O‘zbekiston Respublikasining “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish to‘g‘risida”gi Qonuniga muvofiq O‘zbekiston Respublikasi Adliya vazirligi va O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti qaror qiladilar:

1. Notarial idoralar va advokatlik tuzilmalarida jinoiy faoliyatdan olingan daromadlarni legallashtirishga , terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bo‘yicha ichki nazorat qoidalari ilovaga muvofiq tasdiqlansin.

2. Ushbu qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Qoidalar O‘zbekiston Respublikasining “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish to‘g‘risida”gi Qonuni va O‘zbekiston Respublikasi Prezidentining 2018-yil 23-maydagi PF-5446-son “Budjet mablag‘laridan foydalanish samaradorligini tubdan oshirish va iqtisodiy jinoyatlarga qarshi kurashish mexanizmlarini takomillashtirish chora-tadbirlari to‘g‘risida”gi Farmoniga muvofiq notarial idoralar va advokatlik tuzilmalari uchun jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bo‘yicha ichki nazoratni tashkil qilish va amalga oshirish tartibini belgilaydi.

1. Mazkur Qoidalarda quyidagi asosiy tushunchalar qo‘llangan:

benefitsiar mulkdor — pirovard natijada mulk huquqiga ega bo‘ladigan yoki mijozni aniq nazorat qiladigan jismoniy shaxs, shu jumladan, uning manfaatlari yo‘lida pul mablag‘lari yoki boshqa mol-mulk bilan bog‘liq operatsiya amalga oshirilayotgan yuridik shaxs;

ichki nazorat — maxsus vakolatli davlat organiga xabar qilinishi lozim bo‘lgan operatsiyalarni aniqlash bo‘yicha notarial idoralar yoki advokatlik tuzilmalarining faoliyati;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlar — Jinoiy daromadlarni legallashtirishga qarshi kurashish bo‘yicha moliyaviy choralarni ishlab chiqish guruhining (FATF) rasmiy bayonotlarida xalqaro moliyaviy tizimga xavf tug‘diruvchi hamda jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish tizimlarida strategik kamchiliklari mavjud deb belgilangan davlatlar va hududlar;

identifikatsiyalash — mijozni lozim darajada tekshirish maqsadida, u topshirgan hujjatlar asosida notarial idoralar va advokatlik tuzilmalari tomonidan mijozlar to‘g‘risidagi ma’lumotlarni aniqlash;

mijoz — notarial idora yoki advokatlik tuzilmasiga pul mablag‘lari yoki boshqa mol-mulk bilan bog‘liq operatsiyani amalga oshirish to‘g‘risida yozma yoki og‘zaki yoxud elektron shaklda topshiriq (ariza, iltimosnoma) bilan murojaat qiluvchi jismoniy yoki yuridik shaxs;

mijozni lozim darajada tekshirish — mijozning va qaysi shaxslar nomidan ish ko‘rayotgan bo‘lsa, o‘sha shaxslarning shaxsini hamda vakolatlarini tekshirish, ta’sis hujjatlari asosida mulk va boshqaruv tuzilishini o‘rganish orqali benefitsiar mulkdorni identifikatsiyalash, shuningdek, mijoz tomonidan amalga oshiriladigan amaliy ish munosabatlari va operatsiyalarni, ularning bunday mijoz va uning faoliyati to‘g‘risidagi ma’lumotlarga muvofiqligini tekshirish maqsadida, doimiy asosda o‘rganish;

xabar qilinishi lozim bo‘lgan operatsiyalar — ichki nazoratni o‘tkazish davomida notarial idoralar yoki advokatlik tuzilmalari tomonidan shubhali deb topilgan sodir etilayotgan va tayyorlanayotgan pul mablag‘lari yoki boshqa mol-mulk bilan bog‘liq operatsiyalar;

shubhali operatsiya — pul mablag‘lari yoki boshqa mol-mulk bilan bog‘liq, tayyorlash, sodir etish jarayonida bo‘lgan yoki sodir etib bo‘lingan, ichki nazorat qoidalarini amalga oshirishda notarial idorada yoki advokatlik tuzilmasida jinoiy faoliyatdan olingan daromadlarni legallashtirish, terrorizmni moliyalashtirish va (yoki) ommaviy qirg‘in qurolini tarqatishni moliyalashtirish maqsadida amalga oshirilganligi to‘g‘risida shubha paydo bo‘lgan operatsiya;

maxsus vakolatli davlat organi — O‘zbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti;

hududiy adliya organlari — Qoraqalpog‘iston Respublikasi Adliya vazirligi, viloyatlar va Toshkent shahar adliya boshqarmalari;

tavakkalchilik — mijozlar tomonidan jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirg‘in qurolini tarqatishni moliyalashtirish maqsadida operatsiyalarni amalga oshirish tavakkalchiligi;

pul mablag‘larini yoki boshqa mol-mulkni ishga solmay to‘xtatib qo‘yish — pul mablag‘larini yoki boshqa mol-mulkni o‘tkazishni, konversiyalashni, tasarruf etishni yoxud ko‘chirishni taqiqlash;

ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxs — O‘zbekiston Respublikasi tomonidan tan olingan, ommaviy qirg‘in qurolini tarqatishini oldini olishga qaratilgan BMT Xavfsizlik Kengashining rezolyutsiyalari hamda boshqa xalqaro-huquqiy hujjatlari bilan belgilangan jismoniy yoki yuridik shaxs;

terrorchilik faoliyatida ishtirok etayotgan yoki ishtirok etishda gumon qilinayotgan shaxs — terrorchilik faoliyatida ishtirok etayotgan yoxud ishtirok etishda gumon qilinayotgan, terrorchilik faoliyatini amalga oshirayotgan yoxud amalga oshirishda gumon qilinayotgan tashkilotning bevosita yoki bilvosita mulkdori bo‘lgan yoxud uni nazorat qilayotgan yuridik yoki jismoniy shaxs, shuningdek, terrorchilik faoliyatida ishtirok etayotgan yoxud ishtirok etishda gumon qilinayotgan jismoniy shaxsning yoxud tashkilotning mulkidagi yoki nazorati ostidagi yuridik shaxs;

