Oʻzbekiston Respublikasi Mudofaa vazirligi va Milliy gvardiyasining oliy harbiy taʼlim muassasalarida xorijiy davlatlar harbiy kadrlarini tayyorlash va oʻqitish tizimini joriy etish maqsadida:

1. Oʻzbekiston Respublikasi Mudofaa vazirligi hamda Oliy va oʻrta maxsus taʼlim vazirligining Mudofaa vazirligi oliy harbiy taʼlim muassasalarida (keyingi oʻrinlarda — OHTM):

xorijiy davlatlar harbiy kadrlarini tayyorlash, qayta tayyorlash va malakasini oshirishni (keyingi oʻrinlarda — taʼlim berish) yoʻlga qoʻyish;

umumiy cheklangan shtat birliklari doirasida Xorijiy harbiy kadrlar bilan ishlash boʻlimini tashkil etish toʻgʻrisidagi takliflariga rozilik berilsin.

2. Quyidagilar Xorijiy harbiy kadrlar bilan ishlash boʻlimining asosiy vazifalari etib belgilansin:

xorijiy davlatlar harbiy kadrlarini qabul qilish, tayyorlash va bitiruv tadbirlarini amalga oshirish;

OHTMning ilmiy, oʻquv-tarbiyaviy boʻlinmalariga tarbiyaviy va oʻquv-uslubiy ishlarni tashkil etish, nazorat va monitoring qilishda koʻmaklashish;

xorijiy davlatlar harbiy kadrlarini tayyorlashni tashkil etishning mazmuni, shakllari va texnologiyalarini takomillashtirish maqsadida respublikaning boshqa sohalardagi yetakchi taʼlim muassasalarining tarkibiy boʻlinmalari bilan oʻzaro hamkorlik qilish;

xorijiy davlatlar harbiy kadrlarining Oʻzbekiston sharoitiga moslashishida har tomonlama koʻmaklashish va ular tomonidan Oʻzbekiston Respublikasi qonunchilik hujjatlariga amal qilinishining nazoratini taʼminlash;

xorijiy davlatlar harbiy kadrlari va Oʻzbekiston Respublikasi harbiy xizmatchilari oʻrtasida madaniyatlararo almashinuv boʻyicha tadbirlar, shuningdek, madaniy va maʼnaviy-maʼrifiy ishlarning sifatli oʻtkazilishini muvofiqlashtirish;

xorijiy davlatlar harbiy kadrlari uchun birgalikdagi tadbirlarni oʻtkazish maqsadida Oʻzbekiston Respublikasining sanʼat, madaniyat va sport sohasidagi taniqli namoyandalari va davlat (mahalliy) tashkilotlarining faollarini jalb etgan holda, davlat va jamoat tuzilmalari bilan oʻzaro hamkorlikni tashkil etish;

xorijiy davlatlar harbiy kadrlari vaqtincha yashashi uchun uy-joy ijarasi va madaniy-hordiq tadbirlarini tashkil etish masalalarini hal qilish;

tayyorgarlik natijadorligi, madaniy tadbirlar samaradorligini baholash, madaniyatlararo almashinuvning yangi shakllarini qoʻllash hamda oʻqishning tahlilini oʻtkazish;

boʻlimning moddiy-texnika bazasini mustahkamlash va rivojlantirish ishlarini amalga oshirish.

3. Belgilansinki:

a) OHTMda xorijiy davlatlar harbiy kadrlarining taʼlim olishi xorijiy davlatlarning rasmiy murojaatiga asosan Oʻzbekiston Respublikasi Mudofaa vazirligi tomonidan Oʻzbekiston Respublikasi Prezidenti huzuridagi Xavfsizlik kengashi bilan kelishilgan holda tashkil etiladi;

b) xorijiy davlatlar harbiy kadrlariga taʼlim berish belgilangan tartibda tuziladigan ikki tomonlama xalqaro shartnomalarga muvofiq begʻaraz, imtiyozli hamda toʻlov asosida amalga oshiriladi;

v) Oʻzbekiston Respublikasi mudofaa vaziriga Mudofaa vazirligi boʻlinmalarining (qoʻshinlarining) umumiy cheklangan soni doirasida OHTMning Xorijiy harbiy kadrlar bilan ishlash boʻlimi tashkiliy-shtat tuzilmasiga zaruratga koʻra oʻzgartirish va qoʻshimchalar kiritishga ruxsat beriladi;

