Sud hokimiyati mustaqilligini kuchaytirish, sudyalar zaxirasini shakllantirish, nomzodlarni tanlash va lavozimlarga tavsiya etishning demokratik tamoyillarini mustahkamlash, sudyalar korpusi barqarorligini taʼminlash, Sudyalarni tanlash va lavozimlarga tavsiya etish boʻyicha oliy malaka komissiyasi faoliyatini tashkil qilishni tubdan oʻzgartirish maqsadida hamda Oʻzbekiston Respublikasining “Sudlar toʻgʻrisida”gi Qonuni 11-moddasiga muvofiq :

1. Quyidagilar:

Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasining tashkiliy tuzilmasi va shtatlar soni 1 va 2-ilovalarga muvofiq;

Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi toʻgʻrisida yangi tahrirdagi nizom, shuningdek, uning tarkibi 3 va 4-ilovalarga* muvofiq tasdiqlansin.

2. Oʻzbekiston Respublikasi Vazirlar Mahkamasi mazkur Farmonni ijro etish yuzasidan ikki hafta muddatda Komissiyani moliyaviy va moddiy-texnikaviy jihatdan taʼminlash toʻgʻrisida qaror qabul qilsin.

3. Oʻzbekiston Respublikasi Adliya vazirligi tegishli vazirlik va idoralar bilan birgalikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

4. Quyidagilar oʻz kuchini yoʻqotgan deb hisoblansin:

“Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi toʻgʻrisida” Oʻzbekiston Respublikasi Prezidentining 2001-yil 19-martdagi PF–2817-son Farmoni;

“Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi toʻgʻrisida” Oʻzbekiston Respublikasi Prezidentining 2001-yil 24-sentabrdagi PF–2943-son Farmoni;

“Oʻzbekiston Respublikasi Prezidentining baʼzi farmonlariga oʻzgartish va qoʻshimchalar kiritish toʻgʻrisida” Oʻzbekiston Respublikasi Prezidentining 2005-yil 25-martdagi PF–3587-son Farmoni ilovasining 2-bandi.

5. Ushbu Farmonning ijrosini nazorat qilish Oʻzbekiston Respublikasi Prezidenti Davlat maslahatchisining oʻrinbosari A. Nabiyev zimmasiga yuklansin.

1. Ushbu Nizom Oʻzbekiston Respublikasi Prezidenti huzuridagi Sudyalarni tanlash va lavozimlarga tavsiya etish boʻyicha oliy malaka komissiyasi (bundan buyon matnda Komissiya deb yuritiladi) faoliyatini tartibga soladi.

2. Komissiya sud hokimiyatining chinakam mustaqilligini taʼminlash siyosatini, sud kadrlarini tanlash va joy-joyiga qoʻyish tamoyillarini yanada demokratlashtirishni amalga oshiradigan Oʻzbekiston Respublikasi Prezidenti huzuridagi doimiy ishlovchi organ hisoblanadi.

3. Komissiya zimmasiga sudlar faoliyatini tashkiliy jihatdan taʼminlash, Oʻzbekiston Respublikasi Oliy sudi, Oʻzbekiston Respublikasi Oliy xoʻjalik sudi, fuqarolik va jinoyat ishlari boʻyicha Qoraqalpogʻiston Respublikasi Oliy sudlari, fuqarolik va jinoyat ishlari boʻyicha viloyatlar va Toshkent shahar, tumanlararo, tuman (shahar) sudlari, harbiy sudlar, Qoraqalpogʻiston Respublikasi xoʻjalik sudi, viloyatlar va Toshkent shahar xoʻjalik sudlari sudyalarini tanlash va lavozimlarga tavsiya etish vazifalari yuklanadi.

4. Komissiya oʻz faoliyatini Oʻzbekiston Respublikasi Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining kadrlar siyosatini roʻyobga chiqarishga qaratilgan farmon, qaror va farmoyishlari hamda mazkur Nizom asosida sudyalarning mustaqilligi va ularning faqat qonunga boʻysunishi tamoyillariga qatʼiy rioya etgan holda amalga oshiradi.

