Oʻzbekiston Respublikasi Prezidentining 2019-yil 8-oktabrdagi PF-5847-son “Oʻzbekiston Respublikasi oliy taʼlim tizimini 2030-yilgacha rivojlantirish konsepsiyasini tasdiqlash toʻgʻrisida”gi va 2025-yil 5-maydagi PF-78-son “Istiqbolli kadrlarni maqsadli tayyorlash hamda ularni davlat boshqaruvi va xizmatiga samarali jalb etish tizimini yanada takomillashtirish chora-tadbirlari toʻgʻrisida”gi farmonlariga muvofiq buyuraman:

1. Oʻzbekiston Respublikasi oliy va oʻrta maxsus taʼlim vazirining 2015-yil 30-oktabrdagi 9-2015-son buyrugʻi (roʻyxat raqami 2734, 2015-yil 26-noyabr) (Oʻzbekiston Respublikasi qonun hujjatlari toʻplami, 2015-y., 47-son, 604-modda) bilan tasdiqlangan Oliy taʼlim tashkilotlari magistratura mutaxassisliklari talabalari tomonidan stajirovkani oʻtash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. Muqaddima quyidagi tahrirda bayon etilsin:

“Mazkur Nizom oliy taʼlim tashkilotlari (bundan buyon matnda OTM deb yuritiladi) magistratura mutaxassisliklari talabalari (bundan buyon matnda magistratura talabasi deb yuritiladi) tomonidan stajirovka oʻtash tartibini belgilaydi.”.

2. 2-bandning ikkinchi xatboshisidagi “Davlat boshqaruvi akademiyasi” degan soʻzlar “Davlat siyosati va boshqaruvi akademiyasi” degan soʻzlar bilan almashtirilsin.

3. 35-bandning ikkinchi xatboshisidagi “yozma ravishda” degan soʻzlar “yozma yoki elektron ravishda” degan soʻzlar bilan almashtirilsin.

4. 44-banddagi “yozma ravishda” degan soʻzlar “yozma yoki elektron ravishda” degan soʻzlar bilan almashtirilsin.

5. 48-banddagi “yozma ravishda” degan soʻzlar “yozma yoki elektron ravishda” degan soʻzlar bilan almashtirilsin.

6. 58-bandda:

ikkinchi xatboshidagi “qoniqarsiz baho qoʻyilganda,” degan soʻzlar “60 va undan kam ball toʻplagan hollarda magistratura talabasining bilimi “qoniqarsiz” deb baholanadi hamda” degan soʻzlar bilan almashtirilsin;

uchinchi xatboshi chiqarib tashlansin.

7. Quyidagi mazmundagi 58¹ — 58⁸-bandlar bilan toʻldirilsin:

“58¹. Magistratura talabasining apellyatsiya shikoyatlarini koʻrib chiqish uchun OTM rahbarining qarori bilan ushbu tashkilot tizimining kamida besh nafar mutaxassislaridan iborat tarkibda Apellyatsiya komissiyasi tashkil etiladi.

Bunda, Apellyatsiya komissiyasi tarkibiga boshqa davlat organlari va tashkilotlaridan ham mutaxassislar kelishuv asosida jalb etilishi mumkin.

Stajirovka boʻyicha hisobot himoyasi komissiya aʼzosining Apellyatsiya komissiyasi tarkibiga kiritilishiga yoʻl qoʻyilmaydi.

58². Stajirovka boʻyicha hisobot himoyasi komissiyasi qaroridan norozi boʻlgan magistratura talabasi natijalar eʼlon qilingan kundan boshlab bir oy ichida Apellyatsiya komissiyasiga yozma yoki elektron shaklda apellyatsiya shikoyati berishlari mumkin.

Bunda, Apellyatsiya komissiyasi apellyatsiya shikoyati bilan murojaat qilgan magistratura talabasini shikoyat koʻrib chiqilishidan ikki kun oldin uni koʻrib chiqish vaqti va joyi haqida ogohlantiradi.

58³. Apellyatsiya komissiyasi apellyatsiya shikoyatini, u kelib tushgan kundan boshlab besh kun muddat ichida koʻrib chiqadi. Bunda, apellyatsiya shikoyati bilan murojaat qilgan magistratura talabasi mazkur shikoyatni koʻrib chiqishda ishtirok etish huquqiga ega.

58⁴. Apellyatsiya komissiyasi unda aʼzolarning kamida uchdan ikki qismi ishtirok etganda vakolatli hisoblanadi. Apellyatsiya komissiyasining qarori oddiy koʻpchilik ovoz bilan qabul qilinadi va majlisda ishtirok etgan barcha aʼzolar tomonidan tasdiqlanadigan bayonnoma bilan rasmiylashtiriladi.

Berilgan ovozlar soni teng boʻlib qolgan taqdirda, Apellyatsiya komissiyasi raisining ovozi hal qiluvchi hisoblanadi.

58⁵. Apellyatsiya komissiyasi tomonidan apellyatsiya shikoyatini koʻrib chiqish davomida magistratura talabasiga uni qayta baholashga qaratilgan savollar berilishiga yoʻl qoʻyilmaydi.

58⁶. Shikoyatni koʻrib chiqish natijalari boʻyicha Apellyatsiya komissiyasi tomonidan quyidagi qarorlardan biri qabul qilinadi:

magistratura talabasi natijalarini oʻzgarishsiz qoldirish;

magistratura talabasi natijalariga oʻzgartirish kiritish va uni stajirovkadan oʻtgan deb topish.

58⁷. Apellyatsiya komissiyasi apellyatsiya shikoyati bilan murojaat qilgan magistratura talabasiga oʻz qarorini u qabul qilingan kunning oʻzida maʼlum qilishi kerak.

58⁸. Apellyatsiya komissiyasi qarori ustidan magistratura talabasi yuqori turuvchi organga yoki sudga shikoyat qilishi mumkin.”.