Xizmat doirasida foydalanish uchun grifli hujjatlar bilan ishlash tartibini belgilash, mazkur turdagi hujjatlar bilan elektron ish yuritish jarayonlarini takomillashtirish maqsadida Vazirlar Mahkamasi qaror qiladi:

1. Quyidagilarni nazarda tutuvchi Xizmat doirasida foydalanish uchun grifli hujjatlar bilan ishlash qoidalari (keyingi oʻrinlarda — Qoidalar) ilovaga muvofiq tasdiqlansin:

xizmat doirasida foydalanish uchun (keyingi oʻrinlarda — XDFU) grifli hujjatlar matnlarini tuzish va rasmiylashtirish;

XDFU grifli hujjatlar bilan ishlashda elektron hujjat aylanish tizimlariga qoʻyiladigan talablar;

kelib tushadigan, ish faoliyatida foydalanish uchun cheklangan hujjatlarni qabul qilish, roʻyxatga olish va yoʻnaltirish (topshirish);

XDFU grifli hujjatlarni koʻpaytirish va tarqatish (joʻnatish);

XDFU grifli hujjatlardan foydalanish, XDFU grifini bekor qilish.

2. Shunday tartib oʻrnatilsinki, unga muvofiq, davlat organlari va tashkilotlariga oʻzlarining XDFU grifli hujjatlari boʻyicha axborot xavfsizligini taʼminlash yuzasidan tegishli ekspertizadan oʻtkazilgan elektron hujjat aylanish tizimlarida ish yuritishga ruxsat etiladi.

3. Adliya vazirligi huzuridagi “Oʻzarxiv” agentligiga XDFU grifli hujjatlar bilan ishlashda quyidagi qoʻshimcha vazifalar yuklatilsin:

davlat organlari va tashkilotlarining XDFU grifli hujjatlar bilan ishlashga doir faoliyatini muvofiqlashtirish;

davlat organlari va tashkilotlarining XDFU grifli hujjatlar bilan ishlashga doir faoliyatini monitoring va nazorat qilish;

XDFU grifli hujjatlar bilan ishlash ustidan nazoratni amalga oshirishda tegishli davlat organlari va tashkilotlari, shu jumladan, huquqni muhofaza qiluvchi organlar bilan oʻzaro hamkorlik qilish;

XDFU grifli hujjatlar bilan ishlashda qonunchilik hujjatlari buzilishlari aniqlanganda, ularni bartaraf etish boʻyicha majburiy koʻrsatmalar berish.

4. Adliya vazirligi Iqtisodiyot va moliya vazirligi bilan birgalikda ikki oy muddatda “Oʻzarxiv” agentligiga XDFU grifli hujjatlar bilan ishlashni muvofiqlashtirish boʻyicha qoʻshimcha shtat birliklarini ajratish yuzasidan Vazirlar Mahkamasiga takliflar kiritsin.

5. Raqamli texnologiyalar vazirligi “Kiberxavfsizlik markazi” DUK bilan birgalikda ikki oy muddatda “Ijro.gov.uz” ijro intizomi idoralararo yagona elektron tizimini va uning negizida ishlab chiqilgan “edo.ijro.uz” elektron hujjat aylanish modulini ushbu qaror bilan tasdiqlanayotgan Qoidalar talablariga muvofiqlashtirsin.

6. Respublika va mahalliy ijro etuvchi hokimiyat organlari uch oy muddatda:

a) “Kiberxavfsizlik markazi” DUK bilan birgalikda oʻzlarining elektron hujjat aylanish tizimlarida barcha axborot xavfsizlik choralarini koʻrgan holda XDFU grifli hujjatlar bilan ishlash uchun texnik imkoniyatlar yaratsin;

b) oʻzlari tomonidan qabul qilingan XDFU grifli hujjatlar bilan ishlash tartiblarini ushbu qarorga muvofiqlashtirsin;

v) Adliya vazirligi bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin;

g) Qoidalarga ilovada keltirilgan xizmat doirasida foydalanish cheklangan maʼlumotlarning namunaviy roʻyxatiga muvofiq XDFU toifasiga kiritiladigan sohaviy maʼlumotlar roʻyxatini tasdiqlasin.

