Toshkent shahrida qishloq xo‘jaligi mahsulotlarini yetishtirish va mavjud yer maydonlaridan samarali foydalanishda boshqaruv tizimini joriy etish, shuningdek oziq-ovqat mahsulotlari hajmini ko‘paytirish maqsadida:

1. Quyidagilar:

O‘zbekiston Respublikasi Oliy Majlisi Qonunchilik palatasining 2020-yil 8-sentabrdagi 443-IV-son va Senatining 2020-yil 11-sentabrdagi SQ-135-IV-son “Toshkent viloyati Zangiota, Quyichirchiq, Yangiyo‘l va O‘rtachirchiq tumanlarining, Toshkent shahri Sergeli va Bektemir tumanlarining, shuningdek, Toshkent viloyati va Toshkent shahrining chegaralarini o‘zgartirish hamda Toshkent shahri tarkibida Yangihayot tumanini tashkil etish to‘g‘risida”gi qarorlari;

O‘zbekiston Respublikasi Oliy Majlisi Qonunchilik palatasining 2021-yil 16-avgustdagi 1290-IV-son va Senatining 2021-yil 27-avgustdagi SQ-379-IV-son “Toshkent viloyatining Zangiota, Yuqori Chirchiq, O‘rta Chirchiq va Qibray tumanlari hamda Toshkent shahrining Sergeli, Bektemir, Mirzo Ulug‘bek va Yashnobod tumanlarining, shuningdek Toshkent viloyati va Toshkent shahri chegaralarini o‘zgartirish to‘g‘risida”gi qarorlari qabul qilinganligi ma’lumot uchun qabul qilinsin.

2. Shunday tartib o‘rnatilsinki, unga ko‘ra, Toshkent viloyatidan Toshkent shahri Bektemir, Sergeli, Yashnobod, Mirzo Ulug‘bek va Yangihayot tumanlariga o‘tkazilayotgan sug‘oriladigan yer maydonlari, bog‘lar va tokzorlarda (keyingi o‘rinlarda — o‘tkazilayotgan yer maydonlari):

mavjud yer maydonlari va suv resurslaridan samarali foydalanish, mahsulot yetishtirish, qayta ishlash va eksport hajmini oshirish uchun qishloq xo‘jaligi ekinlari yaxlit maydonlarga plantatsiya usulida joylashtiriladi. Bunda, har bir hududning ixtisoslashuvi, tuproq-iqlim sharoiti, yerlarning meliorativ holati, unumdorligi, suv bilan ta’minlanganligini hisobga olib eksportbop va serdaromad qishloq xo‘jaligi mahsulotlarini yetishtirish yo‘lga qo‘yiladi;

aholi ishsizligini kamaytirish maqsadida ajratilayotgan hududlardagi 20 gektardan kam bo‘lmagan yerlarda Qishloq xo‘jaligi vazirligi tomonidan plantatsiya usulida zamonaviy texnologiyalar asosida intensiv bog‘ va tokzorlar barpo etilib, lizing asosida yetti yil muddatga aholiga beriladi.

Bunda, Investitsiyalar va tashqi savdo vazirligi (L. Qudratov) tijorat banklari bilan birgalikda Toshkent shahri Bektemir, Sergeli, Yashnobod, Mirzo Ulug‘bek va Yangihayot tumanlarida amalga oshiriladigan loyihalarni moliyalashtirishda tijorat banklari kreditlari, xalqaro moliya institutlarining kredit liniyalari mablag‘larini jalb etish choralarini ko‘radi.

