LexUZ sharhi
Mazkur qaror O‘zbekiston Respublikasi Vazirlar Mahkamasining 2021-yil 22-fevraldagi 87-sonli “O‘zbekiston Respublikasi Hukumatining o‘z ahamiyatini yo‘qotgan ayrim qarorlarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida” 2020-yil 27-sentabrdagi PF-6075-son Farmoni)”gi qaroriga asosan o‘z kuchini yo‘qotgan.
Paxta hosilini o‘z vaqtida va sifatli yig‘ishtirib olishni hamda kontraktatsiya shartnomalarining bajarilishini ta’minlash maqsadida Vazirlar Mahkamasi qaror qiladi:
1. Quyidagilar O‘zbekiston Respublikasi Qishloq va suv xo‘jaligi vazirligi, “O‘zpaxtasanoat”, “O‘zagromashservis” uyushmalari, “O‘zqishloqxo‘jalikmash-xolding” kompaniyasi va ularning hududiy bo‘linmalari, manfaatdor vazirliklar va idoralar, Qoraqalpog‘iston Respublikasi Vazirlar Kengashi, viloyatlar va tumanlar hokimliklari, qishloq xo‘jaligi korxonalari rahbarlari va mutaxassislarining muhim vazifalari hisoblansin:
paxta terish mashinalari, transport traktorlari, tirkamalar, maxsus jihozlangan yuk avtomobillari, paxta tozalash zavodlari, paxta tayyorlash punktlari hamda quritish-tozalash sexlari joriy yilning 1-sentabrigacha hozirlab qo‘yilishini tugallash;
Qoraqalpog‘iston Respublikasi va viloyatlar bo‘yicha 1-ilovaga muvofiq paxta terish mashinalari, shu jumladan gorizontal shpindelli “Keys-2022” paxta terish mashinalarining paxta yig‘im-terimida qatnashishini ta’minlash;
paxta terish mashinalari va paxtani yig‘ishtirib olish va tayyorlashda band bo‘lgan boshqa texnikalarni ish holatida saqlash uchun ehtiyot qismlar va tuzatish materiallarining zarur zaxirasini yaratish, ularning kerakli joylarga tezkorlik bilan yetkazilishini ta’minlash, texnikani tuzatish va ularga servis xizmati ko‘rsatish bo‘linmalarining uzluksiz ishlashini tashkil etish;
“Keys-2022” gorizontal shpindelli mashinalardan samarali foydalanish uchun har bir mashinaga kontur bo‘yicha kamida 140 gektardan dala ajratish, dalalarning agrotexnika talablariga muvofiq sifatli tayyorlanishini ta’minlash.
2. “O‘zagromashservis” uyushmasi, Buxoro, Jizzax, Navoiy, Sirdaryo va Toshkent viloyatlari hokimliklarining 2-ilovaga muvofiq “Keys-2022” gorizontal shpindelli paxta terish mashinalarini Buxoro va Navoiy viloyatlari mashina-traktor parklari balansidan Jizzax, Sirdaryo va Toshkent viloyatlari mashina-traktor parklari balansiga berish to‘g‘risidagi takliflari qabul qilinsin.
“O‘zagromashservis” uyushmasi, Jizzax, Sirdaryo va Toshkent viloyatlari hokimliklari 2002-yil 1-sentabrgacha paxta terish mashinalarining belgilangan joylarga temir yo‘l transportida yetkazilishini ta’minlasinlar.
“Paxta-bank” ilgari Buxoro va Navoiy viloyatlari mashina-traktor parklariga paxta terish mashinalarini xarid qilishni mablag‘ bilan ta’minlash uchun berilgan kreditlarni belgilangan tartibda qayta rasmiylashtirsin.
3. O‘zbekiston Respublikasi Qishloq va suv xo‘jaligi vazirligi, “O‘zkimyosanoat”, “O‘zqishloqxo‘jalikkimyo” kompaniyalari, Qoraqalpog‘iston Respublikasi Vazirlar Kengashi, viloyatlar hokimliklari:
g‘o‘za bargini to‘kishni yerda olib borish usuli bilan o‘tkazish uchun texnika vositalari va apparatlarni tayyorlashni joriy yilning 1-sentabrigacha tugallasinlar;
xo‘jaliklarga zarur miqdorda defoliantlar yetkazib berilishini hamda g‘o‘za bargini to‘kish 3-ilovaga muvofiq qulay muddatlarda sifatli o‘tkazilishini ta’minlasinlar.
