Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6- va 21¹-moddalari, “Taʼlim toʻgʻrisida”gi Qonunning 27-moddasi, Vazirlar Mahkamasining 2017-yil 15-martdagi 140-sonli qarori bilan tasdiqlangan “Umumiy oʻrta taʼlim toʻgʻrisida”gi Nizomning 39-bandiga asosan shaharda maktab yoshidagi bolalarni umumiy oʻrta taʼlimga qamrab olish jarayonida umumtaʼlim muassasalariga biriktirilgan hududlar (mikrohudud)ni aniq belgilab olish maqsadida qaror qilaman:

1. Jizzax shahar maktabgacha va maktab taʼlimi boʻlimining 2026-yil 26-maydagi 01/3-1344-sonli xati maʼlumot va ijro uchun qabul qilinsin.

2. Jizzax shahrida maktab yoshidagi bolalarni umumiy oʻrta taʼlimga toʻliq qamrab olish boʻyicha umumtaʼlim muassasalariga biriktirilgan hududlar (mikrohudud) roʻyxati ilovaga asosan tasdiqlansin.

3. Shahar hokimining oʻrinbosari S.Silliyev, shahar Maktabgacha va maktab taʼlimi boʻlimi v.b. (S.Komilov) va shahardagi 31 ta umumtaʼlim muassasalari rahbarlari zimmasiga maktab yoshidagi bolalarni umumiy oʻrta taʼlimga toʻliq qamrab olish, oʻquvchilarning darslarga qatnashish holati yuzasidan monitoring olib borish va uning natijasida aniqlangan muammolarni bartaraf etish boʻyicha zarur choralar koʻrish vazifasi topshirilsin.

4. Belgilansinki, shahardagi umumtaʼlim muassasalar rahbarlari oʻzlari rahbarlik qilayotgan muassasaga biriktirilgan hududdagi maktab yoshidagi bolalarni oʻz vaqtida umumtaʼlim muassasasiga oʻqishga jalb qilish uchun masʼul hisoblanadi.

5. Oʻzbekiston mahallalar uyushmasi shahar boʻlimi (Sh.Azimov)ga mahalla fuqarolar yigʻini raislariga maktab yoshidagi bolalarni umumtaʼlim muassasalariga jalb etish jarayonida shahar maktabgacha va maktab taʼlimi boʻlimi hamda umumtaʼlim muassasalarga amaliy yordam berish tavsiya etilsin.

6. Jizzax shahar Maktabgacha va maktab taʼlimi boʻlimi (S.Komilov), Oʻzbekiston mahallalar uyushmasi shahar boʻlimi (Sh.Azimov), Jizzax shahar Kambagʻallikni qisqartirish va bandlikka koʻmaklashish boʻlimi (O.Gadoyev), Inson ijtimoiy hizmatlar markazi shahar boʻlimi (N.Mamatqulov) hamda mahalla fuqarolar yigʻinlari bilan hamkorlikda nogironligi boʻlgan bolalar, ijtimoiy himoyaga muhtoj oilalar farzandlari, shuningdek, taʼlimdan chetda qolish xavfi yuqori boʻlgan bolalarni aniqlash, ularni umumiy oʻrta taʼlim bilan toʻliq qamrab olish yuzasidan alohida manzilli chora-tadbirlar rejasini 10 kun muddatda ishlab chiqsin va ijrosini taʼminlansin.

Shuningdek mаrkur tashkilot rahbarlari amalga oshirilgan ishlar yuzasidan har yarim yilda Xalq deputatlari Jizzax shahar Kengashining tegishli doimiy komissiyasiga axborot kiritib borilsin

7. Mazkur qaror “Jizzax ovozi” gazetasida rasmiy eʼlon qilinsin. Shuningdek shahar hokimligi va Maktabgacha va maktab taʼlimi boʻlimining rasmiy veb-sayti hamda maktablarning axborot stendlarida eʼlon qilinishi taʼminlansin.

8. Qaror rasmiy eʼlon qilingan kundan eʼtiboran kuchga kiradi.

9. Mazkur qaror qabul qilinishi munosabati bilan shahar hokimining 2025-yil 22-maydagi “Maktab yoshidagi bolalarni umumiy oʻrta taʼlimga qamrab olish boʻyicha umumtaʼlim muassasalariga hududlar (mikrohudud)ni biriktirish toʻgʻrisida”gi 101-3-55-Q/26-sonli qarori oʻz kuchini yoʻqotgan deb hisoblansin.

10. Ushbu qarorning ijrosini nazorat qilish Jizzax shahar hokimining oʻrinbosari S.Silliyev hamda Xalq deputatlari Jizzax shahar Kengashining Yoshlar siyosati, taʼlim, sogʻliqni saqlash va ijtimoiy masalalar boʻyicha doimiy komissiyasi raisi (M.Abdusattarova) zimmasiga yuklatilsin.