Oʻzbekiston Respublikasi Vazirlar Mahkamasining “Bozor islohotlari talablarini hisobga olgan holda qishloq yoshlari kasb-hunar taʼlimining yoʻnalishini oʻzgartirish chora-tadbirlari toʻgʻrisida” 1995-yil 29-iyuldagi 296-son qarorini bajarish maqsadida Vazirlar Mahkamasi qaror qiladi:

1. Quyidagilar tasdiqlansin:

kasb-hunar maktabi toʻgʻrisidagi nizom 1-ilovaga muvofiq;

kasb-hunar litseyi toʻgʻrisidagi nizom 2-ilovaga muvofiq;

biznes-maktab toʻgʻrisidagi nizom 3-ilovaga muvofiq.

2. Oʻzbekiston Respublikasi Xalq taʼlimi vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, oʻziga qarashli oʻquv yurtlariga ega boʻlgan vazirliklar va idoralar:

ikki oy muddatda taʼlim toʻgʻrisidagi idoraviy normativ hujjatlarni mazkur qarorga muvofiqlashtirsinlar;

1996-97 oʻquv yilida tasdiqlangan nizomlarni roʻyobga chiqarishga doir zarur tashkiliy tadbirlarni amalga oshirsinlar.

3. Mazkur qarorning bajarilishini nazorat qilish Taʼlim va fan boʻlimiga yuklansin.

1. Kasb-hunar maktabi yoshlarga kasb-hunar taʼlimi berishni amalga oshiruvchi oʻquv yurti hisoblanadi.

2. Kasb-hunar maktabi oʻz faoliyatini Oʻzbekiston Respublikasi Konstitutsiyasi, “Taʼlim toʻgʻrisida”gi Qonun, mazkur Nizom hamda taʼlim organlarida roʻyxatga olingan Ustavga muvofiq amalga oshiradi.

3. Kasb-hunar maktabiga oʻquv-uslubiy rahbarlikni, uning kimga boʻysunishidan qatʼi nazar, xalq taʼlimi organlari amalga oshiradilar.

4. Kasb-hunar maktabi bazaviy maktablarning bitiruvchilari (9-sinflar), shuningdek, oʻrta maktablarning bitiruvchilari hisobidan butlanadi. Oʻqish muddati — 1, 2, 3 yil.

5. Kasb-hunar maktabini attestatsiya qilish Vazirlar Mahkamasi tomonidan va Xalq taʼlimi vazirligining tegishli normativ hujjatlari bilan belgilangan tartibda amalga oshiriladi.

6. Kasb-hunar maktabi yuridik shaxs hisoblanadi, bank muassasalarida hisob-kitob hamda boshqa schyotlarga, Davlat gerbi tasvirlangan hamda oʻz nomi yozilgan muhrga ega boʻladi.

1. Boʻlajak yosh ishchi va mutaxassislarni, shu jumladan shartnoma asosida kasb-hunarga tayyorlashning yuqori sifatli boʻlishini taʼminlash kasb-hunar maktabi faoliyatining maqsadi hisoblanadi.

2. Kasb-hunar maktabining vazifalari:

oʻquvchilarda kasb-hunar bilimlari, oʻquvlari va koʻnikmalarini shakllantirish;

bozor iqtisodiyoti sharoitlarida oʻquvchilarni faol mehnat faoliyatiga tayyorlash;

oʻquvchilarga kasb-hunar taʼlimi berish bilan bir qatorda umumiy oʻrta taʼlim olish uchun imkoniyatlar yaratish;

korxonalar va tashkilotlarning ishchilar va mutaxassislar tayyorlash hamda ularning malakasini oshirishga boʻlgan talablarini qondirish.

1. Kasb-hunar maktabida oʻquvchilarni oʻqitish, qayta tayyorlash va ularning malakasini oshirish Davlat kasblari klassifikatori asosida amalga oshiriladi.