5. Komissiyaning asosiy vazifalari quyidagilardan iborat:

sudyalarni tanlash va joy-joyiga qoʻyishning demokratik asoslarini takomillashtirish chora-tadbirlarini ishlab chiqish va amalga oshirish;

sudya kadrlarni tanlash va Oʻzbekiston Respublikasi Prezidentining tasdigʻiga taqdim etishda qonuniylikni taʼminlash;

sudyalar mustaqilligi va ularning ijtimoiy muhofazasini mustahkamlashga qaratilgan chora-tadbirlarni amalga oshirish;

sudyalik lavozimlariga kadrlarni tanlash va joy-joyiga qoʻyish borasidagi ishlarni yaxshilash hamda sudya kadrlarni tarbiyalash boʻyicha takliflar ishlab chiqish;

sudyalikka nomzodlarni tanlab olishning huquqiy negizini takomillashtirish, ularning kasb mahoratini oshirish yuzasidan takliflar ishlab chiqish;

sudya kadrlarni tanlash va joy-joyiga qoʻyish boʻyicha ishlarning ochiq-oydinligi va oshkoraligini, bu ishning vertikal boʻyicha hisobot berilishini taʼminlash, shuningdek bu sohada xizmat mavqeyini suiisteʼmol qilish holatlarining oldini olish;

sudyalar zaxirasini shakllantirish, ularni tanlash va nomzodlarni lavozimlarga taqdim etish masalalari boʻyicha sudyalarning malaka hayʼatlari faoliyati ustidan nazoratni amalga oshirish;

sudlar faoliyatini tashkiliy va axborot-tahliliy jihatdan taʼminlash;

sudyalarni tanlash va tayinlash borasida ilgʻor xorijiy tajribalarni oʻrganish va Komissiyaning ish amaliyotiga tatbiq etish.

6. Quyilgan vazifalarni bajarish uchun Komissiyaga quyidagi vakolatlar beriladi:

taqdim etilgan nomzodlarning Oʻzbekiston Respublikasi Oliy sudi, Oʻzbekiston Respublikasi Oliy xoʻjalik sudi, fuqarolik va jinoyat ishlari boʻyicha Qoraqalpogʻiston Respublikasi Oliy sudlari, fuqarolik va jinoyat ishlari boʻyicha viloyatlar va Toshkent shahar, tumanlararo, tuman (shahar) sudlari, harbiy sudlar, Qoraqalpogʻiston Respublikasi xoʻjalik sudi, viloyatlar va Toshkent shahar xoʻjalik sudlari sudyasi lavozimlariga munosibligini aniqlaydi hamda mazkur masala boʻyicha xulosalar beradi.

fuqarolik va jinoyat ishlari boʻyicha viloyatlar, Toshkent shahar, tumanlararo, tuman (shahar) sudlari, harbiy sudlar, viloyatlar va Toshkent shahar xoʻjalik sudlari sudyalari lavozimlariga tavsiya etiladigan nomzodlar boʻyicha Oʻzbekiston Respublikasi Prezidentiga taqdimnomalar kiritadi;

fuqarolik va jinoyat ishlari boʻyicha viloyatlar, Toshkent shahar, tumanlararo, tuman (shahar) sudlari, harbiy sudlar, viloyatlar va Toshkent shahar xoʻjalik sudlari sudyalari vakolatlarini muddatidan oldin tugatish toʻgʻrisida Oʻzbekiston Respublikasi Prezidentiga taqdimnomalar kiritadi;

Oʻzbekiston Respublikasi Oliy sudi, Oliy xoʻjalik sudi, fuqarolik va jinoyat ishlari boʻyicha Qoraqalpogʻiston Respublikasi sudlari, Qoraqalpogʻiston Respublikasi xoʻjalik sudi sudyalarining vakolatlarini muddatidan oldin tugatish toʻgʻrisidagi taqdimnomalarni (materiallarni) koʻrib chiqadi va ular yuzasidan xulosalar beradi;

sudya kadrlarning zaxirasini shakllantirish va undan samarali foydalanish borasidagi ishlarning tashkil etilishini taʼminlaydi;

nomzodlarni oʻrganishning turli usullaridan foydalanadi (suhbatlashish, mustaqil ekspertlar tomonidan sinab koʻrish, topshirilgan muammo boʻyicha mavzuga oid referatlar tayyorlash, tezkor savol-javoblar oʻtkazish va hokazolar);

sudya kadrlar bilan ishlashdagi kamchiliklar xususida taqdimnomalar, uni takomillashtirish boʻyicha takliflar kiritadi;

sudyalar malaka hayʼatlarining faoliyatini takomillashtirish yuzasidan tavsiyalar beradi;

Komissiya zimmasiga yuklatilgan vazifalarni amalga oshirish chogʻida Oʻzbekiston Respublikasi Oliy sudi, Oliy xoʻjalik sudi, Sudyalar uyushmasi, huquqni muhofaza qilish organlari, boshqa muassasalar va tashkilotlar, jamoat birlashmalari bilan hamkorlik qiladi.

