Toshkent shahri va Toshkent viloyati hududlarida joylashgan issiqhona xo‘jaliklarini iqlim o‘zgarishiga moslashtirish, Surxondaryo viloyatining iqlim sharoiti qulay hududlariga ko‘chirish, ularning faoliyatini moliyaviy qo‘llab-quvvatlash va zamonaviy issiqxona infratuzilmasini barpo etish orqali oziq-ovqat xavfsizligini ta’minlash hamda energiya taqsimotini samarali amalga oshirish maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Aholini kuz-qish mavsumlarida qishloq xo‘jaligi mahsulotlari bilan barqaror ta’minlashning qo‘shimcha chora-tadbirlari to‘g‘risida” 2026-yil 25-martdagi PQ-108-son qaroriga asosan Surxondaryo viloyati Sherobod tumanida “Surxon-Agro” erkin iqtisodiy zonasi va “Surxon-Agro” erkin iqtisodiy zonasi direksiyasi tashkil etilgani ma’lumot uchun qabul qilinsin.

2. Ekologiya va iqlim o‘zgarishi milliy qo‘mitasi, Qishloq xo‘jaligi vazirligi, Toshkent shahri, Surxondaryo va Toshkent viloyatlari hokimliklarining Toshkent shahri va Toshkent viloyatida joylashgan, atrof-muhit va insonlar sog‘lig‘iga salbiy ta’sir ko‘rsatayotgan issiqhona xo‘jaliklarini Surxondaryo viloyatida tashkil etiladigan “Surxon-Agro” erkin iqtisodiy zonasi (keyingi o‘rinlarda — “Surxon-Agro” zonasi) hududiga ko‘chirish to‘g‘risidagi takliflari ma’qullansin.

3. Belgilansinki, Toshkent shahri va Toshkent viloyati hududlaridagi issiqxona xo‘jaliklarini ixtiyoriy ko‘chirishni rag‘batlantirish hamda ulardan bo‘shagan yer maydonlaridan kelgusida samarali foydalanishni ta’minlashning quyidagi tartiblari joriy etiladi:

tanlov asosidagi auksion savdolarida ishtirok etuvchi jismoniy va yuridik shaxslarning ro‘yxati Qishloq xo‘jaligi vazirligi, Toshkent shahri hokimligi hamda Toshkent viloyati hokimligi tomonidan taqdim etiladi;

issiqxona xo‘jaliklarini ko‘chirishdan bo‘shagan yer uchastkalarida ijarachilar tomonidan hududning ixtisosligidan kelib chiqib, intensiv bog‘dorchilik, uzumchilik va ko‘chatchilik yo‘nalishlarida faoliyatini davom ettirish yoki “yashil bog‘lar”ni barpo etishga ruxsat beriladi;

davlat mulki bo‘lgan va tadbirkorlik subyektlariga ijara huquqi asosida berilgan yer uchastkalaridagi issiqxonalar faoliyati to‘xtatilib, yer uchastkalarida bino va inshootlar qurish (kapital qurilish) ishlarini amalga oshirish taqiqlanadi.

4. Toshkent shahri, Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlari hududidan Surxondaryo viloyatiga ko‘chiriladigan issiqxona xo‘jaliklarini qo‘llab-quvvatlashning quyidagi tartiblari joriy etilsin:

a) issiqxona faoliyatini to‘xtatib, “Surxon-Agro” zonasi hududida faoliyatini davom ettirgan tadbirkorlik subyektlariga xalqaro moliya institutlari, maqsadli jamg‘armalar, Tiklanish va taraqqiyot jamg‘armasi hamda tijorat banklarining mablag‘lari hisobidan issiqxona xo‘jaliklari uchun ajratilgan milliy va xorijiy valyutadagi kreditlarni qaytarish muddatlari 5 yilga, shundan imtiyozli davri 3 yilgacha uzaytiriladi (muddati o‘tgan asosiy va foiz qarzdorliklarini kredit davriga mutanosib ravishda uzaytirish).

Bunda Tadbirkorlik faoliyatini qo‘llab-quvvatlash davlat jamg‘armasi tomonidan avval taqdim qilingan kafillik va kredit foizlari kompensatsiyalari saqlab qolinadi;

b) 2028-yil 1-aprelga qadar “Surxon-Agro” zonasi hududiga ko‘chadigan issiqxonalar uchun issiqxona konstruksiya va uskunalarini demontaj qilish, tashish va qayta o‘rnatish bilan bog‘liq xarajatlar 1 sotix yer maydoni uchun bir martalik, biroq 500 ming so‘mgacha miqdorda Umummilliy ekologik muammolarni bartaraf etish davlat maqsadli jamg‘armasi mablag‘lari hisobidan qoplab beriladi.

