Oʻzbekiston Respublikasi Prezidentining 2025-yil 19-noyabrdagi “Oʻzbekiston Respublikasida uy-joy va ipoteka bozorini barqaror rivojlantirish chora-tadbirlari toʻgʻrisida”gi PF-219-son Farmoni ijrosini taʼminlash hamda Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi faoliyatini tashkil etish maqsadida qaror qilaman:

1. Quyidagilar mazkur qarorni qabul qilishdan koʻzlangan asosiy maqsadlar etib belgilansin:

(a) urbanizatsiya va uy-joy sohasida davlat boshqaruvi samaradorligini oshirish;

(b) Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi (keyingi oʻrinlarda — Milliy qoʻmita) faoliyatini tashkil etish;

(v) urbanizatsiya va uy-joy sohasida davlat organlari oʻrtasida oʻzaro integratsiyani tashkil etgan holda hamkorlikni yanada rivojlantirish;

(g) urbanizatsiya va uy-joy sohasida yetakchi xorijiy davlatlar va xalqaro tashkilotlar bilan samarali hamkorlikni yoʻlga qoʻyish.

2. Shunday tartib oʻrnatilsinki, unga koʻra quyidagi masalalarni oʻz ichiga olgan normativ-huquqiy hujjatlar loyihalari Milliy qoʻmita bilan majburiy kelishilishi shart:

(a) uy-joylar qurilishida davlat tomonidan qoʻllab-quvvatlash choralari;

(b) Nukus va Toshkent shaharlarida, viloyatlar markazlari va boshqa aglomeratsiyalarda uy-joy hamda noturar joy majmualarini qurish loyihalarini amalga oshirish;

(v) “Yangi Oʻzbekiston” massivlarida va boshqa massivlarda koʻp kvartirali uylar qurilishi boʻyicha yillik maqsadli koʻrsatkichlarni tasdiqlash;

(g) kompleks qurilish loyihalari amalga oshiriladigan va “Yangi Oʻzbekiston” massivlari quriladigan hududlarni belgilash.

3. Belgilab qoʻyilsinki:

(a) Milliy qoʻmita boshqaruv xodimlarining umumiy cheklangan soni 50 ta shtat birligidan iborat boʻladi;

(b) Milliy qoʻmita loyihaviy boshqaruv tamoyili asosida rivojlantirish loyihalarini amalga oshirish uchun mahalliy va xorijiy mutaxassis va ekspertlarni, shu jumladan, olimlar, ilmiy izlanuvchilar va tadqiqotchilarni toʻgʻridan-toʻgʻri shartnomalar asosida jalb qilishi (ishga olishi) mumkin;

(v) Milliy qoʻmita faoliyati Davlat budjeti mablagʻlari va qonunchilik hujjatlarida taqiqlanmagan boshqa manbalar hisobidan moliyalashtiriladi.

4. Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi toʻgʻrisidagi nizom ilovaga muvofiq tasdiqlansin.

5. Milliy qoʻmita Toshkent shahri, Zulfiyaxonim koʻchasi, 1a-uyda joylashgan maʼmuriy binoga operativ boshqarish huquqi asosida joylashtirilsin.

6. Ushbu qarorning samarali ijrosini tashkil etish uchun masʼul va shaxsiy javobgar etib Urbanizatsiya va uy-joy bozorini barqaror rivojlantirish milliy qoʻmitasi raisi belgilansin.

7. Qaror ijrosini nazorat qilish va ijro uchun masʼul tashkilotlar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.

1. Ushbu Nizom Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasining (keyingi oʻrinlarda — Milliy qoʻmita) maqomi, vazifalari, funksiyalari, vakolatlari va faoliyatining tashkiliy asoslarini, shuningdek, uning rahbarlarining funksional majburiyatlari hamda javobgarligini belgilaydi.

