Oʻzbekiston Respublikasi Prezidentining “Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi faoliyatini takomillashtirish toʻgʻrisida” 2018-yil 3-fevraldagi PQ-3504-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi toʻgʻrisida nizom 1-ilovaga muvofiq tasdiqlansin.

2. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

3. Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.V. Akmalov va Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi direktori — oliy va oʻrta maxsus taʼlim vazirining birinchi oʻrinbosari M.M. Xolmuxamedov zimmasiga yuklansin.

1. Ushbu Nizom Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi (keyingi oʻrinlarda Markaz deb ataladi) maqomi, asosiy vazifalari va funksiyalarini, huquqlari va javobgarligini, faoliyatini tashkil etish hamda hisobot berish tartibini, shuningdek, uning rahbarlarining funksional vazifalari va javobgarligini belgilaydi.

2. Markaz kasb-hunar taʼlimi sohasida davlat siyosatini ishlab chiqish va amalga oshirish uchun javob beradigan vakolatli davlat boshqaruvi organi hisoblanadi.

3. Markaz Oʻzbekiston Respublikasi Oliy va oʻrta maxsus taʼlim vazirligiga hamda Oʻzbekiston Respublikasi Vazirlar Mahkamasiga boʻysunadi.

4. Markaz oʻz faoliyatini Oʻzbekiston Respublikasi Prezidentining “Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi faoliyatini takomillashtirish toʻgʻrisida” 2018-yil 3-fevraldagi PQ-3504-son qaroriga muvofiq amalga oshiradi.

5. Markaz oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Oʻzbekiston Respublikasi Oliy va oʻrta maxsus taʼlimi vazirining buyruqlariga, shuningdek, ushbu Nizomga va boshqa qonun hujjatlariga amal qiladi.

6. Markazning oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiydir.

7. Qoraqalpogʻiston Respublikasi, viloyatlar va Toshkent shahar kasb-hunar taʼlimi boshqarmalari, shuningdek, Markaz tarkibiga kiruvchi Kasb-hunar taʼlimi tizimini innovatsion rivojlantirish, pedagog kadrlarning malakasini oshirish va ularni qayta tayyorlash instituti hamda Metrologik nazorat xizmati (keyingi oʻrinlarda Markaz tarkibiga kiruvchi boshqa tashkilotlar deb ataladi) yuridik shaxslar hisoblanadilar, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga hamda blankalarga, mustaqil balansga, Oʻzbekiston Respublikasi Moliya vazirligining Gʻaznachiligida shaxsiy gʻazna hisobvaraqlariga, bank hisob raqamlariga, shu jumladan xorijiy valyutadagi bank hisob raqamlariga ega boʻladilar.

8. Markazning rasmiy nomi:

a) davlat tilida:

toʻliq nomi — Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi, qisqartmasi — KHTM;

b) rus tilida:

toʻliq nomi — Sentr professionalnogo obrazovaniya Ministerstva visshego i srednego spetsialnogo obrazovaniya Respubliki Uzbekistan, qisqartmasi — SPO;

v) ingliz tilida:

toʻliq nomi — The Center vocational education of the Ministry of Nigher and secondary specialized education of the Republic of Uzbekistan, qisqartmasi — CVE.

9. Markaz tizimiga quyidagilar kiradi:

markaziy apparat;

Qoraqalpogʻiston Respublikasi, viloyatlar va Toshkent shahar kasb-hunar taʼlimi hududiy boshqarmalari (keyingi oʻrinlarda hududiy boshqarmalar deb ataladi);

Kasb-hunar taʼlimi tizimini innovatsion rivojlantirish, pedagog kadrlarning malakasini oshirish va ularni qayta tayyorlash instituti;

Metrologik nazorat xizmati;

idoraviy kasb-hunar kollejlari;

nodavlat kasb-hunar kollejlari.

10. Quyidagilar Markazning asosiy vazifalari hisoblanadi:

1) tasarrufida kasb-hunar kollejlari boʻlgan vazirliklar, idoralar, xoʻjalik birlashmalari, tijorat banklari va yirik korxonalar bilan birgalikda kasb-hunar taʼlimi sohasida yagona davlat siyosatini amalga oshirish, kasb-hunar taʼlimini rivojlantirish boʻyicha oʻrta va uzoq muddatli dasturlarni hayotga tatbiq etish va kasb-hunar kollejlarida oʻquv-tarbiya jarayoniga tashkiliy va metodik rahbarlik qilishni taʼminlash;

2) ish beruvchilarning ehtiyojlari va takliflaridan hamda ilgʻor xorijiy tajribadan kelib chiqib, shuningdek, iqtisodiyotning real sektoridagi tarkibiy oʻzgarishlarni hisobga olib kasb-hunar kollejlarida oʻrta boʻgʻinning mehnat bozorida talab etilgan mutaxassislarini tayyorlashning oʻquv rejalari va dasturlari ishlab chiqilishini tashkil etish;

3) yuqori professional rahbarlar va pedagog kadrlarni tanlash hamda ular bilan kasb-hunar kollejlarini taʼminlash, ularning malakasi va kasbiy darajasini muntazam ravishda oshirish, shuningdek, ular mehnatini ragʻbatlantirish ishlarini tizimli asosda taʼminlash;

4) tizimning rahbar va pedagog kadrlari malakasini oshirish hamda ularni qayta tayyorlashning yangi shakllari va usullarini joriy etish;

5) respublikadagi barcha kasb-hunar kollejlari oʻquv-metodik ishlarini ularning idoraviy mansubligidan qatʼi nazar, muvofiqlashtirish;

6) kasb-hunar kollejlarida taʼlim sifatini oshirishga yoʻnaltirilgan chora-tadbirlarni ishlab chiqish va amalga oshirish, taʼlim jarayonini doimiy ravishda takomillashtirish;

7) umumtaʼlim maktablari 10-11-sinf oʻquvchilarining kasbiy koʻnikmalarini shakllantirish boʻyicha ixtisoslashtirilgan oʻquv-ishlab chiqarish majmualarida kasb-hunar taʼlimi jarayonini muvofiqlashtirish va metodik taʼminlash.

11. Markaz oʻziga yuklangan vazifalarga muvofiq quyidagi funksiyalarni amalga oshiradi:

1) tasarrufida kasb-hunar kollejlari boʻlgan vazirliklar, idoralar, xoʻjalik birlashmalari, tijorat banklari va yirik korxonalar bilan birgalikda kasb-hunar taʼlimi sohasida yagona davlat siyosatini amalga oshirish, kasb-hunar taʼlimini rivojlantirish boʻyicha oʻrta va uzoq muddatli dasturlarni hayotga tatbiq etish va kasb-hunar kollejlarida oʻquv-tarbiya jarayoniga tashkiliy va metodik rahbarlik qilishni taʼminlash sohasida:

kasb-hunar kollejlari faoliyatini tashkil etish va yaxshilash masalalarida davlat boshqaruvini amalga oshiradi;

yagona davlat siyosatining asosiy yoʻnalishlari, shu jumladan, kasb-hunar taʼlimi tizimini yanada rivojlanishini nazarda tutadigan davlat dasturlari va boshqa dasturlar, shuningdek, ularni amalga oshirish mexanizmlari boʻyicha Vazirlar Mahkamasiga takliflar kiritadi;

normativ-huquqiy hujjatlar loyihalarini, shuningdek, Markazga yuklangan vazifalar va funksiyalarni bajarish bilan bogʻliq boshqa hujjatlarni Vazirlar Mahkamasiga belgilangan tartibda kiritadi;

Markaz tizimiga kiradigan kasb-hunar taʼlimi muassasalari va tashkilotlarni rivojlantirish istiqbollarini prognozlashtiradi, davlat va hududiy dasturlarni ishlab chiqadi;

iqtisodiyot tarmoqlari va sohalarda kasb-hunar kollejlari bitiruvchilariga boʻlgan talabni hisobga olgan holda, tasarrufida kasb-hunar kollejlari mavjud boʻlgan vazirlik va idoralar bilan birgalikda kasblar va mutaxassisliklar yoʻnalishlarini xatlovdan oʻtkazadi va kadrlar tayyorlash boʻyicha takliflar ishlab chiqadi;

kasb-hunar kollejlarini loyihalashtirish, qurish, taʼmirlash va rekonstruksiya qilish ishlarining monitoringini olib boradi;

kasb-hunar taʼlimi sohasida xalqaro hamkorlikni amalga oshiradi, kasb-hunar kollejlari faoliyatini rivojlantirish va takomillashtirishga xorijiy investitsiyalarni jalb etishda ishtirok etadi, mamlakatimiz va xorijiy moliya tashkilotlarining kreditlari va grant mablagʻlaridan maqsadli va samarali foydalanilishi monitoringini olib boradi;

kasb-hunar taʼlimi davlat taʼlim standartining sifatli bajarilishini taʼminlash uchun idoraviy mansub boʻlinmalar, shuningdek, idoraviy va nodavlat kasb-hunar kollejlari hamda Qoraqalpogʻiston Respublikasi, viloyatlar va Toshkent shahar kasb-hunar taʼlimi hududiy boshqarmalari faoliyatini muvofiqlashtiradi;

kasb-hunar taʼlimi davlat taʼlim standarti hamda kasb-hunar taʼlimi tizimi mutaxassislariga qoʻyiladigan malaka talablarining bajarilishi yuzasidan idoraviy nazoratni tashkil etadi;

kasb-hunar kollejlari va hududiy boshqarmalar faoliyatiga metodik rahbarlikni amalga oshiradi;

axborot texnologiyalari va moliyaviy nazoratning eʼtirof etilgan xalqaro standartlarini joriy etish orqali idoraviy mansub kasb-hunar kollejlarida budjet qonunchiligi buzilishining oldini olishga yoʻnaltirilgan moliyaviy nazoratni amalga oshiradi;

kasb-hunar taʼlimi tizimida xalqaro aloqalarni kengaytirish va uning samaradorligini oshirishga koʻmaklashadi, kasb-hunar taʼlimi sohasida xorijiy va xalqaro tashkilotlar bilan aloqalarni va hamkorlikni yoʻlga qoʻyadi;

xorijiy kasb-hunar taʼlimi muassasalari bilan mamlakatimiz kasb-hunar kollejlarining oʻzaro hamkorligini taʼminlashga qaratilgan dasturlarning ishlab chiqilishi hamda amalga oshirilishini muvofiqlashtiradi;

