O‘zbekiston Respublikasi Prezidentining “O‘zbekiston Respublikasi sog‘liqni saqlash tizimini tubdan takomillashtirish bo‘yicha kompleks chora-tadbirlar to‘g‘risida” 2018-yil 7-dekabrdagi PF-5590-son Farmoni ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Davlat budjeti mablag‘lari hisobidan qoplanadigan tibbiy yordamning kafolatlangan hajmlari ro‘yxatini shakllantirish tartibi to‘g‘risidagi nizom ilovaga muvofiq tasdiqlansin.

2. Belgilansinki, O‘zbekiston Respublikasi Sog‘liqni saqlash vazirligi O‘zbekiston Respublikasi Moliya vazirligi hamda Iqtisodiyot va sanoat vazirligi bilan kelishilgan holda, O‘zbekiston Respublikasi Davlat budjeti mablag‘lari hisobidan qoplanadigan tibbiy yordamning kafolatlangan hajmlari ro‘yxatini (keyingi o‘rinlarda Ro‘yxat deb ataladi) shakllantiruvchi vakolatli organ hisoblanadi.

Ro‘yxatga muvofiq tibbiy yordamning kafolatlangan hajmlari O‘zbekiston Respublikasi Davlat budjetining tegishli moliya yili uchun “Sog‘liqni saqlash” moddasi bo‘yicha ajratiladigan mablag‘lari doirasida moliyalashtirilishi belgilab qo‘yilsin.

3. O‘zbekiston Respublikasi Sog‘liqni saqlash vazirligi:

2019-yil 20-dekabrgacha bo‘lgan muddatda Ro‘yxatni ishlab chiqsin va Sog‘liqni saqlash vazirligining rasmiy veb-saytida 31-dekabrgacha joylashtirsin hamda ularni kelgusi yillarda ham shu muddatlarda har yili yangilab borsin;

respublikaning barcha davlat tibbiyot muassasalarida Ro‘yxatdan tegishli ko‘chirmalar (davlat tilida va rus tilida) mazkur muassasalar faoliyati ixtisosligiga muvofiq har yili 31-dekabrgacha majburiy joylashtirilishini ta’minlasin;

manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari A.A. Abduxakimov va O‘zbekiston Respublikasi sog‘liqni saqlash vaziri A.K. Shadmanov zimmasiga yuklansin.

1. Ushbu Nizom “Fuqarolar sog‘lig‘ini saqlash to‘g‘risida”gi O‘zbekiston Respublikasi Qonuniga, O‘zbekiston Respublikasi Prezidentining “O‘zbekiston Respublikasi sog‘liqni saqlash tizimini tubdan takomillashtirish bo‘yicha kompleks chora-tadbirlar to‘g‘risida” 2018-yil 7-dekabrdagi PF-5590-son Farmoniga muvofiq O‘zbekiston Respublikasi Davlat budjeti mablag‘lari hisobidan qoplanadigan tibbiy yordamning kafolatlangan hajmlari ro‘yxatini (keyingi o‘rinlarda Ro‘yxat deb ataladi) shakllantirish tartibini belgilaydi.

2. Ushbu Nizom O‘zbekiston Respublikasi Sog‘liqni saqlash vazirligi tuzilmasiga kiradigan tibbiy tashkilotlarda tibbiy yordam ko‘rsatishga tatbiq etiladi.

3. Ro‘yxat O‘zbekiston Respublikasi Davlat budjetining tegishli moliya yili uchun “Sog‘liqni saqlash” moddasi bo‘yicha nazarda tutilgan mablag‘lari doirasida tuziladi va tasdiqlanadi.

4. Ushbu Nizomda quyidagi asosiy tushunchalardan foydalaniladi:

tibbiy yordamning kafolatlangan hajmlari — aholiga O‘zbekiston Respublikasi Davlat budjeti mablag‘lari hisobidan qonunchilikda belgilangan tartibda ko‘rsatiladigan tibbiy yordam;

tibbiy yordam — inson salomatligi holatini baholash va unga tibbiy ta’sir ko‘rsatish, shu jumladan tibbiyot xodimlari tomonidan profilaktika qilish, tashhis qo‘yish, davolash, reabilitatsiya qilish va palliativ tibbiy yordam ko‘rsatish bo‘yicha kompleks tadbirlar;

