Oʻzbekiston Respublikasi Prezidentining 2021-yil 3-fevraldagi PF-6159-son “Qishloq xoʻjaligida bilim va innovatsiyalar tizimi hamda zamonaviy xizmatlar koʻrsatishni yanada rivojlantirish toʻgʻrisida”gi Farmoni va 2021-yil 3-fevraldagi PQ-4975-son “Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi faoliyatini tashkil etish toʻgʻrisida”gi qarori hamda Vazirlar Mahkamasining 2021-yil 27-avgustdagi 545-son “Ilmiy va innovatsion faoliyatni boshqarish tizimini tashkil etish chora-tadbirlari toʻgʻrisida”gi qaroriga muvofiq Oʻzbekiston Respublikasi Innovatsion rivojlanish vazirligi, Bandlik va mehnat munosabatlari vazirligi hamda Moliya vazirligi qaror qiladi:

1. Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi, Mehnat vazirligi va Moliya vazirligining 2016-yil 21-apreldagi 4, 7-qq, 25-son qarori (roʻyxat raqami 2790, 2016-yil 24-may) (Oʻzbekiston Respublikasi qonun hujjatlari toʻplami, 2016-y., 21-son, 244-modda) bilan tasdiqlangan Respublika ilmiy-tadqiqot muassasalari xodimlarining mehnatiga haq toʻlash razryadlariga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Izohning ikkinchi xatboshisidagi “Oʻzbekiston Respublikasi Fanlar Akademiyasi Qishloq xoʻjaligi va oziq-ovqat taʼminoti ilmiy-ishlab chiqarish markazi (QXOOTIIChM)” degan soʻzlari “Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi (QXBIMM)” degan soʻzlari bilan almashtirilsin.

2. Ilovada:

a) 3-bandning ikkinchi xatboshisidagi “davlat ilmiy-texnika dasturlarini” va “ilmiy-texnika loyihalarini” degan soʻzlar tegishli ravishda “davlat ilmiy dasturlarini” va “ilmiy loyihalarni” degan soʻzlar bilan almashtirilsin;

b) 4-band quyidagi tahrirda bayon etilsin:

“4. Budjet mablagʻlari hisobiga fundamental, amaliy tadqiqotlar va innovatsiya ishlari davlat ilmiy dasturlarini amalga oshirish doirasida ilmiy loyihalarini bajarishda ishtirok etadigan, mehnatga haq toʻlash razryadlari jadvalining 1 — 4 va 11 — 14-bandlarida koʻzda tutilgan rahbar va ilmiy xodimlar mehnatiga haq toʻlash Oʻzbekiston Respublikasi Vazirlar Mahkamasining 2009-yil 18-avgustdagi 233-son “Ilmiy xodimlar mehnatini yanada ragʻbatlantirish chora-tadbirlari toʻgʻrisida”gi qaroriga muvofiq amalga oshiriladi.”;

v) 8-bandning jadvalidagi “QXOOTIIChM muassasalari” degan soʻzlar “QXBIMM muassasalari” degan soʻzlar bilan almashtirilsin.