Qoraqalpog‘iston Respublikasiga investitsiyalarni jalb qilish, aholi farovonligini oshirish va mayningni amalga oshirish uchun qulay shart-sharoitlar yaratish orqali qayta tiklanuvchi energiya manbalaridan samarali foydalanish maqsadida qaror qilaman:

1. Quyidagilar ushbu qarorning asosiy maqsadi va ustuvor vazifalari etib belgilansin:

(a) mayning faoliyatini amalga oshirish uchun barcha turdagi qayta tiklanuvchi energiya manbalaridan foydalangan holda qulay shart-sharoitlar yaratish;

(b) Qoraqalpog‘iston Respublikasining investitsiyaviy jozibadorligini oshirish hamda yangi ishchi o‘rinlar yaratish orqali aholi daromadlarini ko‘paytirish.

2. O‘zbekiston Respublikasi Prezidentining 2018-yil 3-iyuldagi “O‘zbekiston Respublikasida raqamli iqtisodiyotni va kripto-aktivlar aylanmasi sohasini rivojlantirish chora-tadbirlari to‘g‘risida”gi PQ-3832-son qaroriga muvofiq:

(a) kripto-aktivlar aylanmasi maxsus normativ-huquqiy hujjatlar bilan tartibga solinishi;

(b) mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshirilishi;

(v) kripto-aktivlar aylanmasi sohasida faoliyatni amalga oshirish uchun yuridik shaxslar tomonidan yig‘imlar to‘lanishi belgilanganligi ma’lumot uchun qabul qilinsin.

3. “Besqala Mining Valley” maxsus mayning zonasi (keyingi o‘rinlarda — maxsus zona) tashkil etilsin. Bunda:

(a) maxsus zonaning hududi Qoraqalpog‘iston Respublikasining butun hududi hisoblanadi;

(b) maxsus zona doirasida quyidagilarga:

(i) mayningni amalga oshirish uchun yagona elektr energetika tizimidan va barcha turdagi qayta tiklanuvchi energiya manbalaridan, shuningdek, vodorod elektr stansiyasida ishlab chiqarilgan elektr energiyasidan foydalanishga;

(ii) mayning natijasida olingan kripto-aktivlar belgilangan tartibda milliy kripto-birjalar yoki xorijiy platformalar orqali, shu jumladan, to‘g‘ridan-to‘g‘ri shartnomalar asosida sotilishiga va (yoki) ularni boshqa likvidli kripto-aktivlarga ayirboshlashga;

(iii) mayning natijasida olingan (shu jumladan, boshqa yuqori likvidli kripto-aktivlarga ayirboshlangan) kripto-aktivlarni sotishdan tushgan tushumni majburiy tarzda O‘zbekiston Respublikasidagi banklarning hisobvaraqlariga o‘tkazishga;

(iv) faqatgina Qoraqalpog‘iston Respublikasi hududida davlat ro‘yxatidan o‘tgan holda faoliyat yuritayotgan yuridik shaxslar rezident bo‘lishiga;

(v) rezidentlarga mayning amalga oshirish natijasida hosil bo‘ladigan issiqlik energiyasi hisobidan qishloq xo‘jaligiga mo‘ljallangan yer uchastkalarida belgilangan tartibda issiqxonalar tashkil etishga ruxsat etiladi.

4. Qoraqalpog‘iston Respublikasi Vazirlar Kengashi muassisligida mas’uliyati cheklangan jamiyat shaklida “Besqala Mining Valley” maxsus mayning zonasi direksiyasi” (keyingi o‘rinlarda — Direksiya) tashkil etilsin va Istiqbolli loyihalar milliy agentligi (keyingi o‘rinlarda — Agentlik) mayning faoliyatini amalga oshirish uchun ruxsatnomalar berish bo‘yicha ishchi organ etib belgilansin.