g) xorijiy davlatlar harbiy kadrlariga taʼlim berish:

oliy harbiy taʼlimning bakalavriat dasturi boʻyicha kursantlar umumiy cheklangan shtat birliklaridan tashqari ajratiladigan kvotalar doirasida;

magistratura, harbiy internatura, klinik ordinatura va doktorantura dasturi boʻyicha OHTMga ajratilgan kvotalardan tashqari kvotalar doirasida amalga oshiriladi;

d) xorijiy davlatlar harbiy kadrlariga taʼlim berish OHTMning kursantlari, tinglovchilari, doktorantlari uchun belgilangan tartibda amalga oshiriladi;

e) xorijiy davlatlardan harbiy kadrlarning taʼlim olishi uchun Oʻzbekiston Respublikasi Mudofaa vazirligining budjetdan tashqari hisobvaragʻiga kelib tushgan mablagʻlar Mudofaa vazirligining moddiy-texnik bazasini rivojlantirish va mustahkamlash, qurol-yarogʻ, oʻq-dorilar, harbiy-texnik mulkni sotib olish va modernizatsiya qilish, bino va inshootlarni qurish, taʼmirlash hamda rekonstruksiya qilish ishlariga yoʻnaltiriladi.

4. Quyidagilarni nazarda tutuvchi Oʻzbekiston Respublikasi Mudofaa vazirligi va Milliy gvardiyasi oliy harbiy taʼlim muassasalarida xorijiy davlatlar harbiy kadrlarini tayyorlash va oʻqitish tartibi toʻgʻrisidagi nizom ilovaga muvofiq tasdiqlansin:

oliy harbiy taʼlimning bakalavriat, magistratura, harbiy internatura, klinik ordinatura va doktorantura dasturlari boʻyicha xorijiy davlatlar harbiy kadrlarini oʻqitish, qayta tayyorlash va malakasini oshirishni begʻaraz, imtiyozli hamda toʻlov asosida tashkil etish tartibi;

OHTMda xorijiy davlatlar harbiy kadrlariga taʼlim berish, shu jumladan Oʻzbekiston Respublikasi Davlat taʼlim standartlariga hamda Oʻzbekiston Respublikasi qonunchiligiga muvofiq bitiruvchilarning harbiy-kasbiy tayyorgarligining malaka talablari asosida mutaxassislar tayyorlash tartibi;

xorijiy davlatlarning mudofaa sohasidagi vakolatli organlari taqdim etgan soʻrovnomalarga asosan xorijiy davlatlar harbiy kadrlarini oʻqishga qabul qilishni rejalashtirish hamda mutaxassislik va oʻqitish turi boʻyicha har yilgi kvotalarni taqsimlash tartibi;

taʼlim dasturlarini oʻzlashtirgan xorijiy davlatlar harbiy kadrlariga dastlabki “leytenant” va “tibbiy xizmat leytenanti” harbiy unvonlari hamda mutaxassislik boʻyicha diplom va koʻkrak nishonlarini berish tartibi;

xorijiy davlatlar harbiy kadrlarini tayyorlashni moliyalashtirish va ularning tibbiy taʼminoti hamda Oʻzbekiston Respublikasida taʼlim olish davomida xorijiy davlatlar harbiy kadrlarining huquq va majburiyatlari.

5. Oʻzbekiston Respublikasi Mudofaa vazirligi:

oʻz tizimidagi OHTM tomonidan harbiy kadrlarga taʼlim berish tartibi va muddatlari boʻyicha doimiy ravishda tegishli xorijiy davlatlarni xabardor qilib borsin;

xorijiy davlatlar harbiy kadrlariga taʼlim berish uchun yetarli shart-sharoitlarni yaratish maqsadida OHTMning oʻquv va moddiy-texnika bazasini takomillashtirish va modernizatsiya qilish choralarini koʻrsin;

Oliy va oʻrta maxsus taʼlim vazirligi bilan birgalikda ikki oy muddatda manfaatdor vazirlik va idoralarning soha boʻyicha yuqori malakali mutaxassislarini jalb qilgan holda, xorijiy davlatlar harbiy kadrlari uchun oʻzbek tilini oʻrganish boʻyicha oʻquv dasturlarini ishlab chiqsin.

