Oʻzbekiston Respublikasining Soliq kodeksi, Oʻzbekiston Respublikasi Prezidentining 2021-yil 23-martdagi PF-6191-son “Aholi va tadbirkorlik subyektlariga davlat xizmatlaridan foydalanishda yanada qulay sharoitlar yaratish, bu borada byurokratik toʻsiqlarni qisqartirish boʻyicha qoʻshimcha chora-tadbirlar toʻgʻrisida”gi Farmoni va 2021-yil 22-oktabrdagi PQ-5263-son “Normativ-huquqiy hujjatlar va ularning loyihalarini korrupsiyaga qarshi ekspertizadan oʻtkazishni yanada takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladi:

1. Oʻzbekiston Respublikasi Moliya vazirligi va Davlat soliq qoʻmitasining 2010-yil 24-martdagi 24 va 2010-15-son “Oʻzbekiston Respublikasi oliy oʻquv yurtlarida taʼlim olish uchun yoʻnaltiriladigan mablagʻlarga jismoniy shaxslardan olinadigan daromad soligʻi boʻyicha imtiyozni qoʻllash tartibi toʻgʻrisidagi nizomni tasdiqlash haqida”gi qaroriga (roʻyxat raqami 2107, 2010-yil 27-may) (Oʻzbekiston Respublikasi qonun hujjatlari toʻplami, 2010-y., 21-son, 169-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. Nomi va 1-banddagi “Oʻzbekiston Respublikasi oliy oʻquv yurtlarida” degan soʻzlar “Oʻzbekiston Respublikasining professional va oliy taʼlim tashkilotlarida” degan soʻzlar bilan almashtirilsin.

2. Muqaddima quyidagi tahrirda bayon etilsin:

“Oʻzbekiston Respublikasining Soliq kodeksi va Oʻzbekiston Respublikasining “Davlat soliq xizmati toʻgʻrisida”gi Qonunining 7-moddasiga muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladi:”.

3. Nizomda:

a) nomidagi “Oʻzbekiston Respublikasi oliy oʻquv yurtlarida” degan soʻzlar “Oʻzbekiston Respublikasining professional va oliy taʼlim tashkilotlarida” degan soʻzlar bilan almashtirilsin;

b) 1 — 3-bandlar quyidagi tahrirda bayon etilsin:

“1. Oʻzbekiston Respublikasining Soliq kodeksiga muvofiq 2010-yil 1-yanvardan boshlab fuqarolarning soliq solinadigan ish haqi va boshqa daromadlarining Oʻzbekiston Respublikasining professional va oliy taʼlim tashkilotlarida taʼlim olishga (oʻzining, shuningdek, yigirma olti yoshga toʻlmagan farzandlarining yoki erining (xotinining) taʼlim olishi uchun) yoʻnaltiriladigan toʻlovlariga jismoniy shaxslardan olinadigan daromad soligʻi solinmaydi.

2. Ushbu Nizomning 1-bandida nazarda tutilgan jismoniy shaxslardan olinadigan daromad soligʻi boʻyicha imtiyoz jismoniy shaxslarning soliq solinadigan daromadlarini Oʻzbekiston Respublikasining professional va oliy taʼlim tashkilotlarida oʻzining, shuningdek, yigirma olti yoshga toʻlmagan farzandlarining yoki erining (xotinining) oʻqishi uchun yoʻnaltiriladigan toʻlovlariga (keyingi oʻrinlarda oʻqish uchun toʻlov deb yuritiladi) kamaytirish (keyingi oʻrinlarda soliq chegirmasi deb yuritiladi) koʻrinishida beriladi.

3. Ushbu Nizom maqsadlarida oliy taʼlim tashkiloti deganda oliy taʼlimning taʼlim dasturlarini (bakalavriat va magistratura) amalga oshiradigan, Oʻzbekiston Respublikasi Vazirlar Mahkamasi tomonidan belgilangan tartibda tashkil etilgan, oʻz Ustavi va Oliy taʼlim toʻgʻrisidagi nizom (roʻyxat raqami 1222, 2002-yil 22-fevral) asosida faoliyat yurituvchi yuridik shaxs tushuniladi.