2. Milliy qoʻmita oʻz faoliyatida Oʻzbekiston Respublikasi Prezidentiga hisobdordir.

3. Milliy qoʻmita uy-joy sohasini rivojlantirish borasidagi davlat siyosatini ishlab chiqish va amalga oshirish sohasida vakolatli organ hisoblanadi. Milliy qoʻmita tizimiga Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi (keyingi oʻrinlarda — Kadastr agentligi) kiradi.

4. Milliy qoʻmita oʻz faoliyatida Oʻzbekiston Respublikasi Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, ushbu Nizom hamda boshqa qonunchilik hujjatlariga amal qiladi.

5. Milliy qoʻmita tomonidan oʻz vakolati doirasida qabul qilingan qarorlar davlat va xoʻjalik boshqaruvi organlari, mahalliy davlat hokimiyati organlari, boshqa tashkilotlar va idoralar, xoʻjalik yurituvchi subyektlar (keyingi oʻrinlarda — davlat organlari va boshqa tashkilotlar) uchun bajarilishi majburiy hisoblanadi.

6. Milliy qoʻmita yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi koʻrsatilgan muhrga ega boʻladi.

7. Milliy qoʻmitaning rasmiy nomi:

(a) davlat tilida:

toʻliq — Oʻzbekiston Respublikasi Urbanizatsiya va uy-joy bozorini barqaror rivojlantirish milliy qoʻmitasi, qisqartirilgani — Urbanizatsiya va uy-joy bozori qoʻmitasi;

(b) rus tilida:

toʻliq — Natsionalniy komitet Respubliki Uzbekistan po ustoychivomu razvitiyu urbanizatsii i rinka jilya, qisqartirilgani — Komitet po urbanizatsii i rinku jilya;

(v) ingliz tilida:

toʻliq — National Committee for Sustainable Development of Urbanization and Nousing Market of the Republic of Uzbekistan, qisqartirilgani — Urbanization and Nousing Committee.

8. Milliy qoʻmita faoliyatining asosiy vazifalari quyidagilardan iborat:

(a) urbanizatsiya jarayonlarini muvofiqlashtirish va rivojlantirish;

(b) samarali va barqaror uy-joy siyosatini ishlab chiqish va amalga oshirish;

(v) renovatsiya dasturlarining samarali ijrosini taʼminlash;

(g) “Yangi Oʻzbekiston” massivlarida qurilish ishlarini muvofiqlashtirish, jumladan, hududlarni tanlashda va urbanizatsiya tamoyillariga rioya etilishida qonunchilik hujjatlarida belgilangan qoidalarga amal qilishni taʼminlash;

(d) Milliy qoʻmita vakolatiga kiruvchi masalalar boʻyicha xalqaro hamkorlikni tashkil etish.

9. Milliy qoʻmita oʻziga yuklangan vazifalarga muvofiq quyidagi funksiyalarni amalga oshiradi:

(a) urbanizatsiya jarayonlarini muvofiqlashtirish va rivojlantirish boʻyicha:

(i) hududlarni kompleks qurish mexanizmlarini joriy etadi, kompleks qurilish dasturlarini ishlab chiqish va boshqarish boʻyicha kompetensiyalar markazini shakllantiradi;

(ii) davlat dasturlari va boshqa dasturlarni ishlab chiqadi hamda ularning amalga oshirilishiga koʻmaklashadi;

(iii) hududiy rejalashtirish amaliyotini rivojlantirish va bosh rejalarni tayyorlashga koʻmaklashadi;

(iv) uy-joy qurilishiga davlat mulkidagi yer uchastkalari hamda boshqa yer maydonlarini jalb etishda shaffof tartib-taomillarni joriy etishga koʻmaklashadi;

(v) investitsiya-qurilish loyihalarini amalga oshirish muddatlarini qisqartirish va maʼmuriy jarayonlarni maqbullashtirish choralarini koʻradi;

(vi) kompleks qurilish tamoyillariga rioya etilishini nazorat qiladi;

(b) samarali va barqaror uy-joy siyosatini ishlab chiqish va amalga oshirish boʻyicha:

(i) qonunchilikni takomillashtirish va uy-joy sohasini rivojlantirishning ustuvor yoʻnalishlarini belgilash boʻyicha takliflar ishlab chiqadi;