Ro‘yxat — terrorizmga, ommaviy qirg‘in qurolini tarqatishga qarshi kurashishni amalga oshiruvchi davlat organlari va O‘zbekiston Respublikasining boshqa vakolatli organlaridan taqdim etilayotgan ma’lumotlar, shuningdek, chet davlatlarning vakolatli organlari va xalqaro tashkilotlaridan rasmiy kanallar orqali taqdim etilayotgan ma’lumotlar asosida maxsus vakolatli davlat organi tomonidan tuzilgan terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxati;

operatsiyalarni to‘xtatib turish — mijozning pul mablag‘larini yoki boshqa mol-mulkni ko‘chirish, konversiyalash, o‘zga shaxslarga egalik qilish va foydalanish uchun berish, shuningdek yuridik ahamiyatga ega bo‘lgan boshqa harakatlarni bajarish to‘g‘risidagi topshiriqnomalari ijrosini to‘xtatib turish;

yuqori mansabdor shaxslar — chet davlatning qonun chiqaruvchi, ijro etuvchi, ma’muriy, sud yoki harbiy organida yoxud xalqaro tashkilotda doimiy, vaqtincha yoki maxsus vakolat bo‘yicha tayinlanadigan yoki saylanadigan, tashkiliy-boshqaruv vazifalarni bajaruvchi va yuridik ahamiyatga ega bo‘lgan harakatlarni sodir etishga vakolatli shaxslar, shuningdek chet davlat korxonalarining yuqori martabali rahbarlari, chet davlatning taniqli siyosatchilari va siyosiy partiyalarining taniqli a’zolari, shu jumladan sobiq yuqori mansabdor shaxslar;

yuqori mansabdor shaxslarga yaqin bo‘lgan shaxslar — yuqori mansabdor shaxslarga ijtimoiy va kasbiy jihatdan bevosita bog‘liq bo‘lgan jismoniy shaxslar;

uchinchi tomon — O‘zbekiston Respublikasi “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish to‘g‘risida”gi Qonunining 12-moddasida ko‘rsatilgan pul mablag‘lari yoki boshqa mol-mulk bilan bog‘liq operatsiyalarni amalga oshiruvchi tashkilotlar.

2. Notarial idoralar yoki advokatlik tuzilmalari mijozlar uchun yoki ular nomidan operatsiyalar o‘tkazganda quyidagi sohalarda ichki nazoratni amalga oshiradi:

ko‘chmas mulkni sotib olish yoki sotish;

mijozning pul mablag‘lari, qimmatli qog‘ozlari yoki boshqa mol-mulkini boshqarish;

bank, jamg‘arma hisobvaraqlari yoki qimmatli qog‘ozlar hisobvaraqlarini boshqarish;

yuridik shaxslarni tashkil etish, faoliyat ko‘rsatish yoki boshqarish uchun mablag‘lar yig‘ish;

yuridik shaxslarni tashkil etish, faoliyat ko‘rsatish yoki boshqarish hamda korxonalarning oldi-sotdisi;

ijro xatlarini yozish.

3. Notarial idoralar yoki advokatlik tuzilmalarini ichki nazorat qilish maqsadlari quyidagilardan iborat:

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga oid tavakkalchiliklarni aniqlash, baholash, hujjatlashtirish va ularni kamaytirish;

jinoiy faoliyatdan olingan daromadlarni legallashtirishga va terrorizmni moliyalashtirishga yoki ommaviy qirg‘in qurolini tarqatishni moliyalashtirishga yo‘naltirilgan pul mablag‘lari yoki boshqa mol-mulk bilan bog‘liq operatsiyalarni samarali aniqlash va oldini olish;

notarial idoralar yoki advokatlik tuzilmalarining qasddan yoki qasddan bo‘lmagan jinoiy faoliyatga jalb qilinishiga yo‘l qo‘ymaslik;

notarial idoralar yoki advokatlik tuzilmalari tomonidan jinoiy faoliyatdan olingan daromadlarni legallashtirishga terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish to‘g‘risidagi qonunchilik hujjatlari talablariga, shuningdek, pul mablag‘lari yoki boshqa mol-mulk bilan bog‘liq operatsiyalarni tayyorlash va amalga oshirishda mazkur Qoidalarga og‘ishmay rioya qilinishini ta’minlash.

4. Notarial idoralar yoki advokatlik tuzilmalari ichki nazoratining vazifalari quyidagilardan iborat:

qonunchilik hujjatlari va mazkur Qoidalarga muvofiq mijozlarni lozim darajada tekshirish choralarini amalga oshirish;

benefitsiar mulkdorlarni identifikatsiyalash, ularning shaxsini tekshirish bo‘yicha mumkin bo‘lgan chora-tadbirlar qo‘llash;

mazkur Qoidalarning 24-bandida belgilangan mezonlar asosida shubhali operatsiyalarni aniqlash;

ichki nazoratni amalga oshirish davomida aniqlangan shubhali operatsiyalar to‘g‘risidagi axborotlarni (hujjatlarni) maxsus vakolatli davlat organiga o‘z vaqtida taqdim etish;

Ro‘yxatga kiritilgan shaxslarning pul mablag‘lari yoki boshqa mol-mulk bilan bog‘liq operatsiyalarini to‘xtatib turish va (yoki) pul mablag‘larini yoki boshqa mol-mulkini ishga solmay to‘xtatib qo‘yish hamda to‘xtatib turilgan kunning o‘zida bunday operatsiyalar haqida maxsus vakolatli davlat organini xabardor qilish;

jinoiy faoliyatdan olingan daromadlarni legallashtirishga terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bilan bog‘liq bo‘lgan ma’lumotlarning maxfiyligini ta’minlash;

pul mablag‘lari yoki boshqa mol-mulk bilan bog‘liq operatsiyalar to‘g‘risidagi axborotni, shuningdek, identifikatsiyalash ma’lumotlarini va mijozlarni lozim darajada tekshirishga doir materiallarni qonunchilik hujjatlarida belgilangan muddatlar mobaynida saqlanishini ta’minlash;

notarial idoralar yoki advokatlik tuzilmalari rahbariyatini tegishli qarorlar qabul qilish uchun zarur bo‘lgan ishonchli axborot va materiallar bilan tezkor va muntazam ravishda ta’minlab borish;

shubhali operatsiyalarning amalga oshirilishi yoki amalga oshirishga urinishlar, shubhali operatsiyalarni amalga oshirgan mijozlar bilan bog‘liq shaxslar (rahbarlar, ta’sischilar) to‘g‘risidagi ma’lumotlar bazasini shakllantirish, shuningdek, qonunchilik hujjatlariga muvofiq bunday axborotni davlat organlari va boshqa tashkilotlar bilan o‘zaro ayirboshlash;

so‘rovnomalar bo‘yicha mijozlar bazasidan terrorchilik faoliyatini moliyalashtirish bilan bog‘liq bo‘lgan shaxslarni aniqlash.

notarial idoralari va advokatlik tuzilmalari faoliyatida jinoiy faoliyatdan olingan daromadlarni legallashtirish, terrorizmni moliyalashtirishga va ommaviy qirg‘in qurolini tarqatishni moliyalashtirish tavakkalchiliklarini aniqlash, baholash, hujjatlashtirish va kamaytirish bo‘yicha tegishli chora-tadbirlarni ko‘rish.

yuqori mansabdor shaxslar, ularning oila a’zolari va yuqori mansabdor shaxslarga yaqin bo‘lgan shaxslar amalga oshirayotgan operatsiyalarini chuqur monitoring qilish;

Ro‘yxat bilan solishtirish orqali operatsiya ishtirokchilari orasida terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslarni aniqlash;

maxsus vakolatli davlat organining pul mablag‘lari yoki boshqa mol-mulk bilan bog‘liq operatsiyalarni o‘ttiz ish kunidan ko‘p bo‘lmagan muddatga to‘xtatib turish haqidagi ko‘rsatmasi ijrosini zudlik bilan ta’minlash choralarini ko‘rish.

5. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish uchun ichki nazoratni tashkil etish maqsadida notarial idoralar va advokatlik tuzilmalarida ichki nazorat qoidalariga rioya etilishi uchun javobgar shaxs tayinlanadi.

6. Notarial idoralar va advokatlik tuzilmalarining ichki nazorat tizimi ularning faoliyat ko‘rsatish xususiyatlari, faoliyatining asosiy yo‘nalishlari, mijozlar va ularning operatsiyalari bilan bog‘liq mijozlar bazasi va tavakkalchilik darajasini hisobga olgan holda tashkil etiladi.

Notarial idoralar va advokatlik tuzilmalari mazkur Qoidalar talablaridan kelib chiqqan holda tavakkalchiliklarni aniqlash, baholash, monitoring qilish, boshqarish, kamaytirish va hujjatlashtirish bo‘yicha tegishli choralarni ko‘rish tartibini nazarda tutuvchi ichki qoidalarni ishlab chiqishlari kerak.

Ichki qoidalar mazkur Qoidalar va boshqa qonunchilik hujjatlari talablariga muvofiq bo‘lishi hamda aniqlangan tavakkalchiliklar va ularning baholanishidan kelib chiqib tuzilishi kerak.

Ichki qoidalar va ularga kiritilgan o‘zgartirish va qo‘shimchalar notarial idoralar yoki advokatlik tuzilmalari rahbarlari tomonidan tasdiqlanadi.

7. Davlat notarial idorasida ichki nazorat qoidalariga rioya etilishi uchun javobgar shaxs hududiy adliya organining buyrug‘i bilan tayinlanadi.

Ikki va undan ortiq davlat notariusidan tashkil topgan davlat notarial idorasida ichki nazorat qoidalariga rioya etilishi uchun javobgar shaxs etib hududiy adliya organining buyrug‘ida ko‘rsatilgan mazkur notarial idoraning davlat notariusi tayinlanadi.

Agar davlat notarial idorasi bitta davlat notariusidan iborat bo‘lsa, ichki nazorat qoidalariga rioya etilishi uchun javobgarlik mazkur notarius zimmasiga yuklatiladi.

7¹. Xususiy amaliyot bilan shug‘ullanuvchi notariuslar ichki nazorat qoidalariga rioya etilishi uchun shaxsan javobgar hisoblanadi.

8. Advokatlik tuzilmasida ichki nazorat qoidalariga rioya etilishi uchun javobgar shaxs advokatlik tuzilmasining advokati advokatlik tuzilmasining rahbarining buyrug‘i bilan tayinlanadi. Buyruqning nusxasi shaxsiy ma’lumotlar bilan birga buyruq chiqarilgan kundan boshlab o‘n kun mobaynida hududiy adliya organiga yuboriladi.

Advokat advokatlik faoliyatini individual tarzda amalga oshirayotgan hollarda (advokatlik byurosi) ichki nazorat qoidalariga rioya etilishi uchun javobgarlik mazkur advokat zimmasiga yuklatiladi.

9. Jinoiy faoliyatdan olingan daromadlarni legallashtirishga terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish maqsadida ichki nazorat qoidalariga rioya etilishi uchun javobgar shaxslar quyidagi vazifalarni bajaradilar:

mazkur Qoidalarga muvofiq ichki nazorat jarayonini va mijozlarni lozim darajada tekshirishni joriy etishni va amalga oshirishni tashkillashtiradilar;

mijozlarning ichki nazoratni amalga oshirish davomida aniqlangan shubhali operatsiyalari va xatti-harakatlari to‘g‘risidagi xabarlarni maxsus vakolatli davlat organiga o‘z vaqtida aloqaning telekommunikatsiya kanallari orqali elektron shaklda yuborilishini, shuningdek, maxsus vakolatli davlat organining qo‘shimcha axborot taqdim etish to‘g‘risidagi so‘rovlarining bajarilishini ta’minlaydilar;

mazkur Qoidalarni amalga oshirish jarayonining maxfiyligini ta’minlaydilar.

notarial idoralar va advokatlik tuzilmalarida ichki nazorat tizimini tashkil etish va O‘zbekiston Respublikasi Adliya vazirligi hamda maxsus vakolatli davlat organining vakolatli vakillari tomonidan olib borilgan tekshiruvlar davomida aniqlangan kamchiliklarni bartaraf etish bo‘yicha monitoringni amalga oshiradilar.

10. Ichki nazorat qoidalariga rioya etilishi uchun javobgar shaxslar quyidagilarga haqli:

o‘z tashkilotining rahbarlari va xodimlaridan ichki nazoratni amalga oshirish uchun zarur bo‘lgan farmoyish beruvchi, buxgalteriya va boshqa hujjatlarni talab qilib olish;

ichki nazoratni amalga oshirish maqsadida olingan hujjatlardan nusxa ko‘chirish, tashkilotning elektron ma’lumotlar bazalari, mahalliy hisoblash tarmoqlari va avtomatlashtirilgan kompyuter tizimlarida saqlanayotgan fayllar va boshqa yozuvlardan nusxalar olish;

xabar qilinishi lozim bo‘lgan operatsiyalarga nisbatan kelgusidagi xatti-harakatlar bo‘yicha rahbariyatga takliflar kiritish (shu jumladan, mijoz yoki operatsiya to‘g‘risida qo‘shimcha axborot olish yoki mavjud axborotni tekshirish maqsadida o‘tkazilayotgan operatsiyani to‘xtatish bo‘yicha).

Qonun hujjatlariga muvofiq ichki nazorat qoidalariga rioya etilishi uchun javobgar shaxslar boshqa huquqlarga ham ega bo‘lishlari mumkin.

11. Ichki nazorat qoidalariga rioya etilishi uchun javobgar shaxslar quyidagilarga majburdirlar:

mijozlarni lozim darajada tekshirishni amalga oshirish;

benefitsiar mulkdorlarni identifikatsiyalash choralarini ko‘rish;

shubhali operatsiyalar aniqlanganda, belgilangan tartibda maxsus vakolatli davlat organiga yozma yoki aloqaning telekommunikatsiya kanallari orqali elektron shaklda axborot berish;

olingan axborotlarning maxfiyligiga rioya qilish;

ichki nazoratni amalga oshirish davomida olingan hujjatlarning saqlanishi va qaytarilishini ta’minlash;

mijozni lozim darajada tekshirish materiallariga qo‘shib qo‘yiladigan yaqqol iqtisodiy mohiyatga ega bo‘lmagan, mijozning ta’sis hujjatlarida yoki davlat ro‘yxatidan o‘tkazish to‘g‘risidagi guvohnomasida nazarda tutilgan maqsad va faoliyat turlariga to‘g‘ri kelmaydigan barcha operatsiyalar bo‘yicha lozim darajada tekshirish natijalari va xulosalarini yozma ravishda qayd etish;

identifikatsiyalashni yakunlash imkoni bo‘lmaganda yoki lozim darajada tekshirish natijalariga ko‘ra, mijoz bilan amaliy ish munosabatlarini o‘rnatish maqsadga muvofiq emasligini ko‘rsatib turadigan ma’lumotlar olinganda, mijoz bilan bitim tuzishni rad etish.

jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirg‘in qurolini tarqatishni moliyalashtirish bo‘yicha o‘z tavakkalchiliklarini aniqlash va baholash bo‘yicha tegishli chora-tadbirlarni ko‘rish, ushbu tavakkalchiliklarni hujjatlashtirish va ularni kamaytirish chora-tadbirlarini ko‘rish.