6. Oʻzbekiston Respublikasi Ichki ishlar vazirligi Tashqi ishlar vazirligi bilan birgalikda Mudofaa vazirligi va Milliy gvardiyasi buyurtmasiga binoan xorijiy davlatlar harbiy kadrlariga belgilangan tartibda vizalar berish va ularning muddatini uzaytirish, shuningdek, ularni turgan joyi boʻyicha roʻyxatdan oʻtkazishni va uning muddatini uzaytirishni taʼminlasin.

7. Oʻzbekiston Respublikasi Xalq taʼlim vazirligi Mudofaa vazirligi va Milliy gvardiyasining buyurtmasiga asosan xorijiy davlatlar harbiy kadrlarining farzandlarini yashash manzili (vaqtincha roʻyxatdan oʻtgan joyi) boʻyicha biriktirilgan mikrohududdagi qabul qilish imkoniyati mavjud boʻlgan umumtaʼlim muassasalariga joylashtirish choralarini koʻrsin.

8. Belgilansinki, mazkur qarorni amalga oshirish, shu jumladan xorijiy davlatlarning harbiy kadrlarini tayyorlash bilan bogʻliq tadbirlar:

2021-yilda Oʻzbekiston Respublikasi Mudofaa vazirligiga ajratilgan budjet mablagʻlari doirasida;

2022-yil va kelgusi yillarda tegishlicha Oʻzbekiston Respublikasi Mudofaa vazirligi va Milliy gvardiyasiga har yili ajratiladigan budjet mablagʻlari, budjetdan tashqari mablagʻlar va qonunchilik hujjatlari bilan taqiqlanmagan boshqa manbalar hisobidan moliyalashtiriladi.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

1. Mazkur Nizom Oʻzbekiston Respublikasi Mudofaa vazirligi va Milliy gvardiyasi oliy harbiy taʼlim muassasalarida (keyingi oʻrinlarda — OHTM) xorijiy davlatlar harbiy kadrlarini (keyingi oʻrinlarda — xorijiy harbiy kadrlar) tayyorlash, qayta tayyorlash va ularning malakasini oshirish (keyingi oʻrinlarda — taʼlim berish) tartibini belgilaydi.

2. OHTMda xorijiy harbiy kadrlarga taʼlim berish ikki tomonlama xalqaro shartnomalarga muvofiq amalga oshiriladi.

3. OHTMda xorijiy harbiy kadrlar uchun yillik qabul kvotalari Oʻzbekiston Respublikasi Prezidenti tomonidan belgilanadi.

4. Xorijiy harbiy kadrlarni oʻqishga qabul qilish Oʻzbekiston Respublikasi Mudofaa vazirligi va Milliy gvardiyasiga xorijiy davlatlarning mudofaa va jamoat xavfsizligini taʼminlash sohasidagi vakolatli organlari taqdim etgan murojaatga asosan rejalashtiriladi.

5. Xorijiy davlatlarning mudofaa va jamoat xavfsizligini taʼminlash sohasidagi vakolatli organlarining xorijiy harbiy kadrlar taʼlim olishi uchun murojaat qilish muddati, ularni koʻrib chiqish va oʻqishga qabul qilish toʻgʻrisidagi qaror oʻqish boshlangunga qadar toʻrt oydan kam boʻlmagan muddatda kvotalar miqdorini aniqlashni inobatga olgan holda, Oʻzbekiston Respublikasi Mudofaa vazirligi va Milliy gvardiyasi tomonidan qabul qilinadi.

6. Xorijiy davlatlar kesimidagi har yilgi kvota, mutaxassislik va oʻqitish turi boʻyicha taqsimot Oʻzbekiston Respublikasi Mudofaa vazirligi va Milliy gvardiyasi tomonidan Oʻzbekiston Respublikasi Prezidenti huzuridagi Xavfsizlik kengashi kotibiyati bilan kelishgan holda amalga oshiriladi.

7. Xorijiy harbiy kadrlarga taʼlim berish:

oliy harbiy taʼlimning bakalavriat dasturi boʻyicha kursantlar umumiy cheklangan shtat birliklaridan tashqari ajratiladigan qoʻshimcha kvotalar doirasida;

magistratura, harbiy internatura, klinik ordinatura va doktorantura dasturi boʻyicha OHTMga ajratilgan kvotalardan tashqari qoʻshimcha kvotalar doirasida amalga oshiriladi.

