Namangan viloyati hokimining hisoboti hududlarni kompleks ijtimoiy-iqtisodiy rivojlantirish, tadbirkorlikni qoʻllab-quvvatlash va yangi ish oʻrinlari yaratish orqali aholi turmush darajasini oshirish borasida muayyan ishlar amalga oshirilganligini koʻrsatdi.

Jumladan, 2020-yilning toʻqqiz oyi davomida yalpi hududiy mahsulot hajmi 18 trln. 554,6 mlrd. soʻmni, oʻsish surʼati esa oʻtgan yilning mos davriga nisbatan 104,5 foizni tashkil etgan.

Mahalliy budjet daromadlari prognoz rejasi (1 trln. 10,4 mlrd. soʻm) amalda 105,6 foizga (1 trln. 86,8 mlrd. soʻm) bajarilganligi natijasida budjetga 76,3 mlrd. soʻm qoʻshimcha manbalar shakllantirilgan.

Pandemiya davrida 252 ta korxonaning 5,6 mlrd. soʻm miqdoridagi soliq qarzdorligi, tadbirkorlik subyektlarining 2 ming 412 ta kredit shartnomasi boʻyicha 502,6 mlrd. soʻmlik toʻlovlar muddati uzaytirilgan.

Viloyatda 258,7 mln. AQSh dollari miqdorida toʻgʻridan toʻgʻri xorijiy investitsiyalar va kreditlar oʻzlashtirilib, ushbu koʻrsatkich oʻtgan yilning mos davriga nisbatan 107,5 foizga oʻsgan.

Hududiy investitsiya dasturi doirasida qiymati 3,4 trln. soʻmga teng boʻlgan 1 ming 270 ta loyiha ishga tushirilishi natijasida 16 mingdan ortiq yangi ish oʻrinlari yaratilgan.

Viloyat korxonalari tomonidan 347,4 mln. AQSh dollari miqdorida, xususan viloyatning eksport geografiyasiga yangi qoʻshilgan Moldova, Makedoniya, Gana, Kipr, Suriya kabi davlatlarga 6,7 mln. AQSh dollari miqdorida mahsulotlar eksport qilinishiga erishilgan.

Shuningdek, viloyatda Bandlikka koʻmaklashish jamgʻarmasi mablagʻlari hisobidan 2 ming 539 nafar shaxs kasbga tayyorlangan, 2 ming 651 nafar ishsiz shaxslarga ijtimoiy toʻlovlar toʻlab berilgan, 4 ming 236 nafar kam taʼminlangan fuqaroga subsidiyalar ajratilgan.

Uychi va Norin tumanlarini Andijon viloyatining Baliqchi tumani bilan bogʻlovchi Norin koʻprigi avariya holati bartaraf etilib, zamonaviy talablar asosida rekonstruksiya qilingan.

Viloyatda “jinoyatchilikni jilovlash”, sodir etilgan jinoyatlarni fosh etish va jamoat xavfsizligini taʼminlash borasida olib borilgan profilaktik tadbirlar natijasida 775 ta mahalladan 375 tasida (48,4 foiz) jinoyat sodir etilmagan, 301 ta mahallada (41,8 foiz) jinoyatlar soni kamayishiga erishilgan.

“Xavfsiz shahar” konsepsiyasi doirasida Namangan shahar ichki ishlar organlari faoliyatini muvofiqlashtirish boʻlinmasida xizmatga jalb etilgan kuch va vositalarni markazlashgan holda boshqarish imkonini beruvchi “Vaziyatlar markazi” tashkil etilgan, shaharning yagona geoinformatsion xaritasi yaratilgan.

Viloyatda “temir daftar” ga kiritilgan 34,7 mingdan ortiq oilalarga 18 mlrd. soʻm miqdorida manzilli yordam koʻrsatilgan, ushbu oilalarning 47,4 ming nafar mehnatga layoqatli aʼzolari ish bilan taʼminlangan va doimiy daromad manbaiga ega boʻlgan. Natijada sektor rahbarlarining tavsiyalari asosida xalq deputatlari tuman (shahar) Kengashlarining qarorlari bilan 24,4 mingdan ziyod oilalar “temir daftar” roʻyxatidan chiqarilgan.

Xotin-qizlarni har tomonlama qoʻllab-quvvatlash ishlari doirasida xorijiy davlatlardan qaytib kelgan xotin-qizlarning 1 120 nafari ish bilan taʼminlangan, 551 nafariga tadbirkorlik faoliyati bilan shugʻullanishi uchun imtiyozli kreditlar berilgan.

Ish bilan taʼminlanmagan, qaramogʻida nogironligi boʻlgan farzandi bor 684 nafar ayolning 321 nafari oilaviy tadbirkorlikka jalb etilib, uy sharoitida doimiy daromad olish imkoniyatiga ega boʻlgan. Uy-joyga muhtoj 44 nafar ayolga yangi qurilayotgan uy-joylarning boshlangʻich toʻlovlari toʻlab berilgan, 80 nafarining uy-joylari taʼmirlangan.

Shuningdek, Kasaba uyushmalari Federatsiyasi tomonidan ajratilgan 6 mlrd. soʻm mablagʻ hisobiga 16 ta loyiha moliyalashtirilib, 1 251 nafar xotin-qizning bandligi taʼminlangan.

Tajriba-sinov tariqasida tanlangan Namangan shahri va Toʻraqoʻrgʻon tumanidagi xonadonlar toʻliq oʻrganilib, “ayollar daftari”ga kiritilgan 4,7 ming nafardan ortiq xotin-qizlarni ijtimoiy-huquqiy qoʻllab-quvvatlash, kasb-hunarga oʻrgatish, ularning bandligini taʼminlash boʻyicha manzilli chora-tadbirlar dasturi ishlab chiqilgan va ijroga qaratilgan.

Yoshlar oʻrtasida tadbirkorlikni rivojlantirish maqsadida har bir tuman (shahar) hududida “Yoshlar” kichik sanoat zonasini tashkil etish ishlari boshlangan.

Xususan, Namangan shahrida yosh tadbirkorlar uchun “Yoshlar” maxsus kichik sanoat zonasi tashkil etilib, 30 gektarli hududda 65 ta loyiha amalga oshirilishi hamda kelgusida “yoshlar daftari”ga kiritilgan oʻgʻil-qizlar uchun 3,5 mingta yangi ish oʻrni yaratilishi koʻzda tutilgan.

Shu bilan birga, Oʻzbekiston Respublikasi Oliy Majlisi Senatining ishchi guruhi tomonidan viloyatni oʻrganish jarayonida hududni ijtimoiy-iqtisodiy rivojlantirish borasida oʻz yechimini kutib turgan muammo va kamchiliklar mavjudligi aniqlangan.

Mazkur muammoli masalalar viloyat hamda respublika darajasida hal etilishi nuqtai nazaridan chuqur tahlil etildi. Mahalliy ijro hokimiyati organlari tomonidan vakolat doirasida muammo va kamchiliklarni hal etish boʻyicha “Yoʻl xaritasi” loyihasi ishlab chiqildi.

Xalq deputatlari viloyat Kengashining 2020-yil 28-noyabrda boʻlib oʻtgan sessiyasida bu borada amalga oshirilgan ishlarni oʻrganish natijalari muhokama etildi, tegishli idora va tashkilotlar rahbarlarining hisobotlari eshitildi, mavjud muammolarni bartaraf etish boʻyicha “Yoʻl xaritasi” tasdiqlandi.

Namangan viloyatini ijtimoiy-iqtisodiy rivojlantirish boʻyicha ishlar samaradorligini yanada oshirish, belgilangan chora-tadbirlar ijrosining nazoratini taʼminlashga mahalliy vakillik organlarini keng jalb etish maqsadida hamda “Oʻzbekiston Respublikasi Oliy Majlisi Senatining Reglamenti toʻgʻrisida”gi Qonunning 32²-moddasi va “Parlament nazorati toʻgʻrisida”gi Qonunning 10²-moddasiga muvofiq Oʻzbekiston Respublikasi Oliy Majlisining Senati qaror qiladi:

1. Quyidagilar:

Namangan viloyati hokimi vazifasini bajaruvchi Sh. Abdurazakovning viloyatni kompleks ravishda ijtimoiy-iqtisodiy rivojlantirish borasida amalga oshirilayotgan ishlar toʻgʻrisidagi hisoboti;

Oʻzbekiston Respublikasi Oliy Majlisi Senatining Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi raisi T. Madumarovning Namangan viloyatini oʻrganish yakunlari haqidagi axboroti (ilova qilinadi) maʼlumot uchun qabul qilinsin.

2. Namangan viloyatini har tomonlama rivojlantirish, tadbirkorlikni qoʻllab-quvvatlash, aholi tomonidan koʻtarilayotgan muammolarni bartaraf etish borasida amalga oshirilayotgan ishlar yuzasidan xalq deputatlari Namangan viloyati Kengashi sessiyasi oʻtkazilganligi, unda viloyatni kompleks oʻrganish yakunlari muhokama etilib, tegishli qaror qabul qilinganligi inobatga olinsin.

3. Davlat soliq qoʻmitasi (Sh. Kudbiyev) 2020-yil yakuniga qadar Namangan viloyatida soliq toʻlovchilarning budjet oldidagi mavjud qarzdorligini undirish, shuningdek soliq toʻlovchilarga budjetga ortiqcha toʻlangan soliq summalarini qaytarish boʻyicha tegishli choralar koʻrsin.

