O‘zbekiston Respublikasining “Ta’lim to‘g‘risida”gi Qonuni, O‘zbekiston Respublikasi Prezidentining “O‘zbekiston Respublikasida identifikatsiya ID-kartalarni joriy etish chora-tadbirlari to‘g‘risida” 2020-yil 22-sentabrdagi PF-6065-son va “Aholi va tadbirkorlik subyektlariga davlat xizmatlaridan foydalanishda yanada qulay sharoitlar yaratish, bu borada byurokratik to‘siqlarni qisqartirish bo‘yicha qo‘shimcha chora-tadbirlar to‘g‘risida” 2021-yil 23-martdagi PF-6191-son farmonlari va Vazirlar Mahkamasining “Umumiy o‘rta ta’lim muassasalarida “Tarbiya” fanini bosqichma-bosqich amaliyotga joriy etish chora-tadbirlari to‘g‘risida” 2020-yil 6-iyuldagi 422-son qaroriga muvofiq, buyuraman:

1. O‘zbekiston Respublikasi ichki ishlar vazirining 2018-yil 14-yanvardagi 13-son buyrug‘i (ro‘yxat raqami 2972, 2018-yil 16-fevral) (Qonun hujjatlari ma’lumotlari milliy bazasi, 16.02.2018-y., 10/18/2972/0710-son) bilan tasdiqlangan Xorijiy davlatlar ta’lim muassasalarida o‘qish uchun tanlov o‘tkazish tartibi to‘g‘risidagi nizomga ilovaga muvofiq o‘zgartirishlar kiritilsin.

2. Mazkur buyruq rasmiy e’lon qilingan kundan e’tiboran kuchga kiradi.

1. Muqaddimadan “Kadrlar tayyorlash milliy dasturi to‘g‘risida”gi” degan so‘zlar chiqarib tashlansin.

2. 3-band quyidagi tahrirda bayon etilsin:

“3. Ta’lim muassasalariga yoshi o‘n sakkizdan kichik va yigirma beshdan katta bo‘lmagan, shu jumladan yigirma besh yoshdagi ham, o‘rta, o‘rta-maxsus, boshlang‘ich professional, o‘rta professional yoki o‘rta maxsus professional ma’lumotga ega, O‘zbekiston Respublikasi fuqarolari bo‘lgan O‘zbekiston Respublikasi Ichki ishlar vazirligining akademik litseylari, harbiy akademik litseylar bitiruvchilari, shuningdek ichki ishlar organlarining xodimlari va harbiy xizmatchilari hamda profilaktika (katta) inspektorlarining jamoat tartibini saqlash bo‘yicha yordamchisi lavozimida kamida olti oy ish stajiga ega bo‘lgan shaxslar tanlov asosida o‘qishga yuboriladi.”.

3. 8-bandning birinchi xatboshisi quyidagi tahrirda bayon etilsin:

“8. Ta’lim muassasalariga o‘qishga yuborish bo‘yicha targ‘ibot va dastlabki tanlov bosqichi tadbirlarini tashkil etish hamda amalga oshirish uchun O‘zbekiston Respublikasi Ichki ishlar vazirligining (bundan buyon matnda Vazirlik deb yuritiladi) tegishli tarkibiy tuzilmalari va hududiy bo‘linmalarida (bundan buyon matnda Vazirlikning tegishli bo‘linmalari deb yuritiladi) ishchi guruhlar tuziladi.”.

4. 18-bandning ikkinchi — beshinchi xatboshilari chiqarib tashlansin.

5. 19-band quyidagi tahrirda bayon etilsin:

“19. Ichki ishlar organlari xodimlarining bildirgisiga quyidagi hujjatlar ilova qilinadi:

qo‘lda va kompyuterda yozilgan tarjimai hol;

anketa (so‘rovnoma).

Xodimlar tomonidan bildirgi, tarjimayi holva anketa (so‘rovnoma) ta’lim muassasasida o‘qitiladigan tilda yoziladi.”.

6. 51-band quyidagi tahrirda bayon etilsin:

“51. Yakka tartibdagi yakuniy suhbatning asosiy maqsadi huquqshunoslik, O‘zbekiston tarixi va tarbiya fanlari bo‘yicha nomzodlarning bilimlarini har tomonlama va xolisona baholashdan iborat.”.

7. 13-ilova mazkur o‘zgartirishlarning ilovasiga muvofiq tahrirda bayon etilsin.

1. Yakka tartibdagi yakuniy suhbat huquqshunoslik, O‘zbekiston tarixi va tarbiya fanlari bo‘yicha nomzodlarning bilimlarini har tomonlama va xolisona baholash maqsadida og‘zaki savol-javob tarzida o‘tkaziladi.

2. Yakka tartibdagi yakuniy suhbat kollegiallik prinsipi asosida Qabul komissiyasi tomonidan o‘tkaziladi.

3. Nomzodlarga beriladigan savollar Qabul komissiyasi a’zolari, shuningdek huquqshunoslik, O‘zbekiston tarixi va tarbiya fanlari bo‘yicha malakali mutaxassislar tomonidan tuziladi va savollar bo‘yicha bilet variantlari 1-iyun kuniga qadar tayyorlanadi hamda Qabul komissiyasi raisi tomonidan tasdiqlanadi.

