Respublikada davlatning iqtisodiyotdagi ishtirokini qisqartirish, avtomobil transporti sohasida samarali va raqobatbardosh muhitni shakllantirish, xususiy sektor rolini oshirish, islohotlar jarayonida xususiy kapital ishtiroki uchun kengroq imkoniyatlar yaratish maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Prezidentining “Avtomobil transportini boshqarish tizimini yanada takomillashtirish chora-tadbirlari to‘g‘risida” 2018-yil 6-martdagi PQ-3589-son qaroriga muvofiq Namangan, Qashqadaryo, Samarqand, Toshkent, Surxondaryo va Xorazm viloyatlarida hamda Qoraqalpog‘iston Respublikasida Transport vazirligi huzurida yo‘lovchilarga sifatli avtotransport xizmatlari ko‘rsatish uchun tashkilotlar tashkil qilinganligi va ushbu tashkilotlar istiqbolsiz, zarar bilan ishlayotganligi va ularning rentabelliligi pastligi;

O‘zbekiston Respublikasi Prezidentining “Vaqtinchalik mehnat faoliyatini olib borish uchun respublika hududidan transport orqali chet elga jo‘nab ketish vaqtida O‘zbekiston Respublikasi fuqarolarining xavfsizligini ta’minlash chora-tadbirlari to‘g‘risida” 2018-yil 5-martdagi PQ-3584-son qaroriga muvofiq “O‘zmilliybank” aksiyadorlik jamiyatiga tashkil etilayotgan Avtobusda yo‘lovchilarni xalqaro tashish bo‘yicha ixtisoslashtirilgan kompaniya ustav fondidagi ulushini keyinchalik bozor narxi bo‘yicha boshqa investorga sotish huquqi berilganligi;

O‘zbekiston Respublikasi Prezidentining “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar to‘g‘risida” 2020-yil 27-oktabrdagi PF-6096-son Farmoniga muvofiq davlat unitar korxonalari xo‘jalik jamiyatlariga o‘zgartirilgan holda ularning davlat aksiyalari paketi (ulushi) sotilishiga doir tartib belgilanganligi ma’lumot uchun qabul qilinsin.

2. O‘zbekiston Respublikasi Transport vazirligi, Davlat aktivlarini boshqarish agentligi, Monopoliyaga qarshi kurashish qo‘mitasi, Iqtisodiy taraqqiyot va kambag‘allikni qisqartirish vazirligi va Moliya vazirligining ilovada nazarda tutilgan Transport vazirligi huzuridagi avtomobil transporti sohasidagi korxonalarni mas’uliyati cheklangan jamiyatlarga o‘zgartirgan holda, ulardagi davlat ulushlarini investitsiya va ijtimoiy majburiyatlarni qabul qilish sharti bilan baholangan narxda ommaviy savdolar orqali xususiy sektorga sotish to‘g‘risidagi taklifiga rozilik berilsin.

3. Davlat ulushlari investitsiya va ijtimoiy majburiyatlarni qabul qilish sharti bilan baholangan narxda “E-auksion” elektron savdo platformasida sotiladigan korxonalar ro‘yxati ilovaga muvofiq tasdiqlansin.

4. Davlat ulushlarini sotishda quyidagi investitsiya va ijtimoiy majburiyatlar belgilansin:

ish faoliyatini kamida 5 yil davomida jamoat transporti sohasida amalga oshirish hamda birinchi navbatda qishloq hududlarini tuman va viloyat markazlari bilan bog‘lovchi yo‘nalishlarda faoliyat yuritish;

bir yil muddatda ish faoliyatiga zamonaviy axborot-kommunikatsiya texnologiyalarini (GPS qurilmalari, elektron to‘lov tizimlari) joriy etish.

5. Davlat aktivlarini boshqarish agentligi:

tanlab olingan investorlar bilan tegishli shartnoma tuzilishini hamda qabul qilingan investitsiya va ijtimoiy majburiyatlar bajarilishi yuzasidan monitoring olib borilishini;

investitsiya majburiyatlari belgilangan tartibda to‘liq bajarilgan deb e’tirof etilgandan so‘ng, tashabbuskor investorlarga mazkur obyektlarga nisbatan “tasarruf etish huquqi” bilan mulk huquqini tasdiqlovchi davlat orderi berilishini ta’minlasin.

6. Davlat aktivlarini boshqarish agentligiga auksion savdolari haqida o‘z rasmiy veb-saytlari orqali e’lonlar bergan holda investorlarni jalb qilish bo‘yicha zaruriy choralarni ko‘rish topshirilsin.

8. Transport vazirligi “O‘zmilliybank” AJ bilan birgalikda shaharlararo (viloyatlararo) avtobus yo‘nalishlarida transport xizmatlari sifatini oshirish maqsadida, “Uzautotrans Service” MChJning xalqaro yo‘nalishlarga jalb qilinmayotgan avtobuslari (biriktirilgan yo‘nalishlarini saqlagan holda) faoliyatiga xususiy sektorni jalb qilish choralarini ko‘rsin.

9. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari A.J. Ramatov zimmasiga yuklansin.