Mamlakatimizda ijtimoiy-iqtisodiy sohani isloh qilish bo‘yicha ishlab chiqilayotgan tashabbuslarning sifatini, olib borilayotgan islohotlar natijadorligini tubdan oshirish, shuningdek, 2022 — 2026-yillarda hududlar, tarmoqlar va sohalarni rivojlantirish bo‘yicha dasturlarni ilmiy asoslangan innovatsion yondashuvlar asosida ishlab chiqish maqsadida:

1. O‘zbekiston Respublikasi Prezidenti Administratsiyasi huzuridagi Iqtisodiy tadqiqotlar va islohotlar markazi (keyingi o‘rinlarda — Markaz) zimmasiga quyidagi qo‘shimcha vazifalar yuklatilsin:

hududlarda ijtimoiy-iqtisodiy rivojlanish jarayonlarini jadallashtirishga qaratilgan dasturlarni ishlab chiqishda mahalliy davlat hokimiyati organlarini ilmiy asoslangan taklif va tavsiyalar bilan doimiy ravishda ta’minlab borish;

joylarda mavjud resurslar bazasini o‘rganish orqali iqtisodiyot tarmoqlarida yangi ishlab chiqarish zanjirlarini yaratish bo‘yicha takliflar ishlab chiqish;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda har chorakda tumanlar kesimida aholi orasida so‘rovlar o‘tkazib borish;

O‘zbekistonning jahon iqtisodiyotiga qo‘shilishi jarayonlarining milliy iqtisodiyotga ta’sirini o‘rganib borish hamda mazkur yo‘nalishlarda ilmiy asoslangan taklif va tavsiyalarni vakolatli idoralarga taqdim etib borish;

sanoatda klasterlar faoliyatini rivojlantirib borish bo‘yicha ilg‘or xalqaro tajribani chuqur tahlil qilish orqali ilmiy asoslangan takliflarni ishlab chiqib, vakolatli idoralarga taqdim etib borish;

zamonaviy axborot texnologiyalari va idoralararo integratsiyalashgan ma’lumotlar bazasidan foydalangan holda mahalliy davlat hokimiyati organlariga dolzarb muammolarni bartaraf etishga qaratilgan biznes tahlillarni taqdim etib borish;

O‘zbekiston Respublikasida olib borilayotgan islohotlarning mazmun va mohiyatini keng jamoatchilikka yetkazib borish.

2. Iqtisodiy taraqqiyot va kambag‘allikni qisqartirish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarining quyidagi takliflariga rozilik berilsin:

a) Markaz tuzilmasida:

Sanoat klasterlari faoliyatini rivojlantirish shu’basi;

IT-texnologiyalarni joriy etish va ma’lumotlar bazasini integratsiyalash shu’basi;

Jamoatchilik bilan aloqalar va marketing shu’basini tashkil etish;

b) Qoraqalpog‘iston Respublikasi, Jizzax, Namangan, Samarqand va Qashqadaryo viloyatlarida Markazning hududiy filiallarini tuzish.

3. Belgilansinki:

Markazning hududiy filiallari yuridik shaxs tashkil etmagan holda tuziladi;

hududiy filiallar xodimlari Markaz direktori tomonidan lavozimga tayinlanadi va lavozimidan ozod etiladi;

hududiy filiallar ilmiy xodimlariga Markaz xodimlari uchun nazarda tutilgan mehnatga haq to‘lash shartlari va tibbiy xizmat ko‘rsatish tartibi tatbiq etiladi.

4. O‘zbekiston Respublikasi Prezidenti Administratsiyasi huzuridagi Iqtisodiy tadqiqotlar va islohotlar markazi tuzilmasi 1-ilovaga muvofiq tasdiqlansin.

5. Shunday tartib o‘rnatilsinki, unga ko‘ra:

Axborot texnologiyalari va kommunikatsiyalarini rivojlantirish vazirligi hamda boshqa davlat organlari va tashkilotlari Markazga hududlarning ijtimoiy-iqtisodiy rivojlanishi holati bo‘yicha mavjud ma’lumotlar bazalaridan foydalanishga ruxsat beradi va hududlar bo‘yicha ma’lumotlar bazasini integratsiyalashga ko‘maklashadi;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Markazning hududiy filiallariga mazkur qaror bilan yuklatilayotgan vazifalarni samarali bajarishlari uchun har tomonlama yordam beradi.

6. Belgilansinki, ushbu qarorni amalga oshirish bilan bog‘liq xarajatlar 2021-yilda Innovatsion rivojlanish vazirligiga davlat ilmiy dasturlari doirasida bajariladigan ilmiy loyihalarni moliyalashtirishga ajratilgan budjet mablag‘lari hisobidan qoplanadi, 2022-yildan esa O‘zbekiston Respublikasi Davlat budjeti parametrlarida nazarda tutiladi.

7. Oliy va o‘rta maxsus ta’lim vazirligi, Davlat aktivlarini boshqarish agentligi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda bir oy muddatda Markazning hududiy filiallari oliy o‘quv yurtlarining binolarida bepul foydalanish huquqi asosida joylashtirilishini ta’minlasin.

8. O‘zbekiston Respublikasi Prezidentining 2019-yil 3-oktabrdagi “Ijtimoiy-iqtisodiy rivojlanishda iqtisodiy tadqiqotlar sifati va rolini oshirish chora-tadbirlari to‘g‘risida”gi PQ-4471-son qaroriga 2-ilovaga muvofiq o‘zgartirishlar kiritilsin.

9. Mazkur qarorning ijrosini nazorat qilish O‘zbekiston Respublikasi Prezidenti Administratsiyasi rahbari Z.Sh. Nizomiddinov va O‘zbekiston Respublikasi Prezidenti maslahatchisi R.A. Gulyamov zimmasiga yuklansin.

1. 9-bandda:

birinchi xatboshi chiqarib tashlansin;

ikkinchi xatboshi birinchi xatboshi deb hisoblansin.

2. Qarorga 1-ilova o‘z kuchini yo‘qotgan deb topilsin.