O‘zbekiston Respublikasi Prezidentining “Xususiy tadbirkorlikda tashabbus ko‘rsatish va uni rag‘batlantirish to‘g‘risida”gi Farmonini bajarish hamda chorvachilikda iqtisodiy islohotlarni chuqurlashtirish maqsadida Vazirlar Mahkamasi qaror qiladi:

1. Qoraqalpog‘iston Respublikasi Vazirlar Kengashi, viloyatlar va tumanlar hokimliklari O‘zbekiston Respublikasi Qishloq xo‘jaligi vazirligiga, “O‘zmevasabzavotuzumsanoat” uyushmasi, O‘zbekiston qishloq xo‘jaligi fanlari akademiyasi Davlat mulki qo‘mitasi bilan birgalikda 1995-yil oxirigacha, qonunchilikda belgilangan tartibda, chorvachilik mahsulotlari yetishtirishga ixtisoslashtirilmagan xo‘jaliklar chorvachilik fermalarining xususiylashtirilishini ta’minlasinlar.

2. Chorvachilik fermalarini xususiylashtirishni amalga oshirish uchun tegishli xo‘jaliklarda tuman hokimliklari, xo‘jaliklar, qishloq xo‘jaligi organlari va jamoatchilik vakillaridan iborat tarkibda maxsus komissiyalar tuzilsin.

3. Qishloq xo‘jaligi vazirligiga, Davlat mulki qo‘mitasi, Moliya vazirligi va Adliya vazirligi bilan birgalikda ikki hafta muddatda:

chorva mollari, binolar va asbob-anjomlarni tanlov — kimoshdi savdosi asosida sotish;

yer maydonlarini umrbod egalik qilish uchun yangi mulkdorlarga sotish;

chorva mollari va boshqa mulklar qiymatini to‘lash muddatini uzaytirish tartibini ishlab chiqsin va tasdiqlasin.

4. O‘zbekiston Respublikasi Qishloq va suv xo‘jaligi vazirligi, Qoraqalpog‘iston Respublikasi Vazirlar Kengashi, viloyatlar va tumanlar hokimliklari xususiylashtirilgan fermalarga chorva ozuqasi yetishtirish uchun, har bir xo‘jalikning aniq tabiiy-iqtisodiy hududlarini va yer resurslarini hisobga olgan holda, shartli har bosh mol hisobiga Andijon, Farg‘ona, Namangan, Toshkent, Xorazm va Samarqand viloyatlarida 0,3 gektardan, Qoraqalpog‘iston Respublikasida va boshqa viloyatlarda 0,45 gektardan sug‘oriladigan yerlar, lalmi yerlarda esa 2 gektardan yer ajratsinlar.

5. O‘zbekiston Respublikasi Qishloq xo‘jaligi vazirligi, “O‘zmevasabzavotuzumsanoat” uyushmasi, O‘zbekiston qishloq xo‘jaligi fanlari akademiyasi, Qoraqalpog‘iston Respublikasi Vazirlar Kengashi va viloyatlar hokimliklari chorvachilik fermalarini xususiylashtirishda yangi mulkdorlarning ulush qo‘shib qatnashishlari asosida mavjud kommunikatsiyalar, ozuqa sexlari, transport vositalari va qishloq xo‘jaligi texnikasi negizida shirkatlar tashkil etishni nazarda tutsinlar.

Xususiylashtirilgan fermalarga 1995-yilda Qishloq xo‘jaligi vazirligi, “O‘zmevasabzavotuzumsanoat” uyushmasi va O‘zbekiston qishloq xo‘jaligi fanlari akademiyasi limitlari hisobiga davlat resurslaridan paxta shroti ajratish bo‘yicha topshiriq 2-ilovaga* muvofiq tasdiqlansin.

6. Xususiylashtirilgan fermalar, fermer va dehqon xo‘jaliklaridagi mahsuldor mollar podasini muntazam yangilab borish maqsadida naslchilik zavodlari va xo‘jaliklarining ro‘yxati 3-ilovaga muvofiq tasdiqlansin.

