O‘zbekiston Respublikasi Prezidentining “2021 — 2025-yillarda fuqarolik jamiyatini rivojlantirish konsepsiyasini tasdiqlash to‘g‘risida” 2021-yil 4-martdagi PF-6181-son Farmoni ijrosini ta’minlash maqsadida Vazirlar Mahkamasi qaror qiladi:

1. Adliya vazirligi tomonidan nodavlat notijorat tashkilotlariga onlayn davlat xizmatlarini ko‘rsatish, shu jumladan, ularni elektron shaklda davlat ro‘yxatidan va qayta ro‘yxatdan o‘tkazish, o‘z faoliyati to‘g‘risidagi yillik hisobotlarni real vaqt rejimida taqdim qilish, shuningdek, fuqarolik jamiyatining rivojlanish holati va tendensiyalarini kuzatib borish imkoniyatini beradigan elektron portal (keyingi o‘rinlarda — elektron portal) ishlab chiqilib, ishga tushirilganligi ma’lumot uchun qabul qilinsin.

2. Adliya vazirligi Axborot texnologiyalari va kommunikatsiyalarini rivojlantirish vazirligi, Moliya vazirligi, Innovatsion rivojlanish vazirligi, O‘zbekiston Respublikasi Oliy Majlisi huzuridagi Fuqarolik jamiyati institutlarini qo‘llab-quvvatlash jamoat fondi (keyingi o‘rinlarda — Oliy Majlis huzuridagi jamoat fondi) bilan birgalikda 2022-yil 1-dekabrga qadar elektron portal bazasida quyidagi imkoniyatlarni beradigan ijtimoiy sheriklik va jamoatchilik nazoratini amalga oshirishning zamonaviy mexanizmlarini joriy etsin:

nodavlat notijorat tashkilotlari va fuqarolik jamiyatining boshqa institutlari (keyingi o‘rinlarda — NNT) tomonidan ijtimoiy va iqtisodiy dasturlar ishlab chiqilishida ishtirok etish, ularning ijrosini monitoring qilish, monitoring natijasi bo‘yicha majburiy tartibda ko‘rib chiqilishi lozim bo‘lgan hujjatni, shuningdek, normativ-huquqiy hujjatlar loyihalari to‘g‘risidagi takliflarni mas’ul davlat organlari va tashkilotlariga kiritish;

NNTlarning ijtimoiy va iqtisodiy dasturlar loyihalari yuzasidan bergan takliflarini davlat organlari va tashkilotlari tomonidan ko‘rib chiqish va natijalarini elektron portalga joylashtirish;

NNTlar yoki davlat organlari va tashkilotlari tomonidan ijtimoiy sheriklik munosabatlarini o‘rnatish bo‘yicha takliflar kiritish;

davlat organlari va tashkilotlari tomonidan ijtimoiy sheriklik sohalari doirasida davlat ijtimoiy buyurtmalarini berish to‘g‘risida Oliy Majlis huzuridagi jamoat fondiga yoki uning Qoraqalpog‘iston Respublikasi, viloyatlar va Toshkent shahridagi hududiy bo‘linmalariga (keyingi o‘rinlarda — hududiy bo‘linmalar) buyurtmanomalar yuborish;

NNTlar tomonidan amalga oshirilgan jamoatchilik nazoratining yakuni bo‘yicha tayyorlangan hujjatni davlat organlari va tashkilotlariga yuborish hamda davlat organlari hamda tashkilotlari tomonidan ushbu hujjatning ko‘rib chiqilishi natijasi bo‘yicha qabul qilingan qarorlarni e’lon qilish.