2. Ishlab chiqarish taʼlimi hamda ishlab chiqarish amaliyoti oʻquv-ishlab chiqarish ustaxonalarida, laboratoriyalarda, poligonlarda, kasb-hunar maktabining oʻquv xoʻjaliklarida, shuningdek, tuzilgan shartnomalarga koʻra korxonalarda amalga oshiriladi.

3. Kasb-hunar maktablarida oʻquv-tarbiya jarayoni davlat taʼlim standartlariga muvofiq amalga oshiriladi. Oʻqitish usullari oʻqituvchilar hamda ishlab chiqarish taʼlimi ustalari tomonidan belgilanadi.

1. Kasb-hunar maktablariga oʻquvchilar qabul qilish Oʻzbekiston Respublikasi Xalq taʼlimi vazirligi tomonidan tasdiqlangan qabul qilish qoidalariga muvofiq amalga oshiriladi.

2. Oʻquvchilar tomonidan ishlab chiqarish taʼlimi hamda ishlab chiqarish amaliyoti davrida bajarilgan ishlarga tegishli malaka darajasidagi ishchilarning oylik maoshlariga belgilangan koeffitsiyentlar, qoʻshimcha toʻlovlar va ustamalar hisobga olingan holda amaldagi meʼyorlar, narxlar, stavkalar (maoshlar) boʻyicha haq toʻlanadi.

3. Kasb-hunar maktabi oʻquvchilari maktab jamoasining aʼzolari hisoblanadilar, oʻquv, tarbiya hamda ishlab chiqarish vazifalarini hal qilishda, boʻsh vaqt va dam olishlarni tashkil etishda ishtirok etadilar.

4. Oʻquvchilarning qonunchilik bilan belgilangan oʻqish, mehnat qilish va dam olish shartlariga rioya qilinishiga taʼlim muassasasining rahbariyati javob beradi.

1. Kasb-hunar maktablariga pedagog xodimlar sifatida ishlashga tegishli maʼlumot, kasb-hunar tayyorgarligiga ega boʻlgan shaxslar qoʻyiladilar.

2. Kasb-hunar maktabining pedagog xodimlari:

maktab faoliyatining eng muhim masalalarini muhokama qilish va hal qilishda ishtirok etish;

mashgʻulotlarni olib borish shakli, oʻquvchilarni oʻqitish va tarbiyalash vositalari hamda usullarini mustaqil belgilash;

oʻquv-tarbiya hamda uslubiy ishlarni takomillashtirishga oid takliflar ishlab chiqish va kiritish huquqiga ega boʻladilar.

3. Kasb-hunar maktabi pedagog xodimlarining burchlari:

oʻquv va uslubiy ishlarni yuqori kasb-hunar darajasida olib borish, taʼlim mazmunini takomillashtirishda faol ishtirok etish;

oʻquvchilar, jamoat tashkilotlari bilan oʻzaro munosabatlarni hamkorlikning demokratik asoslarida qurish, oʻquvchilarning oʻzini-oʻzi boshqaruvini rivojlantirishga koʻmaklashish;

oʻz nazariy bilim darajalarini, pedagogik mahoratlarini hamda kasb-hunar malakalarini tinimsiz oshirib borish;

oʻquvchilarning ota-onalari va ular oʻrnini bosuvchi shaxslar bilan muntazam ish olib borish.

1. Kasb-hunar maktabini boshqarish mazkur Nizom va Maktab ustaviga muvofiq amalga oshiriladi. Kasb-hunar maktabining butun faoliyatini bevosita boshqarishni uning direktori amalga oshiradi. Direktor oʻquv yurti bevosita boʻysunadigan organ tomonidan tayinlanadi.

2. Kasb-hunar maktabining pedagogik kengashi toʻgʻrisidagi Nizomga muvofiq tashkil etiladigan va ishlaydigan pedagogik kengash kasb-hunar maktabi boshqaruvining hayʼat organi hisoblanadi.

3. Tuzilma boʻlinmalarining tarkibi, ularning funksiyalari va vazifalari kasb-hunar maktabining ustavi bilan belgilanadi.