7. Mazkur qaror bilan tasdiqlanayotgan Qoidalar ushbu qaror rasmiy eʼlon qilingan kundan boshlab uch oy oʻtgach kuchga kiradi.

8. Ushbu qarorning bajarilishini nazorat qilish Oʻzbekiston Respublikasi adliya vaziri A.D. Tashkulov zimmasiga yuklansin.

1. Xizmat doirasida foydalanish uchun grifli hujjatlar bilan ishlash qoidalari (keyingi oʻrinlarda — Qoidalar) davlat organlari va tashkilotlarida xizmat doirasida foydalanish uchun (keyingi oʻrinlarda — XDFU) grifli hujjatlar bilan ishlash tartibini belgilaydi.

Ushbu Qoidalar davlat sirlarini tashkil etuvchi maʼlumotlarni oʻz ichiga olgan hujjatlar bilan ishlashga nisbatan tatbiq etilmaydi.

2. Ushbu Qoidalarda quyidagi asosiy tushunchalar qoʻllanadi:

viza qoʻyish — mansabdor shaxs tomonidan imzo qoʻyish orqali hujjatning mazmuni bilan tanishgani, roziligi va kelishganini bildiruvchi belgi;

devonxona — davlat organi va tashkilotlaridagi zimmasiga XDFU grifli hujjatlar bilan ishlashni tashkil qilish va uning funksiyalari yuklangan boʻlinma (yoki vakolatli xodim);

yechib olinadigan tashuvchilar — qurilma yoki tizimdan osonlikcha yechib olinib, boshqa qurilma yoki tizimda foydalanilishi mumkin boʻlgan axborot tashuvchi vositalar (CD-DVD, flesh-xotira, tashqi qattiq disklar, SD-karta va boshqalar);

moddiy tashuvchilar — olinadigan (olinmaydigan) (magnit, optik, lazer yoki boshqalar) elektron axborot tashuvchilardagi ularning elektron shakllarini oʻz ichiga oladigan kerakli maʼlumotlar yaratish, qayd qilish, uzatish, olish, saqlash yoki boshqa usulda foydalanish amalga oshiriladigan axborot tashuvchilar;

munosabat belgisi (rezolyutsiya) — mansabdor shaxs tomonidan hujjat boʻyicha topshiriqni oʻz ichiga olgan yozuv;

xizmat doirasida foydalanish cheklangan axborot — qonunchilik hujjatlariga muvofiq foydalanish uchun cheklangan, davlat va xizmat sirlariga mansub boʻlmagan, hujjatlashtirilgan axborot;

xizmat doirasida foydalanish cheklangan axborotni oshkor qilish — har qanday shakldagi xizmat doirasida foydalanish cheklangan axborot (yozma, boshqa shaklda, shu jumladan, texnik vositalardan foydalangan holda) axborot egasining roziligisiz yoki mehnat shartnomasiga (kontraktiga) yoxud fuqarolik-huquqiy shartnomaga zid holda uchinchi shaxslarga maʼlum boʻlishiga olib keladigan harakat yoki harakatsizlik;

XDFU grifli hujjatlar — moddiy tashuvchida qayd qilingan, uni identifikatsiya qilish imkonini beradigan rekvizitlarga ega boʻlgan, belgilangan tartibda rasmiylashtirilgan xizmat doirasida foydalanish cheklangan hujjatlar;

XDFU grifli hujjatlar bilan ishlash qoidalari — axborotni foydalanish uchun qulay boʻlgan maʼlumotlar koʻrinishida taqdim etish maqsadida saqlash, qidirish, tahlil qilish, baholash, qayta ishlash bilan bogʻliq operatsiyalar majmui;

XDFU grifi — xizmat doirasida foydalanishni cheklash uchun axborot tashuvchilarga tushirilgan yoki elektron faylga oʻrnatilgan rekvizit;

hujjatlarni (axborotni) qayta ishlash — axborot texnologiyalari vositalaridan foydalangan holda axborotni tayyorlash, kiritish, toʻplash, saqlash, nusxa koʻchirish, chiqarish, aks ettirish, qabul qilish va uzatish.