7. Komissiya oʻz zimmasiga yuklatilgan vazifalarni amalga oshirish chogʻida sudyalarning malaka hayʼatlari bilan hamkorlik qiladi:

sudyalarning malaka hayʼatlari tomonidan taqdim etilgan nomzodlar zaxirasini shakllantirish, ularni tanlab olish va nomzodlarni sudyalik lavozimlariga tavsiya etish masalasini hal qilish uchun zarur boʻlgan materiallarni (arizalar, bildirilgan fikrlar, xulosalar, maʼlumotnomalar va boshqa hujjatlarni) koʻrib chiqadi;

sudyalar zaxirasini shakllantirish, tanlab olish va lavozimlarga tavsiya etish masalalari boʻyicha sudyalarning malaka hayʼatlari faoliyatini vaqti-vaqti bilan oʻrganadi.

sudya kadrlar bilan ishlash toʻgʻrisida sudyalar malaka hayʼatlari raislarining hisobotini muntazam ravishda tinglab boradi va sudyalarning tegishli malaka hayʼatlari faoliyatini takomillashtirish boʻyicha tavsiyalar beradi;

sudyalarning malaka hayʼatlaridan sudyalik lavozimlariga boʻsh oʻrinlar mavjudligi haqidagi, sudya kadrlarning zaxirasi qanday shakllantirilayotgani toʻgʻrisidagi axborotni, Komissiya oldida turgan vazifalarni hal etish uchun zarur boʻlgan boshqa axborotni talab qilib oladi;

sudyalarning malaka hayʼatlariga sudya kadrlarni tayyorlash va ularning malakasini oshirish, ushbu sohada xalqaro tajribani oʻrganish va undan foydalanish borasidagi ishlarni tashkil qilish bilan bogʻliq boshqa topshiriqlarni beradi.

8. Zaxirani shakllantirish va sudyalik lavozimlariga taqdim etish uchun nomzodlarni tanlash boʻyicha ishlar sudyalarning malaka hayʼatlari tomonidan amalga oshiriladi.

mazkur bandning uchinchi xatboshida koʻrsatilgan lavozimlardan tashqari, fuqarolik va jinoyat ishlari boʻyicha tumanlararo, tuman (shahar) sudlari, fuqarolik va jinoyat ishlari boʻyicha Qoraqalpogʻiston Respublikasi oliy sudlari, fuqarolik va jinoyat ishlari boʻyicha viloyatlar va Toshkent shahar sudlari, harbiy sudlar sudyaligiga nomzodlarning zaxirasini shakllantirish sudyalarning tegishli malaka hayʼatlari tomonidan amalga oshiriladi.

Oʻzbekiston Respublikasi Oliy sudi sudyaligiga, fuqarolik va jinoyat ishlari boʻyicha Qoraqalpogʻiston Respublikasi oliy sudlarining, fuqarolik va jinoyat ishlari boʻyicha viloyatlar va Toshkent shahar sudlarining, Oʻzbekiston Respublikasi Harbiy sudining raisi va rais oʻrinbosarlari lavozimiga nomzodlar zaxirasini shakllantirish Oliy malaka hayʼati tomonidan amalga oshiriladi.

Oʻzbekiston Respublikasi Oliy xoʻjalik sudi, Qoraqalpogʻiston Respublikasi xoʻjalik sudi, viloyatlar va Toshkent shahar xoʻjalik sudlarining sudyaligiga nomzodlar zaxirasini shakllantirish Xoʻjalik sudlari sudyalarining malaka hayʼati tomonidan amalga oshiriladi.

9. Umumiy yurisdiksiya sudlarining malaka hayʼatlariga tegishlicha fuqarolik va jinoyat ishlari boʻyicha Qoraqalpogʻiston Respublikasi oliy sudlari, fuqarolik va jinoyat ishlari boʻyicha viloyatlar, Toshkent shahar sudlari, Oʻzbekiston Respublikasi Harbiy sudi raislari rahbarlik qiladilar.