(ii) Oʻzbekiston Respublikasi Prezidentining topshiriqlariga koʻra yoki oʻz tashabbusi bilan normativ-huquqiy hujjatlar loyihalarini ishlab chiqadi va belgilangan tartibda koʻrib chiqish uchun kiritadi;

(iii) uy-joy sohasini rivojlantirish va renovatsiya dasturlarini amalga oshirish masalalari boʻyicha normativ-huquqiy hujjatlar loyihalarini ekspertizadan oʻtkazadi;

(iv) davlat organlari va boshqa tashkilotlar xodimlarini tayyorlash masalalari boʻyicha ilmiy-taʼlim muassasalari bilan hamkorlik qiladi;

(v) ulushli qurilishga investitsiya kirituvchi shaxslarning huquq va qonuniy manfaatlarini himoya qilish choralarini koʻradi;

(vi) “eskrou” hisobvaraqlari va loyiha moliyalashtirish asosida uy-joy qurilishini moliyalashtirish mexanizmlarini joriy etadi;

(vii) ulushli qurilish uchun elektron platformani joriy etishni taʼminlaydi, ushbu platforma orqali ulushli ishtirok etish shartnomalarini tuzish va mablagʻlarni “eskrou” hisobvaraqlarida joylashtirish jarayonlarining xavfsizligini taʼminlaydi, maʼlumotlarni taqsimlangan reyestr texnologiyalari asosida yuritadi;

(viii) uy-joy xaridorlarini davlat tomonidan qoʻllab-quvvatlash choralari boʻyicha takliflar ishlab chiqadi;

(ix) uy-joy qurilishini moliyalashtirish manbalarini kengaytirish boʻyicha aholi va institutsional investorlar mablagʻlarini jalb etishga oid takliflar tayyorlaydi;

(x) ijara uy-joy fondlarini yaratish va boshqarish hamda ijara uy-joy bozorining turli segmentlarini rivojlantirishga koʻmaklashadi;

(xi) uy-joy sohasining asosiy koʻrsatkichlari boʻyicha toʻliq va ishonchli axborot hamda tahliliy maʼlumotlar bilan taʼminlaydi;

(xii) aholi keng qatlamlari va bozorning professional ishtirokchilari oʻrtasida uy-joy sohasini rivojlantirish boʻyicha amalga oshirilayotgan chora-tadbirlarni targʻib qiladi;

(v) renovatsiya dasturlarining samarali ijrosini taʼminlash boʻyicha:

(i) renovatsiya dasturlarini amalga oshirish boʻyicha chora-tadbirlar rejalarini kelishadi;

(ii) renovatsiya dasturlarini amalga oshirishda kompleks qurilish tamoyillariga rioya etilishini taʼminlaydi;

(iii) renovatsiya dasturlarining ijrosini monitoring va tahlil qilish, ularning samaradorligini oshirish boʻyicha takliflar va tavsiyalar tayyorlaydi;

(g) “Yangi Oʻzbekiston” massivlarida qurilish ishlarini muvofiqlashtirish, jumladan, hududlarni tanlashda va urbanizatsiya tamoyillariga rioya etilishida qonunchilik hujjatlarida belgilangan qoidalarga amal qilishni taʼminlash boʻyicha:

(i) “Yangi Oʻzbekiston” massivlarida koʻp kvartirali uylarni qurish boʻyicha yillik maqsadli koʻrsatkichlarni kelishadi;

(ii) kompleks qurilish va “Yangi Oʻzbekiston” massivlarini barpo etish uchun tanlangan hududlarni kelishadi;

(iii) “Yangi Oʻzbekiston” massivlarini qurishda urbanizatsiya tamoyillariga rioya etilishini taʼminlaydi;

(d) Milliy qoʻmita vakolatiga kiruvchi masalalar boʻyicha xalqaro hamkorlikni tashkil etish boʻyicha:

(i) uy-joy qurilishini rivojlantirish sohasida tajriba almashish hamda mazkur yoʻnalishlarda xalqaro boshqaruv amaliyotini qoʻllash boʻyicha hamkorlikni tashkil etadi;

(ii) uy-joy qurilishi masalalari boʻyicha jamoat va xalqaro tashkilotlar bilan hamkorlik qiladi;

(iii) uy-joy qurilishi sohasida xalqaro hamkorlikni belgilangan tartibda amalga oshiradi, oʻz vakolati doirasida xorijiy davlatlar tegishli organlari va xalqaro tashkilotlar bilan xalqaro shartnomalar tuzadi.

10. Milliy qoʻmita oʻziga yuklangan vazifa va funksiyalarni amalga oshirish uchun quyidagi huquqlarga ega:

(a) Milliy qoʻmita vakolatiga kiradigan masalalar boʻyicha davlat va xoʻjalik boshqaruvi organlari hamda mahalliy davlat hokimiyati organlari faoliyatini muvofiqlashtirish;

(b) belgilangan tartibda Oʻzbekiston Respublikasi Prezidenti Administratsiyasi va Vazirlar Mahkamasiga normativ-huquqiy hujjatlar loyihalarini, shuningdek, Milliy qoʻmitaga yuklangan vazifa va funksiyalarni bajarish bilan bogʻliq boshqa hujjatlarni ishlab chiqish va kiritish;

(v) Milliy qoʻmita vakolatiga kiradigan masalalarni hal etish uchun davlat va xoʻjalik boshqaruvi organlari, mahalliy davlat hokimiyati organlari hamda boshqa tashkilotlardan belgilangan tartibda axborotni soʻrash va olish;

(g) davlat statistikasi organlaridan zarur statistika maʼlumotlarini bepul asosda olish;

(d) Milliy qoʻmita vakolatiga kiradigan masalalar boʻyicha uslubiy materiallar va tavsiyalar ishlab chiqish;

(j) Milliy qoʻmitaga yuklangan vazifalarni amalga oshirish doirasida davlat organlari va boshqa tashkilotlar, nodavlat notijorat tashkilotlar, ilmiy-taʼlim muassasalari, loyiha institutlari hamda xalqaro tashkilotlar, xorijiy kompaniyalarning yuqori malakali mutaxassislarini jalb etish;

(z) uy-joy qurilishi sohasida davlat tomonidan koʻrsatiladigan qoʻllab-quvvatlash choralarini nazarda tutuvchi, markazlashtirilgan manbalar hisobidan imtiyozli ipoteka kreditlash (subsidiyalash), Nukus shahri, viloyat markazlari, Toshkent shahri va boshqa aglomeratsiyalarda turar va noturar joylar majmualarini qurish loyihalarini amalga oshirish, “Yangi Oʻzbekiston” massivlarida va boshqa massivlarda koʻp kvartirali uylar qurish boʻyicha yillik maqsadli koʻrsatkichlarni tasdiqlash, boshqaruv kompaniyalari va uy-joy mulkdorlari shirkatlari faoliyatini tartibga solishga oid normativ-huquqiy hujjatlarni majburiy tarzda kelishish;

(i) Oʻzbekiston Respublikasi Prezidentining 2025-yil 21-fevraldagi “Uy-joy va ipoteka bozorini yanada rivojlantirishga oid qoʻshimcha chora-tadbirlar toʻgʻrisida”gi PF-26-son Farmonining 2-bandi hamda 2025-yil 19-noyabrdagi “Oʻzbekiston Respublikasida uy-joy va ipoteka bozorini barqaror rivojlantirish chora-tadbirlari toʻgʻrisida”gi PF-219-son Farmonining 6-bandida belgilangan mezonlarga muvofiqlik ustidan monitoring va nazoratni amalga oshirish;

(k) davlat va xoʻjalik boshqaruvi organlari hamda mahalliy davlat hokimiyati organlari tomonidan uy-joy qurilishi sohasidagi davlat dasturlari va hududiy dasturlar, loyihalar hamda tadbirlar bajarilishini nazorat qilish va bu masalalar boʻyicha Oʻzbekiston Respublikasi Prezidenti Administratsiyasiga takliflar kiritish;

