LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Kapital qurilishni tashkil etishni tartibga solish, tuzilma xususiyati va ahamiyatiga ega bo‘lgan yirik obyektlar qurilishi bo‘yicha investitsion loyihalarni amalga oshirishda zarur tartib o‘rnatish, valyuta mablag‘laridan samarali foydalanish, shuningdek xorijiy hamkorlar oldida olingan majburiyatlarning so‘zsiz bajarilishini ta’minlash maqsadida:
moliyaviy ta’minot manbalaridan qat’i nazar, qiymati 25 million so‘m va undan ortiq bo‘lgan (1991-yil narxida) obyektlar;
har yili davlat budjeti bilan birgalikda tasdiqlanadigan respublika investitsion dasturiga kiritilgan obyektlar;
loyiha qiymatidan qat’i nazar, hukumat kafilligida xorijiy investitsiyalar va kreditlar jalb etilgan holda barpo etilayotgan obyektlar bo‘yicha qurilish, rekonstruksiya qilish hamda texnik qayta jihozlashga qaratilgan investitsiya loyihalarining texnik-iqtisodiy asoslari O‘zbekiston Respublikasi Vazirlar Mahkamasi tomonidan tasdiqlanadi. Qabul qilingan xalqaro bitimlarda texnik-iqtisodiy asoslarni tasdiqlashning boshqacha tartibi ko‘zda tutilgan bo‘lsa, ana shu bitimlarda belgilangan tartiblar qo‘llaniladi.
Investitsion loyihalarning texnik-iqtisodiy asoslari va loyiha hujjatlari O‘zbekiston Respublikasi Vazirlar Mahkamasi tasdiqlaganiga qadar belgilangan tartibda ekspertizadan o‘tkazilishi lozim.
Korxonalarning, joylardagi davlat organlarining o‘z mablag‘i, tijorat banklari kreditlari hamda bevosita xorijiy investitsiyalar hisobiga amalga oshirilayotgan boshqa investitsion loyihalar bo‘yicha texnik-iqtisodiy asoslar ko‘rsatilgan organlar, korxonalar yoki ularning yuqori tashkilotlari tomonidan tasdiqlanadi.
2. Belgilab qo‘yilsinki, qurilish materiallari va konstruksiyalar, butlovchi mahsulotlar hamda bajarilgan pudrat ishlari uchun erkin muomaladagi valyuta sarf qilingan holda barpo etilayotgan qurilishlarning manzil ro‘yxatlari O‘zbekiston Respublikasi Vazirlar Mahkamasi bilan kelishgan holda tuziladi.
(2-band O‘zbekiston Respublikasi Prezidentining 2018-yil 9-yanvardagi PF-5296-sonli Farmoni tahririda — Qonun hujjatlari ma’lumotlari milliy bazasi, 10.01.2018-y., 06/18/5296/0534-son)
3. O‘zbekiston Respublikasi Markaziy banki, tijorat banklari obyektlar qurilishini moliyaviy jihatdan ta’minlashda mazkur Farmonda belgilangan investitsion loyihalarning texnik iqtisodiy asoslarini tasdiqlash va kelishish tartiblariga qat’iy amal qilsinlar.
4. Investitsion loyihalarni barpo etish va amalga oshirishning belgilangan tartiblariga rioya qilish bo‘yicha shaxsiy javobgarlik buyurtmachi vazifasini bajarayotgan vazirliklar, idoralar, konsernlar, uyushmalar, korporatsiyalar, kompaniyalar, korxona va tashkilotlar rahbarlari, Qoraqalpog‘iston Respublikasi Vazirlar Kengashi Raisining, viloyatlar va Toshkent shahri hokimining kapital qurilish bo‘yicha o‘rinbosarlari, tijorat banklari boshqaruvlari raislari zimmasiga yuklatilsin.
5. Makroiqtisodiyot va statistika vazirligi Moliya vazirligi, O‘zbekiston Respublikasi Markaziy banki hamda boshqa manfaatdor tashkilotlar bilan hamkorlikda viloyatlar va buyurtmachilar misolida tugallanmagan qurilish bo‘yicha yarim yillik statistik hisobotni ishlab chiqib, 1998-yil 1-yanvaridan joriy etsin.
Respublika, soha va hududiy miqyoslarda ijtimoiy-iqtisodiy taraqqiyot yakunlarini ko‘rib chiqishda asosiy e’tibor tugallanmagan qurilishlar tahlili hamda ularni kamaytirish choralariga qaratilsin.
6. Mazkur Farmonning bajarilishini nazorat qilish O‘zbekiston Respublikasi Bosh vaziri O‘. Sultonov zimmasiga yuklansin.