LexUZ sharhi
Mazkur Farmon O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
Paxta ekadigan xo‘jaliklarning ichki va tashqi bozorlarda barqaror xaridorgir yuqori sifatli raqobatbardosh paxta yetishtirishni ko‘paytirishdan iqtisodiy rag‘batlantirilishini kuchaytirish, narx belgilashning bozor iqtisodiyoti talablariga javob beradigan jahon amaliyotida qabul qilingan me’yor va tamoyillarini keng joriy etish maqsadida:
1. Paxta xomashyosiga ichki xarid narxlari hamda eksportga va respublika iste’molchilariga yetkazib berilayotgan paxta tolasining ulgurji narxlari jahon bozorida shakllanayotgan paxta narxi konyunkturasiga muvofiq belgilanish tartibi o‘rnatilsin. Paxta xomashyosi narxini shakllantirishda uni ishlab chiqarish xarajatlarini kamaytirish, shuningdek uni qayta ishlash, saqlash va tashish xarajatlarining qoplanishini hisobga olish zarur.
2. O‘zbekiston Respublikasi Moliya vazirligi, Investitsiyalar va tashqi savdo vazirligi, Qishloq xo‘jaligi vazirligi, “O‘zpaxtasanoateksport” XK, “O‘zpaxtasanoat” AJ va boshqa manfaatdor tashkilotlar bilan birgalikda har yili yangi hosil paxtasiga narx belgilashda, shartnoma va kontrakt majburiyatlarini imzolashda mazkur Farmonning 1-bandida belgilangan paxta xomashyosiga xarid narxlar va paxta tolasiga ulgurji narxlarni shakllantirish mexanizmiga qat’iy amal qilsinlar.
(2-band O‘zbekiston Respublikasi Prezidentining 2020-yil 27-sentabrdagi PF-6075-sonli Farmoni tahririda — Qonun hujjatlari ma’lumotlari milliy bazasi, 28.09.2020-y., 06/20/6075/1330-son)
3. O‘zbekiston Respublikasi Moliya vazirligi, Makroiqtisodiyot va statistika vazirligi, Tashqi iqtisodiy aloqalar vazirligi, Qishloq va suv xo‘jaligi vazirligi, Adliya vazirligi, “O‘zpaxtasanoat” uyushmasi ikki hafta muddatda paxta xomashyosiga xarid narxlarni va paxta tolasiga ulgurji narxlarni shakllantirish tartibi to‘g‘risidagi nizomni ishlab chiqsin va belgilangan tartibda tasdiqlasin.
4. Ushbu Farmonning bajarilishini nazorat qilish O‘zbekiston Respublikasining Bosh vaziri O‘.T. Sultonov zimmasiga yuklansin.