Iqtisodiyotning real tarmoqlari va sohalarida talab qilingan yoʻnalishlar va mutaxassisliklar boʻyicha oʻrta maxsus, kasb-hunar taʼlimi olgan kadrlarni maqsadli va sifatli tayyorlashni taʼminlash, umumtaʼlim maktablarining 9-sinflari bitiruvchilarini oʻn ikki yillik taʼlim bilan toʻliq qamrab olish, shuningdek kasb-hunar kollejlari va akademik litseylarda oʻquv-taʼlim jarayonini tashkil etish tizimini mutaxassislarning kasb tayyorgarligiga qoʻyiladigan zamonaviy talablarni hisobga olgan holda yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 2009-yil 1-iyuldagi 334-f-son farmoyishi bilan tashkil etilgan Maxsus respublika komissiyasi (R.S. Azimov), Oʻzbekiston Respublikasi Sogʻliqni saqlash vazirligi, Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining kasb-hunar kollejlari va akademik litseylar bitiruvchilariga boʻlgan amaldagi talabni tanqidiy oʻrganish asosida ishlab chiqilgan:

tajriba tariqasida 2010/2011 oʻquv yilidan boshlab rivojlangan oʻquv-metodik va moddiy-texnika bazaga, yuqori malakali oʻqituvchilar va ishlab chiqarish taʼlimi ustalariga ega boʻlgan yetakchi kasb-hunar kollejlari negizida 1-ilovadagi* roʻyxatga muvofiq olisdagi ixtisosli kasb-hunar kollejlaridan tashkil etiladigan filiallari boʻlgan tayanch kasb-hunar kollejlarini tashkil etish;

respublika mintaqalari boʻyicha 2-ilovaga* muvofiq 20 ta kasb-hunar kollejini qayta ixtisoslashtirish;

3-ilovaga* muvofiq tibbiyot kollejlarini respublika oliy tibbiy taʼlim muassasalari huzuridagi akademik litseylarga aylantirish;

4-ilovaga* muvofiq tibbiyot kollejlarini respublikaning oliy tibbiy taʼlim muassasalariga biriktirish toʻgʻrisidagi takliflariga rozilik berilsin.

2. Oʻzbekiston Respublikasi taʼlim muassasalariga qabul qilish boʻyicha Davlat komissiyasi tomonidan Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi va boshqa manfaatdor vazirliklar va idoralar bilan birgalikda ishlab chiqilgan 2010/2011 oʻquv yilida umumtaʼlim maktablarining 9-sinflari bitiruvchilarini akademik litseylar va kasb-hunar kollejlariga qabul qilishning umumiy parametrlari 5 va 5.1 — 5.13-ilovalarga* muvofiq tasdiqlansin.

3. Oʻzbekiston Respublikasi taʼlim muassasalariga qabul qilish boʻyicha Davlat komissiyasi (A.N. Aripov) Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir hafta muddatda 2010/2011 oʻquv yilida viloyatlar, shaharlar va tumanlar boʻyicha har bir kasb-hunar kolleji va akademik litseyga umumtaʼlim maktablarining 9-sinflari bitiruvchilarini qabul qilish parametrlarini tasdiqlasin.

Oʻzbekiston Respublikasi taʼlim muassasalariga qabul qilish boʻyicha Davlat komissiyasiga zaruriyat boʻlganda, umumtaʼlim maktablarining 9-sinflari bitiruvchilarini oʻrta maxsus, kasb-hunar taʼlim muassasalarida oʻqitish bilan toʻliq qamrab olinishini taʼminlash maqsadida, akademik litseylar va kasb-hunar kollejlariga qabul qilish koʻrsatkichlariga oʻzgartirishlar kiritish huquqi berilsin.

4. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari manfaatdor vazirliklar va idoralar bilan birgalikda 2010/2011 oʻquv yilida umumtaʼlim maktablarining 9-sinflari bitiruvchilarini akademik litseylar va kasb-hunar kollejlarida oʻqishga qabul qilishning ushbu qaror bilan tasdiqlangan umumiy parametrlari bajarilishini hamda 2010-yil 10-avgustgacha boʻlgan muddatda Vazirlar Mahkamasiga qamrab olish natijalari boʻyicha yakuniy axborot taqdim etilishini taʼminlasinlar.

5. Tayanch kasb-hunar kollejlarining asosiy faoliyati bilan birgalikda quyidagilar ularning muhim vazifalari deb hisoblansin:

oʻquv jarayoni sifatini oshirishga yoʻnaltirilgan oʻquv-metodik rahbarlik qilish va filiallar faoliyatini muvofiqlashtirish, zamonaviy taʼlim va axborot texnologiyalarini, masofadan turib oʻqitish tizimlarini va real iqtisodiyot tarmoqlari va sohalarida talab qilingan malakali mutaxassislarni tayyorlashning boshqa ilgʻor usullarini joriy etish;

davlat taʼlim standartlari talablariga qatʼiy muvofiq ravishda oʻquv dasturlari va metodik qoʻllanmalarni, oʻqitishning interaktiv usullarini ishlab chiqish va qoʻllashda filiallarga metodik va amaliy yordam berish;

filiallarda oʻquv-pedagogika va tarbiyaviy ishlarni olib borishni tashkil etishga tayanch kollejlarning yetakchi oʻqituvchilari va ishlab chiqarish taʼlimi ustalarini keng jalb etish, mutaxassislar tayyorlash boʻyicha yuqori natijalarga erishishda ish tajribasini almashishni tashkil etish;

tayanch kollejlarning moddiy-texnika va oʻquv-metodik bazasida filiallarning oʻquvchilari uchun ixtisosli mutaxassisliklar boʻyicha mahorat darslari va amaliy mashgʻulotlar oʻtkazilishini taʼminlash.

