O‘zbekiston Respublikasi Prezidentining “Qishloq xo‘jaligi sohasiga zamonaviy texnologiyalarni joriy etishni yanada jadallashtirish orqali samaradorlikni oshirish chora-tadbirlari to‘g‘risida” 2025-yil 12-avgustdagi PF-130-son Farmoni ijrosini ta’minlash, shuningdek, qishloq xo‘jaligi va oziq-ovqat sohasida olib borilayotgan islohotlarni samarali tashkil etish, aholini oziq-ovqat mahsulotlari bilan kafolatli ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Qishloq xo‘jaligi sohasiga zamonaviy texnologiyalarni joriy etishni yanada jadallashtirish orqali samaradorlikni oshirish chora-tadbirlari to‘g‘risida” 2025-yil 12-avgustdagi PF-130-son Farmoniga muvofiq Oziq-ovqat xavfsizligini ta’minlash bo‘yicha respublika komissiyasi (keyingi o‘rinlarda — Respublika komissiyasi) tashkil etilgani va uning tarkibi tasdiqlangani ma’lumot uchun qabul qilinsin.

2. Quyidagilarni nazarda tutuvchi Oziq-ovqat xavfsizligini ta’minlash bo‘yicha respublika komissiyasi faoliyatini tashkil etish to‘g‘risidagi nizom ilovaga muvofiq tasdiqlansin:

Respublika komissiyasining asosiy vazifalari va funksiyalari hamda huquqlari va majburiyatlari;

Respublika komissiyasi faoliyatini tashkil etish, qarorlar qabul qilish va ularning bajarilishini ta’minlash tartibi.

3. Respublika komissiyasining ishchi organi etib O‘zbekiston Respublikasi Qishloq xo‘jaligi vazirligi belgilansin.

Respublika komissiyasi ishchi organi quyidagi takliflarni Respublika komissiyasiga kiritib borsin:

ichki va tashqi bozor konyunkturasini chuqur o‘rganish va tahlil qilish asosida mamlakatimizda oziq-ovqat mahsulotlarini ishlab chiqarish hajmlari, jumladan, import o‘rnini bosuvchi mahalliy mahsulot turlarini ko‘paytirish;

respublika aholisini ijtimoiy ahamiyatga ega bo‘lgan asosiy turdagi oziq-ovqat mahsulotlari bilan uzluksiz ta’minlashning istiqbollarini belgilash;

oziq-ovqat xavfsizligini ta’minlashning samarali mexanizmlarini joriy qilish.

4. Respublika komissiyasi ijtimoiy ahamiyatga ega bo‘lgan oziq-ovqat mahsulotlari narxlarining barqarorligini ta’minlash, oziq-ovqat balansidagi importga bog‘langan yoki yetishmovchilik xavfi mavjud bo‘lgan mahsulotlarni yetishtirishni ko‘paytirish bo‘yicha takliflarni har chorakda O‘zbekiston Respublikasi Prezidenti Administratsiyasiga kiritib borsin.

5. Ushbu qarorning bajarilishini nazorat qilish O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorov zimmasiga yuklansin.

1. Ushbu Nizom Oziq-ovqat xavfsizligini ta’minlash bo‘yicha respublika komissiyasining (keyingi o‘rinlarda — Respublika komissiyasi) maqomi, asosiy vazifalari va funksiyalari, huquq va majburiyatlarini hamda faoliyatini tashkil etish tartibini belgilaydi.

2. Respublika komissiyasi ijtimoiy ahamiyatga ega bo‘lgan oziq-ovqat mahsulotlari narxlarining barqarorligini ta’minlash, oziq-ovqat balansidagi importga bog‘langan yoki yetishmovchilik xavfi mavjud bo‘lgan mahsulotlarni yetishtirishni ko‘paytirish, ruxsat etilgan foydalanish turlariga asosan yer uchastkalarida ekin joylashtirish ulushlariga (foizlar) hududlar ixtisosligidan kelib chiqib o‘zgartirish bo‘yicha takliflarni ishlab chiquvchi hamda aholini oziq-ovqat mahsulotlari bilan uzluksiz ta’minlashning istiqbollarini belgilovchi idoralararo kollegial organ hisoblanadi.

3. Respublika komissiyasining tarkibi O‘zbekiston Respublikasi Prezidenti tomonidan tasdiqlanadi.

4. Respublika komissiyasi o‘z faoliyati davomida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, boshqa qonunchilik hujjatlariga, shuningdek, ushbu Nizomga amal qiladi.