5. Shunday tartib o‘rnatilsinki, unga muvofiq maxsus zona doirasida:

(a) talabgorlar (yuridik shaxslar) maxsus zona rezidentligini va mayning faoliyatini amalga oshirish uchun ruxsatnoma olish to‘g‘risida ariza bilan Direksiyaga murojaat qiladi;

(b) talabgorlarning arizalari Direksiya tomonidan ko‘rib chiqiladi, ijobiy xulosa berilganda:

(i) talabgorga Direksiya tomonidan maxsus zona rezidenti (keyingi o‘rinlarda — rezident) maqomi beriladi;

(ii) rezidentga mayning faoliyatini amalga oshirish uchun Agentlik tomonidan qo‘shimcha hujjatlar talab qilinmasdan ruxsatnoma beriladi;

(v) Direksiya rezidentlarni ro‘yxatdan o‘tkazadi, ularning hisobini yuritadi va arizalar sifatli ko‘rib chiqilishiga javobgar bo‘ladi.

6. Belgilansinki:

(a) 2035-yil 1-yanvarga qadar rezidentlarning mayning faoliyatini amalga oshirish bilan bog‘liq operatsiyalardan olingan daromadlari soliqlar va yig‘imlardan ozod qilinadi;

(b) maxsus zonada mayning faoliyatini amalga oshirganlik uchun rezidentlar har oyda ushbu faoliyatdan olgan daromadining 1 foizi miqdorida Direksiyaga to‘lov to‘laydi, bunda Direksiyaning sof foydasi Qoraqalpog‘iston Respublikasi respublika budjetiga o‘tkaziladi;

(v) yagona elektr energetika tizimiga ulanish orqali elektr energiyasidan foydalanilgan taqdirda:

(i) iste’mol qilingan elektr energiyasi uchun to‘lovlar II tarif guruhiga nisbatan ikki baravar o‘suvchi koeffitsiyentga muvofiq to‘lanadi, bundan O‘zbekiston Respublikasi Prezidentining 2025-yil 22-oktabrdagi “Sun’iy intellekt texnologiyalarini yanada rivojlantirishga oid qo‘shimcha chora-tadbirlar to‘g‘risida”gi PF-189-son Farmoniga 1-ilovada nazarda tutilgan holatlar mustasno;

(ii) iste’mol qilingan elektr energiyasining hisobi alohida hisobga olish uskunasini o‘rnatgan holda yuritiladi;

(g) maxsus zonaning faoliyat yuritish tartibi Agentlik tomonidan belgilanadi.

7. Agentlik Iqtisodiyot va moliya vazirligi hamda Qoraqalpog‘iston Respublikasi Vazirlar Kengashi bilan birgalikda ikki oy muddatda mazkur qarorning 6-bandi “a” kichik bandidan kelib chiqib, Soliq kodeksiga o‘zgartirish va qo‘shimchalar kiritishni nazarda tutuvchi qonun loyihasini Vazirlar Mahkamasiga kiritsin.

8. Energetika vazirligi, Tog‘-kon sanoati va geologiya vazirligi hamda Agentlikning salohiyatli investorlar tomonidan maxsus zona hududida norentabel, past debitli, qazib chiqarilishi kamayib borayotgan, shuningdek, uglevodorodlarni yetkazib berishning transport tizimi mavjud bo‘lmagan yoki eskirgan konlarni yanada o‘zlashtirish, saqlash va jihozlash orqali elektr energiyasini ishlab chiqarish va undan mayningni amalga oshirish uchun foydalanish bo‘yicha loyihani hayotga tatbiq etish to‘g‘risidagi taklifiga rozilik berilsin.

9. Energetika vazirligi Agentlik bilan birgalikda ikki oy muddatda norentabel, past debitli, qazib chiqarilishi kamayib borayotgan, shuningdek, uglevodorodlarni yetkazib berishning transport tizimi mavjud bo‘lmagan yoki eskirgan konlarni investorlarga mayningni amalga oshirish uchun foydalanishga berish to‘g‘risidagi tartib ishlab chiqilishi va tasdiqlanishini ta’minlasin.