3. Belgilansinki, 2023-yil 1-yanvardan boshlab quyidagilar davlat organlari va tashkilotlari tomonidan majburiy tartibda elektron portalga joylashtirib boriladi:

ijtimoiy va iqtisodiy dasturlarning loyihalari;

sotsial va ijtimoiy ahamiyatga ega loyihalarni amalga oshirish uchun NNTlarga budjetdan tashqari mablag‘lari hisobidan davlat ijtimoiy buyurtmasini berish uchun tanlov o‘tkazilishi haqidagi e’lonlar;

kelgusi moliya yili uchun davlat ijtimoiy buyurtmalarini berish to‘g‘risida Oliy Majlis huzuridagi jamoat fondiga yoki uning hududiy bo‘linmalariga yuboriladigan buyurtmanomalar;

NNTlar bilan hamkorlikda amalga oshirilgan loyihalar, tuzilgan hamkorlik bitimlari, memorandumlar hamda berilgan davlat ijtimoiy buyurtmalari haqidagi ma’lumotlar;

davlat ijtimoiy buyurtmalarini amalga oshirish jarayoni va natijalari, ajratilgan mablag‘larning sarflanishi haqidagi ma’lumotlar.

Oliy Majlis huzuridagi jamoat fondi va uning hududiy bo‘linmalariga davlat granti va davlat ijtimoiy buyurtmasini berish uchun tanlovlar o‘tkazilishi haqidagi e’lonlar, shuningdek, o‘tkazilgan tanlovlarning natijalari haqida ma’lumotlarni elektron portalga joylashtirib borish tavsiya etilsin.

4. Elektron portalda ijtimoiy sheriklik va jamoatchilik nazoratini amalga oshirishning zamonaviy mexanizmlarini joriy etish bo‘yicha tashkiliy sxema ilovaga muvofiq tasdiqlansin.

5. Elektron portalning funksional imkoniyatlarini takomillashtirish, uning uzluksiz faoliyat ko‘rsatishi, shuningdek, unga texnik xizmat ko‘rsatish va uni qo‘llab-quvvatlash bilan bog‘liq xarajatlar budjetdan tashqari Adliya organlari va muassasalarini rivojlantirish jamg‘armasi mablag‘lari hamda qonunchilik hujjatlari bilan taqiqlanmagan boshqa manbalar hisobidan moliyalashtirilishi belgilab qo‘yilsin.

6. O‘zbekiston Respublikasi Adliya vazirligi:

a) ijtimoiy sheriklikni elektron portal orqali amalga oshirish tartibiga rioya etilishining nazorati va doimiy monitoringini amalga oshirsin;

b) Moliya vazirligi, Iqtisodiy taraqqiyot va kambag‘allikni qisqartirish vazirligi, manfaatdor vazirlik va idoralar bilan birgalikda 2022-yil 1-avgustga qadar davlat boshqaruvi organlarining sotsial va ijtimoiy ahamiyatga ega loyihalarini amalga oshirish uchun NNTlarga budjetdan tashqari mablag‘lar hisobidan davlat ijtimoiy buyurtmasini berish tartibini takomillashtirish yuzasidan quyidagilarni nazarda tutuvchi normativ-huquqiy hujjat loyihasini Vazirlar Mahkamasiga kiritsin:

davlat ijtimoiy buyurtmasini berish tartib-taomillarini “Davlat xaridlari to‘g‘risida”gi O‘zbekiston Respublikasi Qonuni talablari asosida qayta ko‘rib chiqish;

davlat ijtimoiy buyurtmasini bajarish uchun ajratiladigan mablag‘larning eng ko‘p miqdorini belgilash;

ijtimoiy loyihalarni ko‘rib chiqish natijasi bo‘yicha qabul qilingan qaror ustidan shikoyat qilish tartibi;

davlat ijtimoiy buyurtmasini bajarishga ajratilgan mablag‘larning NNTlar tomonidan ma’muriy xarajatlar va ish haqiga ishlatiladigan qismini aniq belgilash;

davlat ijtimoiy buyurtmasini bajarishga ajratilgan mablag‘lardan maqsadli foydalanilishini monitoring qilishning aniq mexanizmi;

davlat ijtimoiy buyurtmasini bajarish natijalarining samaradorligini baholash indikatorlarini belgilash;