4. Uy-joy kommunal xizmat koʻrsatish vazirligi (M. Saliyev):

2021-yil 10-yanvarga qadar ogʻir toifadagi shirkatlarni boshqaruv tashkilotlariga oʻtkazish jarayonida ularning tijorat banklari oldidagi kredit qarzdorligi masalalari hal etilmaganligi bois 2017 — 2020-yillarda koʻp kvartirali uylarni taʼmirlash maqsadida jalb qilingan kreditlarni qaytarish tizimini takomillashtirish;

2021-yil 15-yanvarga qadar Namangan tuman kanalizatsiya nasos stansiyasidan tozalash inshootigacha boʻlgan 12,5 km. masofadagi D-300 mm. boʻlgan yuqori bosimli ikkita tarmoqni qayta taʼmirlash, Uchqoʻrgʻon tumanida yangi 10 ming litr3 hajmdagi suv tozalash inshootini qurish va uzunligi 10 km. boʻlgan, maʼnan eskirgan tarmoqlarni yangilash boʻyicha asoslantirilgan takliflar ishlab chiqsin hamda Vazirlar Mahkamasiga kiritsin;

Namangan viloyati hokimligi (Sh. Abdurazakov) bilan birgalikda 2021-2022-yillar davomida Namangan shahar I. Karimov koʻchasidagi hamda Davlatobod tumanidagi lokal qozonxonalarni modernizatsiya va rekonstruksiya qilish boʻyicha tegishli choralarni amalga oshirsin.

5. Energetika vazirligi (A. Sultanov) Andijon, Namangan, Fargʻona viloyatlarida tabiiy gaz tanqisligining oldini olish uchun tabiiy gaz bosimining, elektr energiyasi bilan taʼminlash uchun bir kunlik erkin isteʼmoli koʻrsatkichining meʼyorda boʻlishi yuzasidan barcha zarur choralarni koʻrsin.

6. Transport vazirligi (I. Mahkamov):

2021-yil 1-mayga qadar Mingbuloq tumanidagi 4R-126 “Baliqchi-Mingbuloq-Nayman-Pungon” avtomobil yoʻlining 62 — 66 km. oraligʻini, 4R-260 “Jomashuy-Tegirmon-Navbahor” avtomobil yoʻlining 14 — 37 km. oraligʻini taʼmirlash choralarini koʻrsin;

Investitsiyalar va tashqi savdo vazirligi (L. Qudratov) Moliya vazirligi (T. Ishmetov) bilan birgalikda Toʻraqoʻrgʻon tumanidan oʻtuvchi 4R-112 Fargʻona halqa avtomobil yoʻlining Chust tumani chegarasidan boshlab Toʻraqoʻrgʻon tumani hududidan oʻtuvchi umumfoydalanishdagi 54 — 73 km. (19 km.) yoʻlning 2-toifali (54 — 66 km. 2 tasmali, 66 — 73 km. 4 tasmali) qismini rekonstruksiya qilish masalasini investitsiya dasturiga kiritish masalasini oʻrganib, tegishli choralarni amalga oshirsin;

2021-yil 1-fevralga qadar Namangan shahrining davlat ahamiyatidagi 4R-117 “Toʻraqoʻrgʻon sh. — Namangan sh. — Chortoq sh. — Keskanyor q. — Sassiqsoy q.” avtomobil yoʻlining 20 km. va 4R-114 “Namangan sh. — Kosonsoy sh. — Qirgʻiziston Respublikasi chegarasi” avtomobil yoʻlining 3 km. kesishmasida, shuningdek Goʻzal va Hamroh koʻchalari kesishmasida yangi yoʻl oʻtkazgich (koʻprik) qurish masalasini oʻrganib chiqib, tegishli takliflar tayyorlasin hamda koʻrib chiqish uchun Vazirlar Mahkamasiga kiritsin.

7. Qishloq xoʻjaligi vazirligi (J. Xodjayev):

Suv xoʻjaligi vazirligi (Sh. Xamroyev), Namangan viloyati hokimligi (Sh. Abdurazakov) bilan birgalikda Namangan viloyatida 2020-yilda foydalanishdan chiqib ketgan va yer osti suvlari zaxirasi mavjud boʻlgan yer maydonlarini oʻzlashtirish boʻyicha zarur chora-tadbirlarni amalga oshirsin;

2021-yil 1-martga qadar paxta-toʻqimachilik klastyerlari faoliyatini tahlil etgan holda klastyerlar tomonidan tumanlarda yetishtiriladigan paxta xomashyosini hududning oʻzida qayta ishlaydigan korxonalar tashkil etish yuzasidan takliflar ishlab chiqsin hamda Vazirlar Mahkamasiga kiritsin.

8. Vazirlar Mahkamasi huzuridagi Agrosanoat majmui ustidan nazorat qilish inspeksiyasi (A. Vahobov) Tadbirkorlik subyektlarining huquqlari va qonuniy manfaatlarini himoya qilish boʻyicha vakil (D. Kasimov), Adliya vazirligi (R. Davletov) bilan birgalikda 2021-yil 1-fevralga qadar tadbirkorlik subyektlarida suvdan foydalanish va suv isteʼmoli tartibi talablari bajarilishini, qishloq xoʻjaligiga moʻljallangan yerlardan foydalanishni oʻrganish (moliyaviy-xoʻjalik faoliyatiga aralashmagan holda) ishlarini Tekshiruvlarni elektron roʻyxatga olish yagona tizimida roʻyxatga olmagan holda amalga oshirish boʻyicha takliflar ishlab chiqsin hamda Vazirlar Mahkamasiga kiritsin.

9. Maktabgacha taʼlim vazirligi (A. Shin):

Namangan viloyatining Kosonsoy, Chortoq tumanlari va Namangan shahrida bolalarning maktabgacha taʼlim tashkilotlari bilan qamrov darajasini oshirish, ehtiyoj mavjud boʻlgan mahallalarda davlat-xususiy sheriklik asosida maktabgacha taʼlim tashkilotlarini tashkil etish choralarini koʻrsin;

Maktabgacha taʼlim tashkilotlari direktorlari va mutaxassislarini qayta tayyorlash va malakasini oshirish institutida Namangan viloyatidagi maktabgacha taʼlim tashkilotlarida faoliyat yuritayotgan mutaxassis boʻlmagan pedagog kadrlarni qayta tayyorlash ishlarini amalga oshirsin.

10. Xalq taʼlimi vazirligi (Sh. Shermatov):

2020-yil 25-dekabrga qadar Namangan viloyatidagi maktablarni yetkazilishi belgilangan darsliklar bilan toʻliq taʼminlasin;

Uchqoʻrgʻon tumanining Qirgʻiziston bilan chegara hududidagi “Obod” mahallasida umumtaʼlim maktabi barpo etish masalasini oʻrganib chiqsin va bu borada tegishli choralar koʻrsin.

11. Oliy va oʻrta maxsus taʼlim vazirligi (I. Majitov) Namangan viloyati hokimligi (Sh. Abdurazakov) bilan birgalikda Namangan viloyatidagi oliy taʼlim muassasalarining mavjud ehtiyojlari hamda moliyaviy imkoniyatlarini inobatga olgan holda talabalar uchun qoʻshimcha turar joy binolarini qurish masalasini koʻrib chiqsin.

12. Madaniyat vazirligi (O. Nazarbekov):

Namangan shahridagi “Mulla Qirgʻiz” madrasasi yaqinida “Namangan Qiangxing Investment” MChJ tomonidan amalga oshirilishi rejalashtirilgan loyiha yuzasidan oʻrganish ishlarini tashkil etsin hamda tegishli xulosa berilishini taʼminlasin;

2021-yil 1-fevralga qadar Namangan viloyatidagi 20 ta bolalar musiqa va sanʼat maktabini oʻquv (qoʻllanmalar, notalar) darsliklari hamda cholgʻu asboblari bilan taʼminlash ishlarini yakunlash choralarini koʻrsin.

13. Oʻzbekiston Respublikasi Vazirlar Mahkamasi:

tijorat banklari hamda Agrosanoat majmui va oziq-ovqat taʼminoti sohasidagi loyihalarni amalga oshirish agentligi tomonidan Namangan viloyatidagi 111 mlrd. 775,3 mln. soʻmlik 14 ta loyiha boʻyicha kredit yigʻma jildlari oʻrganib chiqilishini hamda xulosa berilishini tashkil etsin;

vazirlik va idoralar tomonidan ushbu Qaror bilan yuklatilgan vazifalar ijrosini nazorat qilib borsin, kiritilgan takliflar oʻrganib chiqilishini hamda tegishli choralar koʻrilishini taʼminlasin;

mazkur Qaror ijrosini taʼminlash yuzasidan olib borilgan ishlar toʻgʻrisida 2021-yil 1-iyulga qadar Oʻzbekiston Respublikasi Oliy Majlisi Senatiga tahliliy axborot taqdim etsin.