Biletlarda savollarning takrorlanishiga yo‘l qo‘yilmaydi.

4. Yakka tartibdagi yakuniy suhbat davomida nomzodni baholashda uning savol mazmuni va mohiyatini ochib berishi, javobni mantiqan va ketma-ketlikda izchil ifodalashi, mustaqil va ijodiy fikrlashi hamda savolni yoritishda ishonchli dalillar yoki normativ-huquqiy hujjatlarga havola qilishi inobatga olinadi.

5. Qabul komissiya raisi tomonidan tasdiqlangan savollar ro‘yxati va bilet variantlari komissiya mas’ul kotibining seyfida saqlanadi. Mas’ul kotib savollar ro‘yxati va bilet variantlari oshkor qilinmasligi uchun javobgar hisoblanadi.

6. Nomzod yakka tartibdagi yakuniy suhbatga pasporti (identifikatsiya ID-kartasi) bilan kelishi shart.

7. Nomzodlar yakka tartibdagi yakuniy suhbatdan o‘tish uchun auditoriyaga Qabul komissiyasi raisi tomonidan tasdiqlangan ro‘yxat bo‘yicha ketma-ketlikda shaxsini tasdiqlovchi hujjatini ko‘rsatgan holda kiritiladi.

8. Yakka tartibdagi yakuniy suhbatda nomzod ixtiyoriy ravishda tanlab olgan 3 ta savoldan iborat biletdagi savollarga javob beradi.

Biletdagi:

birinchi savol — huquqshunoslik fani;

ikkinchi savol — O‘zbekiston tarixi fani;

uchinchi savol — tarbiya fanlaridan iborat bo‘ladi.

9. Nomzodlarga huquqshunoslik, O‘zbekiston tarixi va tarbiya fanlaridan beriladigan savollar mazmuni umumiy o‘rta, o‘rta maxsus, boshlang‘ich professional, o‘rta professional, o‘rta maxsus professional ta’lim fanlarining o‘quv dasturlariga muvofiq ishlab chiqiladi.

10. Nomzod biletlardan birini tanlab olgach, savollarga tayyorgarlik ko‘rishi uchun 20 daqiqa vaqt beriladi. Agar nomzod xohlasa tayyorgarlik ko‘rmasdan javob berishiga ruxsat beriladi.

11. Nomzodlarga tayyorgarlik ko‘rishlari uchun Qabul komissiyasi xonasiga tutash bo‘lgan alohida auditoriya ajratiladi. Unga 5 nafar nomzod kiritilib, tayyorgarlik ko‘rish jarayoni komissiya kotibi tomonidan nazorat qilinadi.

12. Nomzodning savollarga javobi eshitilgandan so‘ng komissiyaning har bir a’zosi unga o‘z bahosini qo‘yadi. Qo‘yilgan barcha ballar umumlashtirilib, nomzodning o‘rtacha arifmetik balli aniqlanadi.

13. Nomzodning savollarga bergan javoblari quyidagi 4 ta mezonlar bo‘yicha baholanadi:

savolning mazmun va mohiyatini ochib berishi;

savolga javobni mantiqan va ketma-ketlikda izchil ifodalashi;

savolni yoritishda mustaqil va ijodiy fikrlashi;

savolni yoritishda ishonchli dalillar yoki normativ hujjatlarga havola qilishi.

14. Har bir mezon 5 ta baholash darajasiga ega:

maksimal;

yaxshi;

o‘rta;

past;

qoniqarsiz.

Nomzodning har bir savolga bergan javobi to‘rtta mezon bo‘yicha beshta baholash darajasiga ko‘ra foiz hisobida baholanadi va arifmetik hisoblash orqali savol uchun o‘rtacha ball qo‘yiladi.

15. Yakka tartibdagi yakuniy suhbat natijasi 100 ballik tizimda quyidagicha baholanadi:

birinchi savol uchun — maksimal 40 ball;

ikkinchi savol uchun — maksimal 30 ball;

uchinchi savol uchun — maksimal 30 ball.

16. Nomzodning har bir savol bo‘yicha bergan javobi quyidagi formulaga muvofiq hisoblanadi:

A — savol bo‘yicha to‘plangan ball;

B — savol bo‘yicha maksimal ball;

C — savol bo‘yicha to‘plangan foiz.

17. Qabul komissiyasi a’zolari tomonidan qo‘yilgan baholar muhokama qilinib, har bir nomzodga yakka tartibdagi yakuniy suhbat natijalari bo‘yicha o‘rtacha arifmetik ball qo‘yiladi.

18. Yakka tartibdagi suhbatga belgilangan sana va vaqtda kelmagan nomzodlarga boshqa sana va vaqtda yakka tartibdagi suhbatda ishtirok etish uchun ruxsat berilmaydi.

19. Har bir nomzodning yakka tartibdagi yakuniy suhbat natijalari mazkur metodikaning ilovasiga muvofiq shakldagi qaydnoma bilan rasmiylashtiriladi.

20. Mazkur qaydnoma qabul komissiyasi a’zolari tomonidan imzolanadi va mas’ul kotibga topshiriladi.