2003 йил пахта ҳосилини ўз вақтида ва уюшқоқлик билан йиғиштириб олиш, тузилган контрактация шартномалари бажарилишини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Вазирлар Маҳкамасининг «Пахта хом ашёси етиштиришда бозор принципларини амалга ошириш ва уни етиштиришни ташкил этишни янада такомиллаштириш чора-тадбирлари тўғрисида» 2003 йил 19 февралдаги 93-сон қарорига мувофиқ:

пахта етиштирувчи қишлоқ хўжалиги корхоналарининг пахта хом ашёси етиштиришни кўпайтиришдан манфаатдорлигини рағбатлантириш мақсадида белгиланган прогноз ҳажмларидан ортиқча етиштирилган пахта хом ашёси учун жорий ҳисоб-китоблар ягона харид нархларидан 20 фоиз ортиқ бўлган шартномавий нархлар бўйича амалга оширилиши белгилаб қўйилганлиги;

етиштирилган пахта хом ашёси учун якуний ҳисоб-китоблар уни пахта толасига қайта ишлашда тола чиқиши ва ишлаб чиқарилган пахта толасининг сифатига қараб ҳамда жаҳон бозорида шаклланаётган нархлар конъюнктураси ҳисобга олинган ҳолда амалга оширилиши маълумот учун қабул қилинсин.

2. Ўзбекистон Республикаси Молия вазирлиги Ўзбекистон Республикаси Иқтисодиёт вазирлиги ҳамда Қишлоқ ва сув хўжалиги вазирлиги билан биргаликда Ўзбекистон Республикаси Президентининг «Пахта нархини шакллантириш механизми тўғрисида» 2002 йил 20 августдаги ПФ-3114-сон Фармонини бажариш юзасидан жорий йилнинг 27 августига қадар жаҳон бозорида пахта толаси учун шаклланаётган нархлар конъюнктурасини ҳисобга олган ҳолда харид нархларини белгиласин ва бир ҳафта муддатда пахта етиштирувчи хўжаликларга харид нархлари прейскурантини ва ҳисоб-китоб қилиш тартибини етказсин.

Қўлда ва машинада терилган пахта учун ҳақ тўлаш пахта ҳосилини йиғиштириб олиш учун ўтган йил тўланган ҳақ даражасидан камида 10 фоиз ортиқ бўлиши керак.

Пахта етиштирувчи қишлоқ хўжалиги корхоналари технология карталарига мувофиқ пахта хом ашёси етиштириш харажатларини ва йиғим-терим шартларини ҳисобга олган ҳолда, шунингдек пахта ҳосилдорлиги ва молиявий имкониятларга қараб теримчиларга Ўзбекистон Республикаси Молия вазирлиги томонидан белгиланган энг кам нархлардан келиб чиқиб, бироқ ундан кам бўлмаган миқдорларда табақалаштирилган ҳақ тўланишини таъминласинлар.

3. «Ўзкимёсаноат», «Ўзқишлоқхўжаликкимё» компаниялари ва «Ўзбекистон ҳаво йўллари» миллий авиакомпанияси Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда пахта етиштирувчи қишлоқ хўжалиги корхоналарини дефолиантлар билан таъминлашда, техника воситаларини тайёрлашда ва ғўзани ўз вақтида дефолиация қилиш учун зарур миқдорда самолётлар ажратишда амалий ёрдам кўрсатсинлар.

4. «Ўзнефтмаҳсулот» акциядорлик компанияси:

пахта йиғим-теримида ва пахта тайёрлашда қатнашаётган техниканинг узлуксиз ишлашини таъминлаш ҳамда ерни шудгорлашни тугаллаш учун вилоятларнинг тақдим этилган ҳисоб-китоблари бўйича ёнилғи-мойлаш материалларининг зарур захирасини яратсин;

қишлоқ хўжалиги корхоналарига, машина-трактор паркларига, пахта тозалаш саноати корхоналарига ва пахта хом ашёсини йиғиштириб олиш, ташиш ва унга ишлов беришда банд бўлган бошқа ташкилотларга ушбу ишларни бажариш учун зарур миқдорларда ёнилғи-мойлаш материаллари узлуксиз етказиб берилишини ташкил этсин.

5. 2003 йил пахта хом ашёсини ўз вақтида ва сифатли йиғиштириб олишга кўмаклашиш учун иловага мувофиқ таркибда ишчи гуруҳ ташкил этилсин, унга:

йиғим-теримга тайёргарлик кўриш ва уни ўтказиш билан боғлиқ масалаларни тезкорлик билан ҳал қилиш;

пахта хом ашёси етиштирувчилар билан келишган ҳолда дефолиацияни ўтказиш муддатларини белгилаш ҳуқуқи берилсин.

6. Мазкур қарорнинг бажарилишини назорат қилиш Ўзбекистон Республикаси Президентининг Давлат маслаҳатчиси И.Ҳ. Жўрабеков ва Ўзбекистон Республикаси Бош вазирининг ўринбосари Р.С. Азимов зиммасига юклансин.