Xoʻjalik sudlari sudyalarining malaka hayʼati raisi Oliy xoʻjalik sudi, Qoraqalpogʻiston Respublikasi xoʻjalik sudi, viloyatlar va Toshkent shahar xoʻjalik sudlari sudyalari orasidan saylanadi.

Umumiy yurisdiksiya sudlarining oliy malaka hayʼati raisi Oʻzbekiston Respublikasi Oliy sudi Plenumi tomonidan Oʻzbekiston Respublikasi Oliy sudi sudyalari orasidan saylanadi.

10. Fuqarolik va jinoyat ishlari boʻyicha tumanlararo, tuman (shahar) sudlari, okrug va hududiy harbiy sudlar, Qoraqalpogʻiston Respublikasi xoʻjalik sudi, viloyatlar va Toshkent shahar xoʻjalik sudlarining sudyaligiga (xoʻjalik sudlari raislari va rais oʻrinbosarlari bundan mustasno) nomzodlarning zaxirasini shakllantirish uchun sudyalarning tegishli malaka hayʼatlari oʻzlarini zaxiraga kiritish yoki sudyalarning aniq boʻsh lavozimlarini egallash istagini bildirgan shaxslardan arizalarni qabul qiladilar. Arizaga kadrlarni hisobga olish shaxsiy varagʻi, tarjimai hol, oliy yuridik maʼlumot toʻgʻrisidagi diplom nusxasi, mehnat daftarchasidan koʻchirma, oxirgi ish joyidan tavsifnoma ilova qilinadi. Oʻzbekiston Respublikasining yigirma besh yoshdan kichik boʻlmagan, oliy yuridik maʼlumotli, mutaxassisligi boʻyicha ish staji kamida uch yil boʻlgan fuqarolari sudyalikka nomzodlar zaxirasiga kiritilishlari mumkin. Sudlangan shaxslar sudyalikka nomzodlar zaxirasiga qabul qilinishlari mumkin emas.

Boshqa sudyalik lavozimlariga zaxirani shakllantirish belgilangan tartibda tegishli malaka hayʼatlari tomonidan amalga oshiriladi.

11. Ushbu Nizomning 10-bandi talablariga rioya etilgan taqdirda, arizalar qabul qilinishini rad etishga yoʻl qoʻyilmaydi.

Arizani qabul qilishni rad etish xususida Komissiyaga shikoyat qilinishi mumkin.

12. Arizalarni qabul qilish va roʻyxatga olish, hujjatlarning toʻliqligi va toʻgʻriligini tekshirish ishlarini sudyalar malaka hayʼatining masʼul kotibi amalga oshiradi.

13. Sudyalarning malaka hayʼatlari nomzodlarning kasbiy, axloqiy va ishchanlik fazilatlarini oʻrganib chiqishni tashkil etadilar hamda hujjatlar kelib tushgan paytdan boshlab kechi bilan ikki oy muddatda malaka imtihonlarini oʻtkazadilar, shu imtihonlarning natijalari boʻyicha ularni sudyalikka nomzodlar zaxirasiga kiritish yoki kiritishni rad etish toʻgʻrisida qaror chiqaradilar.

Sudyalarning malaka hayʼatlari eng yaxshi tayyorgarlik koʻrgan, yuqori malakali yuristlar — sudlar, huquqni muhofaza qilish organlari, muassasalar va tashkilotlarning xodimlarini nomzodlar zaxirasiga kiritadilar.

Malaka hayʼatlarining majlislarida tegishlicha fuqarolik va jinoyat ishlari boʻyicha Qoraqalpogʻiston Respublikasi oliy sudlarining, fuqarolik va jinoyat ishlari boʻyicha viloyatlar va Toshkent shahar, tumanlararo, tuman (shahar) sudlarining, harbiy sudlarning, Qoraqalpogʻiston Respublikasi xoʻjalik sudi, viloyatlar va Toshkent shahar xoʻjalik sudlarining sudyalari ishtirok etishlari mumkin, ular sudyalik lavozimiga har bir nomzod boʻyicha oʻz fikrini bildirishga, malaka hayʼatining qaroriga qoʻshilmagan taqdirda esa oʻz fikrini yozma ravishda Komissiyaga yuborishga haqlidirlar.

Zaxiraga kiritilgan shaxslar xususidagi maʼlumotlar Sudyalarning tegishli malaka hayʼatlari tomonidan Komissiyaga yoʻllanadi.

