O‘zbekiston Respublikasi Prezidentining 2023-yil 23-yanvardagi “Savdo-sanoat palatasi faoliyatini yanada takomillashtirish bo‘yicha qo‘shimcha chora-tadbirlar to‘g‘risida”gi PQ-15-son qaroriga muvofiq:

1. O‘zbekiston Respublikasi Prezidentining ayrim hujjatlariga ilovaga muvofiq quyidagilarni nazarda tutuvchi o‘zgartirish va qo‘shimchalar kiritilsin:

Savdo-sanoat palatasining (keyingi o‘rinlarda — Palata) tashkiliy tuzilmasi, uning ijroiya qo‘mitasi va hududiy tuzilmalari Palata tomonidan uning Rayosati bilan kelishilgan holda tasdiqlanishi;

tadbirkorlikka oid beg‘araz ko‘mak loyihalarini amalga oshirishda Palata loyiha hamkori sifatida jalb etilishi;

Palata va uning hududiy bo‘linmalariga davlat subsidiyasini ajratish tizimi joriy qilinishi.

2. Mazkur Farmonning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.

1. O‘zbekiston Respublikasi Prezidentining 2017-yil 19-iyundagi “Biznesning qonuniy manfaatlari davlat tomonidan muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar to‘g‘risida”gi PF-5087-son Farmonida:

a) 1-bandning “g” kichik bandi to‘rtinchi xatboshisidagi “viloyatlar markazlari, tumanlar va shaharlarda Tadbirkorlikka ko‘maklashish markazlari” so‘zlari “Savdo-sanoat palatasining hududiy boshqarmalari, tuman (shahar) bo‘limlari” so‘zlari bilan almashtirilsin;

b) 6-band o‘z kuchini yo‘qotgan deb hisoblansin;

v) 7-bandning birinchi xatboshisidagi “Tadbirkorlikni qo‘llab-quvvatlash markazlari” so‘zlari “Savdo-sanoat palatasi tuman (shahar) bo‘limlari” so‘zlari bilan almashtirilsin.

2. O‘zbekiston Respublikasi Prezidentining 2017-yil 17-noyabrdagi “Hunarmandchilikni yanada rivojlantirish va hunarmandlarni har tomonlama qo‘llab-quvvatlash chora-tadbirlari to‘g‘risida”gi PF-5242-son Farmonining 2-bandi to‘rtinchi xatboshisidagi “Savdo-sanoat palatasi huzuridagi tuman va shahar Tadbirkorlarga ko‘maklashish markazlari” so‘zlari “Savdo-sanoat palatasining tuman (shahar) bo‘limlari” so‘zlari bilan almashtirilsin.

3. O‘zbekiston Respublikasi Prezidentining 2019-yil 10-oktabrdagi “Tashqi beg‘araz ko‘mak mablag‘larini jalb etish mexanizmlarini va donorlar bilan ishlashni takomillashtirish chora-tadbirlari to‘g‘risida”gi PF-5848-son Farmonining 3-bandi quyidagi mazmundagi xatboshi bilan to‘ldirilsin:

“davlat organlari va idoralar tomonidan tadbirkorlikka oid barcha tashqi beg‘araz ko‘mak loyihalarini amalga oshirishda Savdo-sanoat palatasi loyiha hamkori sifatida jalb qilinadi”.

4. O‘zbekiston Respublikasi Prezidentining 2017-yil 19-iyundagi “O‘zbekiston Respublikasi Savdo-sanoat palatasi faoliyatini tashkil etishni takomillashtirish to‘g‘risida”gi PQ-3068-son qarorida:

a) 1-band o‘z kuchini yo‘qotgan deb hisoblansin;

b) 2-bandda:

quyidagi mazmundagi oltinchi xatboshi bilan to‘ldirilsin:

“qonunchilikda belgilangan tartibda davlat tomonidan ajratiladigan subsidiyalar”;

oltinchi — sakkizinchi xatboshilar tegishincha yettinchi — to‘qqizinchi xatboshilar deb hisoblansin;

v) 3-bandning birinchi xatboshisidagi “Tadbirkorlikka ko‘maklashish markazlarida” so‘zlari “O‘zbekiston Respublikasi Savdo-sanoat palatasining tuman (shahar) bo‘limlarida” so‘zlari bilan almashtirilsin;

g) 5-band quyidagi tahrirda bayon etilsin:

“5. O‘zbekiston Respublikasi Savdo-sanoat palatasi o‘z manfaatlari va tadbirkorlik subyektlarining manfaatlari himoyasida O‘zbekiston Respublikasi sudlariga taqdim etadigan ariza, murojaat, shikoyat va da’volari uchun davlat boji to‘lovlaridan ozod etilsin”;

d) 1 — 4-ilovalar o‘z kuchini yo‘qotgan deb hisoblansin.

5. O‘zbekiston Respublikasi Prezidentining 2017-yil 9-oktabrdagi “Kafolat sug‘urta kompaniyasi” aksiyadorlik jamiyati faoliyatini takomillashtirish chora-tadbirlari to‘g‘risida”gi PQ-3317-son qarorining 5-bandi ikkinchi xatboshisidagi “Savdo-sanoat palatasi huzuridagi Tadbirkorlikka ko‘maklashish markazlari” so‘zlari “Savdo-sanoat palatasining tuman (shahar) bo‘limlari” so‘zlari bilan almashtirilsin.