3. XDFU grifli hujjatlar davlat organlari va tashkilotlarining hujjatlar bilan ish yuritish tartibi hamda xususiyatidan kelib chiqib, ushbu Qoidalar asosida elektron yoki zaruratga koʻra, anʼanaviy shaklda yuritiladi.

4. Davlat organlari va tashkilotlarida XDFU grifli hujjat bilan ishlash (XDFU grifli hujjatlarni roʻyxatga, hisobga olish, koʻpaytirish, saqlash va ulardan foydalanishni nazorat qilish) uchun mazkur idoralar rahbarlari, devonxona xodimlari, hujjatni tayyorlagan hamda u bilan ishlashga masʼul ijrochi shaxslar javobgar hisoblanadi.

5. Davlat organlari va tashkilotlarining devonxonalari tomonidan:

XDFU grifli hujjatlar bilan ishlashda tashkiliy va uslubiy jihatdan rahbarlik hamda nazorat amalga oshiriladi;

xodimlar XDFU grifli hujjatlar bilan ishlash tartibi bilan tanishtiriladi.

6. Ushbu Qoidalarga ilovada keltirilgan xizmat doirasida foydalanish cheklangan maʼlumotlarning namunaviy roʻyxatiga muvofiq davlat organlari va tashkilotlari tomonidan XDFU toifasiga kiritiladigan sohaviy maʼlumotlar roʻyxati tasdiqlanadi.

Ushbu sohaviy roʻyxatga davlat organlari va tashkilotlari faoliyatining ochiqligi toʻgʻrisidagi qonunchilik hujjatlariga koʻra ochiq eʼlon qilinadigan maʼlumotlar kiritilmaydi.

7. Umummajburiy davlat koʻrsatmalari sifatida huquqiy normalarni belgilashga, oʻzgartirishga yoki bekor qilishga qaratilgan rasmiy hujjatlar XDFU grifli hujjat shaklida qabul qilinishiga yoʻl qoʻyilmaydi, xizmat doirasida foydalanish cheklangan maʼlumotlarni oʻz ichiga oluvchi hujjatlar bundan mustasno.

8. Hujjatni XDFU toifasiga kiritish va XDFU grifini qoʻyish toʻgʻrisidagi qaror quyidagi masʼul shaxslar tomonidan qabul qilinadi:

ijrochi tomonidan — hujjat loyihasini tayyorlash davomida;

davlat organi va tashkiloti yoki uning tarkibiy boʻlinmasi rahbari tomonidan — hujjatni kelishayotganda (viza qoʻyayotganda) yoki imzolayotganda.

Oʻzbekiston Respublikasi Prezidentining hujjatiga uning eʼlon qilinishi boʻyicha cheklov toʻgʻrisida grif Oʻzbekiston Respublikasi Prezidenti Administratsiyasi reglamentiga muvofiq qoʻyiladi.

Hujjat matnida hajmidan qatʼi nazar, xizmat doirasida foydalanish cheklangan axborot mavjud boʻlganda, ushbu hujjatga XDFU grifi qoʻyiladi.

9. Davlat organi va tashkilotiga XDFU grifi ostida kelib tushgan hujjat grifini uni belgilagan davlat organi yoki tashkiloti bekor qilishi mumkin.

10. Davlat organlari va tashkilotlarining rahbarlari hamda vakolatli xodimlari imzolanayotgan hujjatning XDFU grifli hujjat sirasiga asosli kiritilishi va XDFU grifi bekor qilinishi uchun shaxsan javobgardir.

11. Davlat organlari va tashkilotlarida XDFU grifli hujjatlar bilan ishlash XDFU grifli hujjatlarni qayta ishlashga ruxsat berilgan hamda qonunchilik hujjatlarida belgilangan tartibda kiberxavfsizlik talablariga muvofiqlik yuzasidan ekspertizadan oʻtkazilgan elektron hujjat aylanish tizimlari (keyingi oʻrinlarda — elektron hujjat aylanish tizimlari) orqali amalga oshirilishi mumkin.