“O‘zbekiston havo yo‘llari” milliy aviakompaniyasi O‘zbekiston Respublikasi Qishloq va suv xo‘jaligi vazirligining buyurtmanomalari bo‘yicha g‘o‘za bargini to‘kish uchun yetarli miqdorda samolyotlar ajratsin.
4. Paxta hosilini o‘z vaqtida va sifatli yig‘ishtirib olishni tashkil etish, shuningdek “Keys-2022” paxta terish mashinalaridan samarali foydalanilishi uchun mas’uliyat shaxsan Qoraqalpog‘iston Respublikasi Vazirlar Kengashi Raisi, viloyatlar va tumanlar hokimlari, O‘zbekiston Respublikasi Qishloq va suv xo‘jaligi vazirligi, “O‘zagromashservis” uyushmasi hamda uning hududiy mashina-traktor parklari birlashmalari rahbarlari zimmasiga yuklansin.
5. O‘zbekiston Respublikasi Moliya vazirligi Qishloq va suv xo‘jaligi vazirligi, “O‘zpaxtasanoat” uyushmasi ishtirokida O‘zbekiston Respublikasi Prezidentining 2002-yil 20-avgustdagi PF-3114-son Farmoni bilan belgilangan paxtaning xarid narxlarini shakllantirish tartibidan kelib chiqqan holda 2002-yil hosili paxta xomashyosi xarid narxlarini tasdiqlasin hamda bir hafta muddatda o‘ziga qarashli bo‘linmalarga va paxta ekuvchi xo‘jaliklarga xarid narxlari preyskurantini va hisob-kitob qilish tartibini yetkazsin.
6. 2002-yilda davlat ehtiyojlari uchun paxta tolasini xarid qilish hajmi amalda uni ishlab chiqarish hajmining 50 foizi darajasida belgilansin (O‘zbekiston Respublikasi Vazirlar Mahkamasining 1995-yil 31-oktabrdagi 421-son, 2001-yil 2-maydagi 201-son hamda 2001-yil 26-noyabrdagi 461-son qarorlariga muvofiq Xalqaro tiklanish va taraqqiyot banki hamda Osiyo taraqqiyot banki ishtirokida loyihalar amalga oshirilayotgan tumanlar va qishloq xo‘jaligi korxonalari bundan mustasno).
Belgilab qo‘yilsinki, davlat ehtiyojlari uchun xarid qilish hajmidan ortiqcha yetishtirilgan paxta tolasi shartnomaviy narxlar bo‘yicha sotiladi.
7. Paxta yig‘im-terimi qatnashchilarini moddiy rag‘batlantirishni kuchaytirish maqsadida xo‘jaliklarga paxta terimi uchun dalalardagi mavjud hosilga qarab tabaqalashtirilgan haq to‘lash tavsiya qilinsin.
terilgan 1 kilogramm o‘rta tolali nav paxta uchun — kamida 28 so‘m, ingichka tolali paxta uchun — 31 so‘m;
terilgan 1 kilogramm o‘rta tolali urug‘lik paxta uchun — kamida 31 so‘m, ingichka tolali paxta uchun — 34 so‘m haq to‘lansin.
Mashina-traktor parklari va xo‘jaliklar ikki qatorli vertikal shpindelli paxta terish mashinasida terilgan bir tonna paxta uchun mexanik-haydovchilarga — kamida 546 so‘m, to‘rt qatorli mashinada terilgan paxta uchun 364 so‘m, ikki qatorli gorizontal shpindelli mashinada terilgan paxta uchun — kamida 273 so‘m miqdorida haq to‘laydilar.
Terimchilar va paxta terish mashinalarining mexanik-haydovchilari bilan har 5 kunda hisob-kitob qilinsin.
Paxta ekuvchi qishloq xo‘jaligi korxonalari va fermer xo‘jaliklari rahbarlariga mazkur qarorda belgilangan eng kam stavkalardan kelib chiqib hamda mahsulot yetishtirish xarajatlarini va terim shart-sharoitlarini hisobga olgan holda terimchilarga va paxta terish mashinalari mexanik-haydovchilariga tabaqalashtirilgan haq to‘lash huquqi berilsin.