5. Respublika komissiyasining qarorlari uning majlisi bayonnomasi bilan rasmiylashtiriladi.

Respublika komissiyasi majlisi bayonnomasiga uning a’zolari tomonidan viza qo‘yiladi hamda majlis bayonnomasi kotib tomonidan imzolanadi va komissiya raisi tomonidan tasdiqlanadi.

6. Kuyidagilar Respublika komissiyasining asosiy vazifalari hisoblanadi:

ijtimoiy ahamiyatga ega bo‘lgan oziq-ovqat mahsulotlari narxlarining barqarorligini ta’minlash, oziq-ovqat balansidagi importga bog‘langan yoki yetishmovchilik xavfi mavjud bo‘lgan mahsulotlarni yetishtirishni ko‘paytirish choralarini ko‘rish;

ruxsat etilgan foydalanish turlariga asosan yer uchastkalarida ekin joylashtirish ulushlariga (foizlar) hududlar ixtisosligidan kelib chiqib o‘zgartirish kiritish;

oziq-ovqat xavfsizligini ta’minlashga qaratilgan strategiyalarni ishlab chiqish va uning samarali amalga oshirilishini ta’minlash;

kelgusi yil uchun shakllantirilgan oziq-ovqat mahsulotlari balansining prognozlari va Qishloq xo‘jaligi vazirligi huzuridagi “Raqamli qishloq xo‘jaligi” yagona integratsiyalashuv platformasida (keyingi o‘rinlarda — Agroportal) ekinlarni turlari bo‘yicha joylashtirish yuzasidan ma’lumotlar tahlili natijalarini ko‘rib borish;

oziq-ovqat mahsulotlari turlariga bo‘lgan talabdan va narxlar konyunkturasidan kelib chiqqan holda mahsulotlarning doimiy intervensiyasini yo‘lga qo‘yish va mavsumiy zaxira qilishda bozor tamoyiliga asoslangan narxlarni barqarorlashtirish mexanizmlarini takomillashtirish bo‘yicha tavsiyalar ishlab chiqish.

Respublika komissiyasiga qonunchilik hujjatlariga muvofiq boshqa vazifalar ham yuklanishi mumkin.

7. Respublika komissiyasi o‘ziga yuklangan asosiy vazifalarni bajarish uchun quyidagi funksiyalarni amalga oshiradi:

yer uchastkasidan ruxsat etilgan foydalanish turlariga muvofiq yer maydonlarida ekinlarning joylashtirish ulushlariga hududlar ixtisosligidan kelib chiqqan holda, muayyan tuman bo‘yicha o‘zgartirishlar kiritish haqida qaror qabul qiladi;

har yili 1-oktabrga qadar kelgusi yil uchun shakllantirilgan oziq-ovqat mahsulotlari balansining prognozlari va Agroportalda ekinlarni turlari bo‘yicha joylashtirish yuzasidan ma’lumotlar shakllantirilishini tashkil etadi;

ekinlarni turlari bo‘yicha joylashtirish yuzasidan ma’lumotlarni tahlil qilish orqali ekinlar turlarining oziq-ovqat xavfsizligini ta’minlashdagi ulushini baholaydi;

ekinlarni turlari bo‘yicha joylashtirish rejasi bilan oziq-ovqat mahsulotlari balansidagi ehtiyoj o‘rtasidagi muvofiqlikni aniqlaydi, agar nomuvofiqliklar aniqlansa, tezkor choralar ko‘rish yuzasidan takliflar ishlab chiqadi;

oziq-ovqat xavfsizligini ta’minlash bo‘yicha tegishli choralar ko‘rish yuzasidan O‘zbekiston Respublikasi Prezidenti Administratsiyasiga va Vazirlar Mahkamasiga takliflar kiritadi;

oziq-ovqat xavfsizligini ta’minlashda aniqlangan kamchiliklarni bartaraf qilish bo‘yicha mutasaddi respublika va mahalliy ijro etuvchi hokimiyat organlariga ko‘maklashadi;

respublikada oziq-ovqat xavfsizligini ta’minlashga qaratilgan normativ-huquqiy hujjatlarni takomillashtirish bo‘yicha takliflar ishlab chiqadi.

Respublika komissiyasi o‘ziga yuklangan vazifalarga va qonunchilik hujjatlariga muvofiq boshqa funksiyalarni ham bajarishi mumkin.

8. Respublika komissiyasi o‘ziga yuklangan vazifalarni bajarishda respublika va mahalliy ijro etuvchi hokimiyat organlari hamda boshqa tashkilotlar bilan o‘zaro hamkorlik qiladi.