14. Namangan viloyati hokimligi (Sh. Abdurazakov):

viloyatdagi faoliyati toʻxtagan korxonalarni tarmoqlar va hududlar kesimida tahlil etib, ularning faoliyatini qayta tiklash boʻyicha har tomonlama amaliy yordam koʻrsatsin;

viloyatdagi eksport prognoz rejasini toʻliq bajarmagan yoki umuman eksportni amalga oshirmagan korxonalarga 2021-yilda samarali faoliyat olib borishlariga koʻmaklashsin;

tegishli vazirlik va idoralar bilan birgalikda viloyatdagi boʻsh turgan 54 ta davlat obyektidan samarali foydalanish boʻyicha tegishli choralarni amalga oshirsin;

viloyatda investitsiya dasturlari bajarilishi ishonchli monitoring qilib borilishini yoʻlga qoʻysin, hududiy investitsiya dasturi ijrosini taʼminlash yuzasidan tegishli choralarni amalga oshirsin;

qishloq xoʻjaligiga moʻljallangan sugʻoriladigan ekin yerlari davlat organlari va tashkilotlari, fuqarolar hamda tadbirkorlik subyektlariga boshqa maqsadlar uchun foydalanishga ajratib berilganda yerdan oldingi foydalanuvchining koʻrgan zarari, shu jumladan boy berilgan foyda miqdori hisoblanishini hamda toʻlab berilishini taʼminlasin;

tuman hokimlari tomonidan qishloq xoʻjaligi foydalanishidagi sugʻoriladigan ekin yerlarni boshqa maqsadlar uchun fuqarolar va yuridik shaxslarga ajratib berish holatlariga butunlay chek qoʻysin;

ekin (suvli) yerlar, koʻp yillik daraxtzorlar, yaylov va pichanzorlar va boshqa yerlarning fuqarolar va tadbirkorlik subyektlari tomonidan oʻzboshimchalik bilan egallab olinishi natijasida ularni qishloq xoʻjaligi muomalasidan chiqishga sabab boʻlgan, yetkazilgan zararlar vakolatli organlar tomonidan hisoblanishini hamda yer uchastkalari foydalanish uchun yaroqli holatga keltirilishini taʼminlash choralarini koʻrsin;

qurilish ishlari yakuniga yetkazilib, foydalanishga tayyor turgan maktabgacha taʼlim tashkilotlarini doimiy elektr liniyasiga ulash choralarini koʻrsin;

“yoshlar daftari” va “ayollar daftari” shakllantirilishini toʻliq yakuniga yetkazib, unga kiritilgan yoshlar va xotin-qizlarni talab yuqori boʻlgan kasblarga oʻqitish, tadbirkorlikka keng jalb etish va moliyaviy qoʻllab-quvvatlash boʻyicha tegishli chora-tadbirlarni belgilasin hamda amalga oshirsin.

15. Xalq deputatlari Namangan viloyat Kengashiga:

mahalliy budjet erkin qoldiq mablagʻlarining kamida 10 foizini jamoatchilik fikri asosida aholi tomonidan koʻtarilayotgan muammolarni hal etishga yoʻnaltirish;

mahalliy hokimiyat organlari rahbarlarining hisobot va axborotlari belgilangan muddatlarda eshitib borilishini hamda muhokama qilinishini taʼminlash;

aholi turmush darajasini oshirish, ular tomonidan koʻtarilayotgan muammolarni hal etish maqsadida ijro hokimiyati organlariga deputat soʻrovlarini kiritib borish va ularning ijrosini nazorat qilish;

“temir daftar”, “yoshlar daftari”, “ayollar daftari” asosida ehtiyojmand oilalar, yoshlar hamda xotin-qizlarni qoʻllab-quvvatlash borasida belgilangan vazifalar ijrosi ustidan Kengash nazoratini yoʻlga qoʻyish, bu borada deputatlarning faol hamda masʼuliyatli boʻlishlarini taʼminlash tavsiya etilsin.

16. Qoraqalpogʻiston Respublikasi Joʻqorgʻi Kengesi, xalq deputatlari viloyatlar, tumanlar, shaharlar Kengashlariga:

har oyda Oʻzbekiston Respublikasi Prezidentining 2020-yil 27-oktabrdagi “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar toʻgʻrisida”gi PF-6096-sonli Farmoni ijrosi yuzasidan masʼul rahbarlarning hisobotlarini eshitib borish;”

har chorakda “temir daftar”, “ayollar daftari”, “yoshlar daftari” asosida amalga oshirilayotgan ishlar boʻyicha sektorlar rahbarlari, mahalla va oilani qoʻllab-quvvatlash boʻlinmalari, Yoshlar ishlari agentligining hududiy boʻlinmalari rahbarlarining hisobotlarini eshitish hamda tanqidiy muhokama qilish tavsiya etilsin.

17. Oʻzbekiston Milliy teleradiokompaniyasi (A. Xadjayev)ga Qoraqalpogʻiston Respublikasi Joʻqorgʻi Kengesi, xalq deputatlari viloyatlar, tumanlar, shaharlar Kengashlarining 2020-yil yakunlari boʻyicha oʻtkaziladigan sessiyalarini yoritish tavsiya etilsin.

18. Oʻzbekiston Respublikasi Oliy Majlisi Senati qoʻmitalari mazkur Qarorda belgilangan vazifalarning tegishli vazirlik va idoralar tomonidan ijrosi taʼminlanishini nazorat qilib borsin.

19. Mazkur Qarorning ijrosini nazorat qilish Oʻzbekiston Respublikasi Oliy Majlisi Senati Raisining oʻrinbosari Z. Nizamxodjayev zimmasiga yuklansin.

Joriy yilning 23 — 28-noyabr kunlari Oʻzbekiston Respublikasi Oliy Majlisi Senati Ishchi guruhi tomonidan Namangan viloyatida hududlarni ijtimoiy-iqtisodiy rivojlantirish borasida amalga oshirilayotgan ishlar kompleks oʻrganildi.

Oʻrganish davomida budjet, iqtisodiy islohotlar, agrar, suv xoʻjaligi, kommunal, yoʻl-qurilish va transport infratuzilmasi, ijtimoiy soha, jinoyatchilik va sud-huquq, kambagʻallikni qisqartirish borasida olib borilayotgan ishlar tahlil etildi.

Tahlillar Namangan viloyatida hududlarni kompleks ijtimoiy-iqtisodiy rivojlantirish, tadbirkorlikni qoʻllab-quvvatlash va yangi ish oʻrinlari yaratish orqali aholi turmush darajasini oshirish borasida muayyan ishlar amalga oshirilganligini koʻrsatdi. Jumladan:

Viloyatda 2020-yilning yanvar-sentyabr oylari davomida yalpi hududiy mahsulot hajmi 18 trln. 554,6 mlrd. soʻmni, oʻsish surʼati esa oʻtgan yilning mos davriga nisbatan 104,5 foizni tashkil etgan.

Viloyat boʻyicha 7,4 trln. soʻmlik sanoat mahsulotlari ishlab chiqarilgan, 6 trln. 345,5 mlrd. soʻmlik xizmatlar koʻrsatilgan, chakana savdo aylanmasi 8 trln. 21,5 mlrd. soʻmni tashkil etgan.

Mahalliy budjet daromadlari prognoz rejasi (1 trln. 10,4 mlrd. soʻm) amalda 105,6 foizga (1 trln. 86,8 mlrd. soʻm) bajarilganligi natijasida budjetga 76,3 mlrd. soʻm qoʻshimcha manbalar shakllantirilgan.

Pandemiya sharoitida moddiy qoʻllab-quvvatlash uchun roʻyxatga olingan 34 ming 761 ta muhtoj oilaga 91,9 mlrd. soʻmlik ijtimoiy yordam koʻrsatilgan, 47 ming nafar ishsiz fuqaroning doimiy va mavsumiy ish bilan bandligi taʼminlangan.

Pandemiya davrida 252 ta korxonaning jami 5,6 mlrd. soʻm miqdoridagi soliq qarzdorligi muddati uzaytirilgan, mikrofirma va kichik korxonalardan 33,1 mlrd. soʻmlik inkasso topshiriqnomalari qaytarib olingan.

Davlat mulkini ijaraga olgan 760 ta tadbirkorlik subyekti uchun ijara toʻlovlarini hisoblash toʻxtatilgan hamda tadbirkorlik subyektlarining 2 ming 412 ta kredit shartnomasi boʻyicha 502,6 mlrd. soʻmlik toʻlovlarning muddati uzaytirilgan. Natijada faoliyati vaqtincha toʻxtagan 8 ming 529 ta korxona faoliyati qayta tiklanishiga erishilgan.

Tadbirkorlik faoliyatni qoʻllab-quvvatlash davlat jamgʻarmasi hisobidan 1 ming 686 ta loyiha uchun 1,5 trln. soʻmdan ortiq kreditlar boʻyicha 345,0 mlrd. soʻmlik moliyaviy yordam (kafillik va kompensatsiya koʻrinishida) berilgan.

Mahalliylashtirish dasturiga asosan 32 ta loyiha doirasida 161,3 mlrd. soʻmdan ortiq mahsulotlar ishlab chiqarilgan, qoʻshimcha 363 ta yangi ish oʻrni yaratilgan.

Investorlarni qoʻllab-quvvatlash va huquqiy himoya qilish borasidagi ishlar natijasida 258,7 mln. AQSh dollari miqdorida toʻgʻridan toʻgʻri xorijiy investitsiyalar va kreditlar oʻzlashtirilib, oʻtgan yilning mos davriga nisbatan 107,5 foizga oʻsgan.

Hududiy investitsiya dasturi doirasida qiymati 3,4 trln. soʻmga teng 1 ming 270 ta loyiha ishga tushirilgan va 16 mingdan ortiq yangi ish oʻrinlari yaratilgan.