8. OHTMda xorijiy harbiy kadrlarga taʼlim berish xarajatlari quyidagi tartibda qoplanadi:

begʻaraz asosda — taʼlim va taʼminot (kiyim-kechak, oziq-ovqat, pul taʼminoti, kommunal xizmat) xarajatlari Oʻzbekiston Respublikasi Davlat budjetidan ajratilgan pul mablagʻlari hisobidan, oʻqish davri mobaynida turarjoy xarajatlari (bakalavriat dasturi boʻyicha oʻqitiladigan kursantlardan tashqari), oʻquv dasturi boʻyicha amalga oshirilgan uchish soatlari va uchish mashq trenajyorlaridan foydalanganlik (ishlatganlik) uchun xarajatlar yuboruvchi tomonlar hisobidan;

imtiyozli asosda — taʼlim xarajatlari Oʻzbekiston Respublikasi Davlat budjetidan ajratilgan pul mablagʻlari hisobidan, taʼminot (kiyim-kechak, oziq-ovqat, pul taʼminoti, kommunal xizmat), oʻqish davri mobaynida turarjoy xarajatlari (bakalavriat dasturi boʻyicha oʻqitiladigan kursantlardan tashqari), oʻquv dasturi boʻyicha amalga oshirilgan uchish soatlari va uchish mashq trenajyorlaridan foydalanganlik (ishlatganlik) uchun xarajatlar esa yuboruvchi tomonlar hisobidan;

toʻlov asosida — taʼlim va taʼminotning barcha xarajatlari yuboruvchi tomonlar hisobidan.

9. OHTMga xorijiy harbiy kadrlar kirish imtihonlarisiz oʻqishga qabul qilinadi.

10. Xorijiy harbiy kadrlarga taʼlim berish quyidagicha amalga oshiriladi:

oliy harbiy taʼlim darajasiga muvofiq keladigan oliy harbiy taʼlimning bakalavriat dasturi boʻyicha;

oliy harbiy taʼlim darajasiga muvofiq keladigan oliy harbiy taʼlimning magistratura, harbiy internatura, klinik ordinatura dasturi boʻyicha;

magistratura oliy harbiy taʼlim darajasiga muvofiq keladigan oliy harbiy taʼlimning operativ-strategik darajasi dasturi boʻyicha;

oliy taʼlimdan keyingi taʼlim darajasiga muvofiq keluvchi doktorantura dasturi boʻyicha;

tayyorgarlik kurslarining yakka taʼlim va fakultativ dasturlari asosida;

qoʻshimcha kasbiy dasturlar boʻyicha.

11. OHTMda xorijiy harbiy kadrlarga taʼlim berish Oʻzbekiston Respublikasi davlat taʼlim standartlariga hamda Oʻzbekiston Respublikasi qonunchilik hujjatlariga muvofiq, bitiruvchilar harbiy-kasbiy tayyorgarligining malaka talablariga tatbiq etilgan asosiy taʼlim dasturlari asosida amalga oshiriladi.

12. Xorijiy harbiy kadrlarga taʼlim berish oliy harbiy taʼlimning taʼlim dasturlari boʻyicha oʻzbek va rus tilida amalga oshiriladi.

13. OHTM tomonidan xorijiy harbiy kadrlarga mavjud (shartnoma (bitim)larda koʻrsatilgan) mutaxassisliklar boʻyicha taʼlim beriladi.

14. Xorijiy harbiy kadrlarga oʻzbek va rus tilini oʻrgatish OHTMdagi tillar (chet tillar) kafedrasi tomonidan amalga oshiriladi.

15. Xorijiy harbiy kadrlarga til oʻrgatish quyidagi maqsadlarda amalga oshiriladi:

xorijiy harbiy kadrlarni OHTM asosiy kurslarida taʼlim olish uchun yetarli darajada til bilishini taʼminlash;

OHTM tinglovchi va kursantlariga qoʻyilgan talablar va xorijiy harbiy kadrlarning tayyorgarlik darajasi oʻrtasidagi til bilish boʻyicha tafovutni bartaraf etish;

xorijiy harbiy kadrlarga oʻzbek va rus tilida taʼlim berish hamda ularni OHTM mutaxassisligiga muvofiq taʼlim olishga tayyorlash;

xorijiy harbiy kadrlarni oʻzbek madaniyati, urf-odatlari va Oʻzbekiston tarixi bilan yaqindan tanishtirish.