8. O‘zbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi, Markaziy bank, “Paxta-bank” va boshqa tijorat banklari, “Paxtasanoat” hududiy birlashmalari:
xo‘jaliklar, fermyerlar, tayyorlov punktlari, transport tashkilotlari, paxta tozalash zavodlariga terimchilar va paxta terish mashinalarining mexanik-haydovchilari bilan o‘z vaqtida hisob-kitob qilish uchun;
paxtani yuklash, tushirish, tayyorlash, transportda tashish, joylashtirish hamda unga ishlov berish, paxta terish texnikasiga texnika xizmati ko‘rsatish va tuzatishda band bo‘lgan xodimlarni mehnatga haq to‘lashning ichki idoraviy normativlari bo‘yicha, mashina-traktor parklarini esa paxtani mexanizatsiya vositasida yig‘ishtirib olish bo‘yicha ko‘rsatilgan xizmatlar uchun o‘z vaqtida mablag‘ bilan ta’minlasinlar.
9. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari qishloq xo‘jaligi kooperativlari (shirkat xo‘jaliklari) va boshqa qishloq xo‘jaligi korxonalari tomonidan har bir oilaviy pudratchi va xo‘jalik ichki bo‘linmalari bilan topshirilgan paxta xomashyosining amaldagi hajmi va sifati asosida o‘z vaqtida hisob-kitob qilinishini ta’minlanishini alohida nazoratga olsinlar. Bunda oilaviy pudratchilar va boshqa bo‘linmalar bilan tuzilgan xo‘jalik ichki shartnomalariga qat’iy rioya qilinishi ta’minlansin.
Xo‘jalik ichki pudrati ayrim bo‘linmalarining zararlari boshqa bo‘linmalar hisobiga qoplanishi qat’iy taqiqlansin.
10. Qoraqalpog‘iston Respublikasi Vazirlar Kengashi va viloyatlar hokimliklari “Paxtasanoat” hududiy birlashmalari bilan avtotransport korxonalari o‘rtasida tuzilgan shartnomalar asosida paxta xomashyosini tashishda yetarli miqdordagi yuk avtomashinalari (shu jumladan jismoniy shaxslarning avtotransport vositalari) safarbar etilishini ta’minlasinlar.
11. “O‘zbekneftgaz”, “O‘zneftmahsulot” kompaniyalari yonilg‘i-moylash materiallarining zarur zaxirasini barpo etsinlar, ularning qishloq xo‘jaligi korxonalari, mashina-traktor parklariga, paxta tozalash sanoati korxonalariga, boshqa tashkilotlar va korxonalarga yig‘im-terim, tashish va paxtaga ishlov berish ishlarini bajarish uchun talab etiladigan miqdorda uzluksiz yetkazib berilishini ta’minlasinlar.
12. 2002-yil paxta hosilini o‘z vaqtida va sifatli yig‘ishtirib olishni tashkil etish bo‘yicha 4-ilovaga muvofiq tarkibda ishchi komissiya tashkil etilsin.
Shunday komissiyalar respublikaning barcha mintaqalarida Qoraqalpog‘iston Respublikasi Vazirlar Kengashi Raisi, viloyatlar hokimlari rahbarligida tashkil etilsin.
paxta hosilini uyushqoqlik bilan yig‘ishtirib olish ishlarining borishini muntazam ravishda tahlil qilib borsin;
yig‘im-terimni o‘z vaqtida o‘tkazish va paxta xomashyosini tayyorlashni ta’minlash bilan bog‘liq masalalarni tezkorlik bilan hal qilishda ko‘maklashsin;
ishchi komissiya majlislarida hududiy komissiyalar, respublika vazirliklari va idoralari rahbarlarining hosilni uyushqoqlik bilan yig‘ishtirib olish bo‘yicha ular tomonidan amalga oshirilayotgan ishlar to‘g‘risidagi hisobotlarini eshitish amalda qo‘llansin.
13. “O‘zbekbirlashuv”, “O‘zbeksavdo” kompaniyalari, “O‘zdonmahsulot” korporatsiyasi, “Yog‘moytamakisanoat” uyushmasi qishloq aholisini, ayniqsa paxta yig‘im-terimi qatnashchilarini oziq-ovqat va boshqa zarur xalq iste’mol tovarlari bilan ta’minlash masalalarini tezkorlik bilan hal qilsinlar.