Ichki nazorat qoidalariga rioya etilishi uchun javobgar shaxslar qonunchilik hujjatlariga muvofiq boshqa majburiyatlarga ham ega bo‘lishlari mumkin.

11¹. Operatsiyalar to‘g‘risidagi ma’lumotlar zarurat tug‘ilgan taqdirda operatsiya tafsilotlarini qayta tiklash va axborotdan maxsus vakolatli davlat organi tomonidan foydalanish mumkin bo‘lgan tarzda rasmiylashtirilishi lozim.

12. Ichki nazorat qoidalariga rioya etilishi uchun javobgar shaxslar bir yilda kamida bir marta hududiy adliya organiga o‘z faoliyati natijalari to‘g‘risida hisobot tayyorlaydilar va taqdim etadilar.

13. Hududiy adliya organida ichki nazorat qoidalariga rioya etilishi uchun javobgar shaxslarning ro‘yxatini yuritadigan, ularning o‘qishi va malaka oshirishini tashkil etadigan, shuningdek, ular tomonidan taqdim etilgan hisobotlarni umumlashtiradigan va tahlil etadigan xodim tayinlanadi.

Hududiy adliya organi xodimi ichki nazorat qoidalariga rioya etilishi uchun javobgar shaxslarning taqdim etgan hisobotlari bo‘yicha tahlil natijalari to‘g‘risidagi hisobotni tayyorlaydi va bir yilda bir marta Adliya vazirligiga taqdim etadi.

14. Hududiy adliya organi yarim yilda bir marta hisobot choragidan keyingi oyning 5-sanasidan kechiktirmay Adliya vazirligiga notarial idoralar va advokatlik tuzilmalarida ichki nazorat qoidalariga rioya etilishi uchun javobgar shaxslarning ro‘yxatini taqdim etadi.

15. O‘zbekiston Respublikasi Adliya vazirligi yarim yilda bir marta hisobot choragidan keyingi oyning 15-sanasidan kechiktirmay maxsus vakolatli davlat organiga notarial idoralar va advokatlik tuzilmalarida ichki nazorat qoidalariga rioya etilishi uchun javobgar shaxslarning ro‘yxatini taqdim etadi.

16. Notarial idoralar va advokatlik tuzilmalari:

ish munosabatlari o‘rnatilganda;

olib borilayotgan operatsiyalarning jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirg‘in qurolini tarqatishni moliyalashtirish maqsadlariga aloqador ekanligiga har qanday shubha mavjud bo‘lganda;

identifikatsiyalash uchun avval olingan ma’lumotlarning asliyligi va ishonchliligiga shubhalar mavjud bo‘lganda;

bazaviy hisoblash miqdorining 500 baravari miqdoridan ortiq bo‘lgan bir martalik operatsiyalar amalga oshirilganda mijozlarni lozim darajada tekshirish bo‘yicha chora-tadbirlar ko‘radi.

Notarial idoralar va advokatlik tuzilmalari bitim taraflaridan biri jinoiy faoliyatdan olingan daromadlarni legallashtirishga , terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda yoxud offshor hududlarda doimiy yashayotgan, turgan yoki ro‘yxatga olingan shaxs bo‘lganda mijozlarni lozim darajada tekshirishning kuchaytirilgan chora-tadbirlarini ko‘rishlari lozim.

16¹. Mijozni lozim darajada tekshirishning kuchaytirilgan chora-tadbirlariga quyidagilar kiradi:

mijoz haqida qo‘shimcha ma’lumotlar (faoliyat turi, aktivlar miqdori, ochiq ma’lumotlar bazasi orqali olinishi mumkin bo‘lgan ma’lumot va boshqalar) olish va mijoz yoki benefitsiar mulkdor bo‘yicha ma’lumotlarni yanada tezroq yangilab borish;

mijozdan uning pul mablag‘lari manbalari yoki moliyaviy holatining manbasi haqida ma’lumot olish;

rejalashtirilgan yoki o‘tkazilgan operatsiyalarning sabablari to‘g‘risida ma’lumotlar olish;

qo‘shimcha tekshirishni talab qiladigan operatsiyalar (bitimlar) xususiyatini aniqlash hamda tekshirishlarning soni va ketma-ketligini oshirish yo‘li bilan ish munosabatlarining kuchaytirilgan monitoringini amalga oshirish.

16². Mijozni lozim darajada tekshirish bo‘yicha ko‘riladigan chora-tadbirlar quyidagilarni o‘z ichiga olishi shart:

tegishli hujjatlar asosida mijozning va u qaysi shaxslar nomidan ish ko‘rayotgan bo‘lsa, o‘sha shaxslarning shaxsini hamda vakolatlarini tekshirish;

mijozning benefitsiar mulkdorini identifikatsiyalash;

mijoz tomonidan amalga oshiriladigan amaliy ish munosabatlari va operatsiyalarni ularning bunday mijoz va uning faoliyati to‘g‘risidagi ma’lumotlarga muvofiqligini tekshirish maqsadida doimiy asosda o‘rganish o‘tkazish.

Mijozni lozim darajada tekshirish bo‘yicha yuqorida ko‘rsatib o‘tilgan choralarni ko‘rish bilan birga, mijoz yoki benefitsiar mulkdor sifatida qatnashayotgan yuqori mansabdor shaxslarga nisbatan notarial idoralar va advokatlik tuzilmalari operatsiyalarni amalga oshiruvchi shaxslar:

yuqori mansabdor shaxsning mavqeyi to‘g‘risidagi ma’lumotlarni tekshirish va o‘tkazilayotgan operatsiyadagi pul mablag‘lari yoki boshqa mol-mulkni manbalarini aniqlash bo‘yicha oqilona choralarni ko‘rishi;

yuqori mansabdor shaxs bilan amaliy ish munosabatlariga faqatgina rahbariyat ruxsati bilan kirishish (yoki mavjud mijozlar uchun davom ettirilishi);

amaliy ish munosabatlarini monitoring qilib borishlari lozim.

Notarial idoralar va advokatlik tuzilmalari yuqori mansabdor shaxslarning oila a’zolari va yuqori mansabdor shaxslarga yaqin bo‘lgan shaxslarga ham mazkur bandda nazarda tutilgan choralarni ko‘rishlari shart.