Joriy yilning 25-noyabr holatiga koʻra, viloyat korxonalari tomonidan 347,4 mln. AQSh dollari miqdorida, xususan viloyatning eksport geografiyasiga yangi qoʻshilgan Moldova, Makedoniya, Gana, Kipr, Suriya kabi davlatlarga 6,7 mln. AQSh dollari miqdorida mahsulotlar eksport qilinishiga erishilgan.

“Har bir oila — tadbirkor” dasturi doirasida tijorat banklari tomonidan joriy yilning oʻtgan davri davomida qariyb 33,7 mingta jismoniy va yuridik shaxslarga 669,9 mlrd. soʻmlik kredit mablagʻlari ajratilgan, mazkur kreditlarning 79,8 mlrd. soʻmi “temir daftar”ga kiritilgan 6 ming 428 ta oilaga berilgan.

Viloyatda turizm sohasini rivojlantirish borasidagi ishlar natijasida 2019-yilda xorijiy davlatlardan tashrif buyurgan turistlar soni 2018-yilga nisbatan 3 barobarga oshgan.

Viloyatning turizm salohiyati Rossiya, Janubiy Koreya, Xitoy, Indoneziya, Turkiya, Hindiston, Turkmaniston, Belorussiya kabi davlatlarda oʻtkazilgan xalqaro koʻrgazmalarda namoyish etilgan.

Hozirda turizm sohasi boʻyicha umumiy qiymati 1 trln. soʻmga yaqin boʻlgan 40 ta investitsion loyiha amalga oshirilmoqda, xususan, Chortoq tumanida “Chartak Resort” MChJ shaklidagi Oʻzbekiston-Niderlandiya qoʻshma korxonasi tomonidan loyiha qiymati 149 mlrd. soʻm boʻlgan 250 oʻrinli, zamonaviy chet el texnologiyalariga asoslangan “Sanatoriya, sogʻlomlashtirish markazi” barpo etilmoqda.

Kelgusida Chust tumanini turizm markaziga aylantirish, Namangan shahridagi “Afsonalar vodiysi” bogʻini viloyatning “chorlovchi nuqtasi” sifatida rivojlantirish, tekstil korxonalari salohiyatlaridan foydalangan holda, Namangan shahrini Osiyoning “Milan” shahriga aylantirish rejalashtirilgan.

Bandlikka koʻmaklashish jamgʻarmasi mablagʻlar hisobidan 2 ming 539 nafar shaxs kasbga tayyorlangan, 2 ming 651 nafar ishsiz shaxslarga ijtimoiy toʻlovlar toʻlab berilgan, 4 ming 236 nafar kam taʼminlangan fuqaroga subsidiyalar ajratilgan.

Viloyatda bugungi kunda 185 ming 811 gektar sugʻoriladigan yer maydoniga qishloq xoʻjaligi ekinlari toʻliq joylashtirilgan, joriy yilda 856 ming tonna sabzavot, 104 ming tonna poliz, 278,4 ming tonna kartoshka, 300 ming tonna meva, 124 ming tonna uzum, 74,4 ming tonna dukkakli don mahsulotlari yetishtirilgan.

2020-yilda qishloq xoʻjaligi ekinlarini yetishtirishda 3 ming 660 gektar maydonda suv tejovchi texnologiyalarni joriy qilish (3 ming 150 gektar tomchilatib, 160 gektar yomgʻirlatib, 350 gektar pulsar tizimi orqali) boʻyicha ishlar olib borilmoqda.

Mavjud 1 ming 342 gektar yaroqsiz bogʻlar oʻrniga va qoʻshimcha 154 gektar maydonda jami 1 ming 496 gektar yangi intensiv bogʻlar barpo etilgan, 217 gektar ochiq maydonga va 43 gektar eski samarasiz tokzorlar oʻrniga yangi tokzorlar barpo etilgan.

Viloyatdagi 244 gektar issiqxona xoʻjaliklarida yiliga 18,5 ming tonna sabzavot mahsulotlari yetishtirilmoqda, shuningdek Pop tumanida 27 gektar limonchilik yoʻnalishida yangi issiqxonalar qurish ishlari yakunlanmoqda.

Viloyatda 2020-yilgi kuz-qish mavsumiga puxta tayyorgarlik koʻrish maqsadida 7 ta yoʻnalish boʻyicha (koʻp kvartirali uylarni taʼmirlash, ijtimoiy sohani tayyorlash, issiqlik, ichimlik suvi, elektr, gaz va koʻmir taʼminoti) ishlar tashkil etilgan.

Xususan, issiqlik taʼminotida 6 ta qozon va 2,5 km. issiqlik tarmogʻi mukammal taʼmirlangan, 1,3 km. elektr tarmogʻi tortilgan, 585 dona transformator punkti va 3 ta kompressor mukammal taʼmirlangan, tabiiy gaz taʼminotida 1 km. gaz quvuri va 14 ta gaz taqsimlash punkti mukammal taʼmirlangan.

Shuningdek, Namangan shahridagi uzoq yillardan buyon aholi noroziligiga sabab boʻlib kelayotgan “Hududiy oqava suv tozalash” inshootini rekonstruksiya qilish ishlari boshlab yuborilgan.

Viloyatning Uychi va Norin tumanlarini Andijon viloyatining Baliqchi tumani bilan bogʻlovchi Norin koʻprigi avariya holati bartaraf etilib, zamonaviy talablar asosida rekonstruksiya qilingan.

Viloyatda ijtimoiy sohani rivojlantirish borasida 40 ta obyektda 151,6 mlrd. soʻmlik qurilish-montaj ishlari bajarilgan. Namangan shahar hududi kengayishi hisobiga aholi soni ortganligi inobatga olinib, sobiq endokrinologiya binosida 150 oʻrinli bolalar shifoxonasini tashkil etish uchun 5 mlrd. soʻm mablagʻ ajratilgan.

2020-yil yakuniga qadar viloyatda bolalarning maktabgacha taʼlim bilan qamrov darajasini 56,7 foizdan 62 foizga yetkazish maqsadida davlat-xususiy sherikchilik asosida 4 ming 225 oʻringa moʻljallangan 44 ta maktabgacha taʼlim tashkilotlarini tashkil etish uchun jami 67,3 mlrd. soʻm imtiyozli kredit mablagʻlari ajratilgan.

Shuningdek, viloyatda “jinoyatchilikni jilovlash”, sodir etilgan jinoyatlarni fosh etish va jamoat xavfsizligini taʼminlash borasida olib borilgan profilaktik tadbirlar natijasida 775 ta mahalladan 375 tasida (48,4%) jinoyat sodir etilmagan, 301 ta mahallada (41,8%) jinoyatlar soni kamayishiga erishilgan.

Aholida huquqbuzarlikka nisbatan toqatsizlik hissini shakllantirish maqsadida “Mening mahallamda jinoyat sodir etilmasligi kerak” nomli targʻibot plakatlari joylashtirilgan, “Sening kelajaging oʻz qoʻlingda”, “Oʻz uyingni oʻzing asra”, “Hushyorlikni yoʻqotma” mazmunidagi bukletlar tarqatilgan.

“Xavfsiz shahar” konsepsiyasi doirasida Namangan shahar IIO FMBda xizmatga jalb etilgan kuch va vositalarni markazlashgan holda boshqarish imkonini beruvchi “Vaziyatlar markazi” tashkil etilgan, shaharning yagona geoinformatsion xaritasi yaratilgan.

Ushbu tizimga 178 ta obyektdagi 6,7 mingta zamonaviy raqamli videokuzatuv moslamalari oʻrnatilgan, 10 ta chorrahadagi 88 dona videokuzatuv va qayd etish kameralari, obyektlardagi 395 dona zamonaviy raqamli videokuzatuv kameralari toʻgʻridan toʻgʻri ulangan.

Namangan shahridagi 3 ta bozor hamda 84-maktabga “Inson yuzini aniqlovchi videokuzatuv kameralari”, “Chorsu dehqon bozori” va “Doʻstlik buyum bozori”ga “Tezkor chaqiruv tugmalari” (SOS) oʻrnatilib, markazga ulangan.

Shuningdek, joriy yilning oʻtgan davri mobaynida 4 marotaba oʻtkazilgan “Turmush” tadbirida qariyb 74 mingta oila oʻrganilgan, 1,4 mingta oilaviy nizolar muhokama qilingan, natijada 853 ta nizoli oilaning notinchligiga barham berilgan, 547 ta oilada ajrimlarning oldi olinishiga erishilgan.

Viloyatda “temir daftar”ga kiritilgan 34,7 mingdan ortiq oilalarga 18 mlrd. soʻm miqdorida manzilli yordam koʻrsatilgan, ushbu oilalarning 47,4 ming nafar mehnatga layoqatli aʼzolari ish bilan taʼminlangan va doimiy daromad manbaiga ega boʻlgan. Natijada sektor rahbarlarining tavsiyalari asosida xalq deputatlari tuman (shahar) Kengashlarining qarorlari bilan 24,4 mingdan ziyod oilalar “temir daftar” roʻyxatidan chiqarilgan.

Oliy Majlis Senati, Kasaba uyushmalari Federatsiyasi, Namangan viloyati hokimligi tomonidan tasdiqlangan dasturlar asosida xotin-qizlar muammolarini hal etish va ularni har tomonlama qoʻllab-quvvatlash ishlari davom ettirilmoqda.