2) ish beruvchilarning ehtiyojlari va takliflaridan hamda ilgʻor xorijiy tajribadan kelib chiqib, shuningdek, iqtisodiyotning real sektoridagi tarkibiy oʻzgarishlarni hisobga olib kasb-hunar kollejlarida mehnat bozorida talab etilgan oʻrta boʻgʻin mutaxassislarini tayyorlashning oʻquv rejalari va dasturlari ishlab chiqilishini tashkil etish sohasida:

taʼlim jarayoniga davlat taʼlim standartini joriy etadi, kasblar va mutaxassisliklar boʻyicha taʼlim standartlari, oʻquv rejalari va dasturlarini ishlab chiqadi;

iqtisodiyotning real sektoridagi tarkibiy oʻzgarishlarni va mehnat bozoridagi ehtiyojlardan kelib chiqib, kasb-hunar kollejlarining kadrlar tayyorlash imkoniyatlarini hisobga olgan holda davlat taʼlim standarti, mutaxassisliklar (kasblar) boʻyicha taʼlim standartlari, oʻquv reja va dasturlari hamda darsliklarni uzluksiz ravishda takomillashtirib boradi;

kasb-hunar taʼlimining yoʻnalishlari, mutaxassisliklari va kasblari klassifikatorini ishlab chiqadi;

manfaatdor vazirliklar va idoralar bilan birgalikda kasb-hunar taʼlimi tizimini rivojlantirish va takomillashtirishning ilmiy asoslangan prognozlarini ishlab chiqadi;

taʼlim jarayonining tabaqalashtirilgan dasturlarini joriy etish orqali 6 oydan 2 yilgacha boʻlgan muddatda kadrlarni tayyorlashga metodik rahbarlikni amalga oshiradi;

kasbiy fanlarni oʻqitish bilan birgalikda, kasb-hunarga yoʻnaltirilgan xorijiy tillar va mehnat faoliyatida axborot-kommunikatsiya texnologiyalarini qoʻllash boʻyicha oʻquvchilarning bilimlarini mustahkamlash dasturlarini ishlab chiqadi;

manfaatdor vazirliklar va idoralar bilan birgalikda kasb-hunar kollejlarini jihozlashga boʻlgan normativ talablarni ishlab chiqishda ishtirok etadi;

3) yuqori professional rahbarlar va pedagog kadrlarni tanlash hamda ular bilan kasb-hunar kollejlarini taʼminlash, ularning malakasi va kasbiy darajasini muntazam oshirish, shuningdek, mehnatini ragʻbatlantirish ishlarini tizimli asosda taʼminlash sohasida:

Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi bilan birgalikda kasb-hunar kollejlarining barcha pedagog xodimlarini, ishlab chiqarish taʼlimi ustalarini attestatsiyadan oʻtkazadi hamda uning natijalari boʻyicha xodimlarga tegishli malaka toifalarini belgilaydi;

kasb-hunar kollejlarining pedagog-oʻqituvchilari va ishlab chiqarish taʼlimi ustalariga boʻlgan ehtiyojini oʻrganadi hamda oliy taʼlim muassasalarida kadrlar tayyorlash uchun buyurtmalar taqdim etadi;

pedagog xodimlarni ragʻbatlantirish va mehnatiga haq toʻlash tizimini takomillashtirish boʻyicha takliflar tayyorlaydi, kasb-hunar taʼlimi tizimi xodimlarini davlat mukofotlariga taqdim etilishini tashkil qiladi;

idoraviy mansubligidan qatʼi nazar, kasb-hunar kollejlarining oʻquv-metodik ishlarini rivojlantirish, rahbar xodimlarning malaka oshirish oʻquv kurslari natijasida oʻz lavozimlariga loyiqligi yoki loyiq emasligi haqida taqdimnomalar tayyorlaydi;

4) tizimning rahbar va pedagog kadrlari malakasini oshirish hamda ularni qayta tayyorlashning yangi shakllari va usullarini joriy etish sohasida:

malaka oshirish va qayta tayyorlash jarayonida ilgʻor xorijiy tajribadan kelib chiqqan holda yangi shakllar va usullarni joriy etadi;

zamonaviy taʼlim texnologiyalaridan foydalangan holda, pedagog kadrlar malakasini oshirish va ularni qayta tayyorlash tizimini boshqarishning yangi vertikalini tashkil etadi;

malaka oshirish va qayta tayyorlash davrida kasb-hunar kollejlari rahbar va pedagog xodimlarining ish beruvchi korxona va tashkilotlarda amaliyot oʻtashini tashkil etadi;

kasb-hunar taʼlimi tizimining barcha xodimlari uchun malaka talablari va lavozim vazifalarini ishlab chiqadi;

malaka oshirish va qayta tayyorlash tizimiga axborot texnologiyalarini joriy etish va yangi axborot tizimlarini ishlab chiqish orqali rahbar va pedagog xodimlar uchun rivojlanib boruvchi oʻquv-metodik muhit yaratilishini taʼminlaydi;

malaka oshirishning turli shakl va uslublarini ishlab chiqadi va amaliyotga joriy etadi;

kasb-hunar taʼlimi tizimining rahbar va pedagog xodimlari malakasini oshirish va ularni qayta tayyorlash ishlarini tizimli ravishda tashkil etadi;

malaka oshirish va qayta tayyorlash boʻyicha oʻquv rejalari va dasturlarining ishlab chiqilishini tashkil etadi va tasdiqlaydi;

manfaatdor davlat organlari va nodavlat notijorat tashkilotlar, shu jumladan kasaba uyushmalari bilan birgalikda mehnatni muhofaza qilish, kasb-hunar taʼlimi tizimi oʻquvchilari va xodimlarining sogʻligʻini himoya qilish hamda oʻqish va mehnat qilishi uchun xavfsiz shart-sharoitlarni taʼminlash chora-tadbirlari kompleksini ishlab chiqish va amalga oshirishni tashkil etadi;

5) respublikadagi barcha kasb-hunar kollejlarining idoraviy mansubligidan qatʼi nazar oʻquv-metodik ishini muvofiqlashtirish sohasida:

kadrlarga boʻlgan real ehtiyojni, ish beruvchi korxonalarning takliflarini hisobga olgan holda, iqtisodiyot sohalari va tarmoqlari uchun zarur mutaxassislar tayyorlash sifatini tubdan yaxshilash boʻyicha kasb-hunar kollejlari faoliyatini muvofiqlashtirish;

yoshlarni har tomonlama barkamol, vatanparvarlik va milliy mustaqillik gʻoyalariga sodiqlik ruhida tarbiyalash, ularning qalblarida mustaqillik gʻoyalariga sadoqat, milliy iftixor, Vatanga muhabbat va uning taqdiriga daxldorlik, fidoyilik tuygʻularini shakllantirish, maʼnaviy va axloqiy sifatlarni rivojlantirishga yoʻnaltirilgan pedagogik jarayonni yangi pedagogik shakllar va usullar asosida tashkil etadi;

Markaz tizimi faoliyatiga taalluqli jurnal va gazetalar, blankalar, oʻquv-metodik majmualar, byulletenlar hamda oʻquv qoʻllanmalarni nashr etishni, shuningdek, Markazning veb-sayti ishini tashkil etadi;

yetakchi mahalliy va xorijiy taʼlim muassasalari bilan har tomonlama hamkorlikni rivojlantiradi, zamonaviy innovatsion oʻquv loyihalarini birgalikda amalga oshirish uchun kasb-hunar taʼlimi sohasiga yuqori malakali xorijiy mutaxassislarni jalb etadi;

kasb-hunar kollejlarida maʼnaviy-axloqiy tarbiyalashning milliy mustaqillik gʻoyalariga, boy milliy madaniy-tarixiy anʼanalarga, xalq urf-odatlariga va umuminsoniy qadriyatlarga asoslangan samarali tashkiliy hamda pedagogik shakl va vositalarini joriy etadi;

kasb-hunar kollejlarida taʼlim jarayonini ishlab chiqarish jarayoni bilan integratsiyalashtirishni chuqurlashtirishga qaratilgan chora-tadbirlar kompleksini ishlab chiqadi va joriy etadi;

kasb-hunar taʼlimini takomillashtirish borasidagi muammolar boʻyicha kengashlar, simpoziumlar, seminarlar, ilmiy, oʻquv-metodik konferensiyalar, tanlovlar, koʻrgazmalar va boshqa tadbirlarni tashkil etadi;

kasb-hunar kollejlari oʻquvchilari oʻrtasida fan, kasb va sport boʻyicha turli tanlov va musobaqalar tashkil etadi;

6) kasb-hunar kollejlarida taʼlim sifatini oshirishga yoʻnaltirilgan chora-tadbirlarni ishlab chiqish va amalga oshirish, taʼlim jarayonini doimiy ravishda takomillashtirish sohasida:

taʼlim tizimida ilmiy tadqiqotlar olib borilishini qoʻllab-quvvatlaydi, ragʻbatlantiradi va ularni muammoli vazifalarning hal etilishiga yoʻnaltiradi;

taʼlim va ilmiy-tadqiqot muassasalari mutaxassislarini, yangilangan oʻquv-metodik materiallar va darsliklarni, oʻqitishning zamonaviy shakl va metodlarini kasb-hunar kollejlarida oʻquv-tarbiya jarayonini tashkil etishga keng jalb qilishni taʼminlaydi;

kasb-hunar kollejlarida yoshlarning ilmiy-texnik ijodkorligini, innovatsion gʻoyalarini ragʻbatlantiradi, rivojlantiradi va uning samaradorligini oshiradi;

mamlakat iqtisodiyotini barqaror rivojlantirish hamda modernizatsiyalash jarayonlarida samarali ishtirok etishga qodir boʻlgan kadrlarni tayyorlash maqsadida oʻquv jarayonida innovatsion gʻoyalar, texnologiyalar va ishlanmalarni faol qoʻllab, kasb-hunar taʼlimi va ishlab chiqarishning oʻzaro yaqin hamkorligini taʼminlaydi;

kasb-hunar kollejlarida “Hayot davomida taʼlim olish” prinsipi asosida kattalar taʼlimining turli shakllari va turlarini, jumladan qisqa muddatli kurslarni joriy etadi;

kasb-hunar kollejlari bitiruvchilarini yakuniy davlat attestatsiyasidan oʻtkazish toʻgʻrisidagi nizomni tasdiqlaydi va uning joriy etilishini nazoratga oladi;

kasb-hunar kollejlari va ish beruvchi tashkilotlarda oʻquvchilarning oʻquv va ishlab-chiqarish amaliyotini sifatli oʻtkazishi yuzasidan monitoringni amalga oshiradi;

kasb-hunar kollejlari oʻquvchilarining bilimi va taʼlim sifatiga taʼsir qiladigan omillarni aniqlash boʻyicha tizimli monitoringni amalga oshiradi;

taʼlim sifati monitoringi olib borilishini nazorat qilish va amalga oshirish boʻyicha hujjatlar va metodik tavsiyalarni ishlab chiqadi;

taʼlim sifatining umumiy holati asosida kasb-hunar kollejlari reytingini aniqlaydi;

