Dunyo xalqlarining sirk san’ati yutuqlaridan bahramand bo‘lish, o‘zbek milliy sirk san’atini asrab-avaylash va rivojlantirish, uning obro‘-e’tiborini, san’at sohasidagi o‘rni va jamiyat taraqqiyotidagi ahamiyatini oshirish, xalqlar o‘rtasida madaniy aloqalarni mustahkamlash, shuningdek, Vazirlar Mahkamasining “O‘zbek sirk san’atini yanada rivojlantirish va “O‘zbek davlat sirki” davlat muassasasi faoliyatini qo‘llab-quvvatlash chora-tadbirlari to‘g‘risida” 2019-yil 23-yanvardagi 55-son qarori ijrosini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Madaniyat vazirligi hamda Toshkent shahar hokimligining “Xalqaro sirk san’ati” festivalini (keyingi o‘rinlarda Festival deb ataladi) 2021-yildan boshlab har ikki yilda bir marotaba noyabr oyida Toshkent shahrida o‘tkazish to‘g‘risidagi taklifi ma’qullansin.

2. “Xalqaro sirk san’ati” festivalini o‘tkazish tartibi to‘g‘risidagi nizom ilovaga muvofiq tasdiqlansin.

3. O‘zbekiston Respublikasi Madaniyat vazirligi va Toshkent shahar hokimligi Festivalni tashkil etish va o‘tkazish bo‘yicha mas’ul etib belgilansin.

4. O‘zbekiston Respublikasi Madaniyat vazirligi va Toshkent shahar hokimligiga:

manfaatdor vazirliklar va idoralar bilan birgalikda Festivalga tayyorgarlik ko‘rish va uni o‘tkazish bo‘yicha tadbirlar rejasini ishlab chiqish, tasdiqlash hamda Festivalni o‘tkazish uchun homiylik xayriyalarini jalb etish choralarini ko‘rish;

Festival sovrindorlariga topshiriladigan diplom, sertifikat, statuetka namunalarini ishlab chiqish va tasdiqlash;

Festivalni tashkil etish va o‘tkazish bilan bog‘liq boshqa masalalarni hal etish vazifalari yuklansin.

5. Toshkent shahar hokimligi “O‘zbek davlat sirki” davlat muassasasi binosining atrofidagi hududlarda obodonlashtirish va ko‘kalamzorlashtirish ishlari amalga oshirilishini ta’minlasin.

6. O‘zbekiston Respublikasi Madaniyat vazirligi Axborot texnologiyalari va kommunikatsiyalarini rivojlantirish vazirligi, Turizmni rivojlantirish davlat qo‘mitasi bilan birgalikda bir oy muddatda Festival veb-saytini tayyorlab, Internet jahon axborot tarmog‘iga joylashtirilishini hamda muntazam ravishda yangiliklar, fotosuratlar, audio va video materiallar bilan yangilab borilishini ta’minlasin.

7. Festivalni tashkil etish va o‘tkazish bilan bog‘liq xarajatlarning quyidagi manbalar hisobidan amalga oshirilishi belgilansin:

50 foizi — O‘zbekiston Respublikasi Madaniyat vazirligi huzuridagi Madaniyat va san’atni rivojlantirish jamg‘armasi mablag‘lari;

50 foizi — Toshkent shahar mahalliy budjetining qo‘shimcha manbalari, yuridik va jismoniy shaxslarning homiylik xayriyalari va qonunchilikda taqiqlanmagan boshqa manbalar.

8. O‘zbekiston Respublikasi Tashqi ishlar vazirligi O‘zbekiston Respublikasi Madaniyat vazirligining buyurtmanomalariga asosan Festivalga tashrif buyuruvchi mehmonlar uchun kirish vizalarining konsullik yig‘imlari va haqiqiy xarajatlarning o‘rnini qoplash hisobidan yig‘imlar undirilmasdan, belgilangan tartibda rasmiylashtirilishini ta’minlasin.

9. O‘zbekiston Milliy axborot agentligi, O‘zbekiston Milliy teleradiokompaniyasi, “Dunyo” axborot agentligi va boshqa ommaviy axborot vositalariga Festivalni o‘tkazish bo‘yicha amalga oshirilayotgan ishlarni keng yoritib borish tavsiya etilsin.

10. Mazkur qarorning bajarilishini nazorat qilish O‘zbekiston Respublikasi madaniyat vaziri B.S. Sayfullayev zimmasiga hamda O‘zbekiston Vazirlar Mahkamasining Yoshlar siyosati, madaniyat, ma’rifat, ommaviy axborot vositalari, ijodiy va jamoat tashkilotlari masalalari kotibiyatiga yuklansin.

1. Ushbu Nizom “Xalqaro sirk san’ati” festivalini (keyingi o‘rinlarda Festival deb ataladi) o‘tkazish tartibini belgilaydi.

2. Festival quyidagilarni nazarda tutgan holda o‘tkaziladi:

jahon sirk san’ati yutuqlaridan bahramand bo‘lish, milliy sirk san’ati an’analarini asrab-avaylash, tomoshabinlarning sirk san’atiga bo‘lgan ehtiyojlarini qondirish, milliy sirk dasturlarining badiiy saviyasi va qamrovini kengaytirish;

sirk san’atining betakror ruhi va qiyofasini, o‘ziga xosligini e’tirof etish, xalqlar o‘rtasida do‘stlik rishtalarini mustahkamlash, tinchlik, do‘stlik va ahillikni, boy tarixiy va betakror madaniyatimizni keng targ‘ib etish, mamlakatimiz sirk san’atini jahon hamjamiyatidagi nufuzini