Oʻzbekiston Respublikasi Vazirlar Mahkamasining 1999-yil 14-yanvardagi 19-sonli “Dori-darmon vositalari va tibbiyot buyumlari sotishni tartibga solish toʻgʻrisida”gi qaroriga (Oʻzbekiston Respublikasi Hukumatining QT, 1-son, 4-modda) muvofiq Oʻzbekiston Respublikasi Moliya vazirligi va Sogʻliqni saqlash vazirligi qaror qiladi:

1. Ilova qilinayotgan Aholiga qonun hujjatlariga muvofiq bepul tibbiy yordam koʻrsatayotgan statsionar davolash muassasalari uchun dori-darmon vositalari va tibbiyot buyumlarini sotib olish toʻgʻrisidagi nizom tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasi Vazirlar Mahkamasining 1999-yil 14-yanvardagi 19-sonli “Dori-darmon vositalari va tibbiyot buyumlari sotishni tartibga solish toʻgʻrisida”gi qaroriga (Oʻzbekiston Respublikasi Hukumatining QT, 1-son, 4-modda) asosan ishlab chiqilgan hamda amaldagi qonun hujjatlariga muvofiq aholiga bepul tibbiy yordam koʻrsatayotgan Oʻzbekiston Respublikasining statsionar davolash muassasalari uchun dori-darmon vositalari va tibbiyot buyumlarini davlat budjeti mablagʻlari hisobiga sotib olish tartibini belgilaydi.

1. Amaldagi qonun hujjatlariga muvofiq aholiga bepul tibbiy yordam koʻrsatayotgan statsionar (davolash-profilaktika va sanitariya-epidemiologiya) davolash muassasalari uchun davlat budjeti mablagʻlari hisobiga dori-darmon vositalari va tibbiyot buyumlarini sotib olish Oʻzbekiston Respublikasi Sogʻliqni saqlash vazirligi, Qoraqalpogʻiston Respublikasi Sogʻliqni saqlash vazirligi, viloyatlar va Toshkent shahar sogʻliqni saqlash boshqarmalari, ularning shaharlar va tumanlardagi boʻlinmalari hamda tibbiyot-sanitariya xizmatlarining kafolatlangan hajmi doirasida aholiga bepul tibbiy yordam koʻrsatilishini taʼminlaydigan yuridik shaxs maqomiga ega boʻlgan davolash-profilaktika va sanitariya-epidemiologiya muassasalari (keyingi oʻrinlarda — buyurtmachilar deb yuritiladi) tomonidan amalga oshiriladi.

2. Tibbiyot-sanitariya xizmatlarining kafolatlangan hajmi quyidagilarni oʻz ichiga oladi:

a) shoshilinch, kechiktirib boʻlmaydigan tibbiy yordam koʻrsatish;

b) sogʻliqni saqlashning birlamchi boʻgʻinida va bir qator davlat davolash-profilaktika muassasalarida, eng avvalo qishloq joylarda tibbiy xizmatlar koʻrsatish;

v) bir qancha yuqumli kasalliklarga qarshi aholini immunizatsiya va vaksinatsiya qilish;

g) ijtimoiy ahamiyatga molik boʻlgan kasalliklar va atrofdagilar uchun xavf tugʻdiradigan kasalliklar(sil, onkologik, psixiatrik, narkologik, endokrinologik, infeksion, tanosil kasalligi, OITS, maxov va kasb kasalligiga chalingan bemorlar) boʻyicha ixtisoslashtirilgan tibbiy yordam koʻrsatish;

d) bolalarni tibbiy koʻrikdan oʻtkazish va davolash (pullik kasalxonalardan tashqari);

e) chaqiriq komissiyalarining yoʻllanmalari boʻyicha 15—17 yoshli oʻsmirlarni va chaqiriq yoshdagi shaxslarni (18—27 yosh) tibbiy koʻrikdan oʻtkazish va davolash;

j) tugʻruqqa yordam berish xizmatlari (pullik muassasalardan tashqari);

z) davlat davolash-profilaktika muassasalarida imtiyozli toifaga kiruvchi mijozlarni (nogironlar, urush faxriylari, gʻirt yetimlar) davolash.

3. Oʻzbekiston Respublikasi ham rezidentlari, ham norezidentlari boʻlgan yuridik shaxslar aholiga amaldagi qonun hujjatlariga muvofiq bepul tibbiy xizmat koʻrsatayotgan statsionar davolash muassasalari uchun dori-darmon vositalari va tibbiyot buyumlari yetkazib beruvchilari boʻlishi mumkin.