5. Belgilansinki, Toshkent shahri hamda Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlarida atmosfera havosi sifatini yaxshilash maqsadida:

a) 2026-yil 1-iyundan boshlab ko‘mir, mazut va atmosferaga zararli yoqilg‘ilaridan foydalanishni nazarda tutuvchi yangi issiqxona xo‘jaliklarini tashkil etish va davlat ro‘yxatidan o‘tkazishga ruxsat berilmaydi;

b) 2026-yil 1-avgustdan boshlab mavjud issiqxonalar faoliyatining iqtisodiy samaradorligini qayta ko‘rib chiqish va ularni shaharsozlik hamda ekologik talablarga moslashtirish maqsadida quyidagi cheklov va oshirilgan tariflar joriy etiladi:

issiqxonalarga tabiiy gaz yetkazib berish to‘liq to‘xtatiladi va mavjud shartnomalar belgilangan tartibda gaz ta’minoti tashkilotlari tomonidan bekor qilinadi;

issiqxonalar tomonidan iste’mol qilinadigan suv resurslari uchun to‘lovlar (soliq stavkasi) sanoat korxonalari uchun belgilangan eng yuqori tariflarning 5 baravari miqdorida hisoblanadi;

v) 2026-yil 1-avgustdan boshlab issiqxonalarda yoqilg‘i sifatida ko‘mir, shinalar, bitum, mazut, plyonka, sintetik karton, rezina, jun tolasi hamda shunga o‘xshash komponentlarni o‘z ichiga olgan materiallarni yoqish natijasida atrof tabiiy muhit ifloslantirgani va chiqindilar joylashtirgani uchun kompensatsiya to‘lovlari yigirma baravarga oshirilgan holda qo‘llanadi va mazkur tadbirkorlik subyektiga berilgan ekologik ekspertiza xulosasi qayta ko‘rib chiqiladi;

g) quyidagi yo‘nalishlarda davlat tomonidan taqdim etiladigan imtiyoz, xizmat va moliyaviy qo‘llab-quvvatlash choralaridan issiqxona xo‘jaliklarini tashkil etish uchun foydalanishga cheklovlar o‘rnatiladi:

“mahalla yettiligi”ning kollegial qarorlari asosida beriladigan barcha turdagi ijtimoiy va moddiy yordam hamda faoliyat turini yo‘lga qo‘yish maqsadida davlat tomonidan beriladigan barcha subsidiya va preferensiyalar;

jismoniy va yuridik shaxslarni moliyaviy qo‘llab-quvvatlash maqsadida ularga kredit liniyalari ajratish, kredit limitlarini belgilash va mavjud kreditlar bo‘yicha limitlarni qayta ko‘rib chiqish;

ekologik talablarga rioya etilmagan hollarda davlat ekologik ekspertizasi bo‘yicha ijobiy xulosa berilmaydi, shuningdek, ilgari berilgan xulosaning amal qilishi belgilangan tartibda vaqtincha to‘xtatiladi;

d) ta’lim va ilmiy-tadqiqot muassasalariga ilmiy maqsadlar uchun (seleksiya navlari sinovi, urug‘ va ko‘chatlarni ko‘paytirish, xorijiy nav va duragaylarni mahalliy iqlimga moslashtirish), istisno tariqasida, ekologik talablarga rioya etgan holda mavjud issiqxonalardan foydalanishga ruxsat etiladi.

6. Qishloq xo‘jaligi vazirligi:

Iqtisodiyot va moliya vazirligi, Ekologiya va iqlim o‘zgarishi milliy qo‘mitasi bilan birgalikda ikki oy muddatda issiqxonalarning ko‘chirilishi munosabati bilan subsidiyalarni ajratish va to‘lash mexanizmlarini nazarda tutuvchi qaror loyihasini Vazirlar Mahkamasiga kiritsin;

2026-yil 1-sentabrga qadar “Surxon-Agro” zonasining master rejasi ishlab chiqilishini ta’minlasin.

7. Investitsiyalar, sanoat va savdo vazirligi Qishloq xo‘jaligi vazirligi va Tashqi ishlar vazirligi bilan birgalikda 2026-yil 1-mayga qadar “Surxon-Agro” zonasiga salohiyatli investorlar, xalqaro tashkilotlar va moliya institutlarining mablag‘larini jalb qilish choralarini ko‘rsin.

O‘zbekiston Respublikasining xorijiy mamlakatlardagi elchilari hamda elchixonalardagi savdo-iqtisodiy masalalar bo‘yicha maslahatchilar “Surxon-Agro” zonasiga xorijiy investorlarni o‘zlarining loyihalari bilan qatnashishi, ularning mablag‘larini jalb qilishga shaxsan mas’ul etib belgilansin.

8. Iqtisodiyot va moliya vazirligi Soliq qo‘mitasi bilan birgalikda 2026-yil 1-sentabrga qadar Soliq kodeksiga Toshkent shahri hamda Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlaridagi issiqxonalar egallab turgan yer maydonlari uchun yer solig‘i va ko‘chmas mulk uchun mol-mulk solig‘i stavkalarini amaldagi bazaviy stavkalarga nisbatan 10 baravar (yoki yuqori oshirilgan koeffitsiyentlarda) miqdorida qo‘llashni nazarda tutuvchi qonun loyihasini kiritsin.

9. Qurilish va uy-joy kommunal xo‘jaligi vazirligi, Kambag‘allikni qisqartirish va bandlik vazirligi Surxondaryo viloyati hokimligi bilan birgalikda uch oy muddatda Direksiya mutaxassislari va xodimlari uchun xizmat uy-joylari va vaqtinchalik yotoqxonalar qurish dasturini ishlab chiqsin hamda 2026-yil yakuniga qadar qonunchilikda taqiqlanmagan mablag‘lar hisobidan qurilish ishlarini yakunlasin.

10. Ushbu qarorning bajarilishini nazorat qilish O‘zbekiston Respublikasi Bosh vazirining o‘rinbosari J.A. Xodjayev hamda qishloq xo‘jaligi vaziri I.Yu. Abdurahmonov zimmasiga yuklansin.