10. “Besqala Mining Valley” maxsus mayning zonasi rezidenti sifatida ro‘yxatdan o‘tkazish uchun asosiy talab va shartlar 1-ilovaga muvofiq tasdiqlansin.

11. Qoraqalpog‘iston Respublikasi Vazirlar Kengashi bir oy muddatda:

(a) Direksiyaning tashkil etilishi, davlat ro‘yxatidan o‘tkazilishi va joylashtirish uchun joy ajratilishini;

(b) Energetika vazirligi, boshqa vazirlik va idoralar bilan birgalikda Qoraqalpog‘iston Respublikasida mayning amalga oshirish uchun qayta tiklanuvchi energiya manbalari qurilmalarini o‘rnatish maqsadida yer uchastkalari ajratishning soddalashtirilgan tartibini joriy qilish bo‘yicha Vazirlar Mahkamasiga takliflar kiritilishini ta’minlasin.

12. O‘zbekiston Respublikasi Prezidentining va O‘zbekiston Respublikasi Hukumatining ayrim qarorlariga 2-ilovaga muvofiq o‘zgartirish va qo‘shimchalar kiritilsin.

13. Agentlik ikki oy muddatda:

(a) “Besqala Mining Valley” maxsus mayning zonasi va rezidentlarni ro‘yxatdan o‘tkazish hamda ularning faoliyatini amalga oshirish tartibi to‘g‘risidagi nizomni ishlab chiqsin va tasdiqlasin;

(b) Qoraqalpog‘iston Respublikasi Vazirlar Kengashi, boshqa vazirlik va idoralar bilan birgalikda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

14. Qaror ijrosini samarali tashkil qilishga mas’ul va shaxsan javobgar etib Qoraqalpog‘iston Respublikasi Vazirlar Kengashi Raisi F.U. Ermanov belgilansin.

15. Qaror ijrosini nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

1. Yuridik shaxs Qoraqalpog‘iston Respublikasi hududida davlat ro‘yxatidan o‘tgan bo‘lishi kerak.

2. Mayningni faqat ro‘yxatga olingan paytda ko‘rsatilgan manzilda amalga oshirish lozim.

3. Mayning uskunalarini o‘rnatish uchun mo‘ljallangan alohida joy mavjud bo‘lishi kerak.

4. Mayning uskunalarini o‘rnatish uchun mo‘ljallangan joyning sanitariya normalari va qoidalariga javob berishi hamda texnik xavfsizlik talablarini inobatga olgan holda elektr energiyasi ta’minoti tizimining texnik sozligini ta’minlash lozim.

5. Mayning yagona elektr energetika tizimiga ulangan holda amalga oshirilgan taqdirda, iste’mol qilinadigan elektr energiyasi alohida hisoblanishini ta’minlash maqsadida Elektr energiyasini hisobga olish va nazorat qilishning avtomatlashtirilgan tizimiga (EHNAT) ulanish imkoniyatiga ega bo‘lgan, ro‘yxatdan o‘tkazilgan elektr energiyasini hisobga olish uskunasi bo‘lishi shart.

6. Iqtisodiy jinoyatlar, shuningdek, jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirg‘in qurollarini tarqatishni moliyalashtirish, uyushgan jinoyatchilik, korrupsiya va boshqaruv tartibiga qarshi jinoyatlarni sodir etganlik uchun gumonlanayotgan yoki sudlanganligi olib tashlanmagan yoxud sudlanganlik holati tugallanmagan shaxslar tomonidan rezidentni boshqarishga yo‘l qo‘yilmaydi.

7. Rezidentning ustav kapitalida egasi va (yoki) yakuniy benefitsiar mulkdori sifatida quyidagi shaxslarning ishtirok etishiga yo‘l qo‘yilmaydi:

(a) mazkur talab va shartlarning 6-bandida ko‘rsatilgan shaxslar;

(b) jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda ro‘yxatdan o‘tgan kompaniyalar hamda doimiy yashayotgan, turgan yoki ro‘yxatga olingan shaxslarning bo‘lishiga (ishtirok etishiga).

