Toshkent shahar issiqlik tizimini takomillashtirish va iste’molchilarni issiqlik energiyasi bilan uzluksiz ta’minlash, shuningdek, Toshkent shahar hokimligi va “Veolia Energy Tashkent” MChJning “Toshkent shahri issiqlik ta’minoti tizimini davlat-xususiy sheriklik shartlari asosida modernizatsiya qilish va boshqaruvga berish” loyihasi bo‘yicha ishlarini tizimli tashkil etish maqsadida Vazirlar Mahkamasi qaror qiladi:

1. Quyidagilar:

Toshkent shahar hokimligi va “Veolia Energy Tashkent” MChJ (keyingi o‘rinlarda — maxsus loyiha kompaniyasi) o‘rtasida 2021-yil 29-sentabrda “Toshkent shahri issiqlik ta’minoti tizimini davlat-xususiy sheriklik shartlari asosida modernizatsiya qilish va boshqaruvga berish” loyihasi (keyingi o‘rinlarda — loyiha) bo‘yicha Davlat-xususiy sheriklik to‘g‘risidagi bitim imzolanganligi;

O‘zbekiston Respublikasi va maxsus loyiha kompaniyasi o‘rtasida 2021-yil 29-sentabrda Davlat tomonidan qo‘llab-quvvatlash to‘g‘risidagi bitim imzolanganligi;

maxsus loyiha kompaniyasining Davlat-xususiy sheriklik to‘g‘risidagi bitim bo‘yicha olgan huquq va majburiyatlarining zarur darajada bajarilishi yuzasidan “Veolia Central & Eastern Europe” (Fransiya) kompaniyasi tomonidan kafolat berish bo‘yicha 2021-yil 29-sentabrda Toshkent shahar hokimligi bilan kelishuv bitimi rasmiylashtirilganligi;

Davlat-xususiy sheriklik to‘g‘risidagi bitim Davlat-xususiy sheriklik loyihalari reyestrida 2022-yil 1-fevral kuni DXSh/04-2022-son bilan ro‘yxatga olinganligi ma’lumot uchun qabul qilinsin.

2. O‘zbekiston Respublikasi va maxsus loyiha kompaniyasi o‘rtasida 2021-yil 29-sentabrda imzolangan Davlat tomonidan qo‘llab-quvvatlash to‘g‘risidagi bitim tasdiqlansin.

3. O‘zbekiston Respublikasi Adliya vazirligi Davlat tomonidan qo‘llab-quvvatlash to‘g‘risidagi bitim yuzasidan yuridik xulosa bersin.

4. Davlat soliq qo‘mitasi huzuridagi Kadastr agentligi Vazirlar Mahkamasining “Toshkent shahri issiqlik ta’minoti tizimini davlat-xususiy sheriklik asosida rivojlantirish to‘g‘risida” 2021-yil 22-sentabrdagi 594-son qaroriga asosan maxsus loyiha kompaniyasiga egalik qilish va vaqtinchalik foydalanishga bepul beriladigan bino-inshootlar va boshqa ko‘chmas mulklarni tasarruf etish huquqisiz belgilangan tartibda Davlat reyestrida ro‘yxatdan o‘tkazsin.

6. Vazirlar Mahkamasining “Toshkent shahri issiqlik ta’minoti tizimini davlat-xususiy sheriklik asosida rivojlantirish to‘g‘risida” 2021-yil 22-sentabrdagi 594-son qaroriga ilovaga muvofiq o‘zgartirish va qo‘shimchalar kiritilsin.

7. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari A.J. Ramatov hamda O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov zimmasiga yuklansin.

1. 2-banddagi “Veolia Central & Eastern Europe” (Fransiya) kompaniyasi” so‘zlari “Maxsus loyiha kompaniyasi” so‘zlari bilan almashtirilsin.

2. 3-bandda:

“a” kichik band quyidagi mazmundagi o‘ninchi — o‘n ikkinchi xatboshilar bilan to‘ldirilsin:

“Toshissiqquvvati” DUK xodimlarini Maxsus loyiha kompaniyasiga o‘tkazishni O‘zbekiston Respublikasi Mehnat kodeksiga muvofiq amalga oshirish;

Maxsus loyiha kompaniyasiga o‘tgan xodimlarning oldingi ishlagan davri uchun hisoblangan ish haqi va boshqa to‘lovlarni qoplab berish davlat sherigi tomonidan amalga oshirish.

Bunda, “Toshissiqquvvati” DUK bilan tuzilgan mehnat shartnomalaridan kelib chikadigan har qanday talablar, da’volar va sud ish yurituvi bo‘yicha javobgarlikni davlat sherigi o‘z zimmasiga oladi”;

quyidagi mazmundagi “g” kichik band bilan to‘ldirilsin:

“g) O‘zbekiston Respublikasi Monopoliyaga qarshi kurashish qo‘mitasi qonunchilikda nazarda tutilgan tartibda Maxsus loyiha kompaniyasini Tabiiy monopoliya subyektlarining Davlat reyestriga kiritish hamda belgilangan tartibda nazorat qilish choralarini ko‘rsin”.

3. Quyidagi mazmundagi 18¹-band bilan to‘ldirilsin:

“18¹. “O‘ztransgaz” AJ va “Hududgazta’minot” AJ tabiiy gaz yetkazib berish chegaralarini belgilashda issiqlik manbaida, ayniqsa kuz-qish davrida harorat rejimini ta’minlash, issiqlik ishlab chiqaruvchilar (“Toshkent issiqlik markazi” AJ va “Toshkent issiqlik elektr markazi” AJ) va issiqlik yetkazib beruvchi Maxsus loyiha kompaniyasi Loyihada ishtirok etishini hisobga olib, uzluksiz issiqlik ta’minoti va issiq suv ta’minoti uchun tabiiy gazni hajm va bosimga muvofiq ravishda yetkazib berishni Loyiha ehtiyojlari uchun ustuvor vazifa sifatida ta’minlasin”.

4. Quyidagi mazmundagi 19¹-band bilan to‘ldirilsin:

“19¹. Maxsus loyiha kompaniyasining murojaatiga muvofiq litsenziyalash va ruxsat berish sohasidagi vakolatli organlar qisqa muddatda loyihani amalga oshirish doirasida talab etiladigan litsenziya va ruxsat etish xususiyatiga ega hujjatlar taqdim etilishini ta’minlasin”.