Keyingi yillarda mamlakatimizda ta’lim va kadrlar tayyorlash tizimini tubdan takomillashtirishga, aholiga ko‘rsatilayotgan transport xizmatlari sifatini oshirishga, shuningdek soliq to‘lovchilar uchun soliq yukini kamaytirishga qaratilgan kompleks chora-tadbirlar amalga oshirilmoqda.

Shu bilan birga mavjud preferensiyalarning amal qilish muddatini uzaytirish, shuningdek vaqtinchalik soliq imtiyozlari qo‘llaniladigan faoliyat turlari ro‘yxatini kengaytirish zaruriyati yuzaga kelmoqda.

Mazkur Qonun bilan O‘zbekiston Respublikasining Soliq kodeksiga qo‘shimcha manbalardan daromad oluvchi budjet tashkilotlari uchun belgilangan soliq stavkalarining amal qilishini 2027-yilning 1-yanvarigacha uzaytirish, shuningdek jami daromadning chegaraviy miqdorini 5 milliard so‘mdan 10 milliard so‘mga oshirish, ushbu daromad mavjud bo‘lganda soliq to‘lovchilar har oylik bo‘nak to‘lovlarini to‘liq chorak o‘tganidan keyin to‘lashini nazarda tutuvchi o‘zgartirishlar kiritilmoqda.

Ushbu Qonun bilan O‘zbekiston Respublikasi Prezidentining yoki O‘zbekiston Respublikasi Vazirlar Mahkamasining qaroriga asosan beriladigan budjet subsidiyalari jami daromad tarkibiga kiritilmasligini belgilovchi o‘zgartirishlar kiritilmoqda.

Bundan tashqari o‘z mablag‘lari hisobidan nodavlat umumiy o‘rta ta’lim tashkilotlarining binolarini qurish bilan bog‘liq bo‘lgan xarajatlarga nisbatan foyda solig‘i bo‘yicha vaqtinchalik soliq imtiyozlari berilmoqda. Shuningdek O‘zbekiston Respublikasi Prezidentining qarori bilan tasdiqlanadigan ro‘yxat bo‘yicha protez moslamalari va ularning butlovchi, ehtiyot qismlarini O‘zbekiston Respublikasi hududiga olib kirish hamda O‘zbekiston Respublikasi rezidentlari bo‘lgan vagonlar (konteynerlar) operatorlarining temir yo‘l transportida tashish jarayonida vagonlarni (konteynerlarni) ijara shartlari asosida foydalanishga berish bo‘yicha xizmatlar ko‘rsatish aylanmasi qo‘shilgan qiymat solig‘ini to‘lashdan vaqtinchalik ozod qilinishi nazarda tutilmoqda.

Mazkur Qonun ta’lim tizimini takomillashtirish uchun qo‘shimcha shart-sharoitlar yaratishga, aholiga ko‘rsatilayotgan transport xizmatlari sifatini oshirishga, shuningdek soliq to‘lovchilar uchun soliq yukini kamaytirishga xizmat qiladi.

1-modda. O‘zbekiston Respublikasining 2019-yil 30-dekabrda qabul qilingan O‘RQ-599-sonli Qonuni bilan yangi tahrirda tasdiqlangan O‘zbekiston Respublikasining Soliq kodeksiga (O‘zbekiston Respublikasi Oliy Majlisi palatalarining Axborotnomasi, 2019-yil, 12-songa 1-ilova; 2020-yil, № 3, 198-modda, № 10, 593-modda, № 11, 652-modda, № 12, 690, 691-moddalar; 2021-yil, № 1, 6-modda, № 4, 294-modda, 4-songa ilova, № 8, 800-modda, № 9, 901-modda, № 10, 968, 969, 972, 973-moddalar, № 12, 1199-modda; 2022-yil, № 2, 79-modda, № 3, 215, 216-moddalar, № 5, 461, 464, 467-moddalar, № 6, 570-modda, № 7, 664, 666-moddalar, № 12, 1190-modda; 2023-yil, № 6, 444, 446-moddalar, № 7, 540-modda, №12, 1011-modda; 2024-yil, № 2, 106, 110, 111-moddalar, № 4, 346-modda, № 5, 458, 459-moddalar, № 8, 822, 831-moddalar, № 9, 958-modda) quyidagi o‘zgartirishlar va qo‘shimcha kiritilsin:

1) 337-moddaning oltinchi qismidagi “2024” raqami “2027” raqami bilan almashtirilsin;

2) 340-moddaning sakkizinchi qismidagi “besh milliard” degan so‘zlar “o‘n milliard” degan so‘zlar bilan almashtirilsin;

3) 369-modda birinchi qismining 1-bandidagi “pul mukofoti va sovg‘alar” degan so‘zlar “pul mukofoti, sovg‘alar va budjet subsidiyalari” degan so‘zlar bilan almashtirilsin;

4) 483-modda:

o‘ttiz sakkizinchi qismidagi “2024” raqami “2027” raqami bilan almashtirilsin;

quyidagi mazmundagi ellik ikkinchi — ellik beshinchi qismlar bilan to‘ldirilsin:

“2025-yil 1-yanvardan 2030-yil 1-yanvarga qadar bo‘lgan davrda ikki yil davomida teng ulushlarda tadbirkorlik subyektlari foyda solig‘ini hisoblab chiqarish chog‘ida o‘z mablag‘lari hisobidan nodavlat umumiy o‘rta ta’lim tashkilotlari binolarini qurish bilan bog‘liq bo‘lgan xarajatlarini mazkur binolarning qiymatini amortizatsiya tarzida chegirib tashlanadigan xarajatlar jumlasiga kiritishga haqli.

Nodavlat umumiy o‘rta ta’lim tashkiloti tomonidan ijtimoiy himoyaga muhtoj oilalarning farzandlarini bepul asosda o‘qishga qabul qilish bo‘yicha litsenziya talablari bajarilmagan taqdirda, ushbu moddaning ellik ikkinchi qismida nazarda tutilgan amortizatsiya chegirmalari ushbu Kodeksning 306-moddasida nazarda tutilgan amortizatsiya normalarini qo‘llash hisobidan bekor qilinadi.

O‘zbekiston Respublikasi Prezidentining qarori bilan tasdiqlanadigan ro‘yxat bo‘yicha protez moslamalarini va ularning butlovchi, ehtiyot qismlarini O‘zbekiston Respublikasi hududiga olib kirish qo‘shilgan qiymat solig‘ini to‘lashdan 2027-yil 1-yanvarga qadar bo‘lgan davrda ozod qilinadi.

O‘zbekiston Respublikasi rezidentlari bo‘lgan vagonlar (konteynerlar) operatorlarining temir yo‘l transportida tashish jarayonida vagonlarni (konteynerlarni) ijara shartnomasi asosida foydalanishga berish yuzasidan xizmatlar ko‘rsatish bo‘yicha aylanmasi qo‘shilgan qiymat solig‘idan 2024-yil 1-noyabrdan 2026-yil 1-yanvarga qadar bo‘lgan davrda ozod etiladi”.

2-modda. O‘zbekiston Respublikasi Iqtisodiyot va moliya vazirligi, Transport vazirligi hamda boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

3-modda. O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

respublika ijro etuvchi hokimiyat organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

4-modda. Ushbu Qonun rasmiy e’lon qilingan kundan e’tiboran kuchga kiradi.

Ushbu Qonun 1-moddasi 1, 2-bandlarining hamda 4-bandi ikkinchi xatboshisining qoidalari 2024-yil 1-yanvardan e’tiboran yuzaga kelgan munosabatlarga nisbatan ham tatbiq etiladi.

Ushbu Qonun 1-moddasi 4-bandi oltinchi xatboshisining qoidalari 2024-yil 1-apreldan e’tiboran yuzaga kelgan munosabatlarga nisbatan ham tatbiq etiladi.

Ushbu Qonun 1-moddasi 4-bandi yettinchi xatboshisining qoidalari 2024-yil 1-noyabrdan e’tiboran yuzaga kelgan munosabatlarga nisbatan ham tatbiq etiladi.