Professional taʼlim tashkiloti deganda Oʻzbekiston Respublikasining “Taʼlim toʻgʻrisida”gi Qonuni va Oʻzbekiston Respublikasi Vazirlar Mahkamasining 2020-yil 7-avgustdagi 466-son qarori bilan tasdiqlangan Oʻzbekiston Respublikasida uzluksiz boshlangʻich, oʻrta va oʻrta maxsus professional taʼlim toʻgʻrisidagi nizom asosida faoliyat yurituvchi tashkilot tushuniladi.”;

v) 4-bandning uchinchi xatboshisi “taʼlim kreditlari” degan soʻzlardan keyin “(foizlari bilan)” degan soʻzlar bilan toʻldirilsin;

g) 5-band quyidagi tahrirda bayon etilsin:

“5. Oʻzining, farzandlarining yoki erining (xotinining) oʻqishi uchun toʻlanganda soliq chegirmasi jismoniy shaxs — taʼlim oluvchiga, shuningdek, agar oʻqish uchun toʻlov taʼlim oluvchi yigirma olti yoshga toʻlguniga qadar amalga oshirilgan boʻlsa uning ota-onalariga va (yoki) xotiniga (eriga) beriladi.”;

d) 7-banddagi “oliy oʻquv yurti” degan soʻzlar “professional va oliy taʼlim tashkilotlari” degan soʻzlar bilan almashtirilsin;

e) 10-bandning uchinchi xatboshisi quyidagi tahrirda bayon etilsin:

“Oʻzbekiston Respublikasining professional va oliy taʼlim tashkilotlariga yoki tijorat bankiga olingan taʼlim kreditini (foizlari bilan) qoplash evaziga ish beruvchi tomonidan oʻtkazib beriladigan jismoniy shaxsning soliq solinadigan ish haqi va boshqa daromadlari.”;

j) 11-bandda:

birinchi xatboshidagi “kreditni qoplashga” degan soʻzlardan keyin “(foizlari bilan)” degan soʻzlar bilan toʻldirilsin;

ikkinchi xatboshidagi “Oʻzbekiston Respublikasi oliy oʻquv yurti” degan soʻzlar “Oʻzbekiston Respublikasining professional yoki oliy taʼlim tashkilotlari” degan soʻzlar bilan almashtirilsin;

toʻrtinchi xatboshi chiqarib tashlansin;

z) 13-banddagi “189-moddasida” degan soʻzlar “393-moddasida” degan soʻzlar bilan almashtirilsin;

i) 15-bandning birinchi xatboshisidagi “Oliy oʻquv yurtlari va” degan soʻzlar “Professional va oliy taʼlim tashkilotlari hamda” degan soʻzlar bilan almashtirilsin;

k) 16 — 18-bandlar quyidagi tahrirda bayon etilsin:

“16. Oʻzbekiston Respublikasining professional va oliy taʼlim tashkilotlarida oʻqish uchun toʻlov jismoniy shaxs tomonidan mustaqil ravishda (naqd pul hisobiga, jismoniy shaxslarning banklardagi omonat va boshqa hisob raqamlaridan yoki plastik kartalardan foydalangan holda) amalga oshirilganda, soliq chegirmasi Oʻzbekiston Respublikasi Soliq kodeksining 396 — 398-moddalarida nazarda tutilgan tartibda davlat soliq xizmati organlariga jismoniy shaxsning jami yillik daromadi toʻgʻrisidagi deklaratsiyani topshirish yoʻli orqali berilishi mumkin. Bunda, soliq chegirmasi Oʻzbekiston Respublikasining professional va oliy taʼlim tashkilotlarida taʼlim olish uchun haqiqatda amalga oshirilgan xarajatlar summasiga, soliq davri uchun koʻrsatilgan jismoniy shaxsning jami yillik daromadi miqdorida beriladi.

17. Soliq chegirmasiga boʻlgan huquqni tasdiqlash uchun jismoniy shaxs quyidagilarni taqdim etadi:

talaba (talabalar) bilan Oʻzbekiston Respublikasining professional yoki oliy taʼlim tashkilotlari oʻrtasida toʻlovli-kontrakt asosida oʻqitish toʻgʻrisida tuzilgan shartnoma (shartnomalar) nusxasi;

tijorat banki bilan taʼlim kreditini olish uchun tuzilgan shartnoma (shartnomalar) nusxasi;

Oʻzbekiston Respublikasining professional va oliy taʼlim tashkilotlari hisob raqamiga (taʼlim kreditini (foizlari bilan) qoplaganda tijorat banki hisob raqamiga) pul mablagʻlarini mustaqil toʻlaganligini tasdiqlovchi hujjatlar nusxasi.

18. Agar soliq chegirmasi summasi jami yillik daromadi toʻgʻrisidagi deklaratsiyani taqdim etgan jismoniy shaxsning jami yillik daromadi summasidan ortiq boʻlsa, qolgan summaga soliq chegirmasi uni olish huquqiga ega boʻlgan boshqa jismoniy shaxslarga beriladi.

Davlat soliq xizmati organlari oʻzlarida mavjud maʼlumotlar va taqdim etilgan hujjatlar asosida mustaqil ravishda soliq chegirmasini olish huquqiga ega boʻlgan boshqa jismoniy shaxslar tomonidan soliq chegirmasi koʻrinishidagi imtiyoz summasi qoʻllanilganligini aniqlaydilar.”;

l) 1 va 2-ilovalar mazkur oʻzgartirish va qoʻshimchalarning 1 va 2-ilovalariga muvofiq tahrirda bayon etilsin.