O‘zbekiston Respublikasi Prezidentining 2009-yil 19-iyundagi PQ-1134-son “Devorbop materiallar ishlab chiqarishni ko‘paytirishni rag‘batlantirish va sifatini yaxshilash borasidagi qo‘shimcha chora-tadbirlar to‘g‘risida”gi qarorining 3-bandiga muvofiq O‘zbekiston Respublikasi Moliya vazirligi, Davlat soliq qo‘mitasi qaror qiladilar:

1. Pishgan g‘isht ishlab chiqaruvchi korxonalar tomonidan soliq imtiyozlari va preferensiyalarni qo‘llash tartibi to‘g‘risidagi nizom ilovaga muvofiq tasdiqlansin.

2. Ushbu qaror O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Ushbu Nizom O‘zbekiston Respublikasi Prezidentining 2009-yil 19-iyundagi PQ-1134-son “Devorbop materiallar ishlab chiqarishni ko‘paytirishni rag‘batlantirish va sifatini yaxshilash borasidagi qo‘shimcha chora-tadbirlar to‘g‘risida”gi qarorining 3-bandiga muvofiq pishgan g‘isht ishlab chiqaruvchi korxonalar tomonidan soliq imtiyozlari va preferensiyalarini qo‘llash tartibini belgilaydi.

1. O‘zbekiston Respublikasi Prezidentining 2009-yil 19-iyundagi PQ-1134-son “Devorbop materiallar ishlab chiqarishni ko‘paytirishni rag‘batlantirish va sifatini yaxshilash borasidagi qo‘shimcha chora-tadbirlar to‘g‘risida”gi qaroriga muvofiq 2009-yilning 1-iyulidan 2012-yilning 1-yanvariga qadar maxsus pechlardan (aylanma, tunnelsimon va boshqalar) foydalangan holda, zamonaviy energiya tejaydigan texnologiyalar asosida pishgan g‘isht ishlab chiqaruvchi korxonalar quyidagilarni to‘lashdan ozod qilinadilar:

a) yuridik shaxslardan olinadigan foyda solig‘i;

b) qo‘shilgan qiymat solig‘i;

v) yer qa’ridan foydalanganlik uchun soliq;

g) suv resurslardan foydalanganlik uchun soliq;

d) mol-mulk solig‘i;

e) yer solig‘i;

j) obodonlashtirish va ijtimoiy infratuzilmani rivojlantirish solig‘i;

z) yagona soliq to‘lovi;

i) tovarlarni realizatsiya qilish hajmidan hisoblab chiqariladigan davlat maqsadli jamg‘armalarga va Ta’lim muassasalarini rekonstruksiya qilish, mukammal ta’mirlash va jihozlash bo‘yicha budjetdan tashqari jamg‘armasiga majburiy to‘lovlar.

2. 2012-yilning 1-yanvaridan boshlab maxsus pechlardan foydalangan holda pishgan g‘isht ishlab chiqaruvchi, yer qa’ridan foydalanganlik uchun soliq solinadigan foydali qazilmalarni qazib chiqaruvchi mikrofirmalar va kichik korxonalarga yer qa’ridan foydalanganlik uchun soliqni to‘lash majburiyati saqlangan holda yagona soliq to‘loviga o‘tish huquqi beriladi.

3. Soliq imtiyozlarini buxgalteriya hisobida aks ettirish tartibi Yuridik shaxslarga soliqlar, bojxona va majburiy to‘lovlarni budjetga to‘lash bo‘yicha berilgan imtiyozlarni rasmiylashtirish va buxgalterlik hisobida aks ettirish tartibi to‘g‘risidagi nizom (ro‘yxat raqami 1463, 2005-yil 2-aprel) (“O‘zbekiston Respublikasi qonun hujjatlari to‘plami”, 2005-yil, 14-son, 105-modda) bilan tartibga solinadi.

4. Ushbu Nizomning 1-bandida ko‘rsatilgan imtiyozlar asosiy faoliyat turi — zamonaviy energiya tejaydigan texnologiyalar asosida pishgan g‘isht ishlab chiqarishga:

gazda ishlaydigan korxonalarga — O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasining tegishli hududiy organining xulosasiga asosan ushbu Nizomning 1-ilovasida keltirilgan shaklda;

ko‘mirda ishlaydigan korxonalarga — O‘zbekiston Respublikasi Elektr energetikada nazorat bo‘yicha davlat inspeksiyasining xulosasiga asosan ushbu Nizomning 1a - ilovasida keltirilgan shaklda taqdim etiladi.

5. Korxonalar davlat soliq xizmati organlariga O‘zbekiston Respublikasi Prezidentining 2009-yil 19-iyundagi PQ-1134-son “Devorbop materiallar ishlab chiqarishni ko‘paytirishni rag‘batlantirish va sifatini yaxshilash borasidagi qo‘shimcha chora-tadbirlar to‘g‘risida”gi qaroriga asosan soliqlar va davlat maqsadli jamg‘armalariga va Ta’lim muassasalarini rekonstruksiya qilish, mukammal ta’mirlash va jihozlash bo‘yicha budjetdan tashqari jamg‘armasiga majburiy ajratmalarni to‘lashdan ozod etilganligi to‘g‘risidagi yozma xabarnomani ushbu Nizomning 2-ilovasida keltirilgan shaklda taqdim etadilar. Xabarnomaga maxsus pechlardan foydalangan holda zamonaviy energiya tejaydigan texnologiyalar asosida pishgan g‘isht ishlab chiqaruvchi korxona ekanligini tasdiqlovchi O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasining tegishli hududiy organining yoki O‘zbekiston Respublikasi Elektr energetikada nazorat bo‘yicha davlat inspeksiyasining xulosasi ilova qilinadi.

6. Maxsus pechlardan foydalangan holda zamonaviy energiya tejaydigan texnologiyalar asosida pishgan g‘isht ishlab chiqarishni amalga oshirish bilan birga boshqa faoliyat turi bilan shug‘ullanuvchi korxonalar ushbu faoliyat turlari bo‘yicha alohida-alohida hisob yuritishlari hamda soliqlar va boshqa majburiy to‘lovlarni qonun hujjatlarda nazarda tutilgan tartibda to‘lashlari lozim.

7. Ushbu Nizomning 2-bandida ko‘rsatilgan preferensiyalardan foydalanishda mikrofirmalar va kichik korxonalar yagona soliq to‘lovini to‘lashga o‘tish to‘g‘risidagi xabarnomaga korxona maxsus pechlardan foydalangan holda zamonaviy energiya tejaydigan texnologiyalar asosida pishgan g‘isht ishlab chiqaruvchi ekanligini tasdiqlovchi O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasining tegishli hududiy organining yoki O‘zbekiston Respublikasi Elektr energetikada nazorat bo‘yicha davlat inspeksiyasining xulosasini ilova qiladilar. Yagona soliq to‘lovini to‘lashga o‘tish to‘g‘risidagi xabarnoma O‘zbekiston Respublikasi Soliq kodeksi nazarda tutilgan muddatlarda taqdim etiladi.

8. 2012-yilning 1-yanvaridan keyin tashkil etilayotgan mikrofirmalar va kichik korxonalar uchun, ushbu Nizomning 2-bandida ko‘rsatilgan preferensiyalar, ular davlat ro‘yxatidan o‘tkazilgan sanadan boshlab taqdim etiladi.

9. Soliq imtiyozlari va preferensiyalarining to‘g‘ri qo‘llanishi ustidan nazorat O‘zbekiston Respublikasi davlat soliq xizmati organlari tomonidan amalga oshiriladi.

10. Ushbu Nizom O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasi bilan kelishilgan.