Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuni, Oʻzbekiston Respublikasi Prezidentining 2025-yil 30-apreldagi PQ-153-son “Axborot texnologiyalari yordamida sodir etiladigan jinoyatlarga qarshi kurashish faoliyatini yanada kuchaytirishga qaratilgan chora-tadbirlar toʻgʻrisida”gi qarori va Oʻzbekiston Respublikasi Vazirlar Mahkamasining 2024-yil 27-dekabrdagi 897-son “Aholini ijtimoiy qoʻllab-quvvatlashda “ijtimoiy karta” tizimini joriy etish chora-tadbirlari toʻgʻrisida”gi qaroriga muvofiq Oʻzbekiston Respublikasi Markaziy banki boshqaruvi qaror qiladi:

1. Oʻzbekiston Respublikasi Markaziy banki boshqaruvining 2021-yil 10-martdagi 28/21-son qarori (roʻyxat raqami 3294, 2021-yil 3-aprel) (Qonun hujjatlari maʼlumotlari milliy bazasi, 03.04.2021-y., 10/21/3294/0285-son) bilan tasdiqlangan Oʻzbekiston Respublikasi hududida bank kartalarining chiqarilishi va muomalada boʻlishi qoidalari toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Muqaddima quyidagi tahrirda bayon etilsin:

“Mazkur Nizom banklar tomonidan bank kartalarining chiqarilishi, ularning muomalada boʻlishi va oʻtkazilgan operatsiyalar boʻyicha hisob-kitoblarni amalga oshirish qoidalarini belgilaydi.”.

2. 1-bandning oʻn ikkinchi xatboshisidagi “jismoniy shaxs;” degan soʻzlar “jismoniy shaxs va (yoki) oʻzini oʻzi band qilgan shaxs;” degan soʻzlar bilan almashtirilsin.

3. 6-bandning “a” kichik bandida:

uchinchi xatboshidagi “xodimi yoki yakka tartibdagi tadbirkorga” degan soʻzlar “xodimiga” degan soʻz bilan almashtirilsin;

quyidagi mazmundagi toʻrtinchi va beshinchi xatboshilar bilan toʻldirilsin:

“biznes bank kartasi — oʻz saqlovchisiga, yaʼni yakka tartibdagi tadbirkor yoki oʻzini oʻzi band qilgan shaxsga karta hisobvaragʻidagi pul mablagʻlarini boshqarish imkoniyatini beradi;

ijtimoiy bank kartasi — oʻz saqlovchisiga karta hisobvaragʻidagi ijtimoiy va boshqa toʻlovlar orqali kelib tushgan pul mablagʻlarini boshqarish imkoniyatini beradi;”.

4. 8-band quyidagi tahrirda bayon etilsin:

“8. Biron bir toʻlov tizimiga tegishli boʻlgan bank kartalarini, jumladan oldindan emissiya qilinadigan shaxsiy bank kartalarini emissiya qilish, sertifikatlangan dasturiy-texnik vositalardan foydalangan holda, tegishli toʻlov tizimi operatori tomonidan oʻrnatilgan qoidalarga asosan emitent tomonidan amalga oshiriladi.

Oldindan emissiya qilinadigan shaxsiy bank kartalarini aktivlashtirish emitent tomonidan ushbu kartaning saqlovchisini oʻrnatilgan tartibda identifikatsiya qilgandan soʻng amalga oshiriladi.”.

5. 9-bandning ikkinchi xatboshisi quyidagi tahrirda bayon etilsin:

“bank kartasi saqlovchisining familiyasi va ismi (shaxsiy bank kartalari uchun), bunda oldindan emissiya qilinadigan shaxsiy bank kartasida bank kartasi saqlovchisining familiyasi va ismi jismonan aks ettirilishi talab etilmaydi;”.

6. 11-bandda:

ikkinchi xatboshi quyidagi tahrirda bayon etilsin:

“jismoniy va yuridik shaxslarga, shuningdek oʻn toʻrt yoshdan oʻn sakkiz yoshgacha boʻlgan voyaga yetmagan shaxslarga ularning arizalari asosida oʻzaro tuziladigan shartnoma yoki ofertani qabul qilish yoʻli bilan Tijorat banklarida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalariga (roʻyxat raqami 2886, 2017-yil 23-may) muvofiq mijozni oʻrnatilgan tartibda identifikatsiyalagan holda bank kartalarini foydalanishga taqdim etish;”;

quyidagi mazmundagi uchinchi xatboshi bilan toʻldirilsin:

“oʻn toʻrt yoshgacha boʻlgan voyaga yetmagan shaxslarga ularning ota-onasidan biri yoki ularning oʻrnini bosuvchi shaxslarning (qonuniy vakilining) yozma roziligi va arizasi asosida oʻzaro tuziladigan shartnoma yoki ofertani qabul qilish yoʻli bilan Tijorat banklarida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalariga (roʻyxat raqami 2886, 2017-yil 23-may) muvofiq mijozni oʻrnatilgan tartibda identifikatsiyalagan holda bank kartalarini foydalanishga taqdim etish;”;

uchinchi va toʻrtinchi xatboshilar tegishli ravishda toʻrtinchi va beshinchi xatboshilar deb hisoblansin.

7. 18-banddagi “depozit hisobvaragʻidan” degan soʻzlar “depozit, kredit (ssuda) yoki tranzit hisobvaragʻidan” degan soʻzlar bilan almashtirilsin.

8. 19-bandning birinchi xatboshisidagi “mobil ilovalar orqali” va “elektr energiyasi va tabiiy gaz uchun” degan soʻzlar tegishli ravishda “joyida yoki mobil ilovalar orqali” va “elektr energiyasi, tabiiy gaz, ichimlik va oqova suv xizmatlari uchun” degan soʻzlar bilan almashtirilsin.

9. 20-bandning birinchi xatboshisidagi “Yakka tartibdagi tadbirkor” va “milliy valyutadagi bank kartalaridan” degan soʻzlar tegishli ravishda “Yakka tartibdagi tadbirkor yoki oʻzini oʻzi band qilgan shaxs” va “milliy valyutadagi biznes bank kartalaridan naqd pul olish,” degan soʻzlar bilan almashtirilsin.