O‘zbekiston Respublikasi Konstitutsiyasining 69, 78-moddalariga, “O‘zbekiston Respublikasi Oliy Majlisining Qonunchilik palatasi to‘g‘risida”gi O‘zbekiston Respublikasi Konstitutsiyaviy Qonunining 8-moddasiga hamda “O‘zbekiston Respublikasining ma’muriy-hududiy tuzilishi to‘g‘risida”gi O‘zbekiston Respublikasi Qonunining 18, 23 va 25-moddalariga muvofiq O‘zbekiston Respublikasi Oliy Majlisining Qonunchilik palatasi qaror qiladi:

1. O‘zbekiston Respublikasi Vazirlar Mahkamasining taklifi qabul qilinib:

Toshkent viloyati Zangiota, Quyichirchiq, Yangiyo‘l va O‘rtachirchiq tumanlarining, Toshkent shahri Sergeli va Bektemir tumanlarining, shuningdek Toshkent viloyati va Toshkent shahrining chegaralari o‘zgartirilsin;

Toshkent viloyati Zangiota, Quyichirchiq, Yangiyo‘l va O‘rtachirchiq tumanlarining o‘zgartirilayotgan chegaralari hisobidan Toshkent viloyati hududidan 2 288,4 gektar yer maydoni, shu jumladan Zangiota tumani “Toshkent” mahalla fuqarolar yig‘ini hududi (492,0 gektar), Quyichirchiq tumani “Surum” mahalla fuqarolar yig‘ini hududi (128,7 gektar), Yangiyo‘l tumani “Chortoq” mahalla fuqarolar yig‘ini hududi (264,4 gektar) va O‘rtachirchiq tumani Alisher Navoiy, “Bektemir”, “Jaloir”, “Nurafshon”, “Xo‘ja-Uchqun” mahalla fuqarolar yig‘inlari hududlari hamda “Gulzor” mahalla fuqarolar yig‘ini hududining bir qismi (1 403,3 gektar) Toshkent shahri tarkibiga o‘tkazilsin;

Toshkent viloyatidan Toshkent shahri tarkibiga o‘tkazilgan yer maydoni, shuningdek Toshkent shahrining Sergeli tumani Al-Farg‘oniy, “Viqor”, “Chorbog‘”, “Yorqin hayot”, “Yo‘ldosh”, “Charog‘on”, “Do‘stlik”, “Navqiron”, “Olchazor”, “Tashabbus”, “Yangi umid”, “Yangi Choshtepa”, “Humo” mahalla fuqarolar yig‘inlari hududlari hamda “Daryo bo‘yi”, “Qipchoq”, “Sofdil”, “Past darxon”, “Jo‘nariq”, “Choshtepa” mahalla fuqarolar yig‘inlari hududlarining bir qismi (1 864,2 gektar) va Bektemir tumani “Binokor” mahalla fuqarolar yig‘ini hududi (267,0 gektar) hisobidan Toshkent shahri tarkibida umumiy yer maydoni 4 419,6 gektardan iborat bo‘lgan Yangihayot tumani tashkil etilsin.

2. O‘zbekiston Respublikasi Vazirlar Mahkamasi tomonidan taklif etilgan:

Toshkent shahri tarkibida tashkil etilgan Yangihayot tumani chegaralarining kartografik chizmasi hamda chegaralari chizig‘ining tavsifi tegishincha 1* va 2-ilovalarga* muvofiq;

Toshkent viloyatining Zangiota, Quyichirchiq, Yangiyo‘l va O‘rtachirchiq tumanlari hamda Toshkent shahrining Sergeli va Bektemir tumanlari chegaralarining kartografik chizmasi hamda chegaralari chizig‘ining tavsifi tegishincha 3 — 14-ilovalarga* muvofiq tasdiqlansin.

3. Belgilab qo‘yilsinki, chegarasi o‘zgartirilayotgan Toshkent viloyatining Zangiota tumanidagi saylov okruglaridan (21-O‘zgarish, 22-Xonobod), O‘rtachirchiq tumanidagi saylov okruglaridan (1-Qumovul, 2-Qumovul), Toshkent shahrining Sergeli tumanidagi saylov okruglaridan (9-O‘zar, 11-Xabibiy, 18-Fayzli, 19-Obihayot, 21-Ittifoq, 22-Navqiron, 23-Sofdil, 24-Lutfikor, 25-Qo‘rg‘ontepa), Bektemir tumanidagi saylov okruglaridan (25-Binokor, 26-Sholikor, 27-Sangzor) saylangan xalq deputatlari Zangiota, O‘rtachirchiq, Sergeli va Bektemir tumanlari Kengashlari deputatlari xalq deputatlari Yangihayot tuman Kengashi deputatlari hisoblanadi.

4. O‘zbekiston Respublikasi Vazirlar Mahkamasi ushbu Qarorning ijrosi yuzasidan kompleks chora-tadbirlar amalga oshirilishini ta’minlasin.

5. Mazkur Qaror O‘zbekiston Respublikasi Oliy Majlisining Senatiga yuborilsin.

6. Ushbu Qaror qabul qilingan kundan e’tiboran kuchga kiradi.