3. Qishloq xo‘jaligi vazirligi (J. Xodjayev) Toshkent shahar hokimligi (J. Artikxodjayev), Suv xo‘jaligi vazirligi (Sh. Xamrayev), O‘zbekiston fermer, dehqon xo‘jaliklari va tomorqa yer egalari kengashi (A. Xaitov) bilan birgalikda o‘tkazilayotgan yer maydonlarida:

har bir hududning ixtisoslashuvi, tuproq-iqlim sharoiti, yerlarning meliorativ holati, unumdorligi, suv bilan ta’minlanganligini hisobga olib hamda qayta ishlovchi, tayyorlovchi va eksport qiluvchi tashkilotlarning talablaridan kelib chiqqan holda qishloq xo‘jaligi ekinlari to‘liq ekilishini ta’minlash;

qayta ishlash va eksport hajmlarini uch baravarga oshirish uchun qayta ishlash tashkilotlari, muzlatkichli omborxonalar va logistika markazlarini 2021-2022-yillar davomida to‘liq ishga tushirish hamda ularning ishlashini ta’minlash choralarini ko‘rsin.

4. Belgilansinki:

Qishloq xo‘jaligi vazirligi tizimida 10 ta shtat birligidan iborat Toshkent shahar qishloq xo‘jaligi boshqarmasi tashkil etiladi;

o‘tkazilayotgan yer maydonlarida qishloq xo‘jaligi va oziq-ovqat xavfsizligi sohasida qonunchilik hujjatlari talablariga rioya etilishi va ularning ijrosi ustidan nazorat qilish vazifasi Bosh prokuraturaning Agrar va oziq-ovqat sohalarini rivojlantirishga oid qonunchilik ijrosi ustidan nazorat boshqarmasiga yuklatiladi. Bunda, Bosh prokuraturaning mazkur boshqarmasiga qo‘shimcha 2 ta shtat birligi ajratiladi;

Toshkent shahar qishloq xo‘jaligi boshqarmasining va Bosh prokuraturaning shtat birliklari Toshkent viloyati qishloq xo‘jaligi boshqarmasi va Zangiota, O‘rtachirchiq, Yuqorichirchiq hamda Qibray tumanlari qishloq xo‘jaligi bo‘limlarining jami 12 nafar shtat birliklarini qisqartirish hisobiga shakllantiriladi.

5. Toshkent shahar hokimligi Davlat aktivlarini boshqarish agentligi bilan birgalikda bir oy muddatda Toshkent shahar qishloq xo‘jaligi boshqarmasini Toshkent shahri, Chilonzor tumani, Islom Karimov ko‘chasi, 55-uy manzilidagi binoga operativ boshqaruv huquqi asosida joylashtirsin hamda moddiy-texnika vositalari bilan ta’minlasin.

6. Belgilansinki:

ekin maydonlari o‘zboshimchalik bilan egallanishining oldini olish, qishloq xo‘jaligi texnikalari holatini nazorat qilish, mineral o‘g‘itlarning maqsadli ishlatilishini, paxta va g‘alla hosilini yig‘ib olishda jamoat tartibi, yo‘l harakati xavfsizligini ta’minlashga mas’ul bo‘lgan ichki ishlar vazirining o‘rinbosariga mazkur sohadagi faoliyatni amalga oshirish borasida Toshkent shahar ichki ishlar bosh boshqarmasi boshlig‘ining o‘rinbosari — jamoat xavfsizligi xizmati boshlig‘i bo‘ysundiriladi;

Toshkent shahar ichki ishlar bosh boshqarmasida xodimlarning umumiy cheklangan soni doirasida 5 nafar xodimdan iborat bo‘lim tashkil etiladi.

7. Belgilab qo‘yilsinki, o‘tkazilayotgan yer maydonlarida:

yerlardan foydalanishni tashkil etish Qishloq xo‘jaligi vazirligi tomonidan, qishloq xo‘jaligi yerlarini muhofaza qilish sohasida samarali davlat nazorati Vazirlar Mahkamasi huzuridagi Agrosanoat majmui ustidan nazorat qilish inspeksiyasi tomonidan amalga oshiriladi;

Suv xo‘jaligi vazirligi tomonidan qishloq xo‘jaligi ekinlarini yetishtirish uchun kafolatlangan suv bilan ta’minlash choralari ko‘riladi;

fermer xo‘jaliklari va boshqa qishloq xo‘jaligi korxonalarining qishloq xo‘jaligi bo‘yicha barcha ko‘rsatkichlari Toshkent shahrining tegishli tuman statistika bo‘limlari orqali hisobga olinadi;

yer maydonlarini boshqa yer fondi toifasiga o‘tkazish faqat qonunchilikda belgilangan tartibda kompensatsiya to‘lovlari to‘liq undirilgan taqdirda amalga oshiriladi.