9. Respublika komissiyasi o‘ziga yuklangan vazifa va funksiyalarni amalga oshirishda quyidagi huquqlarga ega:

oziq-ovqat xavfsizligi bo‘yicha mutasaddi davlat organlari va tashkilotlari faoliyatini muvofiqlashtirish;

oziq-ovqat xavfsizligi to‘g‘risidagi takliflarni puxta ishlab chiqish uchun respublika va mahalliy ijro etuvchi hokimiyat organlari hamda boshqa tashkilotlar mutaxassislarini, shuningdek, tegishli faoliyat sohalarida maxsus bilimlarga ega bo‘lgan boshqa shaxslarni jalb etish;

respublika va mahalliy ijro etuvchi hokimiyat organlari hamda boshqa tashkilotlardan oziq-ovqat xavfsizligi bo‘yicha ma’lumotlarni belgilangan tartibda so‘rash va olish;

yer uchastkasidan ruxsat etilgan foydalanish turiga muvofiq yer maydonlarida ekinlarning joylashtirish ulushlariga hududlar ixtisosligidan kelib chiqqan holda o‘zgartirishlar kiritish;

o‘z vakolatiga kiruvchi masalalar bo‘yicha respublika va mahalliy ijro etuvchi hokimiyat organlari rahbarlarining hisobotlarini eshitish;

oziq-ovqat xavfsizligini ta’minlash borasidagi vazifa va topshiriqlar ijrosini ta’minlashda sustkashlikka va mas’uliyatsizlikka yo‘l qo‘ygan davlat organlari va tashkilotlari rahbarlariga nisbatan tegishli choralar ko‘rish bo‘yicha takliflar kiritish.

Respublika komissiyasi qonunchilik hujjatlariga muvofiq boshqa huquqlarga ham ega bo‘lishi mumkin.

10. Respublika komissiyasi:

oziq-ovqat mahsulotlari tanqisligi yuzaga kelganda oziq-ovqat xavfsizligini ta’minlash bo‘yicha tezkor chora-tadbirlarni ko‘rishi;

oziq-ovqat xavfsizligi bo‘yicha dasturlar amalga oshirilishini tashkil etishi va nazorat qilishi;

o‘ziga yuklangan boshqa vazifalar va funksiyalarning samarali bajarilishini ta’minlashi shart.

Respublika komissiyasi qonunchilik hujjatlariga muvofiq boshqa majburiyatlarga ham ega bo‘lishi mumkin.

11. O‘zbekiston Respublikasi Qishloq xo‘jaligi vazirligi Respublika komissiyasining ishchi organi (keyingi o‘rinlarda — ishchi organi) hisoblanadi.

12. Respublika komissiyasi raisi:

Respublika komissiyasi faoliyatiga umumiy rahbarlik qiladi hamda majlislarida raislik qiladi;

Respublika komissiyasi a’zolarining vazifalarini belgilaydi va ularga yuklangan vazifalarning bajarilishini muvofiqlashtiradi;

Respublika komissiyasi majlislari kun tartibini va chaqirilishini belgilash bo‘yicha qaror qabul qiladi;

Respublika komissiyasi tomonidan qabul qilingan qarorlarning bajarilishi yuzasidan doimiy nazoratni tashkil etadi, har chorakda muhokamasini o‘tkazib boradi;

zarurat ko‘ra Respublika komissiyasi ishida ishtirok etish uchun uning tarkibiga kirmaydigan mansabdor shaxslar va boshqa shaxslarni taklif qiladi.

Respublika komissiyasi raisi o‘z vakolatlari doirasida boshqa vazifalarni ham bajarishi mumkin.

13. Respublika komissiyasi a’zolari:

Respublika komissiyasi majlislarida ko‘rib chiqiladigan masalalarni muhokama qilishda va hal etishda ishtirok etadi;

Respublika komissiyasiga ijtimoiy ahamiyatga ega bo‘lgan oziq-ovqat mahsulotlari narxlarining barqarorligini ta’minlash, oziq-ovqat balansidagi importga bog‘langan yoki yetishmovchilik xavfi mavjud bo‘lgan mahsulotlarni ishlab chiqarishni ko‘paytirish to‘g‘risida takliflar kiritadi;

Respublika komissiyasi muhokama qiladigan masalalar bo‘yicha xulosalarni Respublika komissiyasi raisiga taqdim etadi;

Respublika komissiyasi a’zolari o‘z faoliyatini jamoatchilik asosida amalga oshiradi va tegishli davr mobaynida asosiy ish joyidagi ular uchun qonunchilik hujjatlarida belgilangan barcha shart-sharoitlar saqlab qolinadi.