(l) Milliy qoʻmita vakolatiga kiradigan masalalar boʻyicha aniqlangan qonun buzilishi va boshqa holatlar yuzasidan davlat organlari va boshqa tashkilotlarga ogohlantirish, xulosa hamda bajarilishi majburiy boʻlgan koʻrsatmalar yuborish;

(m) Milliy qoʻmita vakolatiga kiradigan masalalar boʻyicha davlat va xoʻjalik boshqaruvi organlari, mahalliy davlat hokimiyati organlari, shuningdek, xoʻjalik birlashmalari rahbarlari va mutaxassislarini jalb etgan holda belgilangan tartibda yigʻilishlar oʻtkazish;

(n) Oʻzbekiston Respublikasi Prezidenti topshirigʻiga binoan xalqaro tashkilotlarda mamlakat manfaatlarini ifoda etish va belgilangan tartibda, xalqaro huquq normalariga muvofiq boshqa davlatlar tegishli tashkilotlari bilan uy-joy qurilishi masalalari boʻyicha hamkorlik toʻgʻrisida shartnomalar tuzish;

(o) belgilangan tartibda nashriyot faoliyatini amalga oshirish, axborot materiallari, davriy nashrlar va boshqa chop etilgan mahsulotlarni tayyorlash va tarqatish;

(p) binolarga xizmat koʻrsatish, inventar va xoʻjalik jihozlarini saqlash va ulardan foydalanish, avtotransport, aloqa vositalari, hisoblash, kompyuter va ofis texnikasi, dasturiy taʼminot sotib olish boʻyicha belgilangan tartibda shartnomalar tuzish;

(r) Milliy qoʻmita vakolatiga kiradigan masalalar boʻyicha diplomatik vakolatxonalar va konsullik muassasalari, xalqaro tashkilotlar hamda xorijiy kompaniyalar bilan xizmat yozishmalarini yuritish, tadbirlar tashkil etish va hadli kelishuvlar tuzish;

(s) Milliy qoʻmita hamda uning tizimiga kiradigan tashkilotlarning moddiy-texnik bazasini mustahkamlash boʻyicha choralar koʻrish;

(t) Milliy qoʻmita tizimining ijtimoiy infratuzilmasini yaratish va takomillashtirish, tizim xodimlarini ragʻbatlantirish va moddiy qoʻllab-quvvatlashning yagona tizimini shakllantirish;

(u) Milliy qoʻmita qonunchilik hujjatlariga muvofiq boshqa huquqlarga ham ega boʻlishi mumkin.

11. Milliy qoʻmita oʻziga yuklangan vazifalarning samarali bajarilishi uchun javobgar hisoblanadi.

12. Milliy qoʻmitaga Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan rais rahbarlik qiladi.

13. Milliy qoʻmita raisi Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan ikki nafar oʻrinbosarga, jumladan, bir nafar birinchi oʻrinbosarga ega boʻladi.

14. Milliy qoʻmita raisi oʻz maqomi hamda tibbiy va transport xizmatini koʻrsatish shartlari boʻyicha Oʻzbekiston Respublikasi Prezidenti maslahatchisiga, raisning birinchi oʻrinbosari — Prezident maslahatchisining birinchi oʻrinbosariga, rais oʻrinbosari — Prezident maslahatchisi oʻrinbosariga tenglashtiriladi.

15. Milliy qoʻmita xodimlari Milliy qoʻmita raisi tomonidan lavozimga tayinlanadi va lavozimidan ozod etiladi.

16. Milliy qoʻmita xodimlarining mehnatiga haq toʻlash shartlari Milliy qoʻmita raisi tomonidan belgilanadi.

Milliy qoʻmitada xizmatchilarning asosiy lavozimlari va ishchi kasblarining klassifikatori hamda Mehnatga haq toʻlash boʻyicha yagona tarif setkasining tarif koeffitsiyentlarini qoʻllash tavsiyaviy xususiyatga ega.