Xususan, xorijiy davlatlardan qaytgan 2 920 nafar xotin-qizlarning 1 120 nafari ish bilan taʼminlangan, 551 nafariga tadbirkorlik faoliyati bilan shugʻullanishi uchun 12,5 mlrd. soʻm miqdorida imtiyozli kreditlar berilgan.

Joylarda 45 marotaba mehnat yarmarkasi tashkil etilib, ularda ishtirok etgan 1,4 ming nafardan ortiq xotin-qizlarga ishga joylashish uchun yoʻllanmalar berilgan hamda 1 ming nafardan ziyodi ishga joylashtirilgan. Norasmiy ish bilan band boʻlgan 1 ming 486 nafar xotin-qizlar vaqtinchalik oʻzini oʻzi band qilgan fuqarolar sifatida rasmiylashtirilgan.

Ogʻir ijtimoiy sharoitda yashayotgan 924 nafar ishsiz ayollar bandligini taʼminlash boʻyicha manzilli chora-tadbirlar belgilanib, bugungi kungacha 577 nafar xotin-qizlar bandligi taʼminlangan.

Ish bilan taʼminlanmagan, qaramogʻida nogironligi boʻlgan farzandi bor 684 nafar ayolning 321 nafari oilaviy tadbirkorlikka jalb etilib, uy sharoitida doimiy daromad olish imkoniyatiga ega boʻlgan.

Shuningdek, Kasaba uyushmalari Federatsiyasi tomonidan ajratilgan 6 mlrd. soʻm mablagʻ hisobiga 16 ta loyiha moliyalashtirilib, 1 251 nafar xotin-qizning bandligi taʼminlangan, 12 nafar ayollarga tikuv mashinalari olib berilgan.

Uy-joyga muhtoj 251 nafar xotin-qizlar roʻyxati asosida bugungi kunga qadar 44 nafar ayolga yangi qurilayotgan uy-joylarning boshlangʻich toʻlovlari toʻlab berilgan, 80 nafarining uy-joylari taʼmirlangan. 673 nafar xotin-qizlarning turli toʻlovlari (qarzlari) homiylar yordamida toʻlab berilgan.

Shuningdek, 284 nafar davolanishga muhtoj ayollar bepul tibbiy koʻrikdan oʻtkazilib, zarur dori-darmon va tibbiy vositalar bilan taʼminlangan, 266 nafar ayollarga moddiy yordam koʻrsatilgan.

Viloyatda “ayollar daftari” yuritilishini yoʻlga qoʻyish, ularning muammolarini bartaraf etish maqsadida tegishli chora-tadbirlar belgilanib, tashkiliy ishlar amalga oshirilmoqda. Xususan, tajriba-sinov tariqasida olingan Namangan shahri va Toʻraqoʻrgʻon tumanidagi 171 ta mahallalarda yashovchi 150,3 ming mingdan ortiq (Namangan shahrida 108 ming 88 ta va Toʻraqoʻrgʻon tumanida 42 ming 217 ta) xonadonlarda xatlov yakuniga yetkazilgan.

Xatlov davomida 150 ming 305 ta xonadonda yashovchi 134 ming 785 nafar (Namangan shahrida 94 ming 795 nafar va Toʻraqoʻrgʻon tumanida 39 ming 990 nafar) yoshlar va 143 ming 715 nafar (Namangan shahrida 103 ming 518 nafar va Toʻraqoʻrgʻon tumanida 40 ming 197 nafar) ayollar bilan suhbatlar oʻtkazilib, muammolari oʻrganib chiqilgan hamda anketa-soʻrovnomalari toʻldirilgan.

Xatlov yakunlariga koʻra, Namangan shahrida 3 ming 848 nafar va Toʻraqoʻrgʻon tumanida 866 nafar ayollar “ayollar daftari”ga kiritilgan va ularni ijtimoiy-huquqiy, psixologik qoʻllab-quvvatlash, kasb-hunarga oʻrgatish, ularning bandligini taʼminlash boʻyicha manzilli chora-tadbirlar dasturi ishlab chiqilib, ijroga qaratilgan.

Viloyatning qolgan 10 ta hududida ham “ayollar daftari” boʻyicha xatlov ishlari olib borilmoqda. Viloyat boʻyicha 339 ming 305 ta xonadon xatlovdan oʻtkazilib, 433 ming 188 nafar ayollar bilan suhbatlashilgan va anketa-soʻrovnoma toʻldirilgan hamda 351 ming 316 ta (81,1 foizi) anketa-soʻrovnoma elektron bazaga kiritilgan.

Yoshlar oʻrtasida tadbirkorlikni rivojlantirish maqsadida har bir tuman (shahar) hududida “Yoshlar” kichik sanoat zonasini tashkil etish ishlari boshlangan. Xususan, Namangan shahridagi Yuksalish dahasida yosh tadbirkorlar uchun “Yoshlar” maxsus kichik sanoat zonasi tashkil etilib, 30 gektarli hududda 65 ta loyiha amalga oshirilishi va kelgusida “yoshlar daftari”ga kiritilgan oʻgʻil-qizlar uchun 3,5 mingta yangi ish oʻrni yaratilishi koʻzda tutilgan.

Shu bilan birga, oʻrganish davomida viloyatni har tomonlama rivojlantirish, aholi turmush darajasini oshirish borasida koʻplab ishlar amalga oshirilishi bilan bir qatorda, oʻz yechimini kutib turgan muammolar va kamchiliklar mavjudligi ham aniqlandi. Jumladan:

1. Soliq toʻlovchilarning budjet oldidagi qarzdorligi joriy yilning 1-noyabr holatiga 109,9 mlrd. soʻmni tashkil etib, yil boshiga nisbatan 2,5 mlrd. soʻmga oshgan. Ayniqsa, yil boshiga nisbatan soliq qarzdorligi Yangiqoʻrgʻon tumanida 23 foizga, Kosonsoy tumanida 35 foizga, Chust tumanida 64 foizga oʻsgan.

Budjetga ortiqcha toʻlangan soliq summalari joriy yilning 1-oktabr holatiga 86,3 mlrd. soʻmni tashkil etgan. Soliq toʻlovchilardan budjetga ortiqcha toʻlovlarning undirilishi asosan Mingbuloq, Pop tumanlariga toʻgʻri kelib, birgina joriy yilning oktyabr oyida qariyb 1,8 mlrd. soʻm ortiqcha toʻlov undirilgan.

2. Budjet xarajatlarining maqsadli sarflanishi yuzasidan 2020-yilning 9 oyida 514 ta moliyaviy nazorat tadbiri oʻtkazilib, qariyb 10,0 mlrd. soʻmlik qonunbuzilish holatlari aniqlangan. Moliyaviy xato va kamchiliklarning 2,4 mlrd. soʻmi yoki 24 foizi xalq taʼlimi sohasi tashkilotlari tomonidan yoʻl qoʻyilgan.

3. Joriy yil boshiga shahar va tumanlar budjetlarida mavjud erkin qoldiq mablagʻlarining kamida 10 foizini jamoatchilik fikri asosida sarflash boʻyicha portal muhokamasiga jamoatchilik tomonidan jami 2 ming 425 ta taklif berilgan boʻlsada, amalda Kosonsoy tumanidan tashqari birorta tumanda eng koʻp ovoz olgan tadbirlarga mablagʻlar yoʻnaltirilmagan va bu borada jamoatchilik fikri inobatga olinmagan. Vaholanki, berilgan takliflarning 60 foizi taʼlim va tibbiyot muassasalarini hamda ichki yoʻllarni taʼmirlash bilan bogʻliq masalalar tashkil etgan.

4. Budjet kodeksining 126-moddasiga zid ravishda bir qator holatlarda tegishli budjetdan moliyalashtirilishi nazarda tutilmagan tashkilotlarni saqlab turish uchun mablagʻlar ajratilgan. Masalan, viloyat prokuraturasiga Mingbuloq tumani budjetining yil boshiga erkin qoldiq mablagʻlari hisobidan tuman prokuraturasi binosini joriy taʼmirlash uchun 2020-yil oktyabr oyida 200 mln. soʻm mablagʻ oʻtkazib berilgan.

5. Oʻzbekiston Respublikasi Prezidentining 2017-yil 13-dekabrdagi “Mahalliy davlat hokimiyati organlarining moliyaviy erkinligini oshirish, mahalliy budjetlarga tushumlarning toʻliqligini taʼminlash boʻyicha soliq va moliya organlari javobgarligini kuchaytirishga oid qoʻshimcha chora-tadbirlar toʻgʻrisida”gi PF-5283-son Farmonining 2-bandida respublika tumanlari (shaharlari) xalq deputatlari Kengashlari sessiyalarida qoʻshimcha manbalar, shu jumladan, mahalliy budjetlarning daromadlarini oshirish rezervlarini aniqlash hisobidan moliyalashtiriladigan xarajatlar koʻrib chiqib tasdiqlanishi belgilangan.

Biroq, bugungi kunda mahalliy davlat hokimiyati organlarining moliyaviy erkinligini oshirishga qaratilgan islohotlar amalga oshirilayotgan bir paytda barcha shahar, tumanlar budjetlarining 2020-yil boshiga shakllangan erkin qoldiq mablagʻlari markazlashgan holda viloyat budjetiga oʻtkazilgan.