7) umumtaʼlim maktablari 10-11-sinf oʻquvchilarining kasbiy koʻnikmalarini shakllantirish boʻyicha ixtisoslashtirilgan oʻquv-ishlab chiqarish majmualarida kasb-hunar taʼlimi jarayonini muvofiqlashtirish va metodik taʼminlash sohasida:

oʻquv-ishlab chiqarish majmualarida umumtaʼlim maktablarining 10-11-sinf oʻquvchilariga kasblarni oʻrgatish ishlarini tashkil etadi;

kasblarning malaka talablari, mashgʻulotlar rejalari va dasturlarini hamda kasbiy taʼlim berish jarayonining metodik taʼminotini takomillashtirib borish boʻyicha takliflar ishlab chiqadi;

kasb-hunar kollejlaridan olisda joylashgan umumiy oʻrta taʼlim muassasalarida tashkil etiladigan oʻquv-ishlab chiqarish majmualarining kasbiy taʼlim sohasidagi faoliyatini oʻrganish asosida taklif va tavsiyalar tayyorlaydi;

kasb-hunar kollejlarining amaliy-metodik ish tajribasiga ega boʻlgan malakali pedagog kadrlar va ishlab chiqarish taʼlimi ustalarining oʻquv-ishlab chiqarish majmualarida belgilangan tartibda faoliyat yuritishi yuzasidan takliflar tayyorlaydi;

kasbiy taʼlim jarayonida “usta-shogird” anʼanalari, mahalliy va xorijiy ilgʻor tajribani oʻrgangan holda eng maqbul usullardan foydalanish boʻyicha oʻquv-metodik qoʻllanmalar ishlab chiqadi.

12. Quyidagilar markaziy apparatning asosiy vazifalari hisoblanadi:

1) hududiy boshqarmalar va Markaz tarkibiga kiruvchi boshqa tashkilotlar bilan birgalikda Markazga yuklangan vazifalar va funksiyalarning samarali bajarilishini taʼminlash;

2) kasb-hunar taʼlimi davlat taʼlim standarti, mutaxassisliklar (kasblar) taʼlim standartlari, oʻquv reja va dasturlarning takomillashtirilishini va rivojlangan xorijiy davlatlar tajribasini oʻrganish asosida taʼlim sifati monitoringi olib borilishini tashkil etish;

3) oʻquv-metodik majmualarni ishlab chiqish va nashr etish faoliyatini muvofiqlashtirish;

4) oʻquvchilarni maʼnaviy-axloqiy tarbiyalash va ijtimoiy qoʻllab-quvvatlashni tashkil etish;

5) kasb-hunar kollejlarida axborot-kommunikatsiya texnologiyalarini joriy etish;

6) Markaz tizimida ichki audit va moliyaviy nazoratni tashkil etish va amalga oshirish;

7) hududiy boshqarmalarda va Markaz tarkibiga kiruvchi boshqa tashkilotlarda kadrlar bilan taʼminlashni muvofiqlashtirish;

8) Markaz tarkibiga kiruvchi boshqa tashkilotlarni rivojlantirishga koʻmaklashish, ularni rivojlantirish konsepsiyalari va istiqbollarini belgilash.

13. Markaziy apparat unga yuklangan asosiy vazifalarga muvofiq quyidagi funksiyalarni amalga oshiradi:

1) Markaz va uning rahbariyati faoliyatini tashkiliy va axborot-tahlil jihatidan taʼminlaydi;

2) hududiy boshqarmalar va Markaz tarkibiga kiruvchi boshqa tashkilotlar tomonidan Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Hukumat qarorlari va farmoyishlari bajarilishi yuzasidan muntazam nazoratni taʼminlaydi;

3) Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi direktori — oliy va oʻrta maxsus taʼlim vazirining birinchi oʻrinbosari (keyingi oʻrinlarda Markaz direktori deb ataladi) va buyruqlari va farmoyishlari amalga oshirilishini oʻz vakolatlari doirasida tashkil etadi;

4) Markaz tomonidan Vazirlar Mahkamasiga kiritiladigan hujjatlarning sifatli va oʻz vaqtida ishlab chiqilishini hamda ularning iqtisodiy, moliyaviy va huquqiy ekspertizadan oʻtkazilishini tashkil etadi;

5) hududiy boshqarmalar va Markaz tarkibiga kiruvchi boshqa tashkilotlar faoliyati monitoringini olib borilishini tashkil etadi;

6) kasb-hunar taʼlimini rivojlantirish maqsadida ilmiy-tadqiqot ishlari olib borilishiga koʻmaklashadi;

7) Markazning faoliyati, shu jumladan qonun ijodkorligi sohasidagi faoliyati huquqiy taʼminlanishini tashkil etadi;

8) boshqaruv qarorlarini qabul qilish maqsadida kasb-hunar taʼlimi tendensiyalari toʻgʻrisida Markaz rahbariyati uchun axborotni toʻplaydi, umumlashtiradi va tahlil qiladi;

9) kasb-hunar taʼlimi masalalari boʻyicha tadbirkorlik subyektlariga axborot, metodik, tashkiliy va maslahat yordami beradi;

10) Markaz vakolatiga tegishli operativ, tashkiliy, kadrlar, moliya, ishlab chiqarish-xoʻjalik masalalari va boshqa masalalar bilan shugʻullanadi;

11) Markazning hududiy boshqarmalar va Markaz tarkibiga kiruvchi boshqa tashkilotlar faoliyatini nazorat qiladi va tahlil etadi;

12) Markazning hududiy boshqarmalar va Markaz tarkibiga kiruvchi boshqa tashkilotlar bilan birgalikda oʻziga yuklangan vazifalarning samarali bajarilishini taʼminlaydi;

13) kasb-hunar kollejlari faoliyatini muvofiqlashtiradi;

14) kasb-hunar taʼlimi sohasida nodavlat taʼlim xizmatlarini koʻrsatish faoliyatini amalga oshiradigan yuridik shaxslar bilan oʻzaro hamkorlik qiladi;

15) kasb-hunar taʼlimi tizimini innovatsion rivojlantirish boʻyicha oʻrta va uzoq muddatli dasturlar ishlab chiqilishini tashkil etadi;

16) kasb-hunar taʼlimi sifatining monitoringini olib boradi;

17) kasb-hunar kollejlarida oʻqitishning turli shakllarini joriy etadi va taʼlim berishning muqobil shakllarini rivojlantiradi;

18) umumtaʼlim maktablarining 10-11-sinf oʻquvchilariga kasbiy taʼlim berish jarayonini muvofiqlashtiradi va metodik taʼminlaydi;

19) respublika budjetidan moliyalashtiriladigan Markaz tarkibiga kiruvchi boshqa tashkilotlarda moliya, buxgalteriya hisobi va hisobotini tashkil etadi;

20) Markaz tizimidagi tashkilotlarda ichki audit va moliyaviy nazoratni tashkil etadi va amalga oshiradi;

21) kasb-hunar kollejlarining binolari va inshootlaridan joriy foydalanish ishlari monitoringini olib boradi va muvofiqlashtiradi;

22) jismoniy va yuridik shaxslarning murojaatlari bilan ishlashni tashkil etadi;

23) xorijiy investitsiyalar jalb etilishini va xalqaro hamkorlikni tashkil etadi.

14. Quyidagilar hududiy boshqarmalarning asosiy vazifalari hisoblanadi:

1) Markazga yuklangan vazifalar va funksiyalarning samarali bajarilishini taʼminlashda ishtirok etish;

2) Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahri, tumanlar (shaharlar) hokimlari, prokuratura, ichki ishlar va davlat soliq xizmati hududiy organlari rahbarlari boshchilik qiladigan kompleks ijtimoiy-iqtisodiy rivojlantirish sektorlari (keyingi oʻrinlarda kompleks ijtimoiy-iqtisodiy rivojlantirish sektorlari deb ataladi) bilan hamkorlik qilish;

3) kasb-hunar taʼlimi sohasida qonun hujjatlariga rioya etilishi yuzasidan monitoring olib borish va nazorat qilish;

4) kasb-hunar kollejlarida oʻquv-metodik faoliyatni muvofiqlashtirish;

5) nodavlat taʼlim xizmatlari koʻrsatish faoliyatini amalga oshiradigan yuridik shaxslarni qoʻllab-quvvatlash hamda kasb-hunar kollejlarida taʼlim berishning muqobil shakllarini rivojlantirish;

6) kasb-hunar kollejlarida ichki audit va moliyaviy nazoratni tashkil etish hamda amalga oshirish.

15. Hududiy boshqarmalar oʻzlariga yuklangan asosiy vazifalarga muvofiq quyidagi funksiyalarni amalga oshiradi:

1) hududiy boshqarmalar va ularning rahbariyati faoliyatini tashkiliy va axborot-tahliliy jihatdan taʼminlaydi;

2) kasb-hunar kollejlari tomonidan Oʻzbekiston Respublikasi qonunlari, Oʻzbekiston Respublikasi Prezidentining farmonlari, qarorlari va farmoyishlari, Hukumat qarorlari va farmoyishlari, Markazning buyruqlari bajarilishi muntazam nazorat qilinishini taʼminlaydi;

3) kasb-hunar kollejlari tomonidan kiritiladigan hujjatlarning sifatli va oʻz vaqtida qayta ishlanishini, ularning iqtisodiy, moliyaviy va huquqiy ekspertizadan oʻtkazilishini tashkil etadi;

4) kasb-hunar kollejlari faoliyatini muvofiqlashtiradi va nazorat qiladi;

5) kasb-hunar kollejlarining metodik faoliyatini muvofiqlashtiradi;

6) idoraviy kasb-hunar kollejlari faoliyatini muvofiqlashtiradi;

7) kasb-hunar taʼlimi sohasida nodavlat taʼlim xizmatlari koʻrsatish faoliyatini amalga oshiradigan yuridik shaxslar bilan oʻzaro hamkorlik qiladi;

8) nodavlat taʼlim xizmatlari koʻrsatish faoliyatini amalga oshiradigan yuridik shaxslarni qoʻllab-quvvatlaydi hamda kasb-hunar kollejlarida taʼlim berishning muqobil shakllarini rivojlantiradi;

9) kasb-hunar kollejlarida davlat taʼlim standartini va mutaxassisliklar (kasblar) taʼlim standartlarini bajarish monitoringini tashkil etadi;

10) kasb-hunar kollejlarining binolari va inshootlarini joriy taʼmirlash ishlari monitoringini olib boradi va muvofiqlashtiradi;

11) jismoniy va yuridik shaxslarning murojaatlari bilan ishlashni tashkil etadi;

12) vakolatiga tegishli tashkiliy, kadrlar, moliya, ishlab chiqarish-xoʻjalik masalalari va boshqa masalalar boʻyicha qarorlar qabul qiladi.