O‘zbekiston Respublikasi Qishloq xo‘jaligi vazirligiga Qoraqalpog‘iston Respublikasi Vazirlar Kengashi va viloyatlar hokimliklari, respublikaning manfaatdor tashkilotlari bilan kelishgan holda, ikki hafta muddatda, ixtisoslashtirilgan naslchilik xo‘jaliklari ro‘yxatini aniqlasin va tasdiqlasin hamda Andijon, Namangan, Samarqand, Toshkent va Farg‘ona viloyatlarida yangi naslchilik zavodlari va xo‘jaliklari tashkil etish to‘g‘risida taklif kiritsin.

7. O‘zbekiston Respublikasi Qishloq xo‘jaligi vazirligi, “O‘zistiqbolstat” davlat qo‘mitasi, Moliya vazirligi bir oy muddatda Vazirlar Mahkamasiga:

chorva naslchiligini davlat tomonidan qo‘llab-quvvatlash, uni Davlat resurslaridan omixta yem bilan ta’minlash chora-tadbirlari to‘g‘risida;

Qishloq xo‘jaligi vazirligi huzurida Chorvachilikda naslchilik ishlari bo‘yicha davlat inspeksiyasi tashkil etish to‘g‘risida takliflar kiritsinlar.

8. O‘zbekiston Respublikasi Qishloq xo‘jaligi vazirligi, “O‘zqishloqxo‘jalikta’minottuzatish” davlat-kooperativ qo‘mitasi, Qoraqalpog‘iston Respublikasi Vazirlar Kengashi, viloyatlar hokimliklari chorvachilikda zooveterinariya punktlari va texnik servis stansiyalari tarmog‘ini rivojlantirishni hamda ularning moddiy-texnika bazasini mustahkamlashni ta’minlasinlar.

9. “O‘zgo‘shtsutsanoat” va “O‘zbeksavdo” davlat uyushmalari, boshqa tayyorlov tashkilotlari fermyerlar, xo‘jaliklar va aholidan chorvachilik mahsulotlarini tuzilgan shartnomalar bo‘yicha bevosita joyning o‘zida qabul qilib olishni amalga oshirsinlar.

10. “O‘zdavneftmahsulot” birlashmasi, “O‘zqishloqxo‘jalikta’minottuzatish” davlat-kooperativ qo‘mitasi va Qishloq xo‘jaligi vazirligi xususiylashtirilgan chorvachilik fermalari va dehqon (fermer) xo‘jaliklari ehtiyojlari uchun 1995-yilda vazirlik fondidan yonilg‘i-moylash materiallarini 4-ilovaga* muvofiq miqdorlarda ajratsinlar.

11. O‘zbekiston Respublikasi Moliya vazirligi, Davlat soliq qo‘mitasi, Qishloq xo‘jaligi vazirligi mahsulot yetishtirish uchun qulay shart-sharoitlar yaratish va uni yanada ko‘paytirishni ta’minlash maqsadida bir oy muddatda chorvachilik mahsulotlari yetishtiruvchi xususiylashtirilgan fermalar, dehqon (fermer) xo‘jaliklari va aholidan soliq olishni takomillashtirish bo‘yicha takliflar kiritsinlar.

12. Belgilab qo‘yilsinki, xususiylashtirilgan fermalarni, fermer xo‘jaliklarini moliyaviy qo‘llab-quvvatlash “Mikrokreditbank” aksiyadorlik-tijorat banki va uning joylardagi muassasalari faoliyatining ustuvor yo‘nalishi hisoblanadi.

13. Davlat mulki qo‘mitasi kichik va o‘rta tadbirkorlikni rivojlantirishga ko‘maklashuvchi jamg‘armadan fermer xo‘jaliklarini qo‘llab-quvvatlash uchun mablag‘lar ajratishni nazarda tutsin.

14. “O‘zistiqbolstat” davlat qo‘mitasi O‘zbekiston Respublikasi qishloq xo‘jaligi vazirligi, boshqa vazirliklar va idoralar, Qoraqalpog‘iston Respublikasi Vazirlar Kengashi hamda viloyatlar hokimliklari bilan birgalikda ikki oy muddatda aholi xo‘jaliklari va fermer xo‘jaliklaridagi chorva mollarini hamda chorvachilik mahsulotlari yetishtirishni statistik hisobga olish tartibini ishlab chiqsin va joriy etsin.

15. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari I. Jo‘rabekov zimmasiga yuklansin.