Mijozni lozim darajada tekshirish imkoniyati mavjud bo‘lmagan taqdirda notarial idoralar va advokatlik tuzilmalari bunday mijoz bilan hamkorlik munosabatlariga kirishish yoki bunday mijozning operatsiyalarini amalga oshirishdan voz kechishi yoxud u bilan har qanday amaliy ish munosabatlarini to‘xtatishi va bu haqda maxsus vakolatli davlat organiga xabar berishi lozim.

16³. Notarial idoralar yoki advokatlik tuzilmalari mazkur Qoidalarning 16²-bandi ikkinchi — to‘rtinchi xatboshilarida nazarda tutilgan mijozlarni lozim darajada tekshirish bo‘yicha chora-tadbirlarni amalga oshirgan uchinchi tomonlarning tekshirish natijalariga tayanishlari mumkin.

Mazkur hollarda mijozlarni lozim darajada tekshirish natijalari bo‘yicha so‘nggi javobgarlik notarial idoralar yoki advokatlik tuzilmalarining zimmasida qoladi. Bunda notarial idoralar yoki advokatlik tuzilmalari:

mijozlarni lozim darajada tekshirish bo‘yicha identifikatsiyalash ma’lumotlari va boshqa tegishli hujjatlar nusxalarini so‘rov asosida darhol olish imkoniyatiga ega bo‘lishiga;

uchinchi tomon mazkur Qoidalar asosida ishlashiga ishonch hosil qilishi kerak.

Mazkur bandning uchinchi va to‘rtinchi xatboshilarida ko‘rsatilgan talablaridan biriga rioya qilinmagan taqdirda, notarial idoralar yoki advokatlik tuzilmalari mijozlarni lozim darajada tekshirish bo‘yicha chora-tadbirlarni mustaqil ravishda amalga oshirishlari kerak.

17. Mijozlarni lozim darajada tekshirish operatsiyalarni amalga oshirishning barcha bosqichlarida olib borilishi lozim.

Benefitsiar mulkdorni belgilash uchun notarial idoralar yoki advokatlik tuzilmalari mijoz boshqa shaxsning nomidan ish ko‘rayotganligini aniqlashga va undan keyin mijoz kimning nomidan ish ko‘rayotgan bo‘lsa, uni identifikatsiyalash hamda shaxsini lozim darajada tekshirish bo‘yicha chora-tadbirlar ko‘rishi shart.

Mijoz yoki benefitsiar mulkdorni identifikatsiyalash bilan bir qatorda ular tomonidan qonunchilik hujjatlariga muvofiq taqdim etiladigan hujjatlardan foydalangan holda ularning operatsiyalarni amalga oshirishga bo‘lgan vakolatlari tekshirilishi shart.

17¹. Agar, mavjud mijozning jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga aloqasi borligi haqida asoslantirilgan shubhalar mavjud bo‘lganida va unga nisbatan mijozlarni lozim darajada tekshirish bo‘yicha choralar amalga oshirayotganligi oshkor bo‘lishi mumkinligini inobatga olgan holda bunday tekshirish bo‘yicha choralar amalga oshirmasdan maxsus vakolatli davlat organga bir ish kundan kechiktirmay shubhali operatsiya haqida xabar yuborilishiga yo‘l qo‘yiladi.

18. Mijoz notarial idora yoki advokatlik tuzilmasiga operatsiyalarni amalga oshirish to‘g‘risida topshiriq (ariza, iltimosnoma) bilan bir yoki bir necha marta murojaat qilganda, notarial idora yoki advokatlik tuzilmasi quyidagilarga majburdirlar:

mazkur Qoidalar va boshqa qonunchilik hujjatlari talablariga muvofiq operatsiya bo‘yicha mijoz yoki naf oluvchini identifikatsiyalash;

ushbu mijozning avvalgi hisobot davri (oy, chorak, yarim yil, yil) mobaynida amalga oshirgan operatsiyalarini, agar bunday operatsiyalar to‘g‘risidagi ma’lumotlar mavjud bo‘lsa, o‘rganib chiqish;

operatsiya turini hamda uning mijoz — yuridik shaxsning ta’sis hujjatlarida belgilangan maqsad va faoliyat turiga muvofiqlik darajasini aniqlash;

operatsiya turini hamda uning tadbirkorlik faoliyatini amalga oshirayotgan mijoz-jismoniy shaxsning davlat ro‘yxatidan o‘tkazish to‘g‘risidagi guvohnomasida belgilangan faoliyat turiga muvofiqlik darajasini aniqlash.

19. Mijoz — jismoniy shaxsni identifikatsiyalash uning shaxsini tasdiqlovchi hujjati (pasport yoki unga tenglashtirilgan hujjat) asosida amalga oshiriladi. Agar jismoniy shaxs yakka tartibdagi tadbirkor bo‘lsa, shuningdek uning davlat ro‘yxatidan o‘tkazilganligi to‘g‘risidagi guvohnomasi ham o‘rganilishi lozim.

20. Mijoz — yuridik shaxsni identifikatsiyalashda notarial idoralar yoki advokatlik tuzilmalari davlat ro‘yxatidan o‘tkazilganlik to‘g‘risidagi guvohnomani, tashkiliy-huquqiy shakli, joylashgan manzili, rahbarlari to‘g‘risidagi ma’lumotlarni, shuningdek, ta’sis hujjatlarida ko‘rsatilgan ma’lumotlarni tekshirishlari lozim.

Mijoz — yuridik shaxsni yanada batafsilroq o‘rganish uchun:

mijozning ta’sis hujjatlari (ro‘yxatdan o‘tkazilgan barcha o‘zgartirishlar va qo‘shimchalar bilan) va mijozning davlat ro‘yxatidan o‘tkazilganligini tasdiqlovchi hujjatlarning rasmiylashtirilishiga;

mijozning boshqaruv organlarining tuzilishi va ularning vakolatlariga;

mijozning ro‘yxatdan o‘tkazilgan ustav fondining (kapitalining) miqdoriga;

qonunchilik hujjatlariga muvofiq boshqa kerakli ma’lumotlarga alohida e’tibor berilishi lozim.

21. Notarial idora yoki advokatlik tuzilmasi mijoz tomonidan taqdim etilayotgan axborotni:

davlat hokimiyati organlari va boshqa tashkilotlardan mijoz haqida olingan ma’lumotlardan foydalanish;

mijozning avvalgi notarial idoralar yoki advokatlik tuzilmalari bilan o‘zaro munosabatlarini o‘rganish;

mijozning ishchanlik obro‘si to‘g‘risidagi axborotni to‘plash orqali tekshirish;

boshqa erkin foydalanishi mumkin bo‘lgan axborot manbalari orqali tekshirishga haqlidir.

21¹. Mijozlarni lozim darajada tekshirish natijasida olingan ma’lumotlar ahamiyati va tavakkalchiliklardan kelib chiqqan holda hamda mijoz ma’lumotlarida o‘zgarishlar bo‘lganda, yiliga kamida bir marotaba yangilanishi lozim.