16. Markaz oʻziga yuklangan vazifalar va funksiyalarni amalga oshirish uchun quyidagi huquqlarga ega:

normativ-huquqiy hujjatlar loyihalarini, shuningdek, Markazga yuklangan vazifalar va funksiyalarni bajarish bilan bogʻliq boʻlgan boshqa hujjatlarni belgilangan tartibda Vazirlar Mahkamasiga yoki Oʻzbekiston Respublikasi Oliy va oʻrta maxsus taʼlim vazirligiga kiritish;

Markaz vakolatiga kiradigan masalalarni hal etish uchun davlat va xoʻjalik boshqaruvi organlaridan, mahalliy davlat hokimiyati organlaridan zarur axborotni belgilangan tartibda soʻrash va olish;

Markaz vakolatiga kiradigan masalalar boʻyicha zarur statistik axborotni davlat statistika organlaridan bepul asosda olish;

Markaz tarkibiga kiruvchi boshqa tashkilotlar, hududiy boshqarmalardan, kasb-hunar kollejlaridan tizimga tegishli maʼlumotlarini va kasb-hunar taʼlimi tizimini rivojlantirish hamda takomillashtirish prognoz koʻrsatkichlarini olish;

Markazning va Markaz tarkibiga kiruvchi boshqa tashkilotlarning davlat mulkini bir boʻlinmadan boshqasiga belgilangan tartibda berish;

Oʻzbekiston Respublikasining xalqaro shartnomalarini belgilangan tartibda ishlab chiqishda ishtirok etish, Markaz vakolatiga kiradigan masalalar boʻyicha idoralararo tusdagi xalqaro shartnomalarni belgilangan tartibda tuzish;

Markaz vakolatiga tegishli boʻlgan masalalar boʻyicha Oʻzbekiston Respublikasi manfaatlarini xalqaro darajada belgilangan tartibda ifodalash;

Markaz vakolatiga kiradigan masalalarda davlat va xoʻjalik boshqaruvi organlari, mahalliy davlat hokimiyati organlari faoliyatini belgilangan tartibda muvofiqlashtirish;

oʻz vakolatlari doirasida normativ-huquqiy hujjatlar qabul qilish, zarur hollarda, davlat boshqaruvining boshqa organlari bilan birgalikda qarorlar va boshqa hujjatlarni qabul qilish;

Markaz va Markaz tarkibiga kiruvchi boshqa tashkilotlar xodimlari tomonidan ularning tegishli sohadagi faoliyati asosiy koʻrsatkichlarining parametrlari bajarilishini hisobga olgan holda, ularni moddiy ragʻbatlantirish tartibi, miqdorlari va shartlarini belgilash;

kasb-hunar taʼlimining taalluqli masalalarini hal etish, kasb-hunar kollejlari faoliyatini takomillashtirish, ularning oʻquv-moddiy bazasini mustahkamlash, malakali kadrlar tayyorlash, xodimlari va oʻquvchilarining belgilangan ijtimoiy muhofazasini taʼminlash boʻyicha takliflarni Oʻzbekiston Respublikasi Vazirlar Mahkamasiga kiritish;

xalqaro va respublika miqyosidagi ilmiy-tadqiqot dasturlarida ishtirok etish, ilmiy investitsiyalarni jalb etish, taʼlim tizimiga xalqaro grantlar kiritilishini taʼminlash;

idoraviy mansubligidan qatʼi nazar, kasb-hunar kollejlari tomonidan “Taʼlim toʻgʻrisida”gi Oʻzbekiston Respublikasi Qonuni va kasb-hunar taʼlimi masalalari boʻyicha boshqa qonun hujjatlari bajarilishini belgilangan tartibda oʻrganish;

mutaxassisliklar (kasblar) taʼlim standartlari, oʻquv rejalari va dasturlari, darsliklar va oʻquv qoʻllanmalari mazmunini takomillashtirish boʻyicha pedagogika fani yutuqlari va ilgʻor tajriba asosida tavsiyalar ishlab chiqish uchun Ilmiy-metodik kengash tashkil etish, Ilmiy-metodik kengash tarkibini va Kengash nizomini tasdiqlash;

kasb-hunar kollejlarini tashkil etish, qayta tashkil etish va tugatish yuzasidan xulosalar berish;

idoraviy mansubligidan qatʼi nazar, kasb-hunar kollejlari oʻquv-metodik ishlarini rivojlantirish, rahbar xodimlarning oʻz lavozimlariga loyiqligi masalalarini tasarrufida kasb-hunar kollejlari boʻlgan vazirliklar, idoralar, xoʻjalik birlashmalari, tijorat banklari va yirik korxonalar bilan birgalikda koʻrib chiqish hamda xulosalar tayyorlash;

xorijiy investitsiyalar hisobiga sotib olinadigan oʻquv-laboratoriya va ustaxona jihozlarining qabul qilingan taʼlim standartlariga mos kelishi, ishlatilishi va saqlanishi yuzasidan takliflar va xulosalar berish;

kasb-hunar taʼlimini rivojlantirish hamda axborot-metodik taʼminlashni yaxshilashga qaratilgan gazeta va jurnallarga muassislik qilish;

oʻquvchilarni sportga jalb etishni kengaytirish va ularning turli musobaqalarda faol ishtirokini taʼminlashga koʻmaklashadigan jamgʻarmalarni tashkil etish;

oliy taʼlim muassasalarida kasb-hunar kollejlari uchun malakali pedagoglar va ishlab-chiqarish taʼlimi ustalari tayyorlashni muvofiqlashtirish va unga metodik rahbarlik qilishda ishtirok etish;

oʻz vakolatlari doirasida xalqaro va xorijiy tashkilotlar bilan hamkorlik qilish;

Markaz faoliyatini keng yoritish maqsadida ijtimoiy tarmoqlarda rasmiy veb-saytlar, shuningdek, sahifalar yaratish;

oʻz vakolatlari doirasida konferensiyalar, seminarlar, simpoziumlar, koʻrgazmalar, yarmarkalar oʻtkazish, shuningdek, boshqa tashkilotlar tomonidan tashkil etiladigan shunday tadbirlarda ishtirok etish;

oʻz vakolatiga kiradigan masalalar boʻyicha metodik materiallar va tavsiyalar ishlab chiqish;

Markaz vakolatiga kiradigan masalalar boʻyicha hayʼat majlislarida hududiy boshqarmalar rahbarlarining hisobotlarini eshitish;

davlat muassasalari va kasb-hunar taʼlimi sohasida nodavlat taʼlim xizmatlari koʻrsatish faoliyatini amalga oshiradigan yuridik shaxslar tomonidan kasb-hunar taʼlimi toʻgʻrisidagi qonun hujjatlarining bajarilishini nazorat qilish;

kasb-hunar taʼlimi tizimini rivojlantirish bilan bogʻliq dolzarb va istiqbolli muammolarni ishlab chiqish boʻyicha ishchi guruhlar tashkil etish;

oʻquv dasturlari, darsliklar, oʻquv qoʻllanmalari va metodik materiallar toʻgʻrisida xulosalar tayyorlash;

noshirlik faoliyati bilan shugʻullanish.

Markaz qonun hujjatlariga muvofiq boshqa huquqlarga ham ega boʻlishi mumkin.

17. Markaz:

oʻziga yuklangan vazifalar va funksiyalarning samarali bajarilishi, shuningdek, kasb-hunar taʼlimi sohasidagi davlat siyosatining samarali amalga oshirilishi;

Markaz faoliyati bilan bogʻliq prognoz koʻrsatkichlarga soʻzsiz erishilishini taʼminlash;

Vazirlar Mahkamasiga kiritiladigan normativ-huquqiy hujjatlar va boshqa hujjatlar loyihalari, shuningdek, Markaz tomonidan qabul qilinadigan normativ-huquqiy hujjatlar amalga oshirilishining sifati, pirovard natijalari va oqibatlari;

kasb-hunar taʼlimi sohasini rivojlantirish, shuningdek, kasb-hunar taʼlimi sohasida hududlarni ijtimoiy-iqtisodiy rivojlantirish va ulardagi muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning samarali amalga oshirilishi uchun javob beradi.

18. Markaziy apparat oʻziga yuklangan vazifalar va funksiyalarni amalga oshirish uchun:

kasb-hunar taʼlimi masalalari boʻyicha tahlil qilish va qayta ishlash uchun zarur boʻlgan materiallar va maʼlumotlarni hududiy boshqarmalaridan va Markaz tarkibiga kiruvchi boshqa tashkilotlardan soʻrash va olish;

Markazda koʻrib chiqiladigan kasb-hunar taʼlimi masalalarini ishlab chiqish, axborot va tahliliy materiallarni, shuningdek, normativ-huquqiy hujjatlar va boshqa hujjatlar loyihalarini tayyorlash uchun hududiy boshqarmalar va Markaz tarkibiga kiruvchi boshqa tashkilotlar rahbarlari hamda vakillarini zarur boʻlganda belgilangan tartibda jalb qilish, shu maqsadda ekspert va ishchi guruhlar tashkil etish;

hududiy boshqarmalar va Markaz tarkibiga kiruvchi boshqa tashkilotlardan oʻzlari tomonidan kiritilgan kasb-hunar taʼlimi boʻyicha normativ-huquqiy hujjatlar va boshqa hujjatlar loyihalarini puxta ishlashni talab qilish, zarurat boʻlganda ularni qayta ishlash uchun qaytarish;

hududiy boshqarmalar va Markaz tarkibiga kiruvchi boshqa tashkilotlar rahbarlari hamda vakillari, shuningdek kasb-hunar kollejlari direktorlari ishtirokida yigʻilishlar oʻtkazish;

hududiy boshqarmalar va Markaz tarkibiga kiruvchi boshqa tashkilotlar rahbarlariga hal qilishni talab etadigan va Markazga yuklangan vazifalar hamda funksiyalarni bajarish bilan bogʻliq masalalar yuzasidan topshiriqlar berish;

qabul qilingan normativ-huquqiy hujjatlar, Oʻzbekiston Respublikasi Prezidenti va Vazirlar Mahkamasining topshiriqlari, shuningdek, Markazning buyruqlari hududiy boshqarmalar va Markaz tarkibiga kiruvchi boshqa tashkilotlar tomonidan bajarilishi yuzasidan ularning faoliyatini belgilangan tartibda oʻrganish va tekshirish huquqiga ega.

Markaziy apparat qonun hujjatlariga muvofiq boshqa huquqlarga ham ega boʻlishi mumkin.