14. O‘zbekiston Respublikasi Sog‘liqni saqlash vazirligi va Madaniyat ishlari vazirligi hosil yig‘im-terimi davrida:
terimchilarga madaniy xizmat ko‘rsatishni tashkil etsin, buning uchun san’at va adabiyot arboblarining xo‘jaliklarga borishlarini nazarda tutsin.
15. “O‘zteleradio” kompaniyasi, O‘zbekiston milliy axborot agentligi paxta yig‘im-terimining borishini radio, televideniye va matbuotda muntazam ravishda yoritib borishni tashkil etsinlar, paxta yetishtirish va uni terib olishda yuqori natijalarga erishgan ishlab chiqarish ilg‘orlari — terimchilar, mexanik-haydovchilar, fermyerlar, xo‘jaliklar rahbarlariga alohida e’tiborni qaratsin.
16. O‘zbekiston Respublikasi Vazirlar Mahkamasining “2002-yilda paxta xomashyosi yetishtirish, g‘o‘zani navlar bo‘yicha joylashtirish hamda navlarni yangilashni takomillashtirish chora-tadbirlari to‘g‘risida” 2001-yil 19-dekabrdagi 477-son qarori 1-bandining ikkinchi xat-boshi va ushbu qarorga 7-ilova o‘z kuchini yo‘qotgan deb hisoblansin.
17. Mazkur qarorning bajarilishini nazorat qilish O‘zbekiston Respublikasi Prezidentining Davlat maslahatchisi I.H. Jo‘rabekov va O‘zbekiston Respublikasi Bosh vazirining o‘rinbosari N.S. Yusupov zimmasiga yuklansin.
Ekin maydoni, ming ga | Mashinada teriladigan maydon, ming ga* | Yig‘imda paxta terish mashinalarining qatnashishi, ta | Mashinada terishning hisoblab chiqilgan hajmi, ming tonna | |||
hammasi | shu jumladan: | |||||
gorizontal shpindelli | vertikal shpindelli | |||||
Qoraqalpog‘iston Respublikasi | 74,0 | 0,4 | 3 | 3 | — | 0,9 |
viloyatlar: | ||||||
Andijon | 109,6 | — | — | — | — | — |
Buxoro | 128,9 | 0,6 | 4 | 4 | — | 1,6 |
Jizzax | 105,5 | 30,5 | 218 | 218 | — | 65,1 |
Qashqadaryo | 170,3 | 16,6 | 144 | 104 | 40 | 37,6 |
Navoiy | 43,0 | — | — | — | — | — |
Namangan | 97,4 | 1,1 | 8 | 8 | — | 2,9 |
Samarqand | 108,8 | 1,7 | 12 | 12 | — | 3,5 |
Surxondaryo | 122,3 | 1,5 | 11 | 11 | — | 4,4 |
Sirdaryo | 123,1 | 29,1 | 208 | 208 | — | 60,0 |
Toshkent | 110,3 | 31,0 | 234 | 214 | 20 | 70,8 |
Farg‘ona | 117,0 | — | — | — | — | — |
Xorazm | 111,2 | 1,4 | 10 | 10 | — | 3,7 |
Jami: | 1421,4 | 113,9 | 852 | 792 | 60 | 250,5 |
Viloyatlar | Balansga berishdan oldin mavjud “Keys-2022” paxta terish mashinalari | Quyidagilardan olib beriladi | Balansga berilgandan keyin mavjud “Keys-2022” paxta terish mashinalari | |
Buxoro viloyati mashina-traktor parklari balansidan | Navoiy viloyati mashina-traktor parklari balansidan | |||
Jizzax | 207 | — | 11 | 218 |
Sirdaryo | 201 | 7 | — | 208 |
Toshkent | 206 | 8 | — | 214 |
Jami: | 614 | 15 | 11 | 640 |
Defoliatsiya va desikatsiya qilinadigan maydon, hammasi, ming ga | Defoliatsiya muddatlari | ||
boshlanishi | tugallanishi | ||
Qoraqalpog‘iston Respublikasi | 50 | 15-sentabr | 25-sentabr |
viloyatlar: | |||
