va IFga yoki XIFga tegishli boʻlgan investitsiya aktivlarini (qimmatli qogʻozlarni, shu jumladan, investitsiya aktivlarini boshqarish jarayonida olinadigan qimmatli qogʻozlarni hamda qimmatli qogʻozlarga investitsiya qilish uchun moʻljallangan va investitsiya aktivlarini boshqarish jarayonida olinadigan pul mablagʻlarini) IFning yoki XIFning (yoki u koʻrsatgan shaxsning) manfaatlarini koʻzlab boshqarish boʻyicha faoliyatni oʻz nomidan amalga oshiruvchi yuridik shaxsdir;”;

v) barcha matn boʻyicha:

“boshqaruvchi kompaniya” soʻzlari “investitsiya aktivlarini ishonchli boshqaruvchi” soʻzlari bilan tegishli kelishiklarda almashtirilsin;

“depozitariy” soʻzlari “Qimmatli qogʻozlar markaziy depozitariysi” soʻzlari bilan tegishli kelishiklarda almashtirilsin;

g) 4-band quyidagi tahrirda bayon etilsin:

“4. IFlar va XIFlarning investitsiya aktivlarini ishonchli boshqarish qonunchilik talablariga muvofiq boʻlgan hamda IF va XIFning Kuzatuv kengashi bilan shartnoma (kontrakt) tuzgan yoxud qonunchilikda belgilangan tartibda qimmatli qogʻozlar bozorini tartibga solish boʻyicha vakolatli davlat organi tomonidan tayinlangan investitsiya aktivlarini ishonchli boshqaruvchi tomonidan amalga oshiriladi.”;

d) 54-bandda:

toʻrtinchi xatboshidan “shu jumladan, IF yoki XIF aksiyalarini yoki aksiyalar sertifikatini, ularni birinchi joylashtirishda tayyorlash xarajatlari” soʻzlari chiqarib tashlansin;

beshinchi xatboshi quyidagi tahrirda bayon etilsin:

“ommaviy axborot vositalarida IF va XIFning reklamasiga haq toʻlash xarajatlari Oʻzbekiston Respublikasi Vazirlar Mahkamasining 1998-yil 25-sentabrdagi 410-sonli “Investitsiya va xususiylashtirish investitsiya fondlari faoliyatini takomillashtirish chora-tadbirlari toʻgʻrisida”gi qarori bilan tasdiqlangan Investitsiya fondlari toʻgʻrisidagi nizomda oʻrnatilgan miqdorda;”;

oltinchi xatboshi chiqarib tashlansin;

yettinchi—toʻqqizinchi xatboshilari mos ravishda oltinchi — sakkizinchi xatboshilar deb hisoblansin;

e) 55-band quyidagi tahrirda bayon etilsin:

“55. Oʻzbekiston Respublikasi Vazirlar Mahkamasining 2003-yil 19-apreldagi 189-sonli “Xususiylashtirilgan korxonalarni korporativ boshqarishni takomillashtirish chora-tadbirlari toʻgʻrisida”gi qarori bilan tasdiqlangan Investitsiya aktivlarining ishonchli boshqaruvchilari toʻgʻrisidagi nizomning 51-bandiga muvofiq, IFga yoki XIFga koʻrsatilgan xizmatlar uchun investitsiya aktivlarini ishonchli boshqaruvchini taqdirlash IF yoki XIF tomonidan asosiy va qoʻshimcha (mukofotlash) taqdirlash shaklida toʻlanadi. Investitsiya aktivlarini ishonchli boshqaruvchini asosiy taqdirlash choraklar boʻyicha taqsimlagan holda bir yil uchun qatʼiy summada belgilanadi. Investitsiya aktivlarini ishonchli boshqaruvchisi oladigan asosiy taqdirlash pulining umumiy miqdori IF yoki XIFning sof aktivlari oʻrtacha yillik qiymatining 5 foizidan ortiq boʻlmasligi kerak. Koʻrsatib oʻtilgan summaga IFni yoki XIFni boshqarish toʻgʻrisidagi shartnoma (kontrakt)ni bajarish boʻyicha investitsiya aktivlarini ishonchli boshqaruvchining barcha xarajatlari (ularni qoplash) kiritiladi, bundan qonunchilikka muvofiq IF yoki XIF hisobiga olib boriladigan xarajatlar mustasno. Investitsiya aktivlarini ishonchli boshqaruvchisini qoʻshimcha (mukofot puli) taqdirlash shartnoma (kontrakt)ga binoan yil natijalari boʻyicha, biroq IF yoki XIF aksiyadorlariga yil mobaynida hisoblangan dividendlar hisobga olingan holda IF yoki XIF sof aktivlari yillik oʻsishi summasidan, Oʻzbekiston Respublikasi Markaziy banki tomonidan belgilangan moliyalashtirish stavkasi boʻyicha sof aktivlarni depozitlarda joylashtirishda yuz beradigan oʻsishdan 7 foizdan ortiq boʻlmagan miqdorda toʻlanadi.”;

yo) 58-bandning beshinchi xatboshisidagi “auditorning” soʻzi “auditorlik tashkilotining” soʻzlari bilan almashtirilsin;

j) 1 va 3-ilovalarda:

“Koʻrsatkichlar nomi” ustunida

“Boshqaruvchi kompaniyani mukofotlash” soʻzlari “Investitsiya aktivlarini ishonchli boshqaruvchini mukofotlash” soʻzlari bilan almashtirilsin;

“Boshqaruvchi kompaniyani (mukofot) ragʻbatlantirish” soʻzlari “Investitsiya aktivlarini ishonchli boshqaruvchini (mukofot) ragʻbatlantirish” soʻzlari bilan almashtirilsin;

“Depozitariyni mukofotlash” soʻzlari “Qimmatli qogʻozlar markaziy depozitariysini mukofotlash” soʻzlari bilan almashtirilsin;

“Boshqaruvchi kompaniya raisi” soʻzlari “Investitsiya aktivlarini ishonchli boshqaruvchisi rahbari” soʻzlari bilan almashtirilsin;

“Depozitariy raisi” soʻzlari “Qimmatli qogʻozlar markaziy depozitariysi Bosh direktori” soʻzlari bilan almashtirilsin;

z) 2, 5 va 6-ilovalarda:

“Boshqaruvchi kompaniya raisi” soʻzlari “Investitsiya aktivlarini ishonchli boshqaruvchisi rahbari” soʻzlari bilan almashtirilsin;

“Depozitariy raisi” soʻzlari “Qimmatli qogʻozlar markaziy depozitariysi Bosh direktori” soʻzlari bilan almashtirilsin;

i) 4-ilova mazkur oʻzgartirishlardagi ilovaga muvofiq tahrirda bayon etilsin.

3. Mazkur oʻzgartirishlar Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi bilan kelishilgan.