14. Sudyalarning malaka hayʼatlari zaxirada boʻlgan va ilk bor fuqarolik va jinoyat ishlari boʻyicha tumanlararo, tuman (shahar) sudlari, okrug va hududiy harbiy sudlar, Qoraqalpogʻiston Respublikasi xoʻjalik sudi hamda viloyatlar va Toshkent shahar xoʻjalik sudlarining sudyasi lavozimlariga taqdim etilayotgan shaxslarni Oʻzbekiston Respublikasi Adliya vazirligi huzuridagi Yuristlar malakasini oshirish markazida maxsus kurslarda oʻqitishni tashkil etadi. Mazkur maxsus kurslarni tamomlaganligi toʻgʻrisidagi sertifikat, u berilgan kundan boshlab uch yil mobaynida amal qiladi.

15. Sudyalik lavozimi boʻshab qolgan taqdirda Sudyalarning tegishli malaka hayʼati sudyalik lavozimiga zaxirada turgan shaxslarni xabardor qiladi. Shu bilan birga 14-bandda nazarda tutilgan sudyalik lavozimiga ilk bor taqdim etilayotgan nomzodlar Oʻzbekiston Respublikasi Adliya vazirligi huzuridagi Yuristlar malakasini oshirish markazi maxsus kurslarini tugatganligi toʻgʻrisidagi sertifikatga ega boʻlgan taqdirdagina xabardor qilinadi.

Boʻshab qolgan sudyalik lavozimini egallash uchun tanlab olishda ishtirok etish istagini bildirgan shaxslar malaka imtihonini topshiradilar, ana shu imtihon natijalari boʻyicha sudyalarning malaka hayʼati ularning sudyalik lavozimiga munosib yoki munosib emasligi toʻgʻrisida qaror qabul qiladi.

16. Sudyalarning malaka hayʼati boʻsh sudyalik lavozimiga tavsiya etilgan kamida ikki nomzodga doir hujjatlarni Komissiyaga yoʻllaydi.

17. Vakolat muddatlari tugayotgan sudyalarni yangi muddatga taqdim etish toʻgʻrisidagi masala sudyalarning tegishli malaka hayʼatlari tomonidan koʻrib chiqiladi. Sudyalar malaka hayʼatining mazkur shaxslar lavozimga munosibligi yoki munosib emasligi toʻgʻrisidagi hamda ularni yangi muddatga tayinlash mumkinligi haqidagi qarori vakolat muddati tugashiga kamida uch oy qolganda Komissiyaga yuboriladi.

Komissiya sudyalarning vakolat muddati tugashidan kamida bir oy oldin ularni yangi muddatga taqdim etish toʻgʻrisidagi hujjatlarni koʻrib chiqilishini taʼminlaydi.

18. Sudyalar malaka hayʼatlarining raislari Komissiyaga taqdim etiladigan sudya kadrlarga oid hujjatlarning toʻliqligi va sifati uchun shaxsan javobgar boʻladilar.

Komissiya muntazam ravishda sudyalar malaka hayʼatlari raislarining sudya kadrlar bilan ishlash ahvoli toʻgʻrisidagi hisobotini tinglab boradi. Sudya kadrlari zaxirasini shakllantirish va tanlash chogʻida malaka hayʼatlarining faoliyatida tanish-bilishchilik, mahalliychilik, xizmat mavqeyini suiisteʼmol qilish kabi hamda boshqa qonunbuzarlik holatlari aniqlangan taqdirda Komissiya tegishli malaka hayʼatining raisini egallab turgan lavozimidan ozod etishgacha boʻlgan darajada intizomiy javobgarlikka tortish toʻgʻrisida taqdimnoma kiritishga haqli.

19. Komissiya Oʻzbekiston Respublikasi Oliy Majlisi Senati va Qonunchilik palatasi, Oliy sudi, Oliy xoʻjalik sudi, Adliya vazirligi, Ichki ishlar vazirligi, Bosh prokuratura vakillari va huquq sohasidagi yuqori malakali mutaxassislar, shuningdek, jamoatchilik vakillaridan shakllantiriladi.

20. Komissiya tarkibi Oʻzbekiston Respublikasi Prezidentining Farmoni bilan oʻn yetti kishidan iborat tarkibda tuziladi hamda Komissiya raisi, rais oʻrinbosari va aʼzolardan tashkil topadi.