tibbiy xizmat — profilaktika qilish, tashhis qo‘yish, davolash, reabilitatsiya qilishga qaratilgan, shuningdek, homiladorlik va tug‘ish vaqtida ko‘rsatiladigan, mustaqil yakunlangan ahamiyat va qiymat xususiyatiga ega bo‘lgan harakat yoki harakatlar to‘plami;

kechiktirib bo‘lmaydigan tibbiy yordam — bemor hayotiga xavf soladigan aniq belgilari bo‘lmagan to‘satdan kuchli kasalliklarda, holatlarda va surunkali kasalliklar kuchayganda ko‘rsatiladigan tibbiy yordam turi;

tez tibbiy yordam — bemor hayotiga xavf soladigan to‘satdan kuchli kasalliklarda, holatlarda va surunkali kasalliklar kuchayganda shoshilinch ko‘rsatiladigan tibbiy yordam turi;

shoshilinch tibbiy yordam — kasalliklarga chalinganda, baxtsiz hodisalar yuz berganda, jarohat olganda, zaharlanganda va tez tibbiy aralashuv har qanday sharoitda ko‘rsatilishini talab qiladigan boshqa holatlarda ko‘rsatiladigan tibbiy yordam turi. Shoshilinch tibbiy yordam kechiktirib bo‘lmaydigan va tez tibbiy yordamni o‘z ichiga oladi;

rejali tibbiy yordam — profilaktika tadbirlari o‘tkazishda, bemor hayotiga xavf solmaydigan, shoshilinch va kechiktirib bo‘lmaydigan tibbiy yordam talab qilmaydigan kasalliklar va holatlarda ko‘rsatiladigan tibbiy yordam turi. Bunday yordamning muayyan vaqt kech ko‘rsatilishi bemor hayotining yomonlashishiga, hayoti va sog‘lig‘i xavf ostida qolishiga sabab bo‘lmaydi;

palliativ tibbiy yordam — bedavo dardga chalingan bemorlarning hayotini yaxshilash maqsadida og‘riqdan xalos qilishga va kasallikning boshqa og‘ir ko‘rinishlarini yengillashtirishga qaratilgan tibbiy aralashuvlar kompleksini ifoda etadigan tibbiy yordam turi;

birlamchi tibbiy-sanitariya yordami — ambulatoriya sharoitida ko‘rsatiladigan va profilaktika qilish, tashhis qo‘yish, kasalliklarni davolash, homiladorlik kechishini kuzatish, sog‘lom turmush tarzini shakllantirish va aholini sanitariya-gigiyena xususida xabardor qilish bo‘yicha tadbirlarni o‘z ichiga oladigan tibbiy yordam turi;

klinik bayonnoma — muayya sindromli aniq bir kasallikka chalinganda yoki tibbiyot tashkilotidagi muayyan klinik vaziyatda bemorga tibbiy yordam ko‘rsatishga qo‘yilgan minimal talablarni belgilovchi normativ hujjat;

tibbiy yordamning sifat standarti — muayyan vaqt davomida tibbiy yordam darajasiga erishishni aks ettiruvchi normalar, qoidalar va talablar to‘plamini o‘z ichiga oladigan hujjat. Tibbiy yordamning sifat standartlari tibbiy faoliyat bilan shug‘ullanadigan tashkilotlar uchun majburiy hisoblanadi va ular tomonidan tibbiy yordam ko‘rsatishda rejalashtirish va iqtisodiy hisob-kitoblar uchun foydalaniladi;

ixtisoslashgan tibbiy yordam — maxsus usullar va murakkab tibbiyot texnologiyalaridan foydalanishni talab qiladigan kasalliklar va holatlarni profilaktika qilish, tashhis qo‘yish va davolashni (shu jumladan homiladorlik, tug‘ish davrida va tug‘ishdan keyingi davrda), shuningdek, tibbiy reabilitatsiya qilishni o‘z ichiga oladigan tibbiy yordam turi;

yuqori texnologik tibbiy yordam — yangi murakkab va (yoki) davolashning noyob usullarini, shuningdek, samaradorligi ilmiy isbotlangan davolashning resurs tejaydigan usullarini, shu jumladan tibbiyot fani va ilm-fan hamda texnikaning o‘zaro bog‘langan tarmoqlari yutuqlari asosida ishlab chiqilgan hujayrali texnologiyalarni, robotlashtirilgan texnikani, axborot texnologiyalarini va gen injeneriyasini o‘z ichiga olgan ixtisoslashgan tibbiy yordam turi.