Telekommunikatsiya tarmoqlarida XDFU grifli hujjatlar almashinuviga axborot xavfsizligi va kiberxavfsizlik talablariga muvofiq faqat himoyalangan elektron pochta tizimi va (yoki) kiberxavfsizlik talablariga muvofiqlik yuzasidan ekspertizadan oʻtkazilgan elektron hujjat aylanish tizimlari yoxud moddiy tashuvchilar mavjud boʻlganda ruxsat beriladi.

Kriptografik himoya vositalari va elektron raqamli imzo vositalaridan foydalanish axborot tizimlarida xizmat doirasida foydalanish cheklangan axborotni qayta ishlashning asosiy sharti hisoblanadi.

Elektron hujjat aylanish tizimlari, XDFU grifli hujjatlarni qayta ishlovchi texnik va dasturiy vositalar, tashkiliy texnika, kompyuter texnikasi va uskunalari, telekommunikatsiya tarmoqlari va vositalari axborot xavfsizligi va kiberxavfsizlik boʻyicha texnik jihatdan tartibga solish sohasidagi normativ-huquqiy hujjatlar talablariga muvofiq boʻlishi shart.

Bunda elektron hujjat aylanish tizimlarida elektron XDFU grifli hujjatlarni yuklab olish va boshqacha usulda saqlash, matnni koʻchirib olish, shuningdek, chop etish imkoniyatlari cheklanishi, XDFU grifli hujjatlar elektron tarzda koʻpaytirilganda, uning har bir nusxasini qatʼiy identifikatsiya qilish imkonini berishi lozim.

12. Elektron hujjat aylanish tizimlarida koʻpaytirilgan, chop etilgan yoki yuklab olingan XDFU grifli hujjatning har bir nusxasida nusxa raqami aks ettirilgan maxsus suv belgisi, chop etilgan yoki yuklab olingan kompyuter texnikasi tarmoq manzili va foydalanuvchi profili, chop etilgan yoki yuklab olingan vaqt va sana koʻrsatilgan texnik maʼlumotlar bilan shakllantirilishi shart.

13. Qogʻoz shaklda kelib tushadigan va joʻnatiladigan XDFU grifli hujjatlar devonxona xodimlari tomonidan markazlashgan holda alohida jurnallarda roʻyxatga olinadi va ijroga qaratiladi.

Jurnallar roʻyxatga olishning quyidagi majburiy rekvizitlar tarkibiga ega boʻlishi kerak:

hujjatning muallifi (korrespondent);

hujjat nomi;

hujjat sanasi;

hujjat indeksi (tashkilotga kelib tushuvchi hujjatlar uchun hujjatning kelib tushish sanasi va indeksi);

hujjat sarlavhasi yoki uning qisqacha mazmuni;

munosabat belgisi (ijrochi, topshiriq mazmuni, muallif, sana);

ijro etish muddati;

ijro etilgani haqidagi belgi (masalaning hal qilinish mohiyati boʻyicha qisqacha yozuv;

amalda ijro etilish sanasi va javob (hujjatning indeksi);

yigʻmajild tartib raqami.

14. XDFU grifi bilan kelib tushgan har bir hujjatning pastki qismiga uni qabul qiluvchi davlat organi yoki tashkilotining nomi yozilgan roʻyxatga olish shtampi qoʻyiladi va munosabat belgisi boʻyicha ijrochilarga topshiriladi.

Bir nechta tarkibiy boʻlinmalar tomonidan bajariladigan hujjatlar ularga nusxa koʻchirish orqali topshiriladi.

15. Ijro etilgan hujjat (ijro etilgani toʻgʻrisidagi belgi bilan) yigʻmajildga qoʻshib qoʻyish uchun devonxonaga qaytariladi.

Agar davlat organi va tashkiloti yigʻmajildlar nomenklaturasida tarkibiy boʻlinmada XDFU grifi boʻlgan yigʻmajildlarni yuritish koʻzda tutilgan boʻlsa, u holda ijro etilgan hujjat davlat organi va tashkiloti rahbarining munosabat belgisida birinchi ijrochi sifatida koʻrsatilgan ushbu tarkibiy boʻlinmaning tegishli yigʻmajildiga tikiladi.

16. Imzolangan hujjat roʻyxatga olish uchun devonxonaga yoki tegishli tarkibiy boʻlinmaga topshiriladi.

17. Hujjatning qoralama variantlari, shu jumladan, qoralama variantlarning vizalangan nusxalari tiklab boʻlmaydigan darajada ijrochi tomonidan yoʻq qilinadi.