1. Kasb-hunar maktabining moliyaviy faoliyati davlat budjeti mablagʻlari hisobidan amalga oshiriladi. Bundan tashqari budjetdan tashqari mablagʻlar tushumlari, jumladan:

shartnomalar boʻyicha ishchi va mutaxassislarni tayyorlash, qayta tayyorlash hamda ularning malakasini oshirish uchun xarajatlarni qoplash tartibida tushadigan mablagʻlar;

belgilangan tartibda ajratiladigan va toʻlanadigan banklarning kreditlari;

kasb-hunar maktabining ishlab chiqarish faoliyati, pulli xizmatlar koʻrsatish va boshqa xoʻjalik hisobidagi faoliyatdan tushadigan mablagʻlar;

mulkchilik shakllaridan qatʼi nazar, korxonalar, tashkilotlardan, jamoat tashkilotlari, xususiy shaxslar, hokimliklardan tushadigan ixtiyoriy tushumlar ham boʻlishi mumkin.

2. Mablagʻlarni sarflash va ulardan foydalanish Oʻzbekiston Respublikasi Moliya vazirligi, Mehnat va aholini ijtimoiy muhofaza qilish vazirligi va boshqa tegishli organlarning “Taʼlim toʻgʻrisida”gi Oʻzbekiston Respublikasining Qonuni qoidalari hisobga olingan holda amaldagi yoʻriqnoma hujjatlariga muvofiq amalga oshiriladi.

Kasb-hunar maktabi Oʻzbekiston Respublikasi Vazirlar Mahkamasi bilan kelishilgan holda Xalq taʼlimi vazirligi tomonidan tashkil etiladi va tugatiladi.

Kasb-hunar litseyi malakali ishchilar va mutaxassislar tayyorlashning yuqori darajasini taʼminlovchi uzluksiz taʼlim tizimidagi integratsiyalashgan turdagi oʻquv muassasasi hisoblanadi.

Kasb-hunar litseyi oʻz faoliyatini Oʻzbekiston Respublikasi Konstitutsiyasiga, “Taʼlim toʻgʻrisida”gi Qonunga, mazkur Nizomga va taʼlim organlarida roʻyxatdan oʻtkazilgan Ustavga muvofiq amalga oshiradi.

Kasb-hunar litseyida kasbga oʻrgatishning ikki bosqichi nazarda tutiladi:

1-bosqich — oʻquvchilarning oʻrta maʼlumot olishlari va ishchi kasbini egallashlari. 1-bosqichni oʻquvchilar bilan butlash bazaviy maktablarning bitiruvchilari hisobidan tanlov asosida amalga oshiriladi;

2-bosqich — 1-bosqichdagi kasb tayyorgarligi yoki kasb boʻyicha oshirilgan ishchi malakasi ixtisosiga koʻra oʻrta boʻgʻin mutaxassisi malakasini egallash.

Oʻzbekiston Respublikasi Oliy va oʻrta maxsus taʼlim vazirligi hamda Xalq taʼlimi vazirligining attestatsiyasidan oʻtgan va akkreditatsiya qilingan hamda maqomiga koʻra oʻrta maxsus oʻquv muassasalariga tenglashtirilgan kasb-hunar litseylariga belgilangan tartibda ikkinchi bosqich boʻyicha oʻrta boʻgʻin mutaxassislarini tayyorlash huquqi beriladi.

Kasb-hunar litseyining ikkinchi bosqichiga qabul birinchi bosqich bitiruvchilari hisobidan belgilangan tartibda test sinovlari asosida amalga oshiriladi.

Mutaxassislarni tayyorlashni tashkil etishda kasb-hunar litseyi Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligining normativ hujjatlariga amal qiladi.

Kasb-hunar litseyi yuridik shaxs hisoblanadi, bank muassasalarida hisob-kitob va boshqa schyotlarga, Davlat gerbi tasvirlangan va oʻz nomi yozilgan muhrga ega boʻladi.