22. Yuridik va jismoniy shaxslarni identifikatsiyalash jarayonida notarial idora yoki advokatlik tuzilmasi benefitsiar mulkdorlarni identifikatsiyalash bo‘yicha, shu jumladan, mijoz mol-mulkining tuzilishini o‘rganish yo‘li bilan, asoslangan va mumkin bo‘lgan chora-tadbirlarni qo‘llashi lozim.

23. Notarial idora yoki advokatlik tuzilmasi mijozlar tomonidan identifikatsiyalash uchun zarur bo‘lgan hujjatlar taqdim etilmagan taqdirda, ularga operatsiyalarni amalga oshirishda rad javobini berishi shart.

23¹. Notarial idoralar va advokatlik tuzilmalari mijozlar tomonidan jinoiy faoliyatdan olingan daromadni legallashtirish, terrorizmni moliyalashtirish yoki ommaviy qirg‘in qurolini tarqatishni moliyalashtirish maqsadida operatsiyalarning amalga oshirilishida tavakkalchilik darajasini (bundan buyon matnda — tavakkalchilik darajasi deb yuritiladi) aniqlash, baholash va kamaytirish chora-tadbirlarini ko‘rishlari shart.

Tavakkalchilik darajasi mijoz taqdim etgan axborot asosida, amalga oshiradigan operatsiyalar turlari, mazkur Qoidalarda belgilangan mezonlari, mijozni lozim tarzda tekshirish natijalari hamda boshqa kerakli ma’lumotlarni hisobga olgan holda mas’ul xodim tomonidan har yili aniqlanadi va baholanadi.

Tavakkalchiliklarni baholash natijalari elektron ravishda rasmiylashtirilishi hamda har yili 15-yanvargacha maxsus vakolatli davlat organi yoki O‘zbekiston Respublikasi Adliya vazirligiga taqdim etilishi lozim.

23². Tavakkalchilikning yuqori darajasi toifasiga notarial idoralar va advokatlik tuzilmalari avvaldan quyidagi mezonlarga ega bo‘lgan mijozlarni tegishli deb topish va ularga nisbatan kuchaytirilgan e’tiborni qaratishlari lozim:

Ro‘yxatga kiritilgan shaxslar yoxud Ro‘yxatga kiritilgan shaxsning nazoratidagi tashkilotlar yoki Ro‘yxatga kiritilgan tashkilotning bevosita yoxud bilvosita mulkdori yoki nazorat qiluvchi shaxslar;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatda yoxud offshor hududda doimiy yashayotgan, turgan yoki ro‘yxatga olingan shaxslar;

norezidentlar;

joylashgan joyi ta’sis yoki ro‘yxatga olish hujjatlarida ko‘rsatilgan ma’lumotlarga muvofiq bo‘lmagan tashkilotlar va yakka tartibdagi tadbirkorlar;

faoliyat davri moliyaviy yilning bir choragidan oshmaydigan tashkilotlar va yakka tartibdagi tadbirkorlar;

haqiqiy egasi ushbu bandning ikkinchi va uchinchi xatboshilarida ko‘rsatilgan shaxs bo‘lgan tashkilotlar;

muntazam ravishda (ketma-ketligi uch oy mobaynida ikki martadan ortiq) shubhali operatsiyalarni amalga oshirayotgan mijozlar;

yuqori mansabdor shaxslar, ularning oila a’zolari va yuqori mansabdor shaxslarga yaqin bo‘lgan shaxslar;

mas’ul xodimda asosli shubha uyg‘otadigan moliyaviy operatsiyalarni amalga oshiruvchi boshqa shaxslar.

23³. Mijoz tomonidan amalga oshiriladigan operatsiyalarning tavsifi o‘zgarishiga qarab, notarial idoralar va advokatlik tuzilmalari zarur bo‘lganda u bilan ishlash bo‘yicha tavakkalchilik darajasini qayta ko‘rib chiqishi lozim.

Notarial idoralar va advokatlik tuzilmalari barcha murakkab, g‘ayrioddiy yirik operatsiyalarga, shuningdek aniq iqtisodiy yoki qonuniy maqsadga ega bo‘lmagan operatsiyalarni amalga oshirishning g‘ayrioddiy sxemalariga kuchaytirilgan e’tibor qaratishlari kerak.

Amalga oshirilgan chora-tadbirlar haqida ma’lumot hududiy adliya organlariga taqdim etilishi lozim.

23⁴. Notarial idoralar va advokatlik tuzilmalari jinoiy faoliyatdan olingan daromadlarni legallashtirish va terrorizmni moliyalashtirish yoki ommaviy qirg‘in qurolini tarqatishni moliyalashtirish maqsadida texnologik yutuqlardan foydalanilishiga yo‘l qo‘ymaslik bo‘yicha chora-tadbirlarni ko‘rishlari kerak. Bu maqsadlarda notarial idoralar va advokatlik tuzilmalari:

yangi xizmat turlari va yangi ish amaliyoti ishlab chiqilishi;

yangi va mavjud xizmat turlari uchun yangi yoki rivojlanayotgan texnologiyalardan foydalanilishi sababli yuzaga kelishi mumkin bo‘lgan tavakkalchilik darajalarini aniqlashi va baholashi kerak.

Bunday tavakkalchilikning baholanishi xizmatlarning yangi turlari, yangi ish amaliyotining ishga tushirilishi yoxud yangi yoki rivojlanayotgan texnologiyalarni foydalanishga tushirishdan avval o‘tkazilishi lozim.

Notarial idoralar va advokatlik tuzilmalari bunday tavakkalchiliklarni monitoring qilish va ularni kamaytirish bo‘yicha tegishli chora-tadbirlar ko‘rishlari zarur.

24. Pul mablag‘lari yoki boshqa mol-mulk bilan bog‘liq operatsiya quyidagi hollarda shubhali deb topilishi mumkin:

mijoz tomonidan zarurat tufayli so‘ralayotgan, shu jumladan, topshiriq beruvchi (agar mijoz ishonchli vakil sifatida ish yuritayotgan bo‘lsa) haqidagi ma’lumotlarni taqdim etishni sababsiz rad etilishi;

mijozning amalga oshirilayotgan bitimga nisbatan maxfiylik masalalari bilan ortiqcha tashvishlanishi;

mijozning xizmat ko‘rsatishning (yuridik yordam) foydaliroq shartlariga nisbatan e’tiborsiz bo‘lishi, shuningdek mijoz tomonidan ayni turdagi xizmatlar ko‘rsatishdagi oddiy to‘lovdan farq qiladigan yuqori mukofotning taklif qilinishi;

mijozning operatsiyalari yaqqol iqtisodiy mohiyatga ega bo‘lmaganligi, mijozning ta’sis hujjatlarida yoki davlat ro‘yxatidan o‘tkazish to‘g‘risidagi guvohnomasida nazarda tutilgan maqsad va faoliyati turlariga to‘g‘ri kelmasligi;

bitimga mijoz faoliyatiga muvofiq kelmaydigan qo‘shimchalar va o‘zgarishlar kiritilishi;

operatsiyani amalga oshirishda mijoz talabi bilan qilayotgan asoslanmagan shoshma-shosharlik;