davlat ijtimoiy buyurtmasini bajarishga ajratilgan mablag‘lar sarflanishi yuzasidan jamoatchilikni doimiy ravishda xabardor qilib borish tartibi;

v) Axborot texnologiyalari va kommunikatsiyalarini rivojlantirish vazirligi bilan birgalikda 2022-yil 1-dekabrga qadar:

davlat organlari va tashkilotlari, Oliy Majlis huzuridagi jamoat fondi, uning hududiy bo‘linmalari hamda NNTlarning elektron portaldan ushbu qarorda belgilangan vazifalarning bajarilishi uchun foydalanishi uchun shart-sharoit yaratish maqsadida zarur chora-tadbirlarni amalga oshirsin;

ushbu qarorning 2 va 3-bandlarida nazarda tutilgan funksional imkoniyatlar O‘zbekiston Respublikasining Yagona interaktiv davlat xizmatlari portali orqali ham amalga oshirilishini ta’minlasin;

g) Moliya vazirligi, Oliy Majlis huzuridagi jamoat fondi, O‘zbekiston nodavlat notijorat tashkilotlari milliy assotsiatsiyasi, manfaatdor vazirlik va idoralar bilan birgalikda 2022-yil 1-dekabrga qadar NNTlarga qonunchilikda belgilangan tartibda ijtimoiy sheriklik doirasida ajratilgan davlat granti va ijtimoiy buyurtmasi bo‘yicha amalga oshirilgan ijtimoiy loyihalarning Yagona elektron reyestrini joriy etsin va doimiy ravishda yangilab borsin.

7. Shunday tartib o‘rnatilsinki, unga muvofiq Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Tibbiy-ijtimoiy xizmatlarni rivojlantirish agentligi bilan birgalikda:

a) “Keksalar, nogironlar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida”gi O‘zbekiston Respublikasi Qonunining tizimli va samarali ijrosi ta’minlanishiga ko‘maklashish maqsadida quyidagi masalalarni aniqlash uchun 2023-yildan boshlab har yili tahlil qilib boradi:

mavjud ijtimoiy xizmatlarning xatlovi, ijtimoiy xizmatlarni ko‘rsatish holati, ijtimoiy xizmatlarni ko‘rsatishga jalb qilingan moddiy va moliyaviy resurslarning turlari va miqdori;

ijtimoiy xizmatlarni ko‘rsatayotgan subyektlar turlari (davlat organlari va tashkilotlari, NNTlar, tadbirkorlik subyektlari va boshqalar.) va soni;

aholining ijtimoiy xizmatlarga bo‘lgan ehtiyojini baholash orqali birinchi navbatda, ijtimoiy xizmatlar ko‘rsatilishi zarur bo‘lgan aholi qatlamlari;

jamoatchilik fikrini inobatga olgan holda, NNTlarga davlat grantlari va ijtimoiy buyurtmalari beriladigan ijtimoiy xizmat ko‘rsatishning ustuvor yo‘nalishlari;

b) tahlillar natijasi bo‘yicha har yili 1-martga qadar Oliy Majlis huzuridagi jamoat fondi mablag‘larini boshqarish bo‘yicha parlament komissiyasi, Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlari huzuridagi ijtimoiy sheriklik bo‘yicha jamoat komissiyalari, Adliya vazirligi hamda manfaatdor vazirlik va idoralarga ma’lumot taqdim etib boradi.

8. Vazirlik va idoralar har yili sotsial va ijtimoiy ahamiyatga ega loyihalarni amalga oshirish uchun NNTlarga budjetdan tashqari mablag‘lar hisobidan beriladigan davlat ijtimoiy buyurtmalarini ushbu qarorning 6-bandida nazarda tutilgan tahliliy ma’lumotlarga asosan shakllantirib borsin.

9. Mazkur qarorning bajarilishini nazorat qilish O‘zbekiston Respublikasi adliya vaziri R.Q. Davletov zimmasiga hamda Vazirlar Mahkamasining Yoshlarni qo‘llab-quvvatlash va jamoat tashkilotlari masalalari kotibiyatiga yuklansin.