Oʻzbekiston Respublikasi Vazirlar Mahkamasi bir oy muddatda tayanch kasb-hunar kolleji va uning filiallari toʻgʻrisidagi Nizomni tasdiqlasin.

6. 2010-yil 1-sentabrdan boshlab:

tayanch kasb-hunar kollejlarining direktorlari, direktorning oʻquv, maʼnaviy-maʼrifiy ishlar va ishlab chiqarish taʼlimi boʻyicha oʻrinbosarlari, metodistlari va ishlab chiqarish taʼlimi ustalarining bazaviy tarif stavkasiga filiallar bilan ishlash boʻyicha qoʻshimcha funksiyalarni bajarganligi uchun 20 foiz miqdorida oylik ustama;

tayanch kasb-hunar kollejlarining oʻqituvchilari tomonidan filialda oʻquv-pedagogik ishlar bajarilgan taqdirda ularning bazaviy stavkalariga 20 foiz miqdorida ustama joriy etilsin.

Oʻzbekiston Respublikasi Moliya vazirligi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda 2010-yil 1-sentabrgacha boʻlgan muddatda tayanch kollejlarning rahbarlari, oʻqituvchilari, metodistlari va ishlab chiqarish taʼlimi ustalari tomonidan filiallarda olib boriladigan ishlar uchun ularga ustamalar joriy etish tartibi toʻgʻrisidagi vaqtinchalik nizomni ishlab chiqsin va belgilangan tartibda tasdiqlasin.

7. Oʻzbekiston Respublikasi Sogʻliqni saqlash vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tegishli oliy tibbiy taʼlim muassasalari bilan birgalikda:

2010/2011 oʻquv yili boshlanguniga qadar tibbiyot akademik litseylari va tibbiy oliy taʼlim muassasalariga biriktirilgan kollejlarning oʻquv-laboratoriya bazasini inventarizatsiyadan oʻtkazsinlar, oʻquv dasturlarini tanqidiy qayta koʻrib chiqsinlar, ularni zarur oʻquv va metodik adabiyotlar va qoʻllanmalar bilan taʼminlasinlar, malakali pedagog kadrlar bilan, shu jumladan oliy taʼlim muassasalarining professor va oʻqituvchilarini faol jalb etish hisobiga butlasinlar;

oliy tibbiy taʼlim muassasalari tomonidan oʻquv-taʼlim jarayoni sifatini oshirishda, respublikaning davolash muassasalari bazasida oʻquvchilarning amaliy mashgʻulotlarini tashkil etishda, shuningdek oʻqituvchilar tarkibining malakasini oshirishda tibbiyot akademik litseylari va kollejlariga tizimli asosda har tomonlama metodik va amaliy yordam koʻrsatilishini taʼminlasinlar.

8. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi:

manfaatdor vazirliklar va idoralar, mahalliy davlat hokimiyati organlari bilan birgalikda 2010/2011 oʻquv yili boshlanguniga qadar tayanch va qayta ixtisoslashtiriladigan kasb-hunar kollejlarining moddiy-texnika bazasi mustahkamlanishini, zarur oʻquv-laboratoriya uskunalari, oʻquv va metodik adabiyotlar bilan jihozlanishini, shuningdek ularning malakali pedagog kadrlar bilan butlanishini taʼminlasin;

Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi bilan birgalikda 2010/2011 oʻquv yili yakunlari boʻyicha, oʻtkazilgan eksperimentni tahlil qilish natijalari asosida Oʻzbekiston Respublikasi Vazirlar Mahkamasiga tayanch kasb-hunar kollejlari va ularning filiallari faoliyatini, shuningdek ularning xodimlari mehnatini ragʻbatlantirish tizimini yanada takomillashtirish toʻgʻrisida takliflar kiritsinlar.

9. Oʻzbekiston Respublikasi Moliya vazirligi oʻrta maxsus, kasb-hunar taʼlimi muassasalariga qabul qilishning 2010/2011 oʻquv yili uchun belgilangan umumiy parametrlarini hisobga olgan holda kasb-hunar kollejlari va akademik litseylar taʼminoti uchun budjetdan belgilangan tartibda zarur mablagʻlar ajratsin.

10. Umumtaʼlim maktablarining 9-sinflari bitiruvchilarini akademik litseylar va kasb-hunar kollejlarida oʻqitish bilan toʻliq qamrab olish boʻyicha ushbu qarorda belgilangan topshiriqlar bajarilishi hamda bunda paydo boʻladigan tezkor masalalar oʻz vaqtida hal etilishi uchun toʻliq javobgarlik tuman, shahar va viloyat hokimliklariga, Qoraqalpogʻiston Respublikasi Vazirlar Kengashiga yuklansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.