Iqtisodiyotni chuqur tarkibiy qayta o‘zgartirishlarni ta’minlashga yo‘naltirilgan investitsiya dasturlarini shakllantirishga doir ishlarni muvofiqlashtirish, ularning ro‘yobga chiqarilishi ustidan nazoratni kuchaytirish, shuningdek xorijiy investitsiyalarni keng jalb etish uchun qulay sharoitlar yaratish maqsadida Vazirlar Mahkamasi qaror qiladi:

1. O‘zbekiston Respublikasi Vazirlar Mahkamasining shtatdagi xodimlari soni 14 nafar bo‘lgan Investitsiya dasturlari departamenti tashkil qilinsin.

Vazirlar Mahkamasining Tashqi iqtisodiy faoliyatni muvofiqlashtirish departamentining Ustuvor investitsiya loyihalari bo‘limi, uning nomini Xorijiy investitsiyalar bo‘limi deb o‘zgartirgan holda, Investitsiya dasturlari departamenti tarkibiga o‘tkazilsin.

2. Investitsiya dasturlari departamentining tuzilmasi va shtat jadvali 1, 1a va 2-ilovalarga muvofiq tasdiqlansin.

Investitsiya dasturlari departamentining boshlig‘i maqomiga ko‘ra O‘zbekiston Respublikasi vaziriga, departament boshlig‘ining o‘rinbosarlari — bo‘limlar boshliqlari — vazirning birinchi o‘rinbosariga tenglashtirilsin.

3. Quyidagilar Investitsiya dasturlari departamentining asosiy vazifalari etib belgilansin:

respublikada yagona davlat investitsiya siyosatini o‘tkazish;

O‘zbekiston Respublikasi Prezidentining “Kapital qurilishni tashkil etishni tartibga solish chora-tadbirlari to‘g‘risida” 1997-yil 28-oktabrdagi PF–1875-son Farmoni qoidalarining bajarilishi ustidan nazoratni ta’minlash;

vazirliklar va idoralar, barcha darajalardagi tarmoq boshqaruv tuzilmalari, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining investitsiya dasturlarini shakllantirish bo‘yicha faoliyatini muvofiqlashtirish hamda ularning bajarilishi ustidan nazorat o‘rnatish;

respublikada qulay investitsiya muhitini shakllantirishni ta’minlovchi normativ-huquqiy bazani ishlab chiqishga doir ishlarni muvofiqlashtirish, xorijiy investitsiyalarni keng jalb etish;

Vazirlar Mahkamasiga tasdiqlash uchun kiritiladigan, mablag‘ bilan ta’minlash manbalaridan qat’i nazar, qiymati 25 mln so‘m va undan yuqori bo‘lgan (1991-yilgi narxlarda) obyektlarni qurish, rekonstruksiya qilish va texnika bilan qayta jihozlash investitsiya loyihalarining, qiymatidan qat’i nazar, hukumat kafolatlari ostidagi xorijiy investitsiyalar va kreditlarni jalb etgan holda quriladigan obyektlarning texnik-iqtisodiy asoslashlarini ekspertizadan o‘tkazish va baholashni tashkil qilish;

xorijiy sarmoya ishtirokidagi investitsiya loyihalarini mablag‘ bilan ta’minlash sxemalarini ishlab chiqish va ekspertizadan o‘tkazish ishlarini muvofiqlashtirish va ularning bajarilishi ustidan nazoratni ta’minlash;

investitsiya dasturlarining bajarilishi va jalb etilayotgan xorijiy investitsiyalarning samarali foydalanilishi monitoringi tizimini ishlab chiqish va undan amaliyotda keng foydalanish;

ustuvor, yirik obyektlarning mablag‘ bilan maqsadli ta’minlanishi, shuningdek, buyurtmachilar, loyihalash institutlari, pudratchi qurilish tashkilotlari va banklar o‘rtasida investitsiya dasturiga kiritilgan obyektlarni qurish, rekonstruksiya qilish va texnika bilan qayta jihozlash bo‘yicha shartnoma munosabatlarining o‘z vaqtida tuzilishi va bajarilishi ustidan nazoratni amalga oshirish;

investitsiya loyihalarida nazarda tutilgan import texnologiya asbob-uskunalarining yetkazib berilishi ustidan nazoratni ta’minlash, o‘rnatilmagan asbob-uskunalar hajmlarini qisqartirish chora-tadbirlarini ishlab chiqish;

investitsiya dasturiga kiritilgan investitsiya loyihalari bo‘yicha loyiha-smeta hujjatlarining holatini tahlil qilish.

4. Belgilansinki, Investitsiya dasturlari departamenti o‘z zimmasiga yuklangan vazifalarga muvofiq ishlarni Vazirlar Mahkamasining Axborot-tahlil boshqarmasi, Tashqi iqtisodiy faoliyatni muvofiqlashtirish departamenti, komplekslari rahbarlarining kotibiyatlari, vazirliklar va idoralar, Qoraqalpog‘iston Respublikasi Vazirlar Kengashi, viloyatlar hamda Toshkent shahar hokimliklari, respublika va hududiy investitsiya dasturlarini shakllantirish va bajarishda qatnashuvchi barcha darajalardagi tarmoq boshqaruv organlari bilan mustahkam aloqada olib boradi.