1. Yoshlarda texnika, texnologiyalar doimo yangilanib, mehnatni tashkil etish takomillashib borayotgan sharoitlarda tezda moslashishga, bozor munosabatlari sharoitida hayot faoliyatiga tayyor turishga koʻmak beruvchi kasbiy oʻquv va koʻnikmalarni shakllantirish kasb-hunar litseyi faoliyatining maqsadi hisoblanadi.

2. Kasb-hunar litseyi faoliyatining vazifalari va yoʻnalishlari quyidagilar hisoblanadi:

kasb-hunar litseyidagi oʻqitishning har bir bosqichi tugal boʻlishi hisobiga oʻquvchilarning qobiliyatlariga muvofiq turli darajalarda kasbiy va umumiy taʼlim olish uchun ularga imkoniyatlar yaratish;

davlat taʼlim standartlariga muvofiq har xil ixtisoslikdagi ishchilar va mutaxassislarni tayyorlash.

1. Kasb-hunar litseyida oʻquvchilarni tayyorlash mutaxassislar va kasblarning amaldagi roʻyxatiga koʻra ishchilar va mutaxassislar kasblari boʻyicha amalga oshiriladi.

2. Kasb-hunar litseyida oʻquvchilarni oʻqitish belgilangan tartibda ishlab chiqilgan va tasdiqlangan oʻquv rejalari va dasturlariga muvofiq olib boriladi.

3. Oʻqish tamom boʻlgandan soʻng oʻqitishning toʻliq kursini oʻtgan, fanlar boʻyicha ijobiy yakuniy baholarga ega boʻlgan kasb-hunar litseyining oʻquvchilari bitirish malaka imtihonlarini topshiradilar yoki diplom loyihasini himoya qiladilar. Imtihonlarni muvaffaqiyatli topshirgan yoki loyihani muvaffaqiyatli himoya qilgan bitiruvchilarga tegishli malaka beriladi va taʼlim darajasiga muvofiq belgilangan namunadagi diplom (sertifikat) topshiriladi.

1. Kasb-hunar litseyining oʻquvchilari oʻquv-mehnat jamoasining toʻla huquqli aʼzolari hisoblanadilar, kasb-hunar litseyining Ustavida va mazkur Nizomda nazarda tutilgan oʻquv, tarbiya va ishlab chiqarish vazifalarini hal etishda bevosita ishtirok etadilar.

2. Kasb-hunar litseyi oʻquvchilariga kasb-hunar oʻquv muassasalari oʻquvchilari uchun Oʻzbekiston Respublikasining amaldagi qonunlari bilan nazarda tutilgan moddiy taʼminlash shart-sharoitlari joriy etiladi.

1. Pedagogik xodimlarni kasb-hunar litseyiga ishga qabul qilish va ishdan boʻshatish Oʻzbekiston Respublikasi qonunchiligiga muvofiq uning direktori tomonidan amalga oshiriladi.

2. Oʻqituvchilar, ishlab chiqarish taʼlimi ustalari va tarbiyachilarning funksional majburiyatlari Oʻzbekiston Respublikasi Xalq taʼlimi vazirligi tomonidan tasdiqlangan malaka tavsifnomasi bilan, shuningdek, litsey Ustavi va kontrakt shartlari bilan belgilanadi.

3. Kasb-hunar litseyining pedagog xodimlariga Moliya vazirligi va Xalq taʼlimi vazirligining amaldagi normativ hujjatlariga koʻra mehnatga haq toʻlash shartlari joriy etiladi.

1. Kasb-hunar litseyini boshqarish mazkur Nizom va litsey ustaviga muvofiq amalga oshiriladi. Kasb-hunar litseyining butun faoliyatiga bevosita rahbarlikni uning direktori amalga oshiradi. Direktor Xalq taʼlimi vazirligi bilan kelishilgan holda, oʻquv muassasasi boʻysunadigan organ tomonidan tayinlanadi.