Bunday amaliyotning qoʻllanilishi kelgusida mahalliy davlat hokimiyati organlarining moliyaviy erkinligini cheklash bilan birga, budjet daromadlarini oshirish rezervlarini aniqlash boʻyicha olib borilayotgan saʼy-harakatlariga salbiy taʼsir koʻrsatadi.

6. Koronavirus pandemiyasi taʼsirini yumshatish tadbirlari uchun Inqirozga qarshi kurashish jamgʻarmasi hisobidan ajratilgan 160,1 mlrd. soʻm mablagʻning maqsadli sarflanishi oʻrganilganda 3,1 mlrd soʻmdan ortiq moliyaviy xato va kamchiliklar aniqlangan.

Jumladan, 2,3 mlrd. soʻm mablagʻ sogʻliqni saqlash muassasalari xodimlariga ortiqcha toʻlab berilgan boʻlsa, birgina gipoxlorid dezinfeksiya vositasining qimmat narxda xarid qilinishi natijasida qariyb 248,9 mln. soʻm mablagʻ ortiqcha sarflangan.

Viloyat SENOM tomonidan tibbiy chiqindilarni utilizatsiya qilishda haqiqatda ishlamagan transport vositalari orqali utilizatsiya qilish punktiga yetkazilganligi toʻgʻrisida maʼlumotlar rasmiylashtirilishi hamda tibbiy chiqindilarni utilizatsiya qilish narxlariga asossiz qiymatlarni kiritish natijasida 532,4 mln. soʻm budjet mablagʻlari asossiz sarflab yuborilgan.

7. Joriy yilning yanvar — sentyabr oylarida 4 ming 900 ta yangi tadbirkorlik subyekti roʻyxatdan oʻtkazilgan, shu bilan birga ushbu davr mobaynida 635 ta korxona faoliyati tugatilgan, 483 ta korxona faoliyati toʻxtagan.

Ayniqsa, oʻtgan yilning mos davriga nisbatan faoliyati tugatilgan korxonalar soni Mingbuloq (40 foiz), Yangiqoʻrgʻon (41 foiz), Namangan (46 foiz), Chortoq (91 foiz) oshgan.

8. Viloyatdagi 10 ta tuman (shahar)da eksport prognozi rejasi bajarilmagan. Shu jumladan, sanoat sohasida 53 ta korxona tomonidan prognoz koʻrsatkichlari bajarilmagan boʻlsa, 19 ta korxona tomonidan umuman eksport amalga oshirilmagan.

9. Viloyatda 54 ta boʻsh turgan davlat obyektidan samarali foydalanish boʻyicha zarur choralar koʻrilmagan, ularning asosiy qismi xalq taʼlimi tizimidagi obyektlar hisoblanadi. Jumladan:

12 ta boʻsh turgan obyektdan unumli foydalanish boʻyicha takliflar mavjud emas;

15 ta obyekt boʻyicha “yoʻl xaritalari” ishlab chiqilmaganligi bois ixtiyoriy ravishda boshqa tashkilotlar balansiga berib yuborilgan;

5 ta obyekt boʻyicha foydalanishga yaroqsizligi toʻgʻrisida Davlat arxitektura qurilish nazorati inspeksiyasidan xulosa olinib, buzish uchun tanlovga kiritilgan;

22 ta obyekt esa bugungi kunda ijaraga berilgan.

10. Kredit mablagʻlarini ajratish masalalari kechikayotganligi sababli 117 mlrd. 774,8 mln. soʻmlik 14 ta loyihani belgilangan muddatdan kechikib ishga tushirish xavfi mavjud. Xususan:

Agrosanoat majmui va oziq-ovqat taʼminoti sohasidagi loyihalarni amalga oshirish agentligiga resurs olish uchun 9 mlrd. 504 mln. soʻmlik 3 ta loyiha boʻyicha kredit yigʻma jildlari taqdim etilgan boʻlsa-da, hanuzgacha mablagʻ masalasi hal etilmagan.

Tijorat banklarining hududiy filiallari tomonidan bosh ofislariga 102 mlrd. 271,3 mln. soʻmlik 11 ta loyiha boʻyicha kredit yigʻma jildlari yuborilgan, biroq ular tomonidan hanuzgacha maʼqullanmaganligi sababli kredit mablagʻlari ajratilmagan.

Pandemiya tufayli xorijiy hamkor tomonidan uskunalar olib kelinmaganligi sababli 96,8 mlrd. soʻmlik 1 ta yirik loyiha ishga tushirilishi kechikmoqda. (“Pop sement” MChJ).

11. Viloyatda investitsiya dasturlari bajarilishi boʻyicha taqdim etilgan maʼlumotlarda tafovutlar mavjud. Masalan, hududiy investitsiya dasturi (2020-yil 7-iyuldagi № 02-0243) doirasida ishga tushirilgan 1 ming 270 ta loyihadan 19 tasi boʻyicha 29,8 mln. AQSh dollari miqdorida toʻgʻridan toʻgʻri investitsiya jalb qilinishi koʻzda tutilgan boʻlib, viloyat investitsiya boshqarmasi tomonidan ushbu reja 71,1 foizga (21,3 mln. AQSh dollari) bajarilganligi qayd etilgan.

Biroq mazkur xoʻjalik yurituvchi subyektlarning viloyat statistika boshqarmasiga taqdim etgan hisobotlariga asosan, haqiqatda jalb qilingan toʻgʻridan toʻgʻri investitsiyalar miqdori 16,5 mln. AQSh dollarini tashkil etgan va reja 55,2 foizga bajarilgan.

12. Namangan shahridagi “Namangan Qiangxing Investment” MChJ tomonidan amalga oshirilayotgan 70,0 mln. AQSh dollari miqdoridagi loyiha qurilishi uchun “Mulla Qirgʻiz” madrasasi yaqinida joylashganligi sababli Madaniyat vazirligidan tegishli xulosa olish jarayoni hal boʻlmayotganligi sababli qurilish jarayonlari kechikmoqda.

1. Viloyatda 2020-yilda 1 ming 900 gektar paxta maydonida tomchilatib sugʻorish texnologiyasini joriy qilish rejalashtirilgan boʻlib, amalda reja 57 foizga (1 ming 80 gektar) bajarilgan.

Uchqoʻrgʻon tumanida rejaga nisbatan 31 foiz (87 gektar), Namangan tumanida 39 foiz (65 gektar), Norin tumanida 62 foiz (112 gektar), Chust tumanida 74 foiz (89 gektar) paxta maydonida tomchilatib sugʻorish texnologiyasi joriy etilgan, xolos.

2. Oʻzbekiston Respublikasi Prezidentining 2020-yil 1-maydagi “Koronavirus pandemiyasi davrida oziq-ovqat xavfsizligini taʼminlash, mavjud resurslardan oqilona foydalanish, qishloq xoʻjaligini davlat tomonidan qoʻllab-quvvatlashning qoʻshimcha chora-tadbirlari toʻgʻrisida”gi PQ-4700-sonli qaroriga asosan Namangan viloyatida 2020-yilda foydalanishdan chiqib ketgan va yer osti suvlari zaxirasi mavjud boʻlgan 9 ming 959 gektar, shundan yer osti suvidan foydalanish hisobiga 8 ming 644 gektar yer maydonini oʻzlashtirish belgilangan. Amalda bugungi kungacha 2 ming 416 gektar (24 foiz) yer maydoni qayta foydalanishga kiritilgan, xolos.

Oʻzlashtirilishi rejalashtirilgan maydonning 2 ming 776 gektari (28 foizi) belgilangan irrigatsiya tadbirlari yakuniga yetkazilmaganligi, 4 ming 767 gektariga (48 foizi) talabgorlar boʻlmaganligi sababli foydalanishga kiritilmagan.

3. Qishloq xoʻjaligiga moʻljallangan suv resurslari va yerlardan foydalanish ustidan nazorat “Oʻzagroinspeksiya” Namangan viloyati boshqarmasi tomonidan amalga oshirilayotgan boʻlib, nazorat obyektining 90 foizi tadbirkorlik subyektlari, fermer xoʻjaliklari, klasster tashkilotlari va boshqalar hisoblanadi. Amaldagi tartibga koʻra, tadbirkorlik subyektlarida oʻtkazilayotgan tekshiruvlar “Tekshiruvlarni elektron roʻyxatga olish yagona tizimi”da roʻyxatga olingan holda oʻtkazilmoqda.

Bu esa, suv resurslari va yerlardan foydalanishda sodir etilayotgan qonunbuzarlik holatlarini joyida zudlik bilan bartaraf etish imkonini bermayapti. Natijada esa tabiiy resurslardan oʻzboshimchalik bilan nooqilona foydalanish holatlari ortib bormoqda.

4. Viloyatda umumiy hisobda 59,05 ming tonna asosiy turdagi qishloq xoʻjaligi mahsulotlarini maxsus tashkil etilgan muzlatgich va omborxonalarga zaxiraga jamgʻarish belgilangan boʻlib, amalda reja 89,5 foizga bajarilgan. Jumladan, rejaga nisbatan kartoshka 89,7 foiz (31,3 ming tonna), piyoz 95,6 foiz (13,3 ming tonna), sabzi 87,5 foiz (9,6 ming tonna), guruch 77,2 foiz (4,6 ming tonna) zaxiraga jamgʻarilgan.