Investitsiya dasturlari departamenti zimmasiga “Davarxitektqurilish” qo‘mitasi, Xorijiy investitsiyalar bo‘yicha agentlik, “O‘zinvestloyiha” respublika injiniring kompaniyasi, Makroiqtisodiyot va statistika vazirligining investitsiya dasturini ishlab chiqish va uni bajarish monitoringini tashkil etishga oid faoliyatini muvofiqlashtirish yuklansin.

5. Investitsiya dasturlari departamentiga quyidagi huquqlar berilsin:

Vazirlar Mahkamasining komplekslari, departamentlari va bo‘limlaridan, tarmoq boshqaruv organlari hamda ijro etuvchi hokimiyat mahalliy organlaridan Departament vakolatiga kiruvchi masalalar bo‘yicha barcha zarur materiallarni talab qilib olish;

Departament zimmasiga yuklangan vazifalarni bajarish uchun Makroiqtisodiyot va statistika vazirligi, Moliya vazirligi, Markaziy bank, vazirliklar va idoralar, korxonalar va tashkilotlar, loyihalash institutlaridan investitsiya loyihalarining zarur texnik-iqtisodiy asoslanishini, loyiha-smeta hujjatlarini, statistika va tahliliy ma’lumotlarni, boshqa materiallarni olish;

mutaxassislarni, shu jumladan xorijiy mutaxassislarni jalb etgan holda investitsiya loyihalarini va qurilishlarning aniq dasturlarini baholash uchun ekspert guruhlari tuzish.

6. Investitsiya dasturlari departamenti:

O‘zbekiston Respublikasi Prezidentining farmonlari va farmoyishlari, Vazirlar Mahkamasining qarorlari va farmoyishlari, Hukumatning boshqa qarorlari majburiy tartibda jo‘natiladigan tashkilotlar ro‘yxatiga;

Makroiqtisodiyot va statistika vazirligi, Moliya vazirligi, Markaziy bank, “Davarxitektqurilish” qo‘mitasi va boshqa manfaatdor idoralarning statistika axborotnomalarini majburiy tartibda jo‘natish reyestriga kiritilsin.

7. O‘zbekiston Respublikasi Moliya vazirligi Vazirlar Mahkamasi Investitsiya dasturlari departamentining joriy xarajatlari va uni texnika bilan jihozlash uchun zarur qo‘shimcha budjet mablag‘lari ajratishni nazarda tutsin.

8. Departament xodimlarining lavozim maoshlariga yuqori malakasi, chet tillarni bilishi, kompyuter texnikasidan foydalangan holda ishlay olishi uchun belgilangan ish haqi fondi doirasida maxsus ustamalar belgilashga ruxsat etilsin.

9. Investitsiya dasturlari departamenti:

uch hafta muddatda Investitsiya dasturlari departamenti to‘g‘risidagi Nizomni ishlab chiqsin va tasdiqlash uchun O‘zbekiston Respublikasining Bosh vaziriga taqdim etsin;

Investitsiya dasturini shakllantirish va uning amalga oshirilishini nazorat qilish tartibi to‘g‘risidagi Nizomni bir oy muddatda ishlab chiqsin va tasdiqlash uchun Vazirlar Mahkamasiga kiritsin.

10. O‘zbekiston Respublikasi Prezidenti Devoni Ishlar Boshqarmasi Investitsiya dasturlari departamentini joylashtirish masalasini bir hafta muddatda hal etsin, bunda uni tegishli ravishda texnik jihozlashni nazarda tutsin.

11. Vazirlar Mahkamasi komplekslarining rahbarlari Investitsiya dasturlari departamenti tashkil etilishi munosabati bilan komplekslarning tuzilmasini va funksiyalarini ikki hafta muddatda aniqlashtirsin hamda Vazirlar Mahkamasining “O‘zbekiston Respublikasi Vazirlar Mahkamasi apparati tuzilmasini takomillashtirish to‘g‘risida” 1997-yil 20-maydagi 248-son qaroriga, shuningdek komplekslarning kotibiyatlari va bo‘limlar to‘g‘risidagi nizomlarga qisman o‘zgartirishlar va qo‘shimchalar kiritish bo‘yicha takliflar kiritsinlar.

12. O‘zbekiston Respublikasi Adliya vazirligi ikki hafta muddatda qonunchilik va normativ hujjatlarga ushbu qarordan kelib chiqadigan o‘zgartirishlar va qo‘shimchalar kiritish to‘g‘risida takliflar taqdim etsin.

13. Mazkur qarorning bajarilishini nazorat qilish O‘zbekiston Respublikasining Bosh vaziri O‘.T. Sultanov zimmasiga yuklansin.

Departament boshlig‘i

Katta inspektor

Bo‘lim boshlig‘i, departament boshlig‘ining o‘rinbosari

Bosh mutaxassis — 3 nafar

Etakchi mutaxassis

Katta inspektor

Bo‘lim boshlig‘i, departament boshlig‘ining o‘rinbosari

Bosh mutaxassis — 4 nafar

Katta inspektor

Shtat bo‘yicha — 14 xodim (shu jumladan 3 nafar katta inspektor.