mijoz tomonidan avval kelishilgan operatsiyaga (bitimga) bevosita uni amalga oshirilishidan oldin ko‘proq, ayniqsa, pul mablag‘lari yoki boshqa mol-mulk harakati yo‘nalishi taalluqli o‘zgartirishlar kiritilishi;

mijoz haqida ma’lumotning mavjud emasligi, shuningdek, ko‘rsatilgan bog‘lanish ma’lumotlari, xususan, pochta va elektron manzili, telefon raqamlari va elektron kanal ma’lumotlari bo‘yicha mijoz bilan aloqa o‘rnatish imkoniyatining yo‘qligi;

ma’lumotlar va hujjatlar taqdim etilishini mijoz tomonidan asossiz kechiktirilishi yoki mijoz tomonidan tekshirib bo‘lmaydigan ma’lumotni taqdim etilishi;

mijoz tomonidan bitim ishtirokchilari haqida bila turib yolg‘on axborot va ma’lumotlarning taqdim etilishi;

amalga oshirish maqsadi qonunchilik hujjatlari bilan o‘rnatilgan nazorat jarayonlaridan bosh tortish deyishga asos bo‘ladigan operatsiyalar yoki bitishuvlarning ko‘p marotaba yuritilganligining aniqlanishi;

identifikatsiyalashni yakunlashning imkoni bo‘lmasligi yoki lozim darajada tekshirish natijalariga ko‘ra, mijoz bilan amaliy ish munosabatlarini o‘rnatish maqsadga muvofiq emasligini ko‘rsatib turadigan ma’lumotlarning olinishi.

25. Operatsiyani shubhali deb tan olish har bir aniq holatda ushbu Qoidalar bilan o‘rnatilgan shubhalilik mezonlaridan foydalangan holda o‘tkaziladigan kompleks tahlil asosida, shuningdek, mijoz shaxsi, uning obro‘si, ishga oid munosabatlarning xususiyati, bitimning asoslari, maqsadlari, hajmi va turi, uni amalga oshirish usuli bilan hamda shubhali operatsiyani to‘g‘ri aniqlash uchun ahamiyatli bo‘lgan boshqa holatlar asosida aniqlanadigan tavakkalchilik xavfiga bog‘liq ravishda amalga oshiriladi.

26. Notarial idoralar va advokatlik tuzilmalari operatsiyalarni amalga oshirishda ularning ishtirokchilari identifikatsiya ma’lumotlarini Ro‘yxat bilan solishtirishlari shart.

Pul mablag‘lari yoki boshqa mol-mulk bilan bog‘liq operatsiyalar kechiktirilmasdan va oldindan xabar qilinmasdan to‘xtatilishi lozim, agarda:

mijoz yoki operatsiya qatnashchilaridan birining barcha identifikatsiya ma’lumotlari Ro‘yxatga kiritilgan shaxsning ma’lumotlari bilan to‘liq mos kelsa;

operatsiya qatnashchilaridan biri Ro‘yxatga kiritilgan shaxs nomidan yoki uning topshirig‘iga binoan faoliyat ko‘rsatayotgan bo‘lsa;

operatsiyani amalga oshirishda foydalanayotgan pul mablag‘lari yoki boshqa mol-mulk to‘liq yoki qisman Ro‘yxatga kiritilgan shaxsga tegishli bo‘lsa;

operatsiya qatnashchisi bo‘lgan yuridik shaxs Ro‘yxatga kiritilgan jismoniy yoki yuridik shaxsning mulkida yoki nazorat ostida bo‘lsa.

Ro‘yxatga kiritilgan shaxsning operatsiyasi to‘xtatib turilganda va (yoki) pul mablag‘larini yoki boshqa mol-mulkini ishga solmay to‘xtatib qo‘yilganda Notarial idoralar va advokatlik tuzilmalari ishga solmay to‘xtatib qo‘yilgan mulkning miqdori ko‘rsatilgan holda bu haqda maxsus vakolatli davlat organiga shubhali operatsiya to‘g‘risida uch soat ichida xabar yuborishlari lozim.

Notarial idoralar va advokatlik tuzilmalari to‘xtatilgan operatsiyani o‘tkazishni tiklashni Terrorchilik faoliyatida yoki ommaviy qirg‘in qurolini tarqatishda ishtirok etayotgan yoki ishtirok etishda gumon qilinayotgan shaxslar ro‘yxatiga kiritilgan shaxslarning operatsiyalarini to‘xtatib turish, pul mablag‘larini yoki boshqa mol-mulkini ishga solmay to‘xtatib qo‘yish, ishga solmay to‘xtatib qo‘yilgan mol-mulkidan foydalanishga ruxsat berish va operatsiyalarini tiklash tartibi to‘g‘risidagi nizomda (ro‘yxat raqami 3327, 2021-yil 19-oktabr) belgilangan tartibda amalga oshiradi.

26¹. Operatsiyaning taraflaridan biri jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatda doimiy yashayotgan, turgan yoki ro‘yxatga olingan shaxs bo‘lsa, bunday operatsiya maxsus vakolatli davlat organiga xabar qilinishi kerak.

27. Mijozning operatsiyasi shubhali deb topilgandan so‘ng, ichki nazorat qoidalariga rioya etilishi uchun javobgar shaxs mijozga nisbatan kelgusidagi xatti-harakatlar haqida qaror qabul qiladi, jumladan:

shubhali operatsiya to‘g‘risida maxsus vakolatli davlat organiga xabar berish haqida;

mijoz bilan operatsiya o‘tkazishga alohida e’tibor qaratish haqida;

qonunchilik hujjatlari yoki u bilan tuzilgan shartnomaga muvofiq mijoz bilan munosabatlarni to‘xtatish haqida.

28. Shubhali operatsiyalar haqidagi ma’lumotlar notarial idoralar yoki advokatlik tuzilmalari tomonidan maxsus vakolatli davlat organiga shubhali operatsiyalar deb topilgan paytdan e’tiboran bir ish kundan kechiktirmay beriladi.

Shubhali operatsiyalarga taalluqli har bir ma’lumot haqida axborot notarial idoralar yoki advokatlik tuzilmalarining ichki nazorat qoidalariga rioya etilishi uchun javobgar shaxs tomonidan qog‘oz va/yoki elektron ko‘rinishda yuritiladigan maxsus jurnallarga kiritiladi.

29. Notarial idoralar yoki advokatlik tuzilmalari ham tegishli operatsiyadan shubhani tasdiqlovchi yoki shubhani olib tashlovchi har qanday ma’lumotni maxsus vakolatli davlat organiga darhol xabar berishlari zarur.