Komissiya raisi va uning oʻn bir nafar aʼzosi besh yil muddatga tasdiqlanadi va oʻz faoliyatlarini jamoatchilik asosida amalga oshiradilar.

Komissiya raisining oʻrinbosari va toʻrt nafar aʼzosi oʻz faoliyatlarini doimiy asosda amalga oshiradilar

21. Komissiya raisi Komissiyaning faoliyatiga rahbarlikni amalga oshiradi va Komissiya zimmasiga yuklangan vazifalarning bajarilishi uchun shaxsan javobgardir.

Komissiya raisi:

Komissiya faoliyatiga umumiy rahbarlikni amalga oshiradi;

Komissiya majlislarini chaqiradi va unga raislik qiladi;

Komissiya vakolatiga tegishli boʻlgan masalalarni koʻrib chiqish uchun kiritadi;

Komissiyaning ijroiya apparati xodimlari oʻrtasida vazifalarni taqsimlaydi;

Komissiya raisi boʻlmagan paytlarda uning vazifasini oʻrinbosari amalga oshiradi.

22. Komissiya raisining oʻrinbosari:

Komissiyaning ijroiya apparati faoliyatida, shuningdek uning moliyaviy-xoʻjalik faoliyatida tashkiliy rahbarlikni amalga oshiradi;

Komissiya raisi boʻlmaganda Komissiya majlislariga raislik qiladi;

Komissiya qarorlari bajarilishini nazorat qilish ishlarini tashkil etadi;

doimiy asosda faoliyat yurituvchi Komissiya aʼzolaridan tashqari, Komissiya ijroiya apparati xodimlarini Komissiya qaroriga asosan lavozimlarga tayinlaydi va ozod etadi;

Komissiya shtatlar jadvalini tasdiqlaydi;

buyruq va farmoyishlar chiqaradi;

fuqarolarni qabul qiladi hamda shikoyat va arizalarni koʻrib chiqish ishlarini tashkil etadi;

qonun hujjatlari va Komissiya qarorlariga muvofiq boshqa vakolatlarni amalga oshiradi.

23. Komissiya faoliyati Komissiya aʼzolarining kollegialligi va teng huquqliligi, Komissiya vakolatiga kiruvchi masalalarning har tomonlama, toʻliq va xolisona hal etilishini taʼminlash tamoyillariga asoslanadi.

24. Komissiya qonunga asosan kadrlarni sudyalik lavozimlariga tayinlashga tavsiyanoma tayyorlovchi oxirgi bosqich hisoblanadi.

25. Komissiya sudya kadrlar zaxirasini shakllantirish va undan samarali foydalanish borasida sudyalar malaka hayʼatlarining faoliyati nazorat qilinishi va muvofiqlashtirilishini taʼminlaydi.

Komissiya vaqti-vaqti bilan joylarga chiqib sudyalar malaka hayʼatlari tomonidan kadrlar zaxirasini shakllantirish va tanlash boʻyicha ishlarning ahvolini tekshirib turadi.

26. Komissiya majlislari uning vakolatiga kiruvchi masalalarning tayyorlanishiga qarab, odatda bir oyda kamida ikki marta oʻtkaziladi.

Komissiya aʼzolarining koʻpchiligi ishtirok etgan taqdirda komissiyaning majlisi vakolatli, deb hisoblanadi.

Sudyalik lavozimlariga nomzodlarni tanlash va tavsiya etish masalalari Komissiya majlislarida koʻrib chiqilayotganda nomzodni taqdim etayotgan tegishli sudyalar malaka hayʼatining raisi maslahat ovozi bilan qatnashishi majburiydir.

Komissiya majlisining bayonnomasi Komissiya kotibiyati xodimi tomonidan yuritiladi va Komissiya raisi tomonidan imzolanadi.

27. Sudyalik lavozimlariga kadrlar boʻyicha takliflar Komissiya tomonidan koʻrib chiqish uchun boʻsh sudyalik lavozimiga kamida ikki nomzoddan iborat holda muqobillik asosida kiritiladi.

Komissiya majlisida muhokama etilayotgan nomzodning shaxsiy va kasbiy sifatlari toʻgʻrisida doimiy asosda faoliyat yurituvchi Komissiya aʼzosining axboroti tinglanadi.

