Sogʻliqni saqlash sohasida Birlashgan Arab Amirliklari bilan hamkorlikni kengaytirish, respublikada ayollar va bolalar uchun zamonaviy, yuqori texnologik hamda ixtisoslashtirilgan tibbiy xizmatlar koʻrsatish tizimini yanada takomillashtirish maqsadida:

1. 2021-yil 26-may kuni Toshkent va Abu-Dabi shaharlarida imzolangan Oʻzbekiston Respublikasi Hukumati bilan Birlashgan Arab Amirliklari Hukumati oʻrtasidagi Xalifa bin Zoid Al Nahayon jamgʻarmasining grant mablagʻlarini Oʻzbekistonga jalb etishda hamkorlik toʻgʻrisidagi bitim (keyingi oʻrinlarda — Bitim) tasdiqlansin.

Investitsiyalar va tashqi savdo vazirligi Bitimni amalga oshirish yuzasidan masʼul vakolatli organ etib belgilansin.

Tashqi ishlar vazirligi Bitimning kuchga kirishi uchun Oʻzbekiston Respublikasi tomonidan zarur boʻlgan davlat ichki tartib-taomillari bajarilganligi toʻgʻrisidagi tegishli bildirishnomani Birlashgan Arab Amirliklari tomoniga yuborsin.

Vazirlar Mahkamasi hamda tegishli vazirlik, idoralar va tashkilotlarning rahbarlari Bitim kuchga kirgandan keyin Oʻzbekiston Respublikasining majburiyatlari bajarilishi ustidan oʻrnatilgan tartibda nazoratni taʼminlasin.

2. Belgilansinki, loyiha doirasida qurilish ishlari yakunlangach, shifoxona oʻrnatilgan tartibda Shayx Xalifa bin Zoid Al Nahayon jamgʻarmasi tomonidan begʻaraz ravishda Oʻzbekiston Respublikasi Sogʻliqni saqlash vazirligi tasarrufiga beriladi.

3. Qoraqalpogʻiston Respublikasi Vazirlar Kengashi (Q.R. Sariyev):

a) loyihani amalga oshirish uchun Nukus shahar tibbiyot birlashmasiga zarur yer uchastkasi ajratilishini taʼminlasin.

Bunda, loyiha doirasida jismoniy va yuridik shaxslarga tegishli boʻlgan koʻchmas mulk obyektlarini buzish hamda mulkdorlarga kompensatsiya toʻlashda qonunchilik hujjatlarida belgilangan tartibga qatʼiy amal qilsin;

b) loyiha maydonining chegaralariga qadar tashqi muhandislik tarmoqlari va transport kommunikatsiyalarini tashkil etish, jumladan elektr energiyasi, gaz va suv taʼminoti, yoʻllar va telekommunikatsiya tarmoqlari boʻyicha ishlarni mahalliy budjet mablagʻlari hisobidan amalga oshirsin.

4. Bitimdagi kelishuvlar ijrosini taʼminlash maqsadida, istisno tariqasida, loyihani amalga oshirishda:

bosh loyiha va bosh pudrat tashkilotlari foyda soligʻi va ijtimoiy soliqdan, ularning xodimlari jismoniy shaxslardan olinadigan daromad soligʻidan ozod qilinsin;

bosh loyiha va bosh pudrat tashkilotlari tomonidan Jamgʻarma uchun amalga oshiriladigan ishlar (xizmatlar, tovarlar)ga nisbatan “nol” (0%) darajali stavkada qoʻshilgan qiymat soligʻi qoʻllanilishi taʼminlansin. Bunda, qoʻshilgan qiymat soligʻi boʻyicha salbiy farqni qaytarish qonunchilikda belgilangan tezlashtirilgan tartibga muvofiq amalga oshiriladi;

import qilingan tovarlar va moddiy boyliklarni majburiy sertifikatlash tartibotlaridan oʻtishdan, bojxona boji, aksiz soligʻi va qoʻshilgan qiymat soligʻidan (bojxona rasmiylashtiruvi yigʻimlari bundan mustasno) ozod qilinsin.

Mazkur bandda nazarda tutilgan soliq va bojxona imtiyozlari Bitim belgilangan tartibda kuchga kirganidan soʻng qoʻllaniladi.

5. Loyihani amalga oshirishda ishtirok etadigan xorijiy mutaxassislarga Investitsiyalar va tashqi savdo vazirligining buyurtmanomalari asosida belgilangan tartibda:

Tashqi ishlar vazirligi (A.X. Kamilov) kirish vizalari rasmiylashtirilishini;

Ichki ishlar vazirligi (P.R. Bobojonov) koʻp martalik vizalar berilishi hamda vaqtinchalik yashash joyi boʻyicha roʻyxatga qoʻyilishi (ularning muddatlari uzaytirilishi)ni taʼminlasin.

6. Mazkur qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosari S.U. Umurzakov zimmasiga yuklansin.