Mamlakat iqtisodiy hayotida xotin-qizlarning faolligini oshirish, ayollar tadbirkorligini har tomonlama qoʻllab-quvvatlash, ularga tadbirkorlik koʻnikmalarini oʻrgatish maqsadida:

1. Xotin-qizlarning iqtisodiy faolligini oshirish, kasbga oʻqitish va bandligini taʼminlash, ularni tadbirkorlikka keng jalb etish uchun Tiklanish va taraqqiyot jamgʻarmasi hisobidan uch yillik imtiyozli davr bilan yetti yil muddatga yillik 14 foiz stavkada jami 100 million AQSh dollari ekvivalentida, shundan AT “Xalq banki”ga 35 million AQSh dollari, “Biznesni rivojlantirish banki” ATBga 35 million AQSh dollari va “Mikrokreditbank”ATBga 30 million AQSh dollari miqdorida kredit resurslari ajratilsin.

Belgilansinki, xotin-qizlarning biznes-loyihalarini moliyalashtirishga:

AT “Xalq banki” va “Mikrokreditbank”ATBga ajratilgan mablagʻlar hisobidan oilaviy tadbirkorlikni rivojlantirish dasturi doirasida belgilangan tartib va mexanizmlar asosida;

“Biznesni rivojlantirish banki” ATBga ajratilgan mablagʻlar hisobidan Oʻzbekiston Respublikasi Prezidentining 2023-yil 14-sentabrdagi “Kichik biznesni rivojlantirishni moliyaviy va institutsional qoʻllab-quvvatlash chora-tadbirlari toʻgʻrisida”gi PQ-306-son va 2023-yil 15-noyabrdagi “Aholini kichik va oʻrta biznesga keng jalb qilishning qoʻshimcha chora-tadbirlari toʻgʻrisida”gi PQ-366-son qarorlarida belgilangan tartib va mexanizmlar asosida kreditlar ajratiladi.

2. Belgilab qoʻyilsinki, Savdo-sanoat palatasi, AT “Xalq banki”, “Biznesni rivojlantirish banki” ATB va “Mikrokreditbank” ATBda quyidagilarni nazarda tutuvchi xotin-qizlar tadbirkorligini qoʻllab-quvvatlash tizimi yaratiladi:

tashabbuskor xotin-qizlarning biznes loyihalarini ishlab chiqishga koʻmaklashish;

mahallalarda xotin-qizlarni tadbirkorlikka oʻqitish;

xotin-qizlar tomonidan tayyorlangan mahsulotlarni sotish;

kooperatsiya asosida loyihalarni amalga oshirishga koʻmaklashish;

loyihalar amalga oshirilishini kuzatib borish va ayol tadbirkorlar bilan doimiy muloqot qilish.

3. Bosh vazir oʻrinbosari Z. Maxkamova Mahallabay ishlash va tadbirkorlikni rivojlantirish agentligi, Ijtimoiy himoya milliy agentligi hamda Qoraqalpogʻiston Respublikasi Vazirlar Kengashi, viloyatlar va Toshkent shahri hokimligi bilan birgalikda bir oy muddatda 2024-2025-yillarda tadbirkorlik, daromad topishga qaratilgan muayyan mehnat faoliyati bilan shugʻullanish va faoliyat turini kengaytirish istagini bildirgan xotin-qizlarni qoʻllab-quvvatlash dasturini (keyingi oʻrinlarda — Dastur) ishlab chiqsin.

Belgilansinki, Dasturni shakllantirishda va unga kiritilgan loyihalarga mazkur qarorning 1-bandida nazarda tutilgan mablagʻlar hisobidan kredit ajratishda ustuvorlik “Ijtimoiy himoya yagona reyestri” axborot tizimiga, “Ayollar daftari”, “Yoshlar daftari” va “Temir daftar”ga kiritilgan xotin-qizlar tomonidan amalga oshirish taklif etilayotgan loyihalarga beriladi.

4. Xotin-qizlar tadbirkorligini rivojlantirish boʻyicha maxsus komissiya (T. Narbayeva):

bir hafta muddatda Xotin-qizlar tadbirkorligini rivojlantirish boʻyicha maxsus komissiya tarkibini tasdiqlasin;

mazkur qarorning 3-bandida nazarda tutilgan Dasturni tasdiqlasin;

har oy yakuni bilan Xotin-qizlar tadbirkorligini rivojlantirish boʻyicha maxsus komissiyaning yigʻilishida amalga oshirilayotgan ishlar samarasi va natijadorligini muhokama qilib borsin.

5. Qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.