30. Maxsus vakolatli davlat organiga xabar qilinishi lozim bo‘lgan operatsiyalar bo‘yicha qonunchilik hujjatlariga va mazkur Qoidalarga muvofiq quyidagilar rasmiylashtiriladi:

operatsiyaning turi va uni amalga oshirish asosi;

operatsiyani amalga oshirish sanasi va summasi;

operatsiyani amalga oshiruvchi jismoniy va yuridik shaxsni identifikatsiyalash uchun zarur bo‘lgan ma’lumotlar;

topshirig‘iga ko‘ra yoki nomidan operatsiyani bajarayotgan jismoniy va yuridik shaxsni identifikatsiyalash uchun zarur bo‘lgan ma’lumotlar;

operatsiyani amalga oshirayotgan jismoniy shaxs (ishonchli vakili) yoki yuridik shaxsning vakilini identifikatsiyalash uchun zarur bo‘lgan ma’lumotlar;

pul mablag‘lari yoki boshqa mol-mulk bilan bog‘liq operatsiyalar bo‘yicha oluvchini va uning vakilini identifikatsiyalash uchun zarur bo‘lgan ma’lumotlar.

31. Maxsus vakolatli davlat organiga axborot taqdim etish O‘zbekiston Respublikasi Vazirlar Mahkamasi tomonidan belgilangan tartibga muvofiq mazkur Qoidalarning 1-ilovasida keltirilgan shakl bo‘yicha amalga oshiriladi.

32. Notarial idoralar yoki advokatlik tuzilmalari pul mablag‘lari yoki boshqa mol-mulk bilan bog‘liq operatsiyalar haqidagi ma’lumotni, shuningdek mijozlarni lozim darajada tekshirish bo‘yicha identifikatsiyalangan materiallar va ma’lumotlarni shu jumladan ish yozishmalarini, har qanday tahlil natijalarini qonunchilik hujjatlarida o‘rnatilgan, lekin operatsiyalar amalga oshirilgan yoki mijozlar bilan munosabatlar to‘xtatilgandan keyin besh yildan kam bo‘lmagan muddatlar davomida saqlashlari zarur.

33. Notarial idoralar yoki advokatlik tuzilmalari jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bilan bog‘liq bo‘lgan axborotga kirish imkoniyatini cheklaydilar, uning tarqalib ketmasligini ta’minlaydilar hamda yuridik va jismoniy shaxslarga ularning operatsiyalari haqida maxsus vakolatli davlat organiga ma’lumot berilganligi to‘g‘risida axborot berish huquqiga ega emaslar.

Notarial idoralar yoki advokatlik tuzilmalari xodimlarining ichki nazorat bo‘yicha vazifalarini bajarish jarayonida olgan axborotni oshkor etmasligini (yoki shaxsiy maqsadlarda, yo uchinchi shaxslar manfaatlari yo‘lida foydalanmasliklarini) ta’minlaydilar.

33¹. Mas’ul xodimning faoliyatida foydalanilgan barcha hujjatlar (O‘zbekiston Respublikasi Adliya vazirligi va maxsus vakolatli davlat organi bilan yozishmalar, shu jumladan yuborilgan xabarlarning qog‘ozdagi va elektron nusxalari, mijozlarning qog‘ozdagi va elektron anketalari, jurnallar va boshqalar)dan foydalanilishini cheklash maqsadida, bunday hujjatlar va ularning ro‘yxati bevosita maxsus jihozlangan xonada yoki yonmaydigan va muhrlanadigan seyfda ushbu xodim tomonidan saqlanishi lozim.

33². Hujjatlarning elektron shakllari dasturiy usulda arxivlashtirilishi, elektron axborot tashuvchi uskunalarga yozib qo‘yilishi hamda mas’ul xodim tomonidan ularning ro‘yxati bilan birgalikda yonmaydigan va muhrlanadigan seyfda saqlanishi zarur.

34. Notarial idoralari va advokatlik tuzilmalari tomonidan mazkur Qoidalar talablariga rioya etilishi ustidan monitoring va nazorat qilish Adliya vazirligi tomonidan maxsus vakolatli davlat organi bilan birgalikda amalga oshiriladi.

Notarial idoralar va advokatlik tuzilmalari tomonidan mazkur Qoidalar talablariga rioya qilinishi ustidan monitoring va nazorat axborot-kommunikatsion texnologiyalaridan foydalangan holda hamda monitoring va nazoratni amalga oshirish jarayonida aniqlangan xavf-xatardan kelib chiqib, mutaxassislarni jalb qilish yo‘li bilan amalga oshiriladi.

34¹. Mazkur Qoidalar, shuningdek, jinoiy faoliyatdan olingan daromadlarni legallashtirish, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bo‘yicha chora-tadbirlarni tartibga soluvchi boshqa hujjatlar notarial idoralar va advokatlik tuzilmalarining barcha xodimlariga yetkazilishi lozim.

34². Notarial idoralar va advokatlik tuzilmalari ichki va tashqi vaziyatlar o‘zgarishini inobatga olgan holda ichki nazorat tizimi samaradorligini doimiy ravishda monitoring qiladi va baholab boradi, shuningdek ish samaradorligini ta’minlash uchun zaruratga qarab uni mustahkamlaydi.

35. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasidagi qonunchilik hujjatlari buzilganligi hollarini yashirishda, shuningdek, mazkur Qoidalar talablarining buzilishida aybdor shaxslar qonunchilik hujjatlarida belgilangan tartibda javobgarlikka tortiladilar.

36. Mazkur Qoidalar O‘zbekiston Respublikasi Advokatlar palatasi bilan kelishilgan.

1. To‘liq, shuningdek agar davlat ro‘yxatidan o‘tganligi to‘g‘risidagi guvohnomasida ko‘rsatilgan bo‘lsa, qisqartirilgan nomi.

2. Davlat ro‘yxatidan o‘tganligi to‘g‘risidagi ma’lumot: sana, raqam, ro‘yxatga oluvchi organ nomi.

3. Soliq to‘lovchining identifikatsiya raqami.

4. Joylashgan joyi (pochta manzili).

5. Davlat ro‘yxatidan o‘tganligi to‘g‘risidagi guvohnomada ko‘rsatilgan boshqa ma’lumotlar.

6. Mavjud bo‘lgan litsenziyalar yoki ruxsat etish xususiyatiga ega hujjatlar (berilgan sanasi va tartib raqami, kim tomonidan berilganligi, amal qilish muddati) yoxud xabarnoma qabul qilinganligi to‘g‘risidagi tasdiqnoma (berilgan sanasi va tartib raqami, kim tomonidan berilganligi) haqidagi ma’lumotlar.

7. Mijoz nomidan ish ko‘ruvchi jismoniy shaxsning identifikatsiyasi to‘g‘risidagi ma’lumotlar.

8. Mijozning ta’sischilari (aksiyadorlari, ishtirokchilari) haqidagi hamda ularning ustav fondi (kapitali)dagi ulushlari to‘g‘risidagi ma’lumotlar.

9. Ro‘yxatga olingan va to‘langan ustav fondi (kapitali) miqdori to‘g‘risidagi ma’lumotlar.

10. Mijozning boshqaruv organlari (yuridik shaxsning boshqaruv organlarining tuzilmasi va shaxsiy tarkibi) to‘g‘risidagi ma’lumotlar.

11. Bog‘lanish ma’lumotlari (telefon raqami, elektron pochta, veb-sayt (agar mavjud bo‘lsa).