8. Yashirin mayning, anonim kripto-aktivlar mayningini hamda muqaddam muomalada bo‘lgan kripto-aktivlarni muomalaga kiritishga yo‘l qo‘yilmaydi.

9. Kripto-aktivlar aylanmasi sohasidagi qonunchilik hujjatlari talablariga rioya qilish kerak.

10. Kripto-aktivlar aylanmasi sohasidagi vakolatli organning talabiga muvofiq faoliyat to‘g‘risidagi ma’lumotlarni bepul taqdim qilish lozim.

11. Maxsus zonada faoliyat yuritish uchun qonunchilik hujjatlari bilan belgilangan ajratmalarni o‘z vaqtida va to‘liq to‘lash shart.

1. O‘zbekiston Respublikasi Prezidentining 2018-yil 3-iyuldagi “O‘zbekiston Respublikasida raqamli iqtisodiyotni va kripto-aktivlar aylanmasi sohasini rivojlantirish chora-tadbirlari to‘g‘risida”gi PQ-3832-son qarorida:

(a) 1-bandning ikkinchi xatboshisidan “(turli kripto-aktivlarda yangi birliklar va komissiya yig‘imlari formatida mukofot olish imkonini beradigan taqsimlash platformasini ta’minlash va yangi bloklar yaratish bo‘yicha faoliyat)” so‘zlari chiqarib tashlansin;

(b) 3-bandda:

(i) “v” kichik band quyidagi tahrirda bayon etilsin:

“v) mayning bu hisoblash operatsiyalarini bajarish orqali ma’lumotlarning taqsimlangan reyestrini yuritish, bloklarning yaxlitligini yaratish va tasdiqlash faoliyatidir.

Mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshiriladi, “Besqala Mining Valley” maxsus mayning zonasi hududida amalga oshiriladigan mayning bundan mustasno.

Yagona elektr energetika tizimiga ulangan holda elektr energiyadan foydalanilgan taqdirda:

iste’mol qilingan elektr energiyasi uchun to‘lovlar belgilangan tarifga nisbatan 2 barobar o‘suvchi koeffitsiyentga muvofiq to‘lanadi, bundan O‘zbekiston Respublikasi Prezidentining 2025-yil 22-oktabrdagi “Sun’iy intellekt texnologiyalarini yanada rivojlantirishga oid qo‘shimcha chora-tadbirlar to‘g‘risida”gi PF-189-son Farmoniga 1-ilovada nazarda tutilgan holatlar mustasno;

tig‘iz davrda iste’mol qilingan elektr energiya uchun tegishli tariflarga Vazirlar Mahkamasi tomonidan belgilanadigan ustamalar qo‘llaniladi;

iste’mol qilingan elektr energiyasining hisobi alohida hisoblagich o‘rnatilgan holda yuritiladi.

Mayning Agentlik tomonidan majburiy ro‘yxatdan o‘tkaziladi va litsenziyalanadigan faoliyat turiga kirmaydi.

Mayning bilan shug‘ullanuvchi shaxslar (maynerlar) qonunchilik hujjatlarida belgilangan tartibda ro‘yxatdan o‘tishlari shart.

Maynerlarni ro‘yxatdan o‘tkazish faqat Internet tarmog‘i orqali elektron shaklda amalga oshiriladi.

Maynerlar o‘z faoliyatini faqat ro‘yxatga olingan paytda ko‘rsatilgan manzilda, yong‘in xavfsizligi hamda sanitariya normalari va qoidalariga rioya qilgan holda amalga oshirishi lozim”;

(ii) “d” kichik band quyidagi tahrirda bayon etilsin:

“d) 2023-yil 1-yanvardan boshlab O‘zbekiston Respublikasi fuqarolari va yuridik shaxslari kripto-aktivlarni sotib olish, sotish va (yoki) ayirboshlash bo‘yicha operatsiyalarni faqat milliy provayderlar orqali belgilangan tartibda amalga oshiradi, qonunchilik hujjatlarida belgilangan hollar bundan mustasno”;

