“Yoʻl harakati xavfsizligi toʻgʻrisida”gi Oʻzbekiston Respublikasi qonuni, Oʻzbekiston Respublikasi Vazirlar Mahkamasining 2011-yil 26-dekabrdagi qarori bilan tasdiqlangan “Oʻzbekiston Respublikasi hududidagi avtomobil yoʻllarida xavfsizlikni taʼminlash va tashkil etish chora-tadbirlari toʻgʻrisida”gi 342-son qarori, Oʻzbekiston Respublikasi Vazirlar Mahkamasining 2022-yil 12-apreldagi “Yoʻl harakati qoidalarini tasdiqlash toʻgʻrisida”gi 172-son qarori ijrosi yuzasidan Zomin tumanida fuqarolarning xavfsizligi va avtotransport vositalarining harakatini tartibga solish maqsadida Zomin tumani Ichki ishlar boshqarmasining 2026-yil 9-iyundagi 48/39/1106-sonli xatini koʻrib chiqib, Oʻzbekiston Respublikasi “Mahalliy davlat hokimiyati toʻgʻrisida”gi qonunining 6-, 21¹-moddalariga asosan, qaror qilaman:

1. Zomin tumani Ichki ishlar boshqarmasining 2026-yil 9-iyundagi 48/39/1106-sonli xati inobatga olinsin.

2. Zomin tumanida fuqarolarning xavfsizligi va avtotransport vositalarining harakatini tartibga solish maqsadida:

Gʻ. Gʻulom MFYdagi “Hurriyat” koʻchasining 1-sonli maktab hamda “Maʼrifatli” jome masjidi joylashgan qismiga 3.24 “Yuqori tezlik cheklangan”, 3.25 “Yuqori tezlik cheklangan hududning oxiri”, 5.46 “Maktab”, 6.19 “Jome masjidi” va 1.31 “Sunʼiy yoʻl notekisligi” yoʻl belgilari, shuningdek rezinali tezlik pasaytirgichlarni oʻrnatishga ruxsat berilsin.

Shuningdek, Dashtobod shahri hududidan oʻtuvchi D052 avtomobil yoʻlining 1–3-kilometrlari oraligʻiga 3.24 “Yuqori tezlik cheklangan” (50 km/soat) va 3.25 “Yuqori tezlik cheklangan hududning oxiri” yoʻl belgilari, “Dashtobod–Zomin” yoʻnalishi boʻyicha harakatlanish qismidagi D052 avtomobil yoʻlining 2,1–2,3-kilometrlari oraligʻining chap tomonida joylashgan parallel mahalla yoʻliga 1.21 “Bolalar” va 1.31 “Sunʼiy yoʻl notekisligi” yoʻl belgilari oʻrnatish hamda mazkur yoʻl uchastkasini rezinali tezlik pasaytirgichlar bilan jihozlashga ruxsat berilsin.

3. Zomin tumani ichki ishlar boshqarmasi yoʻl harakati xavfsizligi boʻlimi (O.Xasanov):

Mazkur qaror bilan tegishli joyga yoʻl belgilari va rezinali tezlik pasaytirgichlar oʻrnatilishini hamda belgilangan tartibda yoʻl yotiq chiziqlari chizilishini tashkil etsin hamda ushbu hududlarda avtomobillar harakatini nazorat qilib borsin.

4. Ushbu qaror rasman eʼlon qilingan kundan kuchga kiradi.

5. Mazkur qaror “Sharq tongi” gazetasida rasmiy eʼlon qilinsin va hokimlikning rasmiy veb-saytiga joylashtirilsin.

6. Qaror ijrosini taʼminlash tuman hokimining oʻrinbosari E.Maxmanazarov hamda tuman ichki ishlar boshqarmasi boshligʻi I.Nurmatov zimmasiga yuklansin.