19. Markaziy apparat:

hududiy boshqarmalar va Markaz tarkibiga kiruvchi boshqa tashkilotlar bilan birgalikda Markazga yuklangan vazifalar va funksiyalarning sifatli va oʻz vaqtida bajarilishini taʼminlash;

Markaz faoliyati bilan bogʻliq prognoz koʻrsatkichlarga erishishni taʼminlash boʻyicha markaziy apparat tarkibiy boʻlinmalari ishini tashkil etish;

Markaz tomonidan koʻrib chiqish uchun Vazirlar Mahkamasiga kiritiladigan normativ-huquqiy hujjatlar va boshqa hujjatlar loyihalari, shuningdek, Markaz tomonidan qabul qilinadigan buyruqlarning tayyorlanish sifati va ekspertizadan oʻtkazilishi;

kasb-hunar taʼlimini rivojlantirish, shuningdek, kasb-hunar taʼlimi sohasida hududlarni ijtimoiy-iqtisodiy rivojlantirish va ulardagi muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlar hududiy boshqarmalar va Markaz tarkibiga kiruvchi boshqa tashkilotlar tomonidan amalga oshirilishini tashkil etish uchun javob beradi.

20. Hududiy boshqarmalar oʻzlariga yuklangan vazifalar va funksiyalarni amalga oshirish uchun:

davlat va xoʻjalik boshqaruvi organlari, mahalliy davlat hokimiyati organlarining hududiy boshqarmalardan oʻz vakolatiga kiradigan masalalarni hal qilish uchun zarur boʻlgan axborotni belgilangan tartibda soʻrash va olish;

kasb-hunar taʼlimi sohasining eng muhim muammolarini ishlab chiqish va koʻrib chiqish boʻyicha hududiy darajada idoralararo komissiyalar va kengashlar tuzish;

kasb-hunar kollejlari faoliyatini muvofiqlashtirish va nazorat qilish;

Markaz vakolatiga kiradigan masalalar boʻyicha davlat va xoʻjalik boshqaruvi organlari, mahalliy davlat hokimiyati organlarining koʻrib chiqishi uchun takliflar kiritish huquqiga ega.

Hududiy boshqarmalar qonun hujjatlariga muvofiq boshqa huquqlarga ham ega boʻlishi mumkin.

21. Hududiy boshqarmalar:

Markazga yuklangan vazifalar va funksiyalar sifatli va oʻz vaqtida bajarilishini taʼminlash;

oʻzlarining faoliyati bilan bogʻliq boʻlgan prognoz koʻrsatkichlarga erishishni taʼminlash;

Markazga kiritilayotgan hujjatlar loyihalari va takliflar, shuningdek, hududiy boshqarmalar tomonidan qabul qilinadigan qarorlarning sifatli amalga oshirilishi, pirovard natijalari va oqibatlari;

tuman (shahar)larda aniqlangan muammolarni har tomonlama va chuqur tahlil qilish hamda umumlashtirish asosida kasb-hunar taʼlimi sohasini Qoraqalpogʻiston Respublikasi, viloyatlar va Toshkent shahrida rivojlantirishga doir takliflarni tayyorlash;

kasb-hunar taʼlimi sohasini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning Qoraqalpogʻiston Respublikasi, viloyatlar va Toshkent shahrida samarali amalga oshirilishi, muammoli masalalar hal etilishi uchun javob beradi.

22. Quyidagilar Markaz direktorining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

2) Markaz faoliyatiga umumiy rahbarlik qilish, Oʻzbekiston Respublikasi Prezidenti, Vazirlar Mahkamasining qarorlari va boshqa qonun hujjatlariga muvofiq Markazga yuklangan vazifalar va funksiyalarning bajarilishini tashkil etish;

3) Oʻzbekiston Respublikasi Prezidenti va Vazirlar Mahkamasining qarorlari bilan tasdiqlangan Markaz faoliyatini yanada takomillashtirish boʻyicha kompleks dasturlar va tadbirlar ijrosini tanqidiy va chuqur tahlil qilish;

4) Markaz, uning hududiy boshqarmalari va Markaz tarkibiga kiruvchi boshqa tashkilotlar faoliyati bilan bogʻliq prognoz koʻrsatkichlarga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

5) Oʻzbekiston Respublikasi Prezidenti Administratsiyasi tarkibiy boʻlinmalari, shuningdek, tegishli vazirliklar va idoralar bilan hamkorlik qilish, Vazirlar Mahkamasi va uning Rayosati majlislarida masalalarni koʻrib chiqishda ishtirok etish;

6) Oʻzbekiston Respublikasi Prezidenti, Oʻzbekiston Respublikasining Bosh vaziri va uning oʻrinbosarlari topshiriqlarini bajarish;

7) oʻz oʻrinbosarlari vakolatlarini belgilash, ular oʻrtasida vazifalarni taqsimlash, Markazning boshqa mansabdor shaxslari vakolatlarini belgilash, Markaz faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy masʼuliyat darajasini belgilash;

8) Markaz faoliyatining rejalashtirilishini tashkil etish, Markaz va oʻz oʻrinbosarlarining har choraklik ish rejalarini tasdiqlash, ularning bajarilishi yuzasidan nazoratni taʼminlash;

9) Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoring olib borishning amaliy tizimini yaratish, Markaz faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq hududiy boshqarmalar, shuningdek, Markaz tarkibiga kiruvchi boshqa tashkilotlar rahbarlarining shaxsiy masʼuliyatini oshirish chora-tadbirlarini koʻrish;

10) Markaz xodimlarini tizimli qayta tayyorlashni va ularning malakasini oshirishni tashkil etish;

11) Markaz tizimida kadrlarni tanlash va joy-joyiga qoʻyish, ularning samarali faoliyat koʻrsatishi uchun zarur shart-sharoitlar yaratish, Markazning kadrlar zaxirasini shakllantirish;

12) Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi va Vazirlar Mahkamasi nomenklaturasiga kiradigan boʻsh lavozimlarga taklif etilgan kadrlarning, shuningdek, Markazga ishga qabul qilinayotgan boshqa kadrlarning professional darajasini, amaliy tajribaga, yuksak darajada ishlash xususiyatlari va maʼnaviy-axloqiy fazilatlarga ega ekanligining kafolatini taʼminlash;

13) faoliyat sohasiga oid masalalar boʻyicha normativ-huquqiy hujjatlar loyihalarining sifatli ishlab chiqilishini, “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlari, Oʻzbekiston Respublikasi Vazirlar Mahkamasining reglamenti va Oʻzbekiston Respublikasi Prezidenti Administratsiyasining reglamenti talablariga qatʼiy muvofiq ravishda oʻz vaqtida kiritilishini tashkil etish, ularning Vazirlar Mahkamasi Apparatida puxta ishlanishida, Vazirlar Mahkamasi rahbariyati huzurida himoya qilinishi va Oʻzbekiston Respublikasi Prezidenti Administratsiyasida koʻrib chiqilishida ishtirok etish;

14) “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlariga va Vazirlar Mahkamasining 2016-yil 17-oktabrdagi 345-son qarori bilan tasdiqlangan Davlat va xoʻjalik boshqaruvi organlari, mahalliy ijro etuvchi hokimiyat organlarining qonun loyihalariga doir faoliyatining namunaviy reglamentiga muvofiq Markazning qonun loyihalarini tayyorlash faoliyatini tashkil etish;

15) Markazga taqdim etilgan takliflar va normativ-huquqiy hujjatlar loyihalari toʻliq va oʻz vaqtida koʻrib chiqilishini taʼminlash, ularni huquqiy, moliyaviy, iqtisodiy ekspertiza va boshqa ekspertizadan puxta oʻtkazish, shuningdek, ularni Oʻzbekiston Respublikasi Prezidenti Administratsiyasining reglamenti va Oʻzbekiston Respublikasi Vazirlar Mahkamasining reglamentida belgilangan muddatlarda kelishish (viza qoʻyish);

16) Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq Markaz rahbarlari va xodimlari xizmat safarlarini tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

17) oʻz oʻrinbosarlari va hududiy boshqarmalar, shuningdek, Markaz tarkibiga kiruvchi boshqa tashkilotlar rahbarlari faoliyatining samaradorligi va natijadorligini muntazam tanqidiy tahlil qilish, Markaz hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

18) Markaz xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarlarini ragʻbatlantirish va intizomiy javobgarlikka tortish, shu jumladan ularning egallab turgan lavozimda qolishining maqsadga muvofiqligiga doir masalalarni koʻrib chiqish toʻgʻrisida takliflar kiritish, ularning shaxsiy masʼuliyatini oshirishga doir tizimli chora-tadbirlarni amalga oshirish;

19) Markaz xodimlari tomonidan Vazirlar Mahkamasining 2016-yil 2-martdagi 62-son qarori bilan tasdiqlangan Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalari asosida tasdiqlangan Markaz xodimlarining odob-axloq qoidalari (keyingi oʻrinlarda Markaz xodimlarining odob-axloq qoidalari deb ataladi) talablariga rioya etilishini taʼminlash;

20) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Markaz tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

21) Markaz va uning hududiy boshqarmalari, shuningdek, Markaz tarkibiga kiruvchi boshqa tashkilotlar ishini tashkil etishning zamonaviy shakllari joriy etilishini taʼminlash;

22) aholi va tadbirkorlik subyektlari bilan hamkorlik qilishda, shu jumladan, “yagona darcha” prinsipini joriy etish orqali davlat xizmatlari sifati va samaradorligini hamda ulardan erkin foydalanishni oshirish hamda “Elektron hukumat toʻgʻrisida”gi Oʻzbekiston Respublikasi Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

23) jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan toʻgʻri va ochiq muloqotni yoʻlga qoʻyish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan joylarga borib qabul qilish;

24) Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Markaz xodimlari va rahbarlarining faol ishtirok etishini tashkil etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasiga tushgan murojaatlari oʻz vaqtida va toʻliq koʻrib chiqilishini taʼminlash;

25) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish;

26) Markaziy apparat va hududiy boshqarmalar toʻgʻrisidagi nizomlarni, Markaz tarkibiga kiruvchi boshqa tashkilotlarning ustavlarini belgilangan tartibda tasdiqlash;

27) Markaz faoliyatiga umumiy rahbarlik qilish;

28) Markaziy apparat xodimlarini, hududiy boshqarmalar, shuningdek, Markaz tarkibiga kiruvchi boshqa tashkilotlar rahbarlarini qonun hujjatlarida belgilangan tartibda lavozimga tayinlash va lavozimdan ozod etish;

29) Markaziy apparat, hududiy boshqarmalar, Markaz tarkibiga kiruvchi boshqa tashkilotlar mansabdor shaxslari bajarishi majburiy boʻlgan buyruqlar chiqarish va koʻrsatmalar berish, shuningdek, ularning ijrosini belgilangan tartibda nazorat qilish;

30) Markaziy apparat, hududiy boshqarmalar, Markaz tarkibiga kiruvchi boshqa tashkilotlar tuzilmasi va shtat jadvalini Vazirlar Mahkamasi tomonidan tasdiqlangan xodimlarning soni doirasida tasdiqlash;

31) Markaziy apparat, hududiy boshqarmalar, Markaz tarkibiga kiruvchi boshqa tashkilotlar tuzilmasiga zarur hollarda oʻzgartirishlar kiritish.

