Zargarlik sanoatiga malakali xorijiy mutaxassislarni jalb qilish va ularning mehnati uchun qulay shart-sharoitlar yaratish hamda O‘zbekiston Respublikasi Prezidentining “O‘zbekiston Respublikasi Prezidentining tadbirkorlar bilan 2023-yildagi ochiq muloqotida belgilangan vazifalarni amalga oshirish chora-tadbirlari to‘g‘risida” 2023-yil 4-sentabrdagi PQ-292-son qarori ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “O‘zbekiston Respublikasi Prezidentining tadbirkorlar bilan 2023-yildagi ochiq muloqotida belgilangan vazifalarni amalga oshirish chora-tadbirlari to‘g‘risida” 2023-yil 4-sentabrdagi PQ-292-son qarorida zargarlik sanoati uchun mutaxassis sifatida jalb qilingan chet el fuqarolariga mehnat faoliyatini amalga oshirish huquqini beruvchi tasdiqnomani berishda undiriladigan yig‘im miqdorini kamaytirish belgilanganligi ma’lumot uchun qabul qilinsin.

2. Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari to‘g‘risidagi yagona nizomga ilovaga muvofiq zargarlik sanoatiga oid kasblar va lavozimlarda mehnat faoliyatini amalga oshirish uchun jalb qilingan chet el fuqarolariga tasdiqnoma berishda undiriladigan yig‘im miqdorini kamaytirishni nazarda tutuvchi o‘zgartirish va qo‘shimcha kiritilsin.

3. Mazkur qarorning bajarilishini nazorat qilish O‘zbekiston Respublikasi investitsiyalar, sanoat va savdo vaziri L.Sh. Qudratov zimmasiga yuklansin.

20-ilovaning 7-pozitsiyasida:

quyidagi mazmundagi beshinchi xatboshi bilan to‘ldirilsin:

“zargarlik sanoatiga oid kasblar va lavozimlarda mehnat faoliyatini amalga oshirish uchun jalb qilingan chet el fuqarolari uchun — bazaviy hisoblash miqdorining 5 baravari miqdorida”;

beshinchi — to‘qqizinchi xatboshilar tegishlicha oltinchi — o‘ninchi xatboshilar deb hisoblansin.