18. Notoʻgʻri rasmiylashtirilgan yoki toʻliq boʻlmagan hujjat kamchiliklarini bartaraf etish uchun devonxona xodimi tomonidan ijrochiga qaytariladi.

19. Joʻnatishdan oldin XDFU grifli hujjatlar devonxona xodimi tomonidan zich, yorugʻlik oʻtkazmaydigan qogʻozdan tayyorlangan konvertlarga (paketlarga) joylanishi kerak.

20. XDFU grifli hujjatlar belgilangan tartibda, joʻnatish reyestrlariga muvofiq feldyegerlik, maxsus aloqa yoki buyurtma pochta joʻnatmasi orqali yuboriladi.

21. XDFU grifli hujjatlarni, zaruratdan kelib chiqib, yigʻmajildlarga alohida yoki grifi boʻlmagan xuddi shu masaladagi hujjatlar bilan birga guruhlashga yoʻl qoʻyiladi.

22. Oshkor etilishi mumkin boʻlmagan maʼlumotlar bilan birgalikda, XDFU grifi boʻlmagan hujjatlar joylashgan yigʻmajildlar XDFU grifli hujjatlar toifasiga kiritilishi kerak. Bunday yigʻmajildlarning muqovalariga XDFU grifi qoʻyiladi.

23. XDFU grifi boʻlgan hujjatlar va yigʻmajildlarini shakllantirish, tartibga keltirish, shu jumladan, qimmatliligini aniqlash boʻyicha ekspertizadan oʻtkazish, yoʻq qilishga saralab olish, uning natijalarini koʻrib chiqish hamda tasdiqlash umumiy ish yuritish hujjatlari uchun belgilangan talablar va tartibga muvofiq amalga oshiriladi.

24. Yoʻq qilish uchun tanlab olingan, XDFU grifi boʻlgan hujjatlar, yigʻmajildlar makulatura sifatida qayta ishlashga topshirilishidan oldin matnni oʻqish va axborotni qayta tiklash imkoniyatini istisno etadigan darajada majburiy tartibda maydalanishi kerak.

25. Kelib tushadigan XDFU grifli hujjatlarni qabul qilish, roʻyxatga olish va yoʻnaltirish (topshirish) devonxona xodimlari tomonidan amalga oshiriladi.

Hujjatlar ish vaqtidan tashqari vaqtda kelib tushganda, ularga ishlov berish va ijrochilarga topshirish hujjat kelib tushgan kuni yoki keyingi ish kunidan kechiktirmay amalga oshirilishi kerak.

26. XDFU grifi bilan kelib tushayotgan barcha hujjatlar devonxona xodimlari tomonidan qabul qilinadi va ochiladi (“Shaxsan” belgisi boʻlgan hujjatlar bundan mustasno). Bunda hujjatlar varaqlari va nusxalarining soni, kuzatuv xatida koʻrsatilgan ilovalarning borligi tekshiriladi.

27. Hujjatlarda koʻrsatilgan ilovalarning mavjud emasligi yoki texnik xatoligi aniqlanganda, ushbu hujjatlar uni qabul qilgan shaxs tomonidan asoslari va (yoki) sabablari koʻrsatilgan holda tegishli izoh kelib tushgan elektron hujjat aylanish tizimi yoki boshqa telekommunikatsiya tarmoqlari orqali hujjat kelib tushgan kuni yoki keyingi ish kunidan kechiktirmay joʻnatgan tashkilotga qaytarib yuboriladi. Konvert (paket) orqali kelib tushgan hujjatlar boʻyicha esa ushbu muddatlarda ikki nusxada dalolatnoma tuziladi, uning bir nusxasi devonxonada qoladi, ikkinchisi esa konvertni (paketni) joʻnatgan tashkilotga yuboriladi.

28. XDFU grifi bilan kelib tushgan har bir hujjatga roʻyxatga olish jurnaliga muvofiq elektron shaklda tartib raqami va sanasi qoʻyiladi.