4. Oʻzbekiston Respublikasi Sogʻliqni saqlash vazirligi aholiga bepul tibbiy yordam koʻrsatayotgan davolash-profilaktika va sanitariya-epidemiologiya muassasalarining buyurtmalari asosida xalqaro patentlanmagan nomlar boʻyicha dori-darmon vositalariga hamda ushbu muassasalarining ixtisosli formulyarlariga kiritilgan farmatsevtika mahsulotlariga kelgusi yil uchun davlat buyutmasini tuzadi.

5. Oʻzbekiston Respublikasi Moliya vazirligi Oʻzbekiston Respublikasi Sogʻliqni saqlash vazirligining dori-darmon vositalari va tibbiyot buyumlarga davlat buyurtmasini koʻrib chiqadi hamda buyurtma summasini kelgusi moliyaviy yil uchun Davlat budjeti loyihasiga kiritadi.

Navbatdagi moliyaviy yilga Oʻzbekiston Respublikasining Davlat budjeti tasdiqlangandan keyin Oʻzbekiston Respublikasi Moliya vazirligi ushbu maqsadlar uchun budjetdan ajratilgan mablagʻlar hajmini belgilangan tartibda Oʻzbekiston Respublikasi Sogʻliqni saqlash vazirligiga maʼlum qiladi.

6. Amaldagi qonun hujjatlariga muvofiq aholiga bepul tibbiy xizmat koʻrsatish uchun dori-darmon vositalari va tibbiyot buyumlarini sotib olishga tayyorgarlik koʻrish va sotib olish qonun hujjatlarida belgilangan tartibda taʼminlanadi.

7. Oʻzbekiston Respublikasi Sogʻliqni saqlash vazirligi tomonidan tasdiqlanadigan roʻyxat boʻyicha shoshilinch tibbiy yordam koʻrsatish uchun dori-darmon vositalarini va tibbiyot buyumlarini sotib olish, shuningdek, ularni davlat ehtiyojlari uchun import qilish, ushbu maqsadlar uchun budjetdan ajratilgan hajmlardan kelib chiqib, ochiq tender savdolarida amalga oshiriladi.

8. Narkoz uchun vaksinalar, zardoblar, preparatlar hamda narkotik moddalarni xarid qilish yopiq tender savdolarida amalga oshiriladi.

9. Dori-darmon vositalari va tibbiyot buyumlarini respublika ishlab chiqaruvchilaridan xarid qilish, qoidaga koʻra, davolash-profilaktika va sanitariya-epidemiologiya muassasalari tomonidan toʻgʻridan toʻgʻri shartnomalar boʻyicha amalga oshiriladi.

Bitta shartnoma boʻyicha qiymati 100 ming AQSh dollari ekvivalentidan koʻp boʻlgan dori-darmon vositalari va tibbiyot buyumlarini xarid qilish Oʻzbekiston Respublikasi Vazirlar Mahkamasining 2000-yil 21-noyabrdagi 456-sonli qaroriga muvofiq tender asosida amalga oshiriladi.

10. Shifoxonalar uchun dori-darmon vositalari va tibbiyot buyumlari importi, odatda, chakana dorixonalarda sotiladigan dori preparatlari oʻramlaridan farq qiladigan nostandart (angro) idishlarda amalga oshiriladi.

11. Dori-darmon vositalari va tibbiyot buyumlariga, shuningdek bepul tibbiy yordam koʻrsatish uchun davolash-profilaktika va sanitariya-epidemiologiya muassasalarining ixtisosli formulyarlariga kiritilgan farmatsevtika mahsulotlariga ehtiyojni aniqlash, ularni davolash-profilaktika va sanitariya-epidemiologiya muassasalarida saqlash, ulardan foydalanish tartibi Oʻzbekiston Respublikasi Sogʻliqni saqlash vazirligi tomonidan belgilanadi.

12. Oʻzbekiston Respublikasi Sogʻliqni saqlash vazirligining davolash-profilaktika va sanitariya-epidemiologiya muassasalarida mazkur Nizomning ijro etilishini taʼminlashni nazorat qilish Oʻzbekiston Respublikasi Sogʻliqni saqlash vazirligining Nazorat inspeksiyasiga yuklanadi.