Andijon | 80 | 10-sentabr | 20-sentabr |
Buxoro | 90 | 15-sentabr | 25-sentabr |
Jizzax | 90 | 10-sentabr | 20-sentabr |
Qashqadaryo | 145 | 10-sentabr | 20-sentabr |
Navoiy | 30 | 10-sentabr | 20-sentabr |
Namangan | 75 | 10-sentabr | 20-sentabr |
Samarqand | 90 | 10-sentabr | 20-sentabr |
Surxondaryo | 100 | 10-sentabr | 20-sentabr |
Sirdaryo | 110 | 10-sentabr | 20-sentabr |
Toshkent | 90 | 10-sentabr | 20-sentabr |
Farg‘ona | 80 | 10-sentabr | 20-sentabr |
Xorazm | 60 | 15-sentabr | 25-sentabr |
Jami: | 1090 |
Jo‘rabekov I.H. | — | O‘zbekiston Respublikasi Prezidentining Davlat maslahatchisi, komissiya rahbari |
Yusupov N.S. | — | O‘zbekiston Respublikasi Bosh vazirining o‘rinbosari, komissiya rahbarining o‘rinbosari |
Qalibekov I.J. | — | Vazirlar Mahkamasining Agrosanoat kompleksi kotibiyati mudiri, komissiya kotibi |
Komissiya a’zolari: | ||
Alimov T. A. | — | O‘zbekiston Respublikasi Prezidentining Davlat maslahatchisi |
Nurmurodov M.B. | — | Moliya vaziri |
Mullajonov F.M. | — | Markaziy bank raisi |
Polvon-zoda A.A. | — | Adliya vaziri |
Nazirov F.G‘. | — | Sog‘liqni saqlash vaziri |
Jo‘rayev X.R. | — | Madaniyat ishlari vaziri |
Haydarov R. | — | Davlat bojxona qo‘mitasi raisi |
Subanov B.J. | — | Ichki ishlar vazirining o‘rinbosari |
Bobojonov P.R. | — | Bosh prokuror o‘rinbosari |
Begaliyev S.B. | — | Qishloq va suv xo‘jaligi vazirining birinchi o‘rinbosari |
Gadoyev E.F. | — | Davlat soliq qo‘mitasi raisining birinchi o‘rinbosari |
Najmiddinov I.X. | — | “O‘zdonmahsulot” korporatsiyasi raisi |
Zikriyoyev E.Z. | — | “O‘zpaxtasanoat” uyushmasi raisi |
Nishonov Sh.N. | — | “O‘zagromashservis” uyushmasi raisi |
Bobomirzayev A.B. | — | Dehqon va fermer xo‘jaliklari uyushmasi raisi |
Salimov A.X. | — | Makroiqtisodiyot va statistika vazirining o‘rinbosari |
Chub V.E. | — | “Boshgidromet” boshqarmasi boshlig‘i |
Xolmuhamedov B.J. | — | “Oziqovqatsanoat” uyushmasi raisi |
Xudoyorov M.B. | — | “Yog‘moytamakisanoat” uyushmasi raisi |
Ko‘chimov A. K. | — | “O‘zteleradio” kompaniyasi raisi |
Hasanov O‘.H. | — | “O‘zkimyosanoat” kompaniyasi raisi |
Saydahmedov I.M. | — | “O‘zbekneftgaz” kompaniyasi raisi |
Ahmedov A.A. | — | “O‘zneftmahsulot” kompaniyasining bosh direktori |
Axmedov A.A. | — | “O‘zneftmahsulot” kompaniyasi raisi |
Axmetov A.A. | — | “O‘zqishloqxo‘jalikmashlizing” kompaniyasi raisi |
Matchonov R.D. | — | “O‘zqishloqxo‘jalikmash-xolding” kompaniyasi raisi |
Bekchonov M. S. | — | “O‘zbekbirlashuv” kompaniyasi raisi |
Fayziyev Z.O. | — | “O‘zbeksavdo” kompaniyasi raisi |
Yusupov F.O. | — | “O‘zkishlokxo‘jalikkimyo” kompaniyasi raisi |
Ayupov A. | — | “O‘zmevasabzavotuzumsanoat-xolding” kompaniyasi raisi |
Toshmatov Q.F. | — | “Paxta-bank” boshqaruvi raisi |
Abdullayev S.S. | — | Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi direktori |