“Qishloq taraqqiyoti va farovonligi yili” Davlat dasturini bajarish yuzasidan hamda yangi korxonalar barpo etish va ishlab turganlarini modernizatsiya qilish, ishlab chiqarish sarf-xarajatlari kamayishini hamda tayyor mahsulot narxining arzonlashuvini ta’minlaydigan zamonaviy energiya tejaydigan texnologiyalarni tatbiq qilish hisobiga sifatli devorbop qurilish materiallari ishlab chiqarish hajmlarini ko‘paytirish va shu asosda ichki bozorni shunday materiallar bilan to‘ldirish, uy-joylar, ayniqsa qishloq joylarda imorat qurayotgan aholining ortib borayotgan talab-ehtiyojini yanada to‘liqroq qondirish maqsadida:

1. O‘zbekiston Respublikasi Iqtisodiyot vazirligi, Moliya vazirligi, “O‘zqurilishmateriallari” aksiyadorlik kompaniyasi tomonidan manfaatdor idoralar va korxonalar bilan birgalikda ishlab chiqilgan 2009—2011-yillarda pishgan g‘isht ishlab chiqaruvchi yangi zamonaviy quvvatlarni yaratish Dasturi ilovaga* muvofiq ma’qullansin.

O‘zbekiston Respublikasi Vazirlar Mahkamasi ikki hafta muddatda ushbu tasdiqlangan Dasturni amalga oshirish bo‘yicha kompleks tashkiliy-texnikaviy tadbirlarni tasdiqlasin, bu tadbirlar:

zamonaviy energiya tejaydigan texnologiyalar bilan jihozlangan, shu jumladan mini-texnologiyalar qo‘llaniladigan devorbop materiallar ishlab chiqarish bo‘yicha yangi quvvatlar belgilangan muddatlarda foydalanishga topshirilishini;

2010-yilning 1-yanvariga qadar muddatda pishgan g‘isht ishlab chiqaruvchi amaldagi korxonalar modernizatsiya qilinib, nostandart, tejamsiz pechlarning maxsus energiya va resurslarni tejaydigan texnologiyalarga almashtirilishini;

devorbop materiallarning muqobil turlarini qo‘llanish, shu jumladan yig‘ma, kompozitsion va kichik blokli konstruksiyalardan foydalanish asosida obyektlar qurilishining yangi zamonaviy industrial texnologiyalari keng joriy etilishini ta’minlaydi.

2. Shunday tartib o‘rnatilsinki, unga muvofiq:

2009-yilning 1-iyulidan boshlab 2012-yilning 1-yanvariga qadar bo‘lgan davrda maxsus pechlar (aylanma, tunnelsimon va boshqalar)dan foydalangan holda zamonaviy energiya tejaydigan texnologiyalar asosida pishgan g‘isht ishlab chiqaruvchi korxonalar barcha turdagi soliqlar, davlat maqsadli jamg‘armalariga va Ta’lim muassasalarini rekonstruksiya qilish, mukammal ta’mirlash va jihozlash jamg‘armasiga majburiy ajratmalar to‘lashdan ozod qilinadi (yagona ijtimoiy to‘lov bundan mustasno);

2010-yilning 1-yanvaridan boshlab nostandart, tejamsiz pechlarni maxsus energiya tejaydigan texnologiyalarga almashtirmagan, shuningdek belgilangan solishtirma sarf normalaridan ortiqcha hajmda tabiiy gazdan foydalanayotgan pishgan g‘isht ishlab chiqaruvchi korxonalarga tabiiy gaz amaldagi ulgurji narxda beriladi;

O‘zbekiston Respublikasi Davlat geologiya qo‘mitasi tomonidan 2012-yilning 1-yanvariga qadar muddatda energiya tejaydigan texnologiyalarni tatbiq qilgan pishgan g‘isht ishlab chiqaruvchi korxonalarga soddalashtirilgan tartib asosida xom ashyo bazasini yaratish va kengaytirish, g‘ishtbop xom ashyoni tajriba-sanoat va sanoat ko‘lamida qazib olish maqsadida geologik jihatdan o‘rganish uchun yer bag‘ri uchastkalaridan foydalanish huquqini olishga litsenziya beriladi, bunda tegishli yer bag‘ri uchastkalaridan foydalanishning aniq shartlari belgilab qo‘yiladi.

3. O‘zbekiston Respublikasi Moliya vazirligi Davlat soliq qo‘mitasi hamda boshqa manfaatdor vazirliklar va idoralar bilan birgalikda 2009-yilning 1-iyuligacha bo‘lgan muddatda pishgan g‘isht ishlab chiqaruvchi korxonalar uchun ushbu qarorda belgilangan soliq imtiyozlari va preferensiyalarini qo‘llanish tartibini ishlab chiqsin va tasdiqlasin, unga rioya etilishi ustidan qattiq nazoratni ta’minlasin.

4. “O‘zqurilishmateriallari” aksiyadorlik kompaniyasi:

bir oy muddatda mashinasozlik korxonalarida devorbop materiallar va ularning ehtiyot qismlarini ishlab chiqarish bo‘yicha zamonaviy texnologik liniyalar va uskunalar tayyorlashni mahalliylashtirishga oid takliflarni O‘zbekiston Respublikasi Vazirlar Mahkamasiga kiritsin;

“O‘zdavneftgazinspeksiya” va “O‘ztransgaz” aksiyadorlik kompaniyasi bilan birgalikda 2009-yilning 1-avgustiga qadar muddatda pishgan g‘isht ishlab chiqarishga tabiiy gaz sarfi normalarini hisob-kitob qilish metodikasini ishlab chiqsin va belgilangan tartibda tasdiqlasin;

ikki oy muddatda O‘zbekiston Respublikasi “Davarxitektqurilish” qo‘mitasi hamda loyiha institutlari bilan birgalikda energiya va resurslarni tejaydigan texnologiyalar qo‘llaniladigan turli quvvatdagi g‘isht zavodlarining bir xildagi namunaviy loyihalarini ishlab chiqsin va belgilangan tartibda tasdiqlasin.

5. Yoqilg‘i-energetika resurslarini tejash bo‘yicha komissiya (Sh.M. Mirziyoyev) “O‘zqurilishmateriallari” AK, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda nostandart, tejamsiz pechlarni maxsus energiya va resurslarni tejaydigan ishlab chiqarish texnologiyalariga almashtirgan holda g‘isht korxonalarini modernizatsiya qilishga oid chora-tadbirlar amalga oshirilishi monitoringini tashkil qilsin va har chorakda Vazirlar Mahkamasiga materiallarni taqdim etib tursin.

7. O‘zbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida takliflar kiritsin.

8. Mazkur qarorning ijrosini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.