16. Xorijiy harbiy kadrlarni tayyorlash kunduzgi taʼlim shaklida amalga oshiriladi.

17. Talab etilgan hajmdagi taʼlim dasturlarini oʻzlashtirgan xorijiy harbiy kadrlarga dastlabki “leytenant” harbiy unvoni, mutaxassisligi boʻyicha toifa beriladi, belgilangan namunadagi diplom va koʻkrak nishoni taqdim etiladi.

Oʻzbekiston Respublikasi Harbiy xavfsizlik va mudofaa universiteti Harbiy tibbiyot institutining bakalavriat bosqichini tamomlagan xorijiy harbiy kadrlarga dastlabki “tibbiy xizmat leytenanti” harbiy unvoni va “harbiy vrach” mutaxassisligini beradigan davlat namunasidagi diplom va koʻkrak nishonlari taqdim etiladi, harbiy internaturani tamomlagach, navbatdagi “tibbiy xizmat katta leytenanti” harbiy unvoni va tegishli mutaxassisligi boʻyicha guvohnoma beriladi.

Oliy harbiy taʼlimning magistratura darajasiga muvofiq keladigan oliy harbiy taʼlim (operativ-taktik, operativ-strategik darajasi) dasturi boʻyicha talab etilgan hajmdagi taʼlim dasturlarini oʻzlashtirgan xorijiy harbiy kadrlarga tegishli magistr darajasi hamda belgilangan davlat namunasidagi diplom va koʻkrak nishonlari taqdim etiladi.

Koʻkrak nishonlari uchun belgilangan toʻlov xorijiy harbiy kadrlar tomonidan amalga oshiriladi.

Oliy taʼlimdan keyingi taʼlim darajasiga muvofiq keladigan doktorantura dasturini tugatgan va belgilangan tartibda dissertatsiya himoya qilgan xorijiy harbiy kadrlarga tegishli fanlar boʻyicha falsafa doktori (PhD) ilmiy darajasi beriladi.

Qisqa muddatli kurslarni tamomlagan xorijiy harbiy kadrlarga belgilangan namunadagi guvohnomalar (sertifikatlar) beriladi.

18. OHTM xorijiy harbiy kadrlarni begʻaraz, imtiyozli va toʻlov asosida tayyorlash tartibi, ularning pul taʼminoti, moddiy-texnika va boshqa taʼminot turlarining oʻziga xosligi Oʻzbekiston Respublikasining xalqaro harbiy hamkorlik doirasida tuzilgan shartnoma (bitim)lariga muvofiq belgilanadi.

19. Xorijiy harbiy kadrlarga taʼlim berish bilan bogʻliq xarajatlarning yuboruvchi tomon hisobidan toʻlanadigan qismi oʻquv yili boshlanguniga qadar OHTM hisob-kitoblari asosida yuboruvchi tomondan Mudofaa vazirligi va Milliy gvardiyaning budjetdan tashqari hisobvaragʻiga pul oʻtkazish orqali oldindan toʻlanadi.

20. Oʻqishga qabul qilingan vaqtda ofitserlik unvoniga ega boʻlmagan, begʻaraz asosda taʼlim oluvchi xorijiy harbiy kadrlarga “oliy harbiy taʼlim muassasasi kursanti” lavozimi boʻyicha pul taʼminoti toʻlanadi.