5. Quyidagilar tibbiy yordamning kafolatlangan hajmlarini aniqlash prinsiplari hisoblanadi:

aholining barcha qatlamlari tibbiy yordamdan foydalana olishi;

birlamchi tibbiy-sanitariya yordam tibbiyot muassasalarida ko‘rsatiladigan profilaktika chora-tadbirlari va tibbiy xizmatlar ustuvorligi;

tibbiy xizmat turlarining tibbiyot muassasalari darajalari bo‘yicha tabaqalanishi, shuningdek, ko‘rsatiladigan tibbiy xizmatlarning murakkabligiga qarab ularni ko‘rsatish izchilligi;

tibbiy xizmatlardan foydalanish va ularni taqdim etish jarayoning oshkoraligi.

6. Ro‘yxatga tibbiy yordamning kafolatlangan hajmlarini kiritishda quyidagi mezonlarga rioya etilishini ta’minlash kerak:

moliyalashtirishda aholi salomatligi ko‘rsatkichlarining yuqori darajasiga erishishni, 2019 — 2025-yillarda O‘zbekiston Respublikasi sog‘liqni saqlash tizimini rivojlantirish konsepsiyasini amalga oshirish samaradorligining maqsadli ko‘rsatkichlarini bajarishni ta’minlaydigan tibbiy yordam turlariga ko‘proq e’tibor beriladi;

tibbiy yordamning kafolatlangan hajmlari ustuvor tartibda profilakatika, reabilitatsiya tadbirlari va palliativ yordam xizmatlarini qamrab olishi, shuningdek, o‘lim va nogironlik ko‘rsatkichlari bo‘yicha yetakchi bo‘lgan asosiy kasalliklarning oldini olish va ularni davolashga qaratilgan bo‘lishi kerak.

7. Ro‘yxat har yili O‘zbekiston Respublikasi Sog‘liqni saqlash vazirligi tomonidan O‘zbekiston Respublikasi Moliya vazirligi hamda Iqtisodiyot va sanoat vazirligi bilan kelishilgan holda, tegishli moliya va rejali davr uchun Davlat budjeti parametrlari tasdiqlangandan keyin 15 kundan kechikmay ishlab chiqiladi va tasdiqlanadi.

8. Ro‘yxat tibbiy yordamning quyidagi turlari bo‘yicha shakllantiriladi:

shoshilinch tibbiy yordam;

rejali tibbiy (shu jumladan birlamchi tibbiy-sanitariya) yordam;

ixtisoslashgan (shu jumladan yuqori texnologik) tibbiy yordam;

palliativ tibbiy yordam.

9. Ro‘yxatga tibbiy xizmatlarning aniq turlari, shu jumladan dori-darmonlar, sarflash materiallari va tibbiyot buyumlari bilan ta’minlash kiritiladi.

10. Tibbiy yordamning kafolatlangan hajmlarini shakllantirishda shoshilinch tibbiy yordam hajmi cheklanishi mumkin emasligi hisobga olinadi. Bunda bila turib yolg‘on shoshilinch yordam so‘rab qo‘ng‘iroq qilgan shaxslar va xuddi shuningdek uni ko‘rsatishni asossiz rad etgan shaxslar belgilangan tartibda ma’muriy javobgarlikka tortiladi.

11. Ro‘yxat tibbiy xizmatlar turlari va hajmlari belgilab olingan holda, tibbiyot tashkilotlari darajasi bo‘yicha shakllantiriladi.

Klinik bayonnomalar, shuningdek, tibbiy yordamning sifat standartlari O‘zbekiston Respublikasi Sog‘liqni saqlash vazirligi tomonidan belgilangan tartibda tasdiqlanadi.

12. Ro‘yxatni shoshilinch tibbiy yordam hajmlari bo‘yicha shakllantirishda quyidagi harajat turlari hisobga olinadi:

transport harajatlari, shu jumladan bemorlarni shoshilinch yordam ko‘rsatiladigan joyga, shuningdek, shoshilinch yoki kechiktirib bo‘lmaydigan ko‘rsatmalar bo‘yicha bir tibbiyot muassasasidan ikkinchisiga transportda olib borish, tashhis qo‘yish, davolash, shu jumladan dori-darmonlar va tibbiyot buyumlari bilan ta’minlash;

shoshilinch va kechiktirib bo‘lmaydigan ko‘rsatkichlar bo‘yicha statsionarda bo‘lish;

shoshilinch va kechiktirib bo‘lmaydigan holatlar bo‘yicha statsionarda bo‘lish davrida ovqatlanish.