Komissiya sudya kadrlar boʻyicha taqdim etilgan materiallarni oʻrganish va suhbatlashish yoʻli bilan sudyalikka nomzodlarni tanlab oladi, ularning kasb mahorati darajasini, maʼnaviy fazilatlarini (halolligi va vijdonini sotmasligini), qobiliyatini, shuningdek, huquq sohasidagi tegishli tayyorgarligi va malakasini aniqlaydi.

Sudya kadrlarni tanlash va tavsiya etish boʻyicha Komissiya faoliyatini tashkil qilish reglament bilan belgilanadi.

28. Qaror majlisda ishtirok etayotgan Komissiya aʼzolarining oddiy koʻpchilik ovozi bilan qabul qilinadi. Nomzodga ovoz berish chogʻida Komissiya aʼzolaridan boshqa shaxslarning hozir boʻlishiga yoʻl qoʻyilmaydi.

Komissiya majlisida quyidagi qarorlar qabul qilinishi mumkin:

nomzodning taqdim etilgan sudyalik lavozimiga munosibligi toʻgʻrisida;

nomzodning taqdim etilgan sudyalik lavozimiga nomunosibligi toʻgʻrisida;

nomzodning keyinchalik boʻsh lavozimga taqdim etish huquqi bilan sudyalik lavozimi zaxirasida qoldirilishi toʻgʻrisida;

sudyalik lavozimiga taqdim etilgan nomzodning hujjatlarini professional, axloqiy va shaxsiy fazilatlarini qoʻshimcha oʻrganish uchun qaytarib yuborish toʻgʻrisida.

Komissiyaning qarori xulosa tarzida rasmiylashtiriladi va majlisda qatnashgan Komissiya aʼzolari tomonidan imzolanadi. Ovoz berish vaqtida ozchilikni tashkil qilgan Komissiya aʼzolari xulosani imzolaydilar, ularning alohida fikri majlis bayonnomasiga kiritiladi.

29. Nomzodlarning Oʻzbekiston Respublikasi Oliy sudi, Oliy xoʻjalik sudi, Qoraqalpogʻiston Respublikasi sudlarining sudyalari lavozimlariga munosibligi toʻgʻrisida Komissiyaning xulosasi Oʻzbekiston Respublikasi Prezidentiga koʻrib chiqish uchun kiritiladi.

Qoraqalpogʻiston Respublikasi sudlari sudyalarini saylash yoki tayinlash uchun Komissiya xulosasiga asosan Qoraqalpogʻiston Respublikasi Joʻqorgʻi Kengesi Raisi Oʻzbekiston Respublikasi Prezidenti bilan kelishilgan holda, Qoraqalpogʻiston Respublikasi Joʻqorgʻi Kengesiga taqdimnoma kiritadi.

Fuqarolik va jinoyat ishlari boʻyicha viloyatlar, Toshkent shahar sudlari, tumanlararo, tuman (shahar) sudlari, harbiy sudlar, viloyatlar va Toshkent shahar xoʻjalik sudlarining sudyalari lavozimiga nomzodlar xususida Komissiya oʻz xulosasiga asoslanib, ularni tayinlash toʻgʻrisida Oʻzbekiston Respublikasi Prezidentiga taqdimnoma kiritadi.

30. Agar Komissiya nomzodni sudyalik lavozimiga nomunosib yoki uning hujjatlarini qoʻshimcha oʻrganish uchun qaytarib yuborish lozim degan xulosaga kelgan hollarda bir yil muddat oʻtgandan keyin ushbu masalaning takroran koʻrib chiqilishiga yoʻl qoʻyiladi. Bu haqda xulosaga tegishli yozuv kiritiladi.

31. Komissiyaning xulosasida Komissiyaning nomi, tarkibi va majlisning vaqti, masalasi koʻrib chiqilayotgan shaxsning familiyasi, ismi va otasining ismi hamda uni taʼriflovchi boshqa maʼlumotlar, taqdimnomani (materiallarni) kiritgan organning nomi, shuningdek Komissiya tomonidan qabul qilingan qaror koʻrsatiladi.

32. Materiallar toʻliq boʻlmagan hollarda, masalani xolisona yechish maqsadida Komissiya uni koʻrib chiqishni keyinga qoldirish huquqiga egadir.

33. Komissiya Kotibiyati Komissiya faoliyatini tashkiliy va moddiy-texnikaviy jihatdan taʼminlash maqsadida tuziladi hamda oʻz faoliyatida Komissiyaga hisobot beradi.