17. Milliy qoʻmita xodimlariga tibbiy xizmat koʻrsatish shartlari Oʻzbekiston Respublikasi Prezidenti Administratsiyasi xodimlari uchun belgilangan tartibda amalga oshiriladi.

18. Milliy qoʻmitaga 4 ta yengil xizmat avtotransport vositalarini, shu jumladan, 3 ta shaxsan biriktirilgan, 1 ta navbatchi avtotransport vositasini xarid qilish va saqlash uchun limit beriladi.

19. Milliy qoʻmita faoliyatini moliyalashtirish manbalari quyidagilardan iborat:

(a) Oʻzbekiston Respublikasi Davlat budjeti mablagʻlari;

(b) jismoniy va yuridik shaxslarning, shu jumladan, xorijiy jismoniy va yuridik shaxslarning xayriya mablagʻlari;

(v) Milliy qoʻmitaning vaqtincha boʻsh mablagʻlarini banklarda joylashtirishdan olinadigan daromadlar;

(g) qonunchilik hujjatlari bilan taqiqlanmagan boshqa tushumlar.

20. Milliy qoʻmita raisi:

(a) Milliy qoʻmita faoliyatiga umumiy rahbarlik qiladi hamda Milliy qoʻmitaga yuklangan vazifa va funksiyalarni bajarish uchun shaxsan javob beradi;

(b) Milliy qoʻmita shtat jadvali va xarajatlar smetasini tasdiqlaydi;

(v) Milliy qoʻmita boshqaruv xodimlarining umumiy cheklangan soni doirasida Milliy qoʻmita tuzilmasini tasdiqlaydi;

(g) Milliy qoʻmita tarkibiy boʻlinmalari toʻgʻrisidagi nizomlarni tasdiqlaydi;

(d) Milliy qoʻmita xodimlarining lavozim vazifalarini tasdiqlaydi;

(j) xorijiy davlatlarning vakolatli organlari, xalqaro tashkilotlar, xorijiy ilmiy-taʼlim muassasalar va kompaniyalar bilan hamkorlik toʻgʻrisidagi bitimlar va boshqa shartnomalarni tuzadi;

(z) Kadastr agentligi direktori va uning oʻrinbosarlarini lavozimga tayinlash va lavozimdan ozod etish boʻyicha taqdimnomalar kiritadi;

(i) Kadastr agentligi tuzilmasi va shtat sonini kelishadi;

(k) oʻz vakolati doirasida buyruqlar, qarorlar va farmoyishlar chiqaradi, Milliy qoʻmita xodimlari uchun bajarilishi majburiy boʻlgan koʻrsatmalar beradi.

21. Kadastr agentligi direktori Oʻzbekiston Respublikasi Prezidenti tomonidan lavozimga tayinlanadi va lavozimidan ozod etiladi.

22. Kadastr agentligi direktori Oʻzbekiston Respublikasi Prezidenti Administratsiyasi rahbari tomonidan lavozimga tayinlanadigan va lavozimidan ozod etiladigan oʻrinbosarlarga, shu jumladan, bir nafar birinchi oʻrinbosarga ega boʻladi.

23. Kadastr agentligi boshqaruv xodimlarining mavjud cheklangan soni, shuningdek, mehnatga haq toʻlash tartibi, tibbiy va transport xizmati koʻrsatishning amaldagi shartlari saqlab qolinadi.

24. Kadastr agentligi direktori Milliy qoʻmita raisi bilan kelishgan holda Agentlik tuzilmasi va shtat jadvalini tasdiqlash, shuningdek, Agentlik tuzilmasiga boshqaruv xodimlarining umumiy cheklangan soni doirasida oʻzgartirishlar kiritish huquqiga ega.

25. Milliy qoʻmitani qayta tashkil etish va tugatish qonunchilik hujjatlarida belgilangan tartibda amalga oshiriladi.