21. Oʻqishga qabul qilingan vaqtda ofitserlik unvoniga ega boʻlgan, begʻaraz asosda taʼlim oluvchi xorijiy harbiy kadrlarga, taʼlim olish muddati va kursidan qatʼi nazar:

a) malaka oshirish kurslarida:

“mayor” harbiy unvoni boʻyicha harbiy unvon maoshi;

“motooʻqchi batalyon komandiri” lavozimi va unga tenglashtirilgan lavozimlar boʻyicha lavozim maoshi;

b) oliy harbiy taʼlim darajasiga muvofiq keladigan oliy harbiy taʼlim (magistratura) dasturi boʻyicha:

“podpolkovnik” harbiy unvoni boʻyicha harbiy unvon maoshi;

“motooʻqchi batalyon komandiri” lavozimi va unga tenglashtirilgan lavozimlar boʻyicha lavozim maoshi;

v) magistratura oliy harbiy taʼlim darajasiga muvofiq keluvchi oliy harbiy taʼlim (operativ-strategik darajasi) dasturi, doktorantura dasturi boʻyicha:

“podpolkovnik” harbiy unvoni boʻyicha harbiy unvon maoshi;

“motooʻqchi brigadasi komandiri” lavozimi va unga tenglashtirilgan lavozimlar boʻyicha lavozim maoshi toʻlanadi.

22. Ushbu Nizomning 21-bandida nazarda tutilgan toʻlovlar oʻqishga qabul qilingan kundan boshlab, oʻqishni yakunlagan kunigacha boʻlgan muddatda amalga oshiriladi.

23. Ofitserlik unvoniga ega boʻlmagan xorijiy harbiy kadrlar oʻqish davrida Oʻzbekiston Respublikasi Mudofaa vazirligi va Milliy gvardiyasi harbiy xizmatchilariga belgilangan meʼyorlar asosida oziq-ovqat bilan taʼminlanadi.

Ofitserlik unvoniga ega boʻlgan xorijiy harbiy kadrlarning oʻqish davrida oziq-ovqat taʼminoti oʻz hisobidan amalga oshiriladi.

24. Xorijiy harbiy kadrlarning kiyim-kechak taʼminoti (begʻaraz asosda oʻqitiladigan kursantlardan tashqari) yuboruvchi tomon hisobidan qoplanadi va taʼlim olayotgan OHTM hududlarida oʻz armiyasining kiyim rusumi qoidalarini buzmagan holda kiyib yuradi.

25. Ofitserlik unvoniga ega boʻlgan xorijiy harbiy kadrlar Oʻzbekiston Respublikasi Mudofaa vazirligi va Milliy gvardiyasi harbiy xizmatchilar toifasi uchun nazarda tutilgan meʼyorlar boʻyicha amaliy mashgʻulotlarning alohida turlarini oʻtkazish uchun maxsus kiyim-kechak bilan taʼminlanadilar.

26. Oʻqish davrida xorijiy harbiy kadrlarning turarjoy taʼminoti quyidagicha amalga oshiriladi:

oliy harbiy taʼlim darajasiga muvofiq keladigan oliy harbiy taʼlimning bakalavriat dasturi boʻyicha oʻqish davrida begʻaraz asosda OHTM yotoqxonalarida turarjoy bilan taʼminlanadi. Toʻlov asosida oʻqitiladigan kursantlarning turarjoy xarajatlari yuboruvchi tomon hisobidan qoplanadi;

oliy harbiy taʼlim darajasiga muvofiq keladigan oliy harbiy taʼlimning magistratura, harbiy internatura, klinik ordinatura, doktorantura, malaka oshirish kurslari dasturi boʻyicha oʻqish davrida turarjoy ikkilamchi ijaraga olish yoʻli bilan taʼminlanadi. Bunda ikkilamchi ijaraga olish xarajatlari yuboruvchi tomon hisobidan toʻlanadi.

27. Yuboruvchi tomondan xorijiy harbiy kadrlar oʻqish davrida oʻquv rejalarida belgilangan meʼyorlardan tashqari qoʻshimcha akademik soatlar talab qilinganda, oʻtkazilgan qoʻshimcha darslar uchun amalga oshirilgan sarf-xarajatlar yuboruvchi tomon hisobidan toʻlanadi.

28. Xorijiy harbiy kadrlar uchuvchi mutaxassisligi yoʻnalishida taʼlim olishda havo transportlarini parvozda boshqarish, yerdan koʻtarish, qoʻndirish hamda aeroport inshootlari va uskunalarini yoki foydalanishda boʻlmagan aeroport hududida joylashgan havo transportlarini ishdan chiqarish va mashgʻulotlar jarayonida yoki mashgʻulotdan tashqari vaqtlarda foydalanish natijasida ularga zarar yetkazgan hollarda, ularning javobgarligi toʻgʻrisidagi masalalar xalqaro shartnomalar (bitimlar) va xalqaro huquq normalarida boshqacha qoidalar belgilanmagan boʻlsa, Oʻzbekiston Respublikasi qonunchilik hujjatlariga muvofiq hal etiladi va yetkazilgan zarar yuboruvchi tomon hisobidan qoplanadi.