(iii) “i” kichik band quyidagi tahrirda bayon etilsin:

“i) xizmatlar provayderlari faoliyatiga qo‘yiladigan litsenziya talablari va shartlari quyidagilardan iborat:

O‘zbekiston Respublikasi hududidagi serverlarda joylashgan elektron platforma va (yoki) texnik hamda dasturiy vositalar majmuining mavjudligi;

kripto-aktivlar bilan bog‘liq barcha operatsiyalar bo‘yicha ma’lumotlarni, platforma ishtirokchilarining identifikatsiya ma’lumotlarini, xizmatlar provayderlarining platforma ishtirokchilari bilan munosabatlariga oid materiallarni (shu jumladan, platforma ishtirokchilari o‘rtasida), shu jumladan, ish yozishmalarini besh yil davomida saqlash;

kripto-aktivlar aylanmasi, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurollarining tarqalishini moliyalashtirishga qarshi kurashish hamda shaxsga doir ma’lumotlarni saqlash va ulardan foydalanish sohasidagi O‘zbekiston Respublikasi qonunchilik hujjatlari talablariga rioya qilish;

kripto-aktivlar aylanmasi sohasidagi reklamaga qo‘yiladigan, shu jumladan, kripto-aktivlardan foydalanish bilan bog‘liq faoliyatning samaradorligi (daromadi) haqida va’dalar berish, kripto-aktivlar bilan bitimlarni tuzish boyishning yengil usuli ekanligi haqidagi ma’lumotlarni tarqatish taqiqlanganligi hamda kripto-aktivlar O‘zbekiston Respublikasi hududida to‘lov yoki to‘lovni qabul qilish vositasi (qonunchilik hujjatlarida belgilangan hollar bundan mustasno) sifatida qo‘llanilishi mumkin emasligi haqidagi talablarga rioya qilish;

anonim kripto-aktivlar bilan operatsiyalarni amalga oshirmaslik;

platforma faoliyatini amalga oshirish bilan bog‘liq ma’lumotlarni vakolatli organning so‘roviga binoan bepul taqdim etish;

jismoniy va yuridik shaxslarga, shu jumladan, norezidentlarga, litsenziatning ustav kapitalidagi ulushini realizatsiya qilishni litsenziyalovchi organ bilan kelishish;

litsenziatning rahbariyati (direktor va uning o‘rinbosarlari), shuningdek, jinoiy faoliyatdan olingan daromadlarni legallashtirish, terrorizm, ommaviy qirg‘in qurollarini tarqatish, ularni moliyalashtirishga qarshi kurashish bo‘yicha tarkibiy bo‘linma rahbarini almashtirish masalasini litsenziyalovchi organ bilan kelishish;

qonunchilik hujjatlariga muvofiq boshqa talablar.

Quyidagilar kripto-birjalarga qo‘yiladigan qo‘shimcha litsenziya talablari va shartlari hisoblanadi:

kripto-aktivlarni kotirovkalashni ularga bo‘lgan talab va taklif asosida amalga oshirish;

ariza berilgan sanada pul mablag‘i shaklida bazaviy hisoblash miqdorining kamida besh ming baravari miqdorida shakllantirilgan ustav jamg‘armasi (kapitali) mavjudligi, shundan uch ming baravarini O‘zbekiston Respublikasining tijorat bankida alohida hisobvaraqda zaxiraga qo‘yish”;

(iv) “m” kichik band quyidagi tahrirda bayon etilsin:

“m) kripto-aktivlar aylanmasi sohasidagi faoliyatni amalga oshirish uchun yuridik shaxslar yig‘im to‘laydilar. Yig‘imlar O‘zbekiston Respublikasi Davlat budjeti va Agentlik o‘rtasida taqsimlanadi, qonunchilik hujjatlarida nazarda tutilgan hollar bundan mustasno.