5. Viloyat boʻyicha 2019-yilda 66 ta (163,4 gektar), 2020-yilning oʻtgan davri mobaynida 21 ta (19,23 gektar) holatda qishloq xoʻjaligiga moʻljallangan sugʻoriladigan ekin yerlari davlat organlari va tashkilotlari, fuqarolar hamda tadbirkorlik subyektlariga boshqa maqsadlar uchun doimiy va vaqtinchalik foydalanishga ajratib berilgan.

Biroq ushbu jarayonda yerdan oldingi foydalanuvchining koʻrgan zarari, shu jumladan, boy berilgan foyda miqdori hisoblanmagan hamda fermer xoʻjaligiga toʻlab berish choralari koʻrilmagan.

6. Viloyat boʻyicha jami 58 ta (Yangiqoʻrgʻon tumanida 22 ta, Kosonsoy tumanida 21 ta, Namangan tumanida 4 ta, Toʻraqoʻrgʻon tumanida 3 ta, Chust tumanida 3 ta, Uchqoʻrgʻon tumanida 2 ta, Pop tumanida 2 ta, Uychi tumanida 1 ta) holatda tuman hokimlari tomonidan vakolati boʻlmasa-da, qishloq xoʻjaligi foydalanishidagi sugʻoriladigan ekin yerlarni boshqa maqsadlar uchun fuqarolar va yuridik shaxslarga ajratib berish toʻgʻrisida tegishli qarorlar qabul qilingan.

Vaholanki, Oʻzbekiston Respublikasi Prezidentining 2019-yil 17-iyundagi “Qishloq xoʻjaligida yer va suv resurslaridan samarali foydalanish chora-tadbirlari toʻgʻrisida”gi PF-5742-son Farmonining 5-bandida sugʻoriladigan qishloq xoʻjaligi yerlari maxsus muhofazaga olinib, ushbu yerlarni qishloq xoʻjaligidan boshqa maqsadlarga, shu jumladan, sanoat va fuqarolik obyektlari (binolar va inshootlar) qurilishi uchun ajratilishiga yoʻl qoʻyilmasligi belgilangan.

7. 2020-yilning oʻtgan davri mobaynida jami 1 ming 198 ta holatda 1 ming 568 gektar, shundan 1 ming 467,5 gektar ekin (suvli) yerlar, 44,01 gektar koʻp yillik daraxtzorlar, 10,37 gektar yaylov va pichanzorlar hamda 46,34 gektar boshqa yerlar fuqarolar va tadbirkorlik subyektlari tomonidan oʻzboshimchalik bilan egallab olinganligi aniqlangan.

Biroq jismoniy va yuridik shaxslar tomonidan yerlarning oʻzboshimchalik bilan egallab olinishi natijasida ularni qishloq xoʻjaligi muomalasidan chiqishga sabab boʻlgan yetkazilgan zararlar vakolatli organlar tomonidan hisoblanmagan va yer uchastkalarini foydalanish uchun yaroqli holatga keltirish choralari koʻrilmagan.

1. Koʻp qavatli uylar atrofi boʻlgan 29 ta hududda bolalar maydonchasi mavjud emas, koʻp qavatli uylarga kirish yoʻlaklarining (tratuar) 30 ming 240 m² qismi taʼmirtalab ahvolda, 132 ta koʻp qavatli uyning 283 ta tashqi yoritish tizimi taʼmirga muhtoj. Shuningdek, koʻp qavatli uylarning 10 ming 315 p/m irrigatsiya tarmogʻi ishlamaydi.

2. Ogʻir toifadagi shirkatlarni boshqaruv tashkilotlariga oʻtkazish jarayonida shirkatlarning tijorat banklari oldidagi kredit qarzdorligi masalalari hal etilmagan. 2017 — 2020-yillarda koʻp kvartirali uylarni taʼmirlash maqsadida jalb qilingan tijorat banklarining kreditlarini qaytarish tizimini takomillashtirish talab etilmoqda.

3. Namangan tuman kanalizatsiya nasos stansiyasi 1984-yilda qurilgan boʻlib, hozirgi vaqtga qadar taʼmirlash ishlari olib borilmagan, Uchqoʻrgʻon tumani markazidagi 1985-yilda qurilgan suv tozalash inshooti sutkasiga 1 400 metr³ chiqindini qabul qilish va tozalash quvvatiga ega boʻlib, bugungi kunda sutkasiga 2 500 metr³ chiqindi qabul qilinayotganligi sababli tez-tez avariya holatlari yuzaga kelmoqda.

4. Viloyatda isteʼmolchilarni tabiiy gaz bilan taʼminlash gaz taqsimlash stansiyalari (GTS) orqali meʼyor boʻyicha 5-6 kg/sm² bosimda boʻlishi zarur, ammo hozirgi kunda oʻrtacha 1,5 — 2,0 kg/sm² bosimda tabiiy gaz bilan taʼminlanmoqda.

Buning oqibatida viloyatning barcha hududlarida tabiiy gaz tanqisligi kuzatilmoqda, jumladan, viloyat boʻyicha tabiiy gaz bilan taʼminlanadigan 380 ta MFY hududida yashovchi qariyb 176 mingta xonadondan 205 ta MFYdagi 55 mingga yaqin xonadonga tabiiy gaz yetib bormasligi holatlari vujudga kelgan.

5. Aholi xonadonlariga oʻrnatilgan zamonaviy aqlli hisoblagichlardan 3 ming 655 tasining dasturda ulash maʼlumotlari “Texnopark” MChJga isteʼmol qilingan gaz hajmlari dasturida aks ettirilishini taʼminlash uchun taqdim etilgan boʻlsa-da, dasturga integratsiya qilinmagan.

6. Elektr energiyasi boʻyicha viloyatning bir kunlik erkin isteʼmoli 17 mln. kVt.s tashkil etadi, ammo bugungi kunda bir kunda 14,9 mln. kVt.s elektr energiya yetkazib berilmoqda, yaʼni bir kunda oʻrtacha 2,1 mln. kVt.s elektr energiyasi yetishmovchiligi mavjud.

7. Oʻzbekiston Respublikasi Prezidentining 2018-yil 29-martdagi “2018 — 2022-yillarda Qoraqalpogʻiston Respublikasi, viloyatlar va Toshkent shahrida avtomobil koʻpriklari, yoʻl oʻtkazgichlar va boshqa sunʼiy inshootlarni qurish, rekonstruksiya qilish va toʻliq taʼmirlash Dasturini tasdiqlash toʻgʻrisida”gi PQ-3632-sonli qaroriga asosan Namangan shahrida qurilishi belgilangan davlat ahamiyatidagi 4R-117 “Turaqoʻrgʻon sh. — Namangan sh. — Chortoq sh. — Keskanyor q. — Sassiqsoy q.” avtomobil yoʻlining 20 km. va 4R-114 “Namangan sh. — Kosonsoy sh. — Qirgʻiziston Respublikasi chegarasi” avtomobil yoʻlining 3 km. kesishmasida, Namangan shahridagi Goʻzal va Hamroh koʻchalari kesishmasida yangi yoʻl oʻtkazgich (koʻprik) qurish boʻyicha amaliy ishlar boshlanmagan.

8. Toʻraqoʻrgʻon tumanidan oʻtuvchi 4R-112 Fargʻona halqa avtomobil yoʻlining Chust tumani chegarasidan boshlab Toʻraqoʻrgʻon tumani hududidan oʻtuvchi umumfoydalanishdagi 54 — 73 km (19km.) yoʻlning 2-toifali (54 — 66 km.lar 2 tasmali, 66 — 73 km.lar 4 tasmali) qismini rekonstruksiya qilish zarur.

9. Mingbuloq tumanidagi 4R-126 “Baliqchi — Mingbuloq — Nayman — Pungon” avtomobil yoʻlining 62 — 66 km. oraligʻi, 4R-260 “Jomashuy — Tegirmon — Navbahor” avtomobil yoʻlining 14 — 37 km. oraligʻi taʼmirga muhtoj ahvolda.

1. Viloyatda maktabgacha taʼlim tashkilotlariga 118 ming 331 nafar bolalar qamrab olingan boʻlib, qamrov koʻrsatkichi 51,9 foizni tashkil etadi. Ammo Kosonsoy (49,2 foiz), Chortoq (47,1 foiz) tumanlari, Namangan shahrida (45 foiz) qamrov koʻrsatkichi pastligicha qolmoqda.

Viloyatdagi jami 563 ta maktabgacha taʼlim tashkilotidan 136 tasi (24,1 foizi) kapital rekonstruksiyaga, 189 tasi (33,5 foizi) kapital taʼmirga, 69 tasi (12,2 foizi) joriy taʼmirga muhtoj. Shuningdek, ehtiyoj mavjud boʻlgan 182 ta (23,4 foiz) mahalla hududida maktabgacha taʼlim muassasasi mavjud emas.

2. Maktabgacha taʼlim tashkilotlarida faoliyat yuritayotgan pedagog kadrlarning 30 foizi oliy, 70 foizi oʻrta maxsus maʼlumotga ega, ularning 243 nafari (2,4 foizi) mutaxassis emas.

3. Bugungi kungacha maktablarga 83,9 foiz (1,9 mln. dona) darsliklar yetkazib berilgan, holbuki oʻquv yili boshlanishida maktablar 100 foiz darsliklar bilan taʼminlanishi zarur.

4. Uchqoʻrgʻon tumanining Qirgʻiziston davlati bilan chegara hududidagi “Obod” mahallasida maktab mavjud emasligi bois oʻquvchilar 5 km. uzoqlikda boʻlgan qoʻshni mahalladagi maktabga oʻqishga qatnamoqda.