34. Komissiya Kotibiyati:

sudyalarning malaka hayʼatlari tomonidan kelib tushadigan takliflarni hamda sudya kadrlar zaxirasiga kiritilgan, shuningdek, aniq lavozimga tavsiya etilgan har bir nomzodga oid hujjatlarni yigʻish, umumlashtirish va tahlil qilish ishlarini amalga oshiradi;

sudya kadrlar boʻyicha statistik, shaxsiy hisobni va arxiv ishini yuritadi;

kelib tushgan hujjatlarning toʻliqligi va toʻgʻriligini tekshiradi hamda ularni koʻrib chiqish uchun Komissiyaga topshiradi;

Komissiyani zarur axborot-tahliliy hujjatlar bilan taʼminlaydi;

Komissiya topshirigʻiga asosan, sudyalar zaxirasini shakllantirish, ularni tanlash va lavozimlariga tavsiya etish masalalari boʻyicha sudyalarning malaka hayʼatlari faoliyatini oʻrganadi;

Komissiyaning boshqa topshiriqlarini bajaradi.

35. Komissiya Kotibiyati oʻz faoliyatini Komissiya tomonidan tasdiqlanadigan nizom asosida olib boradi.

36. Komissiya Kotibiyati Komissiyaga aʼzo boʻlgan rahbar va rahbar oʻrinbosari, shuningdek, toʻrt nafar yetakchi inspektordan iboratdir.

Komissiya Kotibiyati rahbari va rahbar oʻrinbosari oʻz lavozimlariga Oʻzbekiston Respublikasi Prezidenti tomonidan tayinlanadi va ozod etiladi.

Komissiya Kotibiyati oliy yuridik maʼlumoti boʻlgan va qoida tariqasida sudlarda ish staji uch yildan kam boʻlmagan xodimlardan shakllantiriladi.

37. Sudlarni halol va malakali kadrlar bilan taʼminlash, sudyalarni kasb burchi va xizmat odob-axloq meʼyorlariga rioya qilishlarini taʼminlash maqsadida Komissiya huzurida sud inspeksiyasi tuziladi.

Sud inspeksiyasi oʻz faoliyatida Komissiyaga hisobot beradi.

38. Sud inspeksiyasining asosiy vazifalari quyidagilardan iborat:

sudyalarning qasamyodga rioya etish holatini tahlil qilish;

sudyalik odob-axloqi buzilishining oldini olish;

sudyalarning noqonuniy harakati ustidan shikoyatlarni oʻrganish;

sudyalarni ularning maqomi, shaʼni va qadr-qimmatiga tajovuzlardan himoya qilish;

sudyalik lavozimiga ilk bor koʻrsatilayotgan nomzodlarga taalluqli materiallarni tegishli organlar bilan birgalikda oʻrganish;

yangi vakolat muddatiga taqdim etilayotgan sudyalar nomzodi boʻyicha xulosalar berish;

sudyalar korpusi barqarorligini taʼminlashga, sudyalarni lavozimga saylash, tayinlash va ozod etish boʻyicha qonunda belgilangan tartibni amalga oshirishga koʻmaklashish;

qonun buzilishiga yoʻl qoʻygan sudyalarga nisbatan tegishli choralarni qoʻllash toʻgʻrisida Komissiyaga takliflar kiritish.

39. Sud inspeksiyasi oʻz faoliyatini Komissiya tomonidan tasdiqlanadigan nizom asosida olib boradi.

40. Sud inspeksiyasi Komissiyaga aʼzo boʻlgan rahbar va rahbar oʻrinbosari, shuningdek toʻrt nafar yetakchi inspektordan iboratdir.

Sud inspeksiyasi rahbari va rahbar oʻrinbosari oʻz lavozimlariga Oʻzbekiston Respublikasi Prezidenti tomonidan tayinlanadi va ozod etiladi.

Sud inspeksiyasi oliy yuridik maʼlumoti boʻlgan va qoida tariqasida sudlarda ish staji besh yildan kam boʻlmagan xodimlardan shakllantiriladi.

41. Sud inspeksiyasi xodimlari oʻz vazifalarini bajarishda sudyalarning shaʼnini va qadr-qimmatini hurmat qilishlari, kasbga oid sirni saqlashlari shart.