29. XDFU grifli hujjatlar roʻyxatdan oʻtkazilgandan soʻng davlat organi va tashkiloti rahbari yoki u vakolat bergan shaxsning munosabat belgisi bilan ijroga qaratiladi hamda xodimga topshiriladi.

30. Davlat organlari va tashkilotlarida XDFU grifli hujjatlarning matnlarini tuzish va rasmiylashtirish umumiy ish yuritish qoidalariga muvofiq amalga oshiriladi, ushbu Qoidalarda nazarda tutilgan hollar bundan mustasno.

31. XDFU grifli hujjatlarni rasmiylashtirish, roʻyxatga olish, nusxa koʻchirish (koʻpaytirish), hisobga olish, saqlash va yoʻq qilish ishlari olib boriladigan xizmat xonalari hujjatning yoʻqolishi, oshkor etilishi hamda ularga begona shaxslarning nazoratsiz kirish imkoniyatini cheklaydigan qulayliklarga ega boʻlishi kerak.

32. XDFU grifi hujjatning birinchi sahifasi yuqori oʻng burchagiga va hujjatlarga ilova qilingan xatning birinchi sahifasiga qoʻyiladi hamda grif ostida hujjat nusxasining raqami koʻrsatiladi.

33. Axborot tashuvchilardan qatʼi nazar, kuzatuv xatlariga ilovalar kuzatuv xatida sanab koʻrsatilishi kerak.

Agar ilova elektron hujjat shaklida yechib olinadigan tashuvchilarda yuborilayotgan boʻlsa, ilova qilingan xatda “ilova” soʻzidan keyin yechib olinadigan tashuvchilar turi, uni hisobga olish raqami va XDFU grifi koʻrsatiladi.

Zarur hollarda yuborilayotgan hujjatlar (fayllar) roʻyxati yuqorida qayd etilgan rekvizitlar koʻrsatilgan holda kuzatuv xatiga ilova qilinadi.

34. XDFU grifli elektron hujjat davlat organi va tashkiloti rahbari yoki boshqa vakolatli mansabdor shaxs tomonidan hujjatlarni identifikatsiya qilish imkonini beradigan QR-kod (matrik shtrixli kod) belgisi qoʻyilgan holda elektron raqamli imzo orqali imzolanadi.

QR-kodda (matrik shtrixli kodda) quyidagi maʼlumotlarni aks ettiruvchi havola boʻlishi lozim:

davlat organi va tashkilotining nomi;

hujjatning raqami va sanasi;

imzolagan shaxsning F.I.O.

35. Yechib olinadigan tashuvchilardan XDFU grifli hujjatlar fayllarini oʻchirish, yechib olinadigan tashuvchilarni magnitsizlash yoʻli bilan yoki mexanik ravishda yoʻq qilish orqali amalga oshiriladi.

36. Joʻnatilayotgan XDFU grifli hujjatlar himoyalangan elektron hujjat aylanish tizimlarida qayd etiladi. Ushbu hujjatlarning roʻyxatga olingan indeksi XDFU literi bilan toʻldiriladi.

Masalan: “5-8/15-XDFU”.

37. Joʻnatish uchun hujjatlar shu kunning oʻzida yoki keyingi ish kunidan kechiktirmay yuborilishi kerak.

38. XDFU grifli hujjatlarning elektron nusxalari faqat davlat organi va tashkilotining masʼul tarkibiy boʻlinmasi yoki devonxona rahbarining yozma munosabat belgisi bilan boshqa yechib olinadigan tashuvchilarga koʻchirilishi yoki undan qogʻozga nusxa olish mumkin.

39. Xizmat doirasida foydalanishi cheklangan axborotga ega boʻlgan yechib olinadigan tashuvchilarni saqlash axborot xavfsizligi va kiberxavfsizlik talablariga rioya etgan holda ular tarkibidagi axborotni oʻgʻirlash, yaroqsiz holga keltirish yoki yoʻq qilish imkoniyatini istisno qiladigan sharoitlarda amalga oshiriladi.

40. XDFU grifli hujjatlarni uchinchi shaxslarga berish har qanday holatda davlat organlari va tashkilotlari rahbarlarining yozma ruxsati bilan amalga oshirilishi mumkin.