23. Quyidagilar Markaz direktori oʻrinbosarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) Markaz direktori vaqtincha boʻlmaganda, tegishli buyruq asosida uning vazifalarini bajarish;

3) Markazning tarkibiy boʻlinmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

4) Markaz faoliyatining yoʻnalishlari boʻyicha Oʻzbekiston Respublikasi Prezidenti va Vazirlar Mahkamasining qarorlari bilan tasdiqlangan Markaz faoliyatini yanada takomillashtirish boʻyicha konsepsiyalar, kompleks dasturlar va kompleks tadbirlar ijrosini tanqidiy va chuqur tahlil qilish;

5) tarkibiy boʻlinmalar tomonidan prognoz koʻrsatkichlarga erishishni soʻzsiz taʼminlash chora-tadbirlarini amalga oshirish, boʻlinmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

6) tarkibiy boʻlinmalar rahbarlarining har choraklik rejalarini tasdiqlash, ularning bajarilishi yuzasidan nazoratni taʼminlash;

7) Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, Markazning tarkibiy boʻlinmalarida ijro intizomi boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlar oʻz vaqtida va sifatli ijro etilishi uchun tarkibiy boʻlinmalar rahbarlarining shaxsiy masʼuliyatini oshirish chora-tadbirlarini koʻrish;

8) Markaz hayʼati, Markaz direktorining buyruqlari va topshiriqlari oʻz vaqtida va sifatli bajarilishini taʼminlash;

9) tarkibiy boʻlinmalarda kadrlarni tanlash va joy-joyiga qoʻyish boʻyicha Markaz direktoriga takliflar taqdim etish, ularning professional darajasini, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligining kafolatini taʼminlash, ularning kasbiy malakasini oshirish chora-tadbirlarini koʻrish, mutasaddilik qilinadigan boʻlinmalarda kadrlar zaxirasini shakllantirish;

10) tarkibiy boʻlinmalar tomonidan normativ-huquqiy hujjatlar loyihalari sifatli ishlab chiqilishini tashkil etish, Markazning tarkibiy boʻlinmalarida tayyorlangan hujjatlar loyihalarini koʻrib chiqish va ular keyinchalik Markaz direktori tomonidan koʻrib chiqilishi, imzolanishi (viza qoʻyilishi) uchun viza qoʻyish, ularning Oʻzbekiston Respublikasi Prezidenti Administratsiyasi reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, shuningdek, Vazirlar Mahkamasi apparatida normativ-huquqiy hujjatlar loyihalarini ishlab chiqishda Markaz direktorining topshirigʻiga binoan ishtirok etish;

11) Markazga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish, moliyaviy, iqtisodiy, huquqiy ekspertiza va boshqa ekspertizadan puxta oʻtkazish;

12) Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3137-son qarorlari talablariga muvofiq xizmat safarlarini amalga oshirish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

13) tarkibiy boʻlinmalar rahbarlari va xodimlari faoliyati samaradorligi va natijadorligini muntazam tanqidiy tahlil qilish, Markaz hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

14) kasb-hunar taʼlimi sohasiga tegishli masalalar boʻyicha Markaz faoliyatini takomillashtirishga doir amaliy chora-tadbirlar koʻrish, kasb-hunar taʼlimi sohasidagi qonun hujjatlarini takomillashtirishga oid takliflar ishlab chiqish va ularni Markaz direktoriga kiritish;

15) tarkibiy boʻlinmalar rahbarlari va xodimlarini ragʻbatlantirish va intizomiy javobgarlikka tortish, shu jumladan ularning egallab turgan lavozimida qolishi maqsadga muvofiqligi bilan bogʻliq masalani koʻrib chiqish boʻyicha Markaz direktoriga takliflar kiritish, funksional vazifalar va yuklangan vazifalar bajarilishi uchun ularning shaxsiy masʼuliyatini oshirish boʻyicha tizimli chora-tadbirlar koʻrish;

16) Markaz xodimlarining Odob-axloq qoidalari talablariga rioya qilishini, mutasaddilik qilinadigan tarkibiy boʻlinmalar rahbarlari va xodimlarining ushbu qoidalarga rioya etishini taʼminlash;

17) huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

18) Markaz direktoriga davlat xizmatlarining samaradorligi, sifatini va ulardan erkin foydalanishni oshirishga doir takliflarni kiritish;

19) “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonunida belgilangan muddatlarda va tartibda jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil etish, aholi bilan toʻgʻridan toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan joylarga borib qabul qilish;

20) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslar vakillarining Oʻzbekiston Respublikasi Prezidenti Virtual qabulxonasiga tushgan murojaatlari oʻz vaqtida va toʻlaqonli koʻrib chiqilishini taʼminlash;

21) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

24. Quyidagilar markaziy apparat tarkibiy boʻlinmalari rahbarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

2) tarkibiy boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalarning bajarilishini tashkil etish;

3) tegishli tarkibiy boʻlinmalar va Markaz tarkibiga kiruvchi boshqa tashkilotlar faoliyatini oʻz vakolatlari doirasida muvofiqlashtirish;

4) prognoz koʻrsatkichlarning bajarilishini muntazam tahlil qilish hamda tarkibiy boʻlinmalar ushbu koʻrsatkichlarga soʻzsiz erishishini taʼminlashga qaratilgan qoʻshimcha chora-tadbirlarni amalga oshirish boʻyicha Markaz direktorining mutasaddilik qiladigan oʻrinbosarlariga takliflar kiritish;

5) Oʻzbekiston Respublikasi Prezidenti va Vazirlar Mahkamasi qarorlari va topshiriqlari ijrosini taʼminlash, Markaz tarkibiy boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish chora-tadbirlarini koʻrish;

6) Markaz hayʼati qarorlari, Markaz direktori va uning oʻrinbosarlarining buyruqlari hamda topshiriqlari oʻz vaqtida va sifatli bajarilishini taʼminlash;

7) tarkibiy boʻlinmalarning har choraklik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

8) tarkibiy boʻlinmalarga yuklangan vazifalar bajarilishini nazorat qilish va muvofiqlashtirish, hududiy boshqarmalar va Markaz tarkibiga kiruvchi boshqa tashkilotlar faoliyatiga amaliy va metodik yordam koʻrsatish;

9) tarkibiy boʻlinmalar faoliyatiga oid masalalar yuzasidan qonun hujjatlarini takomillashtirish boʻyicha takliflarni ishlab chiqish va ularni koʻrib chiqish uchun Markaz rahbariyatiga kiritish;

10) tarkibiy boʻlinmalarda kadrlarni tanlash va joy-joyiga qoʻyishda Markaz direktori oʻrinbosarlariga takliflar taqdim etish, ularning professional darajasini, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligining kafolatini taʼminlash, kasb malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

11) normativ-huquqiy hujjatlar loyihalarining tarkibiy boʻlinmalar tomonidan sifatli ishlab chiqilishini tashkil etish, Markazning tarkibiy boʻlinmalarida tayyorlangan hujjatlar loyihalarini keyinchalik Markaz rahbariyati tomonidan koʻrib chiqish, imzolash (viza qoʻyish) uchun koʻrib chiqish va viza qoʻyish, ularning Oʻzbekiston Respublikasi Prezidenti Administratsiyasining reglamenti va Vazirlar Mahkamasi reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, Markaz rahbariyatining topshirigʻi boʻyicha normativ-huquqiy hujjatlar loyihalarini Vazirlar Mahkamasi apparatida ishlab chiqishda ishtirok etish;

12) Markazga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish, moliyaviy, iqtisodiy, huquqiy ekspertiza va boshqa ekspertizadan puxta oʻtkazish;

13) Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq xizmat safarlarini amalga oshirish, xizmat safarlari asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

14) tarkibiy boʻlinmalar xodimlari faoliyatining samaradorligi va natijadorligini muntazam ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

15) Markaz xodimlarining Odob-axloq qoidalari talablariga rioya qilishini, tarkibiy boʻlinmalar xodimlari ushbu qoidalarga rioya etishini taʼminlash;

16) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Markaz tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyoti va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

17) Markaz rahbariyatiga davlat xizmatlarining samaradorligi, sifatini va ulardan erkin foydalanishni oshirishga doir takliflar kiritish;

18) jismoniy va yuridik shaxslarning murojaatlarini koʻrib chiqish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatlarda va tartibda aholi bilan toʻgʻridan toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan joylarga borib qabul qilish;

19) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasiga tushgan murojaatlarini oʻz vaqtida va toʻlaqonli koʻrib chiqish;

20) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

25. Quyidagilar hududiy boshqarmalar rahbarlarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

2) hududiy boshqarmalar faoliyatiga umumiy rahbarlik qilish, Oʻzbekiston Respublikasi Prezidenti, Vazirlar Mahkamasining tegishli qarorlari va boshqa qonun hujjatlari va Markaz buyruqlari bilan ularga yuklangan vazifalar va funksiyalar bajarilishini tashkil etish;

3) hududiy boshqarmalar faoliyati bilan bogʻliq prognoz koʻrsatkichlarga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

4) Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq topshiriqlarning oʻz vaqtida va sifatli bajarilishi uchun hududiy boshqarmalar xodimlarining shaxsiy masʼuliyatini oshirish chora-tadbirlarini koʻrish;

5) Markaz hayʼati qarorlari, Markaz direktori va uning oʻrinbosarlarining buyruqlari va topshiriqlari oʻz vaqtida va sifatli bajarilishini taʼminlash;

6) kasb-hunar taʼlimi sohasiga kiradigan masalalar yuzasidan mahalliy davlat hokimiyati organlari va kompleks ijtimoiy-iqtisodiy rivojlantirish sektorlari bilan hamkorlik qilish;

7) oʻz oʻrinbosarlari vakolatlarini belgilash, ular oʻrtasida vazifalarni taqsimlash, hududiy boshqarmalarning boshqa mansabdor shaxslari vakolatlarini belgilash, Markazning hududiy boshqarmalari faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy javobgarlik darajasini belgilash;