14. Ishchi organ:

a) Respublika komissiyasi faoliyatini tashkil etishda quyidagilarni amalga oshiradi:

Respublika komissiyasi ish rejasi loyihasini tayyorlaydi va navbatdagi majlisga barcha zarur hujjatlarning o‘z vaqtida tayyorlanishini ta’minlaydi, bunda respublika va mahalliy ijro etuvchi hokimiyat organlari, tijorat banklari, boshqa tashkilotlar va Respublika komissiyasi a’zolaridan zarur ma’lumot va xulosalarni olish huquqiga ega;

Respublika komissiyasi faoliyatini samarali yo‘lga qo‘yishda mutasaddi vazirlik va idoralarning malakali mutaxassislaridan iborat tarkibda ishchi guruh tashkil etadi va uning faoliyatini muvofiqlashtiradi;

Respublika komissiyasi majlisi o‘tkazilishini, jumladan, majlisning kun tartibini, o‘tkaziladigan vaqti va joyini, shuningdek, taklif etiladiganlarning soni va tarkibini Respublika komissiyasi raisi bilan kelishadi;

Respublika komissiyasi a’zolarini va taklif etilganlarni majlis o‘tkaziladigan sana, vaqti va joyi to‘g‘risida xabardor qiladi;

Respublika komissiyasi qarorlarining bajarilishi bo‘yicha monitoring yuritadi va uning natijalarini Respublika komissiyasi raisiga ko‘rib chiqish uchun taqdim etadi;

Respublika komissiyasi majlisi qarorlari bayonnomasini rasmiylashtiradi va tasdiqlangan majlis bayonnomasini Respublika komissiyasi a’zolariga hamda zaruratga ko‘ra, boshqa mutasaddi tashkilotlarga yetkazadi;

b) mutasaddi respublika va mahalliy ijro etuvchi hokimiyat organlari hamda boshqa tashkilotlar bilan birgalikda:

ichki va tashqi bozor konyunkturasini chuqur o‘rganish va tahlil qilish asosida mamlakatimizda oziq-ovqat mahsulotlarining ishlab chiqarish hajmlari, jumladan, import o‘rnini bosuvchi mahalliy mahsulot turlarini ko‘paytirish;

respublika aholisini ijtimoiy ahamiyatga ega bo‘lgan asosiy turdagi oziq-ovqat mahsulotlari bilan uzluksiz ta’minlashning istiqbollarini belgilash;

oziq-ovqat mahsulotlarini ishlab chiqarish quvvatlarini ko‘paytirish, mahalliy korxonalarga ilg‘or xorijiy amaliyot va standartlarni tatbiq etish hamda ularning faoliyatini qo‘llab-quvvatlashning samarali mexanizmlarini joriy qilish bo‘yicha takliflarni tayyorlaydi hamda Respublika komissiyasiga kiritib boradi.

15. Respublika komissiyasi har chorakda amalga oshirilgan ishlar to‘g‘risida O‘zbekiston Respublikasi Prezidenti Administratsiyasi va Vazirlar Mahkamasiga axborot taqdim etadi.

16. Respublika komissiyasi o‘z ishini tasdiqlagan rejalar asosida tashkil qiladi va majlislarni, zaruratga ko‘ra, har ikki oyda kamida bir marotaba o‘tkazadi.

Respublika komissiyasi raisi navbatdan tashqari majlislar chaqirishi mumkin.

17. Respublika komissiyasi majlisi uning raisi, rais bo‘lmagan taqdirda, uning o‘rinbosarlari tomonidan olib boriladi.

Respublika komissiyasi majlisi o‘z a’zolarining kamida uchdan ikki qismi qatnashganda vakolatli hisoblanadi.

18. Respublika komissiyasi majlisida ko‘rib chiqiladigan masalalarning mohiyatiga qarab, majlisga respublika va mahalliy ijro etuvchi hokimiyat organlari, xo‘jalik birlashmalari va boshqa tashkilotlarning rahbarlari hamda mutaxassislari taklif etilishi mumkin.

19. Respublika komissiyasi tomonidan qabul qilingan qarorlar ijrosini ta’minlash respublika va mahalliy ijro etuvchi hokimiyat organlari uchun majburiy hisoblanadi.

20. Respublika komissiyasi qonunchilik hujjatlarida belgilangan tartibda O‘zbekiston Respublikasi Prezidenti tomonidan tugatiladi yoki qayta tuziladi.