41. Elektron shakldagi XDFU grifli hujjatlar va yigʻmajildlar himoyalangan elektron hujjat aylanish tizimlarida saqlanishi kerak.

42. XDFU grifli hujjatlarni ular bilan ishlash uchun xizmat xonalaridan tashqariga (uy, mehmonxona va boshqalar) olib chiqish taqiqlanadi.

43. XDFU grifli hujjatlardagi maʼlumotlar oshkor qilingani faktlari aniqlanganda, ushbu holatlar davlat organi va tashkiloti rahbarining buyrugʻi bilan tashkil etiladigan komissiya tomonidan tekshiriladi. Komissiyaning xulosasi rahbar tomonidan tasdiqlanadi.

44. Davlat arxivlarida XDFU grifli hujjatlarni saqlash maxfiy boʻlmagan arxiv hujjatlari uchun belgilangan talablar va tartibga muvofiq amalga oshiriladi.

45. XDFU grifli hujjatlar bilan ishlovchilar:

ushbu Qoidalarda nazarda tutilgan talablarning amalga oshirilishi;

oʻz faoliyatini bajarishi natijasida olingan maʼlumotlarning sir saqlanishi;

oʻziga topshirilgan XDFU grifli hujjatlarning but saqlanishi;

XDFU grifli hujjatlar, shu jumladan, elektron shakldagi hujjatlar bilan ishlashda axborot xavfsizligi va kiberxavfsizlik talablariga toʻliq rioya etilishi uchun shaxsan javob beradi.

46. XDFU grifli hujjatlardan davlat organlari va tashkilotlari rahbarlarining ruxsati bilan foydalanish mumkin.

47. XDFU grifli hujjatlardan olingan maʼlumotlardan ochiq chiqishlarda foydalanish yoki matbuotda ochiq eʼlon etish, radio va televideniye orqali uzatish, ochiq koʻrgazmalarda, stendlarda, vitrinalarda yoki boshqa hammaga koʻrinadigan joylarda namoyish etish uchun foydalanish taqiqlanadi.

48. Boshqa davlat organlari va tashkilotlarining vakillariga, agar ularning bajarayotgan topshiriq mavzusini koʻrsatgan holda yozma soʻrovi boʻlsa, ixtiyorida ushbu materiallar boʻlgan davlat organlari va tashkilotlari rahbarlarining ruxsati bilan XDFU grifli hujjatlar bilan tanishishlariga ruxsat beriladi.

49. XDFU grifli hujjatlar ijrochilarga himoyalangan elektron hujjat aylanish tizimlari yoki qogʻozga nusxa olish orqali beriladi.

50. XDFU grifli hujjatlarning grifini bekor qilish masalasi, qoida tariqasida, har ikki yilda bir marta koʻrib chiqilishi mumkin.

51. XDFU grifini bekor qilish masalasi davlat organlari va tashkilotlari tomonidan tashkil etiladigan komissiya tomonidan koʻrib chiqiladi va natijasi dalolatnoma bilan rasmiylashtiriladi.

52. Quyidagi holatlar XDFU grifini bekor qilishga asos boʻladi:

XDFU grifli hujjatlarga xizmat doirasida foydalanish cheklangan axborotlar asossiz kiritilganda;

hujjatlardagi maʼlumotlar xizmat doirasida foydalanish cheklangan axborotga tegishli boʻlgan maʼlumotlar roʻyxatidan chiqarilganda;

XDFU grifli hujjatlardagi maʼlumotlar oʻz ahamiyatini yoʻqotganda.

53. Hujjatlardagi XDFU grifi bekor qilinganda, XDFU grifini bekor qilish uchun asos sifatida ushbu Qoidalarning 51-bandiga muvofiq tuzilgan dalolatnomaning sanasi va raqami koʻrsatiladi va qogʻoz asosdagi hujjatlar, yigʻmajildlarning muqovalaridagi grif ustidan oʻchiriladi.

Ushbu belgilar tegishli yigʻmajildlar roʻyxatlariga, davlat organi va tashkilotining roʻyxatga olish — nazorat qilish shakllariga kiritiladi.