29. Xorijiy harbiy kadrlarning tibbiy taʼminoti Oʻzbekiston Respublikasi Mudofaa vazirligi va Milliy gvardiyasi harbiy xizmatchilari uchun belgilangan meʼyorlar asosida amalga oshiriladi.

30. Xorijiy harbiy kadrlar oʻquv rejalari va taʼlim dasturlariga muvofiq bir OHTM (harbiy qism)dan boshqasiga yuborilganda va qaytarilayotganda, ularni tashish bilan bogʻliq xarajatlar qabul qiluvchi tomon hisobidan amalga oshiriladi.

Xorijiy harbiy kadrlarning taʼtilda boʻlish davrida doimiy yashash joyiga borishi va qaytishi bilan bogʻliq xarajatlar yuboruvchi tomon hisobidan amalga oshiriladi.

31. Xorijiy harbiy kadrlar quyidagi huquqlarga ega:

OHTM ilmiy-tadqiqot ishlarida (maxfiy grifdagi ilmiy-tadqiqot ishlari bundan mustasno), talabalarning ilmiy jamiyatlari va toʻgaraklarida qatnashish;

OHTM maxfiy boʻlmagan kutubxonalari, sport majmualari, klublari va madaniyat saroylaridan foydalanish;

dam olishning uyushtirilgan turlarida qatnashish.

32. Xorijiy harbiy kadrlar quyidagilarga majbur:

Oʻzbekiston Respublikasi Konstitutsiyasi va boshqa qonunchilik hujjatlariga amal qilish, mahalliy urf-odatlar va anʼanalarga hurmat bilan munosabatda boʻlish, respublikada xorijiy fuqarolarning boʻlishi va harakatlanishi boʻyicha belgilangan qoidalarni bajarish;

harbiy intizomga qatʼiy rioya qilish, mashgʻulotlar va oʻquvlarda qatnashish, oʻquv rejalari va dasturlarida nazarda tutilgan oʻquv ishlarining barcha turlarini bajarish, imtihon va sinovlarni belgilangan muddatlarda topshirish;

OHTM ichki tartib-qoidalariga rioya qilish;

Oʻzbekiston Respublikasi Mudofaa vazirligi, Milliy gvardiyasi, OHTM rahbarlari va komandirlarning koʻrsatma hamda farmoyishlarini bajarish.

33. OHTMda belgilangan ichki tartib-qoidalarga rioya etmagan, oʻquv fani dasturini oʻzlashtirmagan xorijiy harbiy kadrlarga belgilangan tartibda oʻqishdan chetlashtirish choralar koʻrilishi mumkin.

Oʻzbekiston Respublikasi hududida boʻlish qoidalarini buzganlik uchun xorijiy harbiy kadrlar belgilangan tartibda vakolatli davlat organlari tomonidan respublika hududidan chiqarib yuboriladi.

34. Oʻzbekiston Respublikasi hududida jinoyat sodir etgan xorijiy harbiy kadrlar, agar Oʻzbekiston Respublikasining xalqaro shartnomalarida boshqacha qoida nazarda tutilmagan boʻlsa, Oʻzbekiston Respublikasi qonunchilik hujjatlariga asosan javobgarlikka tortiladi.

35. Oʻqishni tugatgan yoki OHTM roʻyxatidan chetlashtirilgan xorijiy harbiy kadrlar Oʻzbekiston Respublikasi qonunchilik hujjatlarida belgilangan muddatlarda Oʻzbekiston Respublikasidan chiqib ketishi shart, Oʻzbekiston Respublikasining xalqaro shartnomalarida, shuningdek, jamoaviy va shaxsiy shartnomalar hamda kontraktlarda nazarda tutilgan holatlar bundan mustasno.

36. Mazkur Nizom talablarini buzishda aybdor deb topilgan shaxslar Oʻzbekiston Respublikasi qonunchilik hujjatlariga muvofiq javobgarlikka tortiladi.