8) Markazning hududiy boshqarmalari faoliyatini rejalashtirishni tashkil etish, hududiy boshqarmalar va oʻz oʻrinbosarlarining har choraklik ish rejalarini tasdiqlash, ularning bajarilishi yuzasidan nazoratni taʼminlash;

9) Markazning hududiy boshqarmalarda kadrlarni tanlash va joy-joyiga qoʻyish, ularning samarali faoliyat koʻrsatishi uchun zarur shart-sharoitlar yaratish, hududiy boshqarmalar kadrlar zaxirasini shakllantirish;

10) Markaz direktori nomenklaturasiga kiradigan boʻsh lavozimlarga taklif etilgan kadrlarning, shuningdek, hududiy boshqarmalarga ishga qabul qilinayotgan boshqa kadrlarning professional darajasini amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligining kafolatini taʼminlash;

11) hududiy boshqarmalar xodimlarini, oʻz oʻrinbosarlarini ragʻbatlantirish va intizomiy javobgarlikka tortish masalalarini hal qilish, shu jumladan ular egallab turgan lavozimda qolishi maqsadga muvofiqligiga doir masalalarni koʻrib chiqish, ularning shaxsiy masʼuliyatini oshirish boʻyicha muntazam chora-tadbirlar koʻrish;

12) hududiy boshqarmalar xodimlari tomonidan Markaz xodimlarining Odob-axloq qoidalari talablariga rioya etishini taʼminlash;

13) huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali hududiy boshqarmalar tizimida “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

14) prognoz koʻrsatkichlarning bajarilishini muntazam tahlil qilish hamda hududiy boshqarmalar tomonidan ushbu koʻrsatkichlarga soʻzsiz erishishni taʼminlashga qaratilgan qoʻshimcha chora-tadbirlarni amalga oshirish boʻyicha Markaz direktorining mutasaddilik qiladigan oʻrinbosarlariga takliflar kiritish;

15) hududiy boshqarmalar xodimlari faoliyatining samaradorligi va natijadorligini tizimli ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

16) hududiy boshqarmalar faoliyatiga oid masalalar boʻyicha qonun hujjatlarini takomillashtirish, shuningdek, davlat xizmatlari samaradorligi, sifatini va ulardan erkin foydalanishni oshirish boʻyicha takliflar ishlab chiqish hamda ularni koʻrib chiqish uchun Markaz rahbariyatiga kiritish;

17) kasb-hunar kollejlari faoliyatini muvofiqlashtirish va nazorat qilish;

18) jismoniy va yuridik shaxslarning murojaatlarini koʻrib chiqish, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuni bilan belgilangan muddatlarda va tartibda aholi bilan toʻgʻridan toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslarning vakillarini muntazam ravishda shaxsan qabul qilish, shu jumladan, joylarga borib qabul qilish;

19) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasiga tushgan murojaatlarini oʻz vaqtida va toʻlaqonli koʻrib chiqish;

20) hududiy boshqarmalar xodimlarining lavozim maoshiga mukofotlar, ustamalar toʻlash, ularga moddiy yordam berish, ularni mukofotlash, ragʻbatlantirish va ularga nisbatan intizomiy chora qoʻllash toʻgʻrisida qaror qabul qilish, davlat mukofotlari va idoraviy mukofotlar bilan taqdirlash toʻgʻrisida Markazga takliflar kiritish;

21) davlat sirini yoki qonun bilan qoʻriqlanadigan boshqa sirni tashkil etuvchi maʼlumotlarning himoya qilinishini taʼminlash.

26. Markaz direktori:

1) Markazga yuklangan vazifalar va funksiyalarning bajarilishi;

2) ushbu Nizomning 17-bandida nazarda tutilgan Markazning javobgarlik sohalari boʻyicha;

3) ushbu Nizomning 22-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

27. Markaz oʻrinbosarlari:

1) Markazning mutasaddilik qilinadigan tarkibiy boʻlinmalarida Markazga yuklangan vazifalar va funksiyalarning bajarilishi;

2) ushbu Nizomning 17-bandida nazarda tutilgan Markazning mutasaddilik qilinadigan masalalarga doir javobgarlik sohalari boʻyicha;

3) ushbu Nizomning 23-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

28. Markaziy apparat tarkibiy boʻlinmalari rahbarlari:

1) tegishli tarkibiy boʻlinmalarga yuklangan vazifalar va funksiyalarning amalga oshirilishi;

2) ushbu Nizomning 19-bandida nazarda tutilgan markaziy apparatning javobgarlik sohalari boʻyicha;

3) ushbu Nizomning 24-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

29. Hududiy boshqarmalar rahbarlari:

1) hududiy boshqarmalarga yuklangan vazifalar va funksiyalarning bajarilishi;

2) ushbu Nizomning 21-bandida nazarda tutilgan hududiy boshqarmalarning javobgarlik sohalari boʻyicha;

3) ushbu Nizomning 25-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

30. Markazga Oʻzbekiston Respublikasi oliy va oʻrta maxsus taʼlim vazirining taqdimnomasiga asosan Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan Markaz direktori — Oʻzbekiston Respublikasi oliy va oʻrta maxsus taʼlim vazirining birinchi oʻrinbosari boshchilik qiladi.

31. Markaz direktorining ikki nafar oʻrinbosari, shu jumladan bir nafar birinchi oʻrinbosari boʻladi.

32. Markaz direktorining oʻrinbosarlari Oʻzbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod etiladi.

33. Markaz direktori boʻlmagan vaqtda uning vakolatlari vazifalar taqsimotiga binoan uning oʻrinbosarlari tomonidan bajariladi.

34. Hududiy boshqarmalar boshliqlari tegishli ravishda Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari bilan kelishilgan holda Markaz direktori tomonidan lavozimga tayinlanadi va lavozimdan ozod etiladi.

35. Markaz direktori Markazning tarkibiga kiruvchi boshqa tashkilotlar rahbarlarini belgilangan tartibda lavozimga tayinlaydi va lavozimdan ozod etadi.

36. Markaz direktori markaziy apparat boshqarmalari va boʻlimlari, hududiy boshqarmalar toʻgʻrisidagi nizomni, Markaz tarkibiga kiruvchi boshqa tashkilotlarning ustavlarini belgilangan tartibda tasdiqlaydi.

37. Markaziy apparat tarkibiy boʻlinmalarining hududiy boshqarmalar va Markaz tarkibiga kiruvchi boshqa tashkilotlar bilan oʻzaro hamkorligi markaziy apparat tarkibiy boʻlinmalarining rahbarlari tomonidan taʼminlanadi.

Markaziy apparatning tarkibiy boʻlinmalari hududiy boshqarmalar va Markaz tarkibiga kiruvchi boshqa tashkilotlar bilan oʻz faoliyati yoʻnalishlari boʻyicha hamkorlik qilish doirasida:

1) topshiriqlarni hududiy boshqarmalarga va Markaz tarkibiga kiruvchi boshqa tashkilotlarga yetkazadi hamda ularning bajarilishini nazorat qiladi;

2) hududiy boshqarmalarga va Markaz tarkibiga kiruvchi boshqa tashkilotlarga tarkibiy boʻlinmalarning bevosita faoliyati masalalari boʻyicha soʻrovlar yuboradi hamda ularning ijro etilishini nazorat qiladi;

3) hududiy boshqarmalar va Markaz tarkibiga kiruvchi boshqa tashkilotlarning faoliyat yuritish amaliyotini tekshiradi va oʻrganadi, umumlashtiradi, uni takomillashtirishga qaratilgan chora-tadbirlarni ishlab chiqadi va qabul qiladi;

4) hududiy boshqarmalar va Markaz tarkibiga kiruvchi boshqa tashkilotlar faoliyatini tashkil etish va faoliyati natijalari toʻgʻrisida hisobot va axborot materiallari, statistika maʼlumotlari va boshqa maʼlumotlar oʻrganilishini tashkil etadi;

5) hududiy boshqarmalar va Markaz tarkibiga kiruvchi boshqa tashkilotlarning ish rejalarini tahlil qiladi, faoliyatini rejalashtirishni takomillashtirishga doir chora-tadbirlar koʻradi;

6) hududiy boshqarmalar va Markaz tarkibiga kiruvchi boshqa tashkilotlardan tushgan takliflarni koʻrib chiqadi;

7) normativ-huquqiy hujjatlar loyihalarini tayyorlashda hududiy boshqarmalar va Markaz tarkibiga kiruvchi boshqa tashkilotlarning ishtirokini tashkil etadi, kasb-hunar taʼlimi sohasida qonun hujjatlarini takomillashtirish boʻyicha ulardan tushgan takliflarni koʻrib chiqadi.

38. Hududiy boshqarmalar va Markaz tarkibiga kiruvchi boshqa tashkilotlar markaziy apparatning tarkibiy boʻlinmalari bilan hamkorlik qiladi, shu jumladan:

1) Markaz rahbariyati topshiriqlarining ijrosi haqida axborot beradi;

2) kasb-hunar taʼlimi sohasida qonun hujjatlarini amalga oshirish boʻyicha faoliyat natijalari toʻgʻrisida markaziy apparatga axborot taqdim etadi;

3) ularning faoliyatini tekshirish va oʻrganish natijasida aniqlangan kamchiliklarni va qoidabuzarliklarni bartaraf etish natijalari toʻgʻrisida maʼlumot beradi;

4) oʻz faoliyati natijalari toʻgʻrisidagi hisobotlarni belgilangan tartibda va muddatlarda markaziy apparatga taqdim etadi;

5) kasb-hunar taʼlimi muammolarini hal qilishga qaratilgan takliflarni markaziy apparatga yuboradi;

6) kompleks ijtimoiy-iqtisodiy rivojlantirish sektorlari bilan oʻzaro hamkorlik natijalari toʻgʻrisida axborot beradi;

7) vakolatli organlar tomonidan oʻtkazilgan oʻz faoliyatini tekshirish natijalari toʻgʻrisida xabar beradi.

39. Markaziy apparat tarkibiy boʻlinmalari, hududiy boshqarmalar hamda Markaz tarkibiga kiruvchi boshqa tashkilotlarning oʻzaro hamkorligi jarayonida yuzaga keladigan kelishmovchiliklar Markaz direktorining topshirigʻiga binoan tegishli oʻrinbosari tomonidan koʻrib chiqiladi.

Agar koʻrib chiqishdan keyin kelishmovchiliklar hal etilmasa, bevosita Markaz direktori ularni bartaraf etish boʻyicha qaror qabul qiladi.

40. Markaz oʻz vazifalari va funksiyalarini amalga oshirishda davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar bilan hamkorlik qiladi.

Hududiy boshqarmalar oʻz vakolati doirasida davlat va xoʻjalik boshqaruvi organlari, mahalliy davlat hokimiyati organlarining hududiy boʻlinmalari va boshqa tashkilotlar bilan hamkorlik qiladi.