9. Toshkent shahar hokimligi (J. Artikxodjayev) Qishloq xo‘jaligi vazirligi (J. Xodjayev), O‘zbekiston fermer, dehqon xo‘jaliklari va tomorqa yer egalari kengashi (A. Xaitov) bilan birgalikda bir oy muddatda:

Bektemir, Sergeli, Yashnobod va Mirzo Ulug‘bek tumanlarida faoliyat yuritayotgan qishloq xo‘jaligi mahsuloti yetishtiruvchilar bilan ularning foydalanuvida bo‘lgan yerlar ijarasi bo‘yicha ijara shartnomasini qayta rasmiylashtirishga amaliy yordam bersin;

yer ijarasi shartnomasi amaldagi yerdan foydalanuvchi bilan ilgari tuzilgan shartnomada ko‘rsatilgan muddatning qolgan qismiga tuzilishini ta’minlasin.

10. Davlat soliq qo‘mitasi huzuridagi Kadastr agentligi Toshkent shahar hokimligi bilan birgalikda uch oy muddatda Toshkent shahriga o‘tkazilgan yer maydonlarini yer fondi toifalari, turlari, yerdan foydalanuvchilar bo‘yicha konturlar kesimida, shuningdek, mavjud barcha bino-inshootlar, qurilmalar, shu jumladan aholining yashash joylarini ularning egalari kesimida qayta xatlovdan o‘tkazsin va xatlov yakunlariga ko‘ra tegishli masshtabdagi xaritalarini yangilasin.

11. Quyidagilarga:

qishloq xo‘jaligi vaziri J. Xodjayev zimmasiga — qishloq xo‘jaligiga mo‘ljallangan yerlardan foydalanishni tashkil etish va muhofaza qilish sohasida samarali davlat nazoratini amalga oshirish yuzasidan;

Toshkent shahar hokimi J. Artikxodjayev zimmasiga — qishloq xo‘jaligi yerlaridan maqsadli va samarali foydalanish hamda ularning boshqa yer fondi toifasiga noqonuniy o‘tkazilishiga yo‘l qo‘ymaslik yuzasidan;

Bektemir, Sergeli, Yashnobod, Mirzo Ulug‘bek va Yangihayot tumanlari hokimlari zimmasiga — tuman hududlariga o‘tkazilgan qishloq xo‘jaligi yerlarida faqat qishloq xo‘jaligi mahsulotlari yetishtiruvchilar bilan shartnomalar tuzilishini ta’minlash yuzasidan javobgarlik yuklatilsin.

12. Bosh prokuratura (Sh. Raximov) Toshkent shahriga o‘tkazilgan, shuningdek, ilgari berilgan yer uchastkalaridan samarali va oqilona foydalanilishi ustidan muntazam ravishda nazorat olib borilishini hamda yer to‘g‘risidagi qonunchilik hujjatlari buzilishi holatlarini sodir etgan shaxslarga nisbatan qat’iy choralar ko‘rilishini ta’minlasin.

14. Toshkent shahar va Toshkent viloyati hokimliklari Qishloq xo‘jaligi vazirligi bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

15. Mazkur qarorning ijrosini samarali tashkil qilishga mas’ul va shaxsiy javobgar etib qishloq xo‘jaligi vaziri J. Xodjayev, Toshkent shahar hokimi J. Artikxodjayev va Toshkent viloyati hokimi vazifasini bajaruvchi Z. Mirzayev belgilansin.

Qaror ijrosini har chorakda muhokama qilib borish, ijro uchun mas’ul idoralar faoliyatini muvofiqlashtirish va nazorat qilish O‘zbekiston Respublikasi Bosh vazirining o‘rinbosari Sh.M. G‘aniyev zimmasiga yuklansin.