5. Viloyatdagi oʻrta maxsus taʼlim muassasalarining 5 tasida isitish qozonlari jismonan va maʼnan eskirgan (Mingbuloq tumanidagi 1-, 2-son, Chortoq tumanidagi 2-son, Namangan shahridagi 2-son kasb-hunar maktablari, Fargʻona pedagogika instituti huzuridagi Toʻraqoʻrgʻon xizmat koʻrsatish hamda Oʻzbekiston jismoniy tarbiya va sport universiteti huzuridagi Uychi jismoniy tarbiya va sport texnikumlari).

6. Viloyatdagi 3 ta oliy taʼlim muassasasida jami 7 ming 600 ta yotoqxonaga ehtiyoj mavjud (Namangan davlat universitetida 4 mingta, Namangan muhandislik-qurilish institutida 2 ming 100 ta, Namangan muhandislik-texnologiya institutida 1 ming 500 ta).

7. Tashqi elektr tarmogʻini tortish ishlari Vazirlar Mahkamasining 2017-yil 17-yanvardagi 01-07/1-1057-sonli yigʻilish bayoniga asosan mahalliy budjet mablagʻlari hisobidan amalga oshirilishi nazarda tutilganligi uchun obyektlarning loyiha-smeta hujjatlariga tashqi elektr tarmogʻini tortish ishlari kiritilmagan, mahalliy budjetdan esa ushbu tadbirlar uchun mablagʻ ajratilmagan.

Shu bois foydalanishga tayyor holatda turgan baʼzi maktabgacha taʼlim muassasalarida hududiy elektr tarmoqlari korxonalari tomonidan doimiy elektr liniyasiga ulash ishlari amalga oshirilmagan, buning natijasida obyektlarni foydalanishga topshirishda asossiz kechikishlar paydo boʻlmoqda.

Jumladan, Mingbuloq tumanida 13-son, Norin tumanida 22-, 47-son, Pop tumanida 40-son, Uychi tumanida 12-son, 13-son maktabgacha taʼlim tashkilotlarida elektr transformator punktlari oʻrnatilgan boʻlsa-da, transformatorgacha keladigan tashqi elektr tarmogʻini tortish ishlari amalga oshirilmagan.

1. Viloyatda joriy yilning 10 oyida 2 ming 708 ta jinoyat sodir etilib, oʻtgan yilning shu davriga nisbatan 788 taga yoki 41 foizga ortgan. Jumladan, ogʻir va oʻta ogʻir turdagi jinoyatlar 88 taga (463 — 551), qotillik 5 taga (19 — 24), qasddan badanga ogʻir shikast yetkazish 11 taga (41 — 52), talonchilik 4 taga (14 — 18), bosqinchilik 9 taga (5 — 14), oʻgʻirlik 60 taga (314 — 374), firibgarlik 149 taga (209 — 358), bezorilik 87 taga (51 — 138), oʻrtacha ogʻir tan jarohati yetkazish 65 taga (19 — 84), yengil tan jarohati yetkazish 91 taga (24 — 115) koʻpaygan.

2. Noaniq sharoitda sodir etilgan 547 ta jinoyatning 123 tasi (22,4 %) fosh etilmagan, ular Namangan shahrida 44 tani, Yangiqoʻrgʻon tumanida 13 tani, Uychi, Uchqoʻrgʻon va Chortoq tumanlarida 10 tadan, Norin tumanida 9 tani, Kosonsoy va Toʻraqoʻrgʻon tumanlarida 7 tadan, Namangan tumanida 4 tani, Mingbuloq, Pop va Chust tumanlarida 3 tadan tashkil etadi. Viloyatdagi 775 ta mahallaning 76 tasida jinoyat soni ortib ketgan.

3. 2019-yil va joriy yilning 10 oyi davomida prokuratura organlari tomonidan 159 ta holatda 211 nafar mansabdor shaxsga nisbatan korrupsiyaga oid jinoyat ishlari qoʻzgʻatilib, tergov harakatlari olib borilgan. Mazkur jinoyatlarning 27 tasini poraxoʻrlik, 132 tasini mansabni suiisteʼmol qilish tashkil qiladi.

Ushbu sohada tergov qilingan jinoyatlarning idoralar kesimida tahliliga koʻra, 1 nafar hokim oʻrinbosari, 2 nafar MIB, 7 nafar IIV va 1 nafar Mudofaa vazirligi quyi tizimlari, 1 nafar Milliy gvardiya, 6 nafar bandlik, 8 nafar oliy va oʻrta maxsus taʼlim, 22 nafar xalq taʼlimi, 6 nafar maktabgacha taʼlim, 8 nafar qishloq xoʻjaligi sohasi, 2 nafar yer-geodezkadastr tizimi, 5 nafar boshqa davlat organlari, 10 nafar bank, 16 nafar davlat ulushi boʻlgan xoʻjalik yurituvchi subyekt, 89 nafar davlat ulushi boʻlmagan xoʻjalik yurituvchi subyekt, 27 nafar nodavlat notijorat tashkiloti rahbarlari va xodimlari jinoiy javobgarlikka tortilgan.

1. Adliya organlari tomonidan 2019-yilda 5 ta, 2020-yilda 2 ta normativ-huquqiy tusdagi qaror loyihalari belgilangan talablarga rioya qilinmay taqdim qilinganligi sababli ekspertizadan oʻtkazilmasdan qaytarilgan.

Ayrim hollarda normativ tusdagi hujjatlar tegishli adliya organi tomonidan huquqiy ekspertizadan oʻtkazilmasdan noqonuniy ravishda qabul qilingan. Xususan, 2019-yilda 73 ta, 2020-yilning oʻtgan davrida 7 ta normativ tusdagi qaror va farmoyishlar adliya organlarida huquqiy ekspertizadan oʻtkazilmasdan qabul qilinganligi aniqlanib, kiritilgan taqdimnomalarga asosan bekor qilinishi taʼminlangan.

2. 2019-yilda davlat hokimiyati va boshqaruvi organlari tizimida korrupsiyaning kelib chiqishiga, boshqa huquqbuzarliklar sodir etilishiga sharoit yaratib beradigan, shuningdek tadbirkorlik subyektlari uchun ortiqcha maʼmuriy va boshqa cheklovlarni joriy qiladigan qoida va normalarni, tadbirkorlik subyektlarida asossiz xarajatlarni vujudga keltiruvchi qoidalar mavjud boʻlgan viloyat hokimining 128 ta qarori va 3 ta farmoyishini, Xalq deputatlari viloyat kengashining 6 ta qarorini qonunchilik normalariga muvofiqlashtirish va bekor qilish toʻgʻrisida taklif kiritilgan.

1. 2020-2021-yillar davomida Chust tumanidagi “Varzik”, Uychi tumanidagi “Jiydakapa” madaniyat markazlarini taʼmirlash va jihozlash boʻyicha ishlar mablagʻ ajratilmaganligi bois boshlanmagan.

2. Viloyatdagi 20 ta bolalar musiqa va sanʼat maktabini jami 750 dona oʻquv (qoʻllanmalar, notalar) darsliklari hamda 867 ta oʻzbek va yevropa cholgʻu asboblari bilan taʼminlash ishlari yakunlanmagan.

Xalq deputatlari mahalliy Kengashlari faoliyatini toʻgʻri va samarali tashkil etish, deputatlik nazoratini taʼminlash, sessiyalarda mahalliy hokimiyat organlari rahbarlarining hisobot va axborotlarini eshitish borasida ayrim kamchiliklar mavjud. Jumladan:

1. Mahalliy hokimiyat organlari rahbarlarining mahalliy Kengashlar sessiyalarida hisobotlarini eshitib borish tizimli yoʻlga qoʻyilmagan. Xususan, tuman hokimlarining baʼzi oʻrinbosarlari, moliya, soliq organlari rahbarlarining har chorakda hisobotlari eshitib borilmagan.

2. Mahalliy Kengashlar deputatlari tomonidan ijro hokimiyati organlari rahbarlariga kiritilgan deputat soʻrovlariga belgilangan muddatda javob bermaslik holatlari mavjud. Masalan, Chust tuman Kengashi deputati Gʻ. Ergashevning 2020-yil 2-fevralda tuman ekologiya va atrof muhitni muhofaza qilish sohasidagi nazorat boʻyicha inspeksiyasi boshligʻiga, deputat Sh. Madalimovning 2020-yil 17-fevralda tuman elektr taʼminoti boʻlimi boshligʻiga, 2020-yil 11-mart kuni tuman gaz taʼminoti boʻlimi rahbariga kiritgan deputat soʻrovlariga javob berilmagan.

3. Mahalliy Kengashlar deputatlarining oʻz deputatlik faoliyatini tashkil etishlari, Kengash sessiyalariga tayyorgarlik koʻrishlari, aholi murojaatlari bilan ishlashlari uchun shart-sharoit yaratish maqsadida “deputatlar xonalari” tashkil etish borasidagi ishlar ayrim tumanlarda qoniqarli emas.

Oʻrganish davomida mahalliy Kengashlar deputatlari bilan muloqotlar olib borildi, ularga faoliyatni toʻgʻri tashkil etish boʻyicha tavsiyalar berildi, mavjud kamchiliklarni bartaraf etish yuzasidan amaliy yordam koʻrsatildi.