54. Idoraviy saqlov muddati tugagan XDFU grifli hujjatlar ushbu grifni bekor qilish nuqtai nazaridan koʻrib chiqilgandan soʻng Oʻzbekiston Respublikasining “Arxiv ishi toʻgʻrisida”gi Qonunida nazarda tutilgan muddatlarda va tartibda tegishli davlat arxiviga topshiriladi hamda belgilangan tartibda saqlanadi.

55. XDFU grifi boʻlgan va saqlash uchun davlat arxivlariga topshirilgan hujjatlardan Vazirlar Mahkamasining 2020-yil 10-noyabrdagi 706-son qarori bilan tasdiqlangan Oʻzbekiston Respublikasi davlat arxivlari oʻquv zallarida foydalanuvchilarning arxiv hujjatlari bilan ishlash tartibi toʻgʻrisidagi nizom talablariga muvofiq foydalanish mumkin.

XDFU grifli hujjatlardan foydalanish masalasi ularni davlat arxiviga topshirish jarayonida davlat organi va tashkiloti bilan davlat arxivi oʻrtasida tuziladigan kelishuvda nazarda tutiladi.

56. Adliya vazirligi huzuridagi “Oʻzarxiv” agentligi XDFU grifli hujjatlar bilan ishlash boʻyicha monitoring va nazorat qiluvchi vakolatli organ hisoblanadi.

57. Davlat organlari va tashkilotlarida XDFU grifli hujjatlar bilan ishlash boʻyicha monitoring va nazorat Vazirlar Mahkamasining 2020-yil 19-martdagi 174-son qarori bilan tasdiqlangan Arxiv ishi va ish yuritish holati boʻyicha davlat nazoratini amalga oshirish tartibi toʻgʻrisidagi nizomga muvofiq amalga oshiriladi.

58. Ushbu Qoidalar bilan belgilangan talablar bajarilmasligi davlat organi yoki tashkiloti rahbari tomonidan xodimga nisbatan xizmat tekshiruvi oʻtkazish hamda intizomiy jazo chorasini qoʻllash uchun asos boʻladi.

59. Ushbu Qoidalar talablariga rioya qilinishi ustidan nazorat devonxona, ijrochi boʻlinma hamda davlat organi va tashkiloti rahbari zimmasiga yuklanadi.

60. Ushbu Qoidalar talablari buzilishida aybdor boʻlgan shaxslar qonunchilik hujjatlariga muvofiq javobgar boʻladi.

1. Jismoniy shaxsning shaxsga doir maʼlumotlari.

2. Jismoniy shaxsning shaxsiy hayoti toʻgʻrisidagi axborotlar, shuningdek, uning shaxsiy hayoti sirini ochuvchi axborotlar, qonunchilik hujjatlarida belgilangan hollar bundan mustasno.

3. Axborot manbai yoki taxallus bilan imzo chekkan muallif toʻgʻrisidagi axborotlar, qonunchilik hujjatlarida belgilangan hollar bundan mustasno.

4. Yozishmalar, telefondagi soʻzlashuvlar, qonunchilik hujjatlariga muvofiq axborot olish cheklangan telekommunikatsiyalar tarmoqlari orqali uzatiladigan pochta, telegraf xabarlari va boshqa axborotlar.

5. Qonunchilik hujjatlariga muvofiq axborot olish cheklangan tergov va sud yurituvi siri hisoblangan maʼlumotlar.

6. Qonunchilik hujjatlariga muvofiq axborot egasi axborot olishni cheklagan xizmatga doir maʼlumotlar.

7. Qonunchilik hujjatlariga muvofiq axborot olish cheklangan tijorat siri hisoblangan maʼlumotlar.

8. Qonunchilik hujjatlariga muvofiq axborot olish cheklangan bank siri, shaxsni sugʻurtalash siri.

9. Qonunchilik hujjatlariga muvofiq axborot olish cheklangan (shifokor, notarial harakatlar, advokatlik, soliq siri va boshqalar) kasb faoliyati bilan bogʻliq maʼlumotlar.

10. Ixtiro, foydali model yoki sanoat namunasining mohiyati toʻgʻrisidagi maʼlumotlar, ular haqidagi maʼlumotlar rasmiy tarzda eʼlon qilingunga qadar.