41. Hududiy boshqarmalar tegishli hududlarni ijtimoiy-iqtisodiy rivojlantirish boʻyicha “yoʻl xaritalari”ni ishlab chiqishda va amalga oshirishda kompleks ijtimoiy-iqtisodiy rivojlantirish boʻyicha sektorlar bilan oʻzaro yaqin hamkorlik qiladi.

42. Markaz faoliyatiga Vazirlar Mahkamasining tegishli kompleksi rahbari va Vazirlar Mahkamasining axborot-tahlil departamentlari hamda Oʻzbekiston Respublikasi Prezidenti devonining tegishli xizmati mutasaddilik qiladi.

43. Markazda Markaz direktori (hayʼat raisi), Markaz direktorining oʻrinbosarlari (lavozimi boʻyicha), shuningdek, Markaz faoliyatining asosiy yoʻnalishlarini muvofiqlashtiruvchi Markaz tarkibiy boʻlinmalari rahbarlaridan iborat tarkibda hayʼat tuziladi.

Hayʼat tarkibining soni va shaxsiy tarkibi Markaz direktorining taqdimnomasiga binoan Vazirlar Mahkamasi tomonidan tasdiqlanadi.

44. Hayʼatga quyidagi vazifalar yuklanadi:

Markaz faoliyatining asosiy yoʻnalishlarini ishlab chiqish va amalga oshirish;

qonun hujjatlarida belgilangan vazifalar oʻz vaqtida va sifatli amalga oshirilishini taʼminlash uchun kasb-hunar taʼlimi tizimi xodimlari va rahbarlarining shaxsiy javobgarligini oshirish choralarini koʻrgan holda, hududiy boshqarmalar va Markaz tarkibiga kiruvchi boshqa tashkilotlar rahbarlarining hisobotlari muntazam ravishda eshitilishini tashkil etish;

Markaz faoliyatining kasb-hunar taʼlimi sohasida keng dunyoqarash, chuqur bilimga ega boʻlgan, hozirgi bozor sharoitlarida muayyan kasb-hunar va ish koʻnikmalarini egallagan yoshlarni tayyorlashga yoʻnaltirilgan yagona davlat siyosatini olib borish, kasb-hunar taʼlimi sohasida maqsadli vazifalar va ustuvor yoʻnalishlarni roʻyobga chiqarish boʻyicha amalga oshirilayotgan chora-tadbirlarning natijadorligini har chorakda muntazam koʻrib chiqish;

joylarda kasb-hunar taʼlimining dolzarb masalalari muhokama qilinishini taʼminlagan holda, hayʼatning kengaytirilgan sayyor majlislari oʻtkazilishini tashkil etish, shuningdek, yuzaga kelgan muammolarni bartaraf etish boʻyicha tegishli qarorlarni ishlab chiqish va qabul qilish;

Markaziy apparatga va uning tizimiga kiradigan lavozimlar nomenklaturasini koʻrib chiqish va tasdiqlash;

Markaz nomenklaturasiga kiradigan lavozimlarga kadrlarni tanlash, joy-joyiga qoʻyish masalalarini koʻrib chiqish;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari bilan belgilangan vazifalar oʻz vaqtida va sifatli bajarilishini taʼminlash uchun Markaz rahbarlari va xodimlarining ijro intizomini mustahkamlash va shaxsiy javobgarligini oshirish.

Hayʼat Markaz vakolatiga kiritilgan boshqa masalalarni ham koʻrib chiqishga haqli.

45. Hayʼat majlisiga Markaz vakolatiga kiradigan masalalar yuzasidan davlat va xoʻjalik boshqaruvi organlari, boshqa tashkilotlar rahbarlari taklif etilishi mumkin.

46. Hayʼat, agar uning majlisida hayʼat tarkibining yarmidan koʻpi qatnashsa, vakolatli hisoblanadi. Koʻrib chiqilayotgan masalalar yuzasidan qarorlar oddiy koʻpchilik ovoz bilan qabul qilinadi.

47. Hayʼat qarorlari Markaz direktorining buyruqlari bilan amalga oshiriladi.

48. Markaz direktori va hayʼat aʼzolari oʻrtasida kelishmovchiliklar yuzaga kelgan taqdirda, Markaz direktori yuzaga kelgan kelishmovchiliklar haqida Oliy va oʻrta maxsus taʼlim vaziriga va Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosariga axborot bergan holda mustaqil ravishda qaror qabul qiladi. Shuningdek, hayʼat aʼzolari ham Oliy va oʻrta maxsus taʼlim vaziriga va Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosariga oʻz fikrini maʼlum qilishi mumkin.

49. Hayʼat faoliyatining tartibi uning hayʼat tomonidan tasdiqlanadigan reglamenti bilan belgilanadi.

50. Markazda Ilmiy metodik kengash jamoatchilik asosida faoliyat yuritadi. Kengash tarkibi har 3 yilda bir marta Markaz direktorining buyrugʻi bilan tasdiqlanadi.

51. Ilmiy metodik kengash:

davlat taʼlim standartlari, oʻquv rejalar, dasturlar, darslik va oʻquv qoʻllanmalari mazmunini takomillashtirish boʻyicha ilgʻor tajribalar asosida tavsiyalar ishlab chiqadi;

ilgʻor pedagogik va axborot-kommunikatsiya texnologiyalarini, shuningdek, kasb-hunar taʼlimi sohasidagi ilmiy izlanishlar natijalarining taʼlim jarayonida qoʻllanilishini rivojlantirish masalalarni koʻrib chiqadi.

Ilmiy metodik kengash kasb-hunar taʼlimini metodik taʼminlashni mustahkamlashga qaratilgan boshqa masalalarni ham koʻrib chiqishga haqli.

52. Ilmiy metodik kengash yigʻilishlariga Markaz vakolatiga kiradigan masalalar boʻyicha boshqa vazirliklar va idoralar, ish beruvchi tashkilotlar vakillari taklif etilishi mumkin.

53. Ilmiy metodik kengash oʻz faoliyatini Markaz direktori tomonidan tasdiqlanadigan nizomga muvofiq amalga oshiradi.

54. Markaz faoliyatining samaradorligi va natijadorligi muntazam baholanishi lozim.

55. Markaz faoliyatining samaradorligi va natijadorligiga berilgan baholar Oʻzbekiston Respublikasi Prezidenti Administratsiyasining tegishli tarkibiy boʻlinmalari bilan kelishilgan holda Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari tomonidan tasdiqlanadigan Markaz faoliyatining samaradorligi va natijadorligini baholash mezonlari va ish indikatorlariga asoslanadi.

56. Markaz faoliyatining samaradorligi va natijadorligini baholash yakunlari boʻyicha:

Markaz rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Markaz faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari koʻriladi.

Markaz faoliyatining samaradorligi va natijadorligini baholash tartibi va metodikasi qonun hujjatlariga koʻra belgilanadi.

57. Markaziy apparat, hududiy boshqarmalar hamda Markaz tarkibiga kiruvchi boshqa tashkilotlarni moddiy-texnik taʼminlash va xodimlar mehnatiga haq toʻlash Oʻzbekiston Respublikasi respublika budjeti mablagʻlari, shuningdek, qonun hujjatlarida taqiqlanmagan boshqa manbalar hisobiga moliyalashtiriladi.

58. Markaz xodimlariga Oʻzbekiston Respublikasi Oliy va oʻrta maxsus taʼlim vazirligining tegishli lavozimlari uchun belgilangan mehnatga haq toʻlash va moddiy ragʻbatlantirish shartlari qoʻllaniladi.

Markaz xodimlarining lavozim maoshlariga har oyda qoʻshiladigan ragʻbatlantirish xususiyatiga ega boʻlgan qoʻshimcha haqlar va ustamalar Markaz direktori tomonidan tasdiqlanadigan nizomga muvofiq toʻlanadi.

59. Markaz xodimlariga oylik ish haqi toʻlash va ularni moddiy ragʻbatlantirish manbalari Oʻzbekiston Respublikasi Davlat budjeti, budjet tashkilotini rivojlantirish jamgʻarmasi mablagʻlaridan va qonun hujjatlarida taqiqlanmagan boshqa manbalar hisobiga amalga oshiriladi.

60. Markaz direktori Markazning faoliyati toʻgʻrisida Oʻzbekiston Respublikasi Oliy va oʻrta maxsus taʼlim vazirligiga, Vazirlar Mahkamasiga, Oʻzbekiston Respublikasi Prezidenti Administratsiyasining tegishli tarkibiy boʻlinmalariga va Oʻzbekiston Respublikasi Prezidentiga muntazam ravishda hisobot beradi.

61. Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari Markaz rahbarlariga yuklangan vazifalarning samarali bajarilishi uchun ularning faoliyati boʻyicha muntazam monitoring olib boradi, Markaz faoliyatining samaradorligiga xolisona baho beradi.

62. Monitoring va baholash yakunlari boʻyicha Markazning alohida oʻrnak koʻrsatgan rahbarlari, mansabdor shaxslari va xodimlari ragʻbatlantiriladi yoxud yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan javobgarlikka tortiladi.

63. Markazni qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “2010-2011 oʻquv yilida Oʻzbekiston Respublikasining oʻrta maxsus, kasb-hunar taʼlim muassasalariga qabul toʻgʻrisida” 2010-yil 1-iyuldagi 131-son qarorining (Oʻzbekiston Respublikasi QHT, 2010-y., 26-27-son, 212-modda) 1-ilovasi.

2. Vazirlar Mahkamasining “Tayanch kasb-hunar kolleji va uning filiallari toʻgʻrisidagi nizomni tasdiqlash haqida” 2010-yil 19-avgustdagi 180-son qarori (Oʻzbekiston Respublikasi QT, 2010-y., 8-son, 45-modda).

3. Vazirlar Mahkamasining “Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi faoliyatini yanada takomillashtirish chora-tadbirlari toʻgʻrisida” 2011-yil 12-iyuldagi 204-son qarori (Oʻzbekiston Respublikasi QHT, 2011-y., 28-son, 291-modda).

4. Vazirlar Mahkamasining “Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi toʻgʻrisidagi nizomni tasdiqlash haqida” 2011-yil 26-avgustdagi 244-son qarori(Oʻzbekiston Respublikasi QT, 2011-y., 8-son, 73-modda).

5. Vazirlar Mahkamasining “Oʻrta maxsus, kasb-hunar taʼlimi muassasalarini axborot-metodik taʼminlash xizmati faoliyatini tashkil etish toʻgʻrisida” 2014-yil 14-apreldagi 91-son qarori(Oʻzbekiston Respublikasi QHT, 2014-y., 16-son, 179-modda).