Yig‘imlar miqdori, ularni to‘lash va ularning taqsimlanishi Agentlik tomonidan O‘zbekiston Respublikasi Iqtisodiyot va moliya vazirligi va Soliq qo‘mitasi bilan birgalikda tasdiqlanadigan tartib asosida amalga oshiriladi”;

(v) 4-band quyidagi tahrirda bayon etilsin:

“4. Quyidagilarga:

a) xizmatlar provayderlariga:

ko‘rsatilgan xizmatlar uchun, shu jumladan, kripto-aktivlar shaklida mukofot olish, uning miqdorini va uni mijozlardan undirish tartibini belgilash;

O‘zbekiston Respublikasi rezidentlari va norezidentlari bilan kripto-aktivlarni milliy va xorijiy valyutaga sotib olish va (yoki) begonalashtirishga, shuningdek, kripto-aktivlarni boshqa kripto-aktivlarga ayirboshlashga qaratilgan bitimlarini tashkil etish;

b) kripto-do‘konlarga o‘z faoliyatini faqat elektron platforma orqali amalga oshirish jarayonida mijozlarining mablag‘larini tranzaksiya amalga oshirilgan va ma’lumotlarning taqsimlangan reyestrida tegishli yozuv paydo bo‘lgan paytdan boshlab Agentlik tomonidan belgilangan muddatda saqlash;

v) maynerlarga mayning natijasida olingan kripto-aktivlarni milliy kripto-birjalar yoki xorijiy platformalar orqali, shu jumladan, to‘g‘ridan-to‘g‘ri shartnomalar bo‘yicha, belgilangan tartibda sotish va (yoki) ularni boshqa kripto-aktivlarga ayirboshlash huquqi berilsin. Bunda mayning natijasida olingan kripto-aktivlarni boshqa yuqori likvidli kripto-aktivlarga ayirboshlash va ularni keyinchalik milliy kripto-birjalar yoki xorijiy platformalar orqali, shu jumladan, to‘g‘ridan-to‘g‘ri shartnomalar asosida sotishga yo‘l qo‘yiladi. Mayning natijasida olingan (shu jumladan, boshqa yuqori likvidli kripto-aktivlarga ayirboshlangan) kripto-aktivlarni sotishdan tushgan tushum majburiy tarzda O‘zbekiston Respublikasidagi bankning hisobvaraqlariga o‘tkaziladi”;

(g) quyidagi mazmundagi 5-band bilan to‘ldirilsin:

“5. Shunday tartib o‘rnatilsin, unga muvofiq:

a) bir vaqtning o‘zida quyidagi mezonlardan kamida ikkitasi mavjud bo‘lganda, kripto-aktivlar bilan operatsiya (keyingi o‘rinlarda — operatsiya) o‘tkazish joyi sifatida O‘zbekiston Respublikasi tan olinadi:

operatsiyaning bir tomoni O‘zbekiston Respublikasining rezidenti (jismoniy yoki yuridik shaxs) bo‘lishi;

operatsiya O‘zbekiston Respublikasining hududida amalga oshirilishi;

operatsiya O‘zbekiston Respublikasining hududida ro‘yxatdan o‘tgan IP-manzildan va (yoki) O‘zbekiston Respublikasining xalqaro kodi mavjud bo‘lgan mobil telefon raqamidan foydalangan holda amalga oshirilishi;

operatsiya bo‘yicha hisob-kitoblar O‘zbekiston Respublikasining tijorat banki tomonidan emissiya qilingan bank kartasidan foydalanilganda yoki to‘lovlarga ishlov berish va ularning kliringi O‘zbekiston Respublikasi hududida amalga oshirilganda;

operatsiyani amalga oshirish uchun xizmatlar O‘zbekiston Respublikasining hududida yashovchi mijozlar uchun mo‘ljallanganda, shu jumladan, davlat tilida taqdim etilganda yoki reklama qilinganda;

b) Agentlikka quyidagi vakolatlar beriladi:

O‘zbekiston Respublikasi rezidentlariga kripto-aktivlar aylanmasi sohasida noqonuniy xizmatlar ko‘rsatuvchi xorijiy yuridik shaxslarning (keyingi o‘rinlarda — xorijiy yuridik shaxslar) faoliyatini tekshirish. Bunda ushbu tekshirishlarga O‘zbekiston Respublikasining tadbirkorlik subyektlari faoliyati ustidan davlat nazorati sohasidagi qonunchilik hujjatlari tatbiq etilmaydi;

kripto-aktivlar aylanmasi sohasidagi qonunchilik hujjatlarini buzganlik uchun xorijiy yuridik shaxslarga nisbatan jarimalar qo‘llash. Bunda ushbu jarimaning 50 foizi litsenziyalovchi organning hisobvarag‘iga yo‘naltiriladi”;

(d) 6-bandning “a” va “b” kichik bandlari quyidagi tahrirda bayon etilsin:

“a) xizmatlar provayderlarini:

terroristik faoliyatda yoki ommaviy qirg‘in qurollarini tarqatishda ishtirok etgan yoki ishtirok etishda gumon qilinayotgan shaxslar tomonidan;

iqtisodiy jinoyatlar, shuningdek, jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirg‘in qurollarini tarqatishni moliyalashtirish, uyushgan jinoyatchilik, giyohvand moddalarning noqonuniy savdosi, korrupsiya va axborot texnologiyalari bilan bog‘liq jinoyatlarni sodir etganlik uchun gumonlanayotgan yoki sudlanganligi olib tashlanmagan yoxud o‘talmagan shaxslar tomonidan;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda doimiy yashayotgan, bo‘lib turgan yoki ro‘yxatga olingan shaxslar tomonidan boshqarish;

b) xizmatlar provayderlarining ustav jamg‘armasida:

ushbu bandning “a” kichik bandida ko‘rsatilgan shaxslarning;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda ro‘yxatdan o‘tgan kompaniyalar ishtirok etishi”.

2. Vazirlar Mahkamasining 2024-yil 31-maydagi 319-son “Elektr energiyasi va tabiiy gazdan foydalanish qoidalarini tasdiqlash to‘g‘risida”gi qaroriga 1-ilovada:

(a) 2-bandning sakkizinchi xatboshisi quyidagi tahrirda bayon etilsin:

“mayning — hisoblash operatsiyalarini bajarish orqali ma’lumotlarning taqsimlangan reyestrini yuritish, bloklarning yaxlitligini yaratish va tasdiqlash faoliyatidir”;

(b) 80-band quyidagi tahrirda bayon etilsin:

“80. Mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshiriladi. Bunda “Besqala Mining Valley” maxsus mayning zonasida barcha qayta tiklanuvchi energiya manbalaridan foydalanishga ruxsat etiladi.

Mayning uchun yagona elektr energetika tizimiga belgilangan tartibda ruxsat olib ulangan holda elektr energiyasidan foydalangan taqdirda:

iste’molchilar iste’mol qilingan elektr energiyasi uchun to‘lovlarni II tarif guruhiga nisbatan ikki baravar o‘suvchi koeffitsiyentga muvofiq to‘laydilar. Bundan O‘zbekiston Respublikasi Prezidentining 2025-yil22-oktabrdagi “Sun’iy intellekt texnologiyalarini yanada rivojlantirishga oid qo‘shimcha chora-tadbirlar to‘g‘risida”gi PF-189-son Farmoniga 1-ilovada belgilangan holatlar bundan mustasno;

iste’mol qilingan elektr energiyasining hisobi alohida hisoblagich o‘rnatilgan holda yuritiladi;

belgilangan tartibda ruxsat olmasdan mayning bilan shug‘ullanuvchi shaxslarning yagona elektr energetika tizimiga ulanish holatlari aniqlanganda, ularga II tarif guruhiga nisbatan amaldagi tarifga besh baravar o‘suvchi koeffitsiyent qo‘llaniladi”.