13. Ro‘yxatni birlamchi tibbiy-sanitariya yordami mutaxassislari va ixtisoslashgan mutaxassislar tomonidan ambulatoriya sharoitlarida va kunduzgi statsionar sharoitlarda ko‘rsatiladigan rejali tibbiy yordam hajmlari bo‘yicha shakllantirishda quyidagi harajatlar hisobga olinadi:

a) katta yoshli aholini bir yilda ikki marta, endi turmush quradiganlarni profilaktik tibbiy ko‘rikdan o‘tkazish, davlat budjet tashkilotlarining xodimlarini birlamchi va davriy tibbiy ko‘rikdan o‘tkazish;

b) ijtimoiy ahamiyatga ega kasalliklar va atrofdagilar uchun xavf soladigan kasalliklardan aziyat chekayotgan fuqarolarni, shuningdek, surunkali kasalliklarga aziyat chekayotgan shaxslarni dispanserda kuzatish;

v) chaqiruv komissiyalari yo‘llanmalari bo‘yicha chaqiruv yoshidagi (18 — 27 yosh) shaxslarni tekshirish va davolash;

g) onalar va bolalarga tibbiy yordam ko‘rsatish, shu jumladan:

homilador ayollarni homiladorlik yoki gestatsiya davomida (kamida 7-marta) o‘tkaziladigan organizmning bo‘yida bo‘lishdan boshlab tug‘ilgunicha qorin ichida normal rivojlanshini ta’minlash maqsadida amalga oshiriladigan kompleks tashhis qo‘yish, davolash va profilaktika tadbirlarini nazarda tutuvchi vantenatal (tug‘ishgacha) parvarish qilish;

homila anomal o‘sishining oldini olish uchun 16 — 20 haftalik muddatlarda homiladorlarning xavfli guruhini skrining tekshirish;

homiladorlarga OIV-infeksiyasi xususida maslahat berish va tekshirish;

tug‘dirish;

chaqaloqlarda irsiy va tug‘ma kasalliklarni erta aniqlash hamda o‘z vaqtida davolash maqsadida ularni neonatal skrining yoki ommaviy tekshirish;

chaqaloqlarni va 1 yoshga to‘lmagan bolalarni audiologik skrining tekshirish;

tug‘ilgandan keyin 42 kun davomida parvarishlash va maslahat berish;

O‘zbekiston Respublikasi Milliy emlash taqvimiga muvofiq emlash;

18 yoshga to‘lmagan bolalarni tekshirish va davolash;

oilani rejalashtirish masalalari yuzasidan maslahat berish.

14. Ro‘yxat belgilangan tartibda beriladigan yo‘llanmalar bo‘yicha tuman, shahar, viloyat, respublika darajasidagi tashkilotlarda statsionar sharoitlarda ko‘rsatiladigan ixtisoslashgan (shu jumladan yuqori texnologik) tibbiy yordam bo‘yicha tasdiqlangan hajmlar doirasida tibbiy xizmatlar ko‘rsatish navbatini qayd etadigan elektron axborot tizimlaridan foydalangan holda kvotalash orqali tartibga solinadi.

15. Ro‘yxatni palliativ yordam hajmlari bo‘yicha shakllantirishda quyidagi harajat turlari hisobga olinadi:

a) zarur hajmlarda dori-darmonlar va tibbiyot buyumlari bilan ta’minlash;

b) statsionar/xospisda bo‘lish bilan bog‘liq xarajatlar (koyka-o‘rinni ta’minlash);

v) belgilangan normalarga muvofiq ovqatlanish.

16. Jismoniy shaxslarning quyidagi toifalari tibbiy ko‘rsatmalar bo‘lganda asoslantirilgan murojaatlar bilan Ro‘yxatga kiritilgan tibbiy yordamni olish huquqiga ega:

O‘zbekiston Respublikasi fuqarolari;

O‘zbekiston Respublikasi hududida muqim yashaydigan chet el fuqarolari va fuqaroligi bo‘lmagan shaxslar;

chet el fuqarolari.

17. Ushbu Nizom talablarini buzganlikda aybdor shaxslar qonunchilikda nazarda tutilgan tartibda javobgar bo‘ladi.