2. Kasb-hunar litseyining pedagogik kengashi toʻgʻrisidagi Nizomga muvofiq tashkil etilgan va ish koʻradigan pedagogik kengash Kasb-hunar litseyini boshqarishning hayʼat organi hisoblanadi.

3. Tuzilmaviy boʻlinmalarning tarkibi, ularning funksiyalari va vazifalari kasb-hunar litseyining ustavi bilan belgilanadi.

1. Kasb-hunar litseyining moliyaviy faoliyati davlat budjeti mablagʻlari hisobidan amalga oshiriladi. Bundan tashqari, budjetdan tashqari mablagʻlar tushumlari, jumladan:

ishchilar va mutaxassislarni tayyorlash, qayta tayyorlash hamda ularning malakasini oshirish uchun xarajatlar oʻrnini toʻldirish tartibidagi shartnomalar boʻyicha mablagʻlar tushumi;

belgilangan tartibda ajratiladigan va toʻlanadigan banklarning kreditlari;

ishlab chiqarish faoliyatidan, pulli xizmatlar koʻrsatish va boshqa xoʻjalik hisobidagi faoliyatidan tushadigan mablagʻlar;

mulkchilik shakllaridan qatʼi nazar, korxonalar, tashkilotlardan, jamoat tashkilotlari, xususiy shaxslardan tushadigan ixtiyoriy tushumlar ham boʻlishi mumkin.

2. Mablagʻlarni sarflash Moliya vazirligi, Mehnat va aholini ijtimoiy muhofaza qilish vazirligi, Xalq taʼlimi vazirligi va Oliy va oʻrta maxsus taʼlim vazirligining amaldagi yoʻl-yoʻriq koʻrsatuvchi hujjatlariga muvofiq amalga oshiriladi.

Kasb-hunar litseyi Oʻzbekiston Respublikasi Vazirlar Mahkamasi bilan kelishilgan holda Xalq taʼlimi vazirligi tomonidan tashkil etiladi va tugatiladi.

1. Biznes-maktab kichik biznesning, fermer xoʻjaliklarining menejment, marketing, xoʻjalik huquqi, moliyani boshqarish, buxgalterlik hisobi va audit asoslarini, amaliy tadbirkorlik faoliyati uchun zarur boʻlgan bilimlar va koʻnikmalarni yetarli hajmlarda egallagan tashkilotchilarini tayyorlaydi.

2. Biznes-maktab oʻz faoliyatini Oʻzbekiston Respublikasi Konstitutsiyasiga, “Taʼlim toʻgʻrisida”gi Qonunga, mazkur Nizomga va taʼlim organlarida roʻyxatdan oʻtkazilgan ustavga muvofiq amalga oshiradi.

3. Biznes-maktabga tegishli darajadagi kasb-hunar oʻquv yurtlari uchun nazarda tutilgan barcha imtiyozlar joriy etiladi.

4. Biznes-maktab yuridik shaxs hisoblanadi, mustaqil balansga, banklarda hisob-kitob, valyuta va boshqa schyotlarga, Davlat gerbi tasvirlangan va oʻz nomi yozilgan muhrga ega boʻladi.

1. Kichik biznes sohasida yoshlarda faol tadbirkorlik faoliyati uquvi va koʻnikmalarini shakllantirish, bozor iqtisodiyoti sharoitlarida biznes bilan shugʻullanish uchun zarur boʻlgan kasblar va mutaxassisliklarga ega boʻlish imkoniyatlarini taʼminlash asosida yoshlarning ijtimoiy himoya qilinishi funksiyasini amalga oshirish biznes-maktab faoliyatining maqsadi hisoblanadi.

2. Quyidagilar biznes-maktabning vazifalari va faoliyati yoʻnalishlari hisoblanadi:

davlat taʼlim standartlariga muvofiq kichik biznesni tashkil etish va olib borish sohasida malakali mutaxassislar tayyorlash;

fermer xoʻjaliklari, firmalar, kompaniyalar, korxonalar, muassasalarga va alohida tadbirkorlarga biznesni tashkil etish yuzasidan maslahat xizmatlari koʻrsatish;

mintaqada tadbirkorlikni, kichik biznesni rivojlantirish uchun biznes-laboratoriyalar, inkubatorlar va shunga oʻxshash muassasalarni tashkil etish;

tadbirkorlik sohasida band boʻlgan amaliyotchi xodimlar uchun tayyorlov, qayta tayyorlov va malaka oshirish kurslari tashkil etish.

3. Biznes-maktab uning asosiy funksiyalarini muvaffaqiyatli amalga oshirishga koʻmaklashuvchi va qonun hujjatlari bilan taqiqlanmagan istalgan boshqa faoliyat bilan shugʻullanishga haqlidir.

1. Biznes-maktabda oʻqitish ishlari belgilangan tartibda ishlab chiqiladigan va tasdiqlanadigan oʻquv rejalari va dasturlariga muvofiq amalga oshiriladi.

2. Oʻqish tamom boʻlgandan keyin biznes-maktabning oʻqitishning toʻliq kursini tamomlagan va fanlar boʻyicha yakuniy ijobiy baholarga ega boʻlgan oʻquvchilari bitiruv malaka imtihonlari topshiradilar yoki ishlab chiqilgan biznes-rejalarni himoya qiladilar.

Imtihonlarni muvaffaqiyatli topshirgan yoki loyihalarni muvaffaqiyatli himoya qilgan bitiruvchilarga tegishli malaka beriladi va taʼlimning tegishli darajasining belgilangan namunadagi diplomi (sertifikati) topshiriladi.

1. Biznes-maktabga oʻquvchilar qabul qilish biznes-maktabning ustaviga muvofiq amalga oshiriladi.

2. Biznes-maktab oʻquvchilariga Oʻzbekiston Respublikasining amaldagi qonun hujjatlari bilan tegishli oʻquv yurtlarining oʻquvchilari uchun nazarda tutilgan moddiy taʼminot shartlari joriy etiladi.

3. Oʻquvchilar:

biznes-maktabning oʻquv-moddiy bazasidan foydalanish;

biznes-maktabning tadbirkorlik faoliyatida qatnashish;

biznes-maktabning faoliyatini, oʻquvchilar tarkibini yaxshilash yuzasidan takliflar kiritish huquqiga ega boʻladilar.

4. Biznes-maktab oʻquvchilari:

Oʻzbekiston Respublikasining qonun hujjatlariga;

axloq va etika normalariga, biznes-maktabning ustavi va ichki tartib-qoidalariga rioya qilishga;

fanga asos boʻluvchi bilimlarni muntazam va teran egallashga, oʻz qobiliyatlarini rivojlantirishga, oʻz bilimlarini mustaqil boyitib borish uquvini ishlab chiqishga va ularni amaliyotda qoʻllashga majburdirlar.

1. Biznes-maktabda oʻqituvchi sifatida ishlashga tegishli kasb-hunar tayyorgarligiga ega boʻlgan shaxslar qoʻyiladilar.

Biznes-maktab oʻqituvchilarini ishga qabul qilish va ishdan boʻshatish Oʻzbekiston Respublikasi qonun hujjatlariga muvofiq amalga oshiriladi. Biznes-maktabning pedagog xodimlariga Oʻzbekiston Respublikasining amaldagi qonun hujjatlari bilan tegishli oʻquv yurtlarining oʻqituvchilari uchun nazarda tutilgan imtiyozlar joriy etiladi.

2. Biznes-maktabning pedagog xodimlari:

biznes-maktab faoliyatining eng muhim masalalarini muhokama qilish va hal etishda qatnashish;

mashgʻulotlarni olib borish shaklini, oʻquvchilarni oʻqitish va tarbiyalash vositalari va usullarini mustaqil belgilash;

oʻquv-tarbiya va uslubiy ishlarni takomillashtirishga oid takliflar tayyorlash va kiritish huquqiga ega boʻladilar.

3. Biznes-maktabning pedagog xodimlari:

oʻquv va uslubiy ishlarni kasb jihatidan yuqori saviyada olib borishga, taʼlim mazmunini takomillashtirishda faol qatnashishga;

pedagogik mehnatni tashkil etishning yuksak madaniyatini taʼminlashga, oʻquvchilar tomonidan oʻquv materialining sifatli oʻzlashtirilishi uchun javob berishga;

oʻzlarining nazariy saviyalarini, pedagogik mahoratlarini, kasbiy malakalarini uzluksiz oshirib borishga majburdirlar.

4. Biznes-maktabga pedagogika ishlariga jalb qilinadigan oliy oʻquv yurtlari oʻqituvchilari uchun oliy oʻquv yurtlari professor-oʻqituvchilari uchun nazarda tutilgan ish haqi stavkalari saqlab qolinadi.

1. Biznes-maktabni boshqarish yakkaboshchilik va kollegiallik asoslarida amalga oshiriladi. Biznes-maktabning butun faoliyatiga rahbarlik qilishni uning direktori amalga oshiradi. Direktor biznes-maktab bevosita boʻysunishida boʻlgan organ tomonidan oliy maʼlumotga ega boʻlgan, odatda, kamida 5 yillik pedagogik ish stajiga ega boʻlgan shaxslardan tayinlanadi.

Biznes-maktabning direktori biznes-maktabning butun faoliyatiga rahbarlik qiladi, oʻquv-tarbiya jarayonini tashkil etadi, uning borishi va natijalarini nazorat qilishni amalga oshiradi, biznes-maktab ishining sifati va samaradorligi uchun shaxsan javob beradi.

2. Oʻquv-tarbiyaviy, uslubiy ishlarning asosiy masalalarini kollegial koʻrib chiqish uchun biznes-maktabda tajribali pedagog xodimlardan, korxonalar va tashkilotlarning vakillaridan iborat pedagogika kengashi, ilmiy-uslubiy kengash tashkil etiladi.

1. Biznes maktabni 2006/2007 oʻquv yiligacha (ushbu oʻquv yili ham kiradi) oʻqishga qabul qilingan oʻquvchilar boʻyicha moliyalashtirish davlat budjeti mablagʻlari hisobidan amalga oshiriladi. Bundan tashqari, budjetdan tashqari mablagʻlar tushumlari moliyalashtirish manbalari boʻlishi mumkin, shu jumladan:

tadbirkorlar va mutaxassislar tayyorlanganligi, qayta tayyorlanganligi va malakasi oshirilganligi uchun xarajatlarni qoplash tartibida shartnomalar boʻyicha mablagʻlar tushumi;

belgilangan tartibda beriladigan va toʻlanadigan banklarning kreditlari;

biznes-maktabning ishlab chiqarish faoliyatidan, pulli xizmatlar koʻrsatish va xoʻjalik hisobidagi boshqa faoliyatidan tushadigan mablagʻlar;

mulkchilik shakllaridan qatʼi nazar, korxonalar, tashkilotlardan, jamoat tashkilotlari, xususiy shaxslar, hokimliklardan tushadigan ixtiyoriy tushumlar ham boʻlishi mumkin.

Biznes-maktablarda 2007/2008 oʻquv yilidan boshlab oʻqishga qabul qilingan oʻquvchilarni oʻqitish budjetdan tashqari mablagʻlar hisobidan amalga oshiriladi.

2. Mablagʻlarni sarflash va ulardan foydalanish “Taʼlim toʻgʻrisida”gi Oʻzbekiston Respublikasi Qonuni qoidalari hisobga olingan holda Oʻzbekiston Respublikasi Moliya vazirligi va Mehnat va aholini ijtimoiy muhofaza qilish vazirligining amaldagi yoʻriqnoma hujjatlariga muvofiq amalga oshiriladi.

Biznes-maktabni tashkil etish, tugatish va qayta tashkil etish amaldagi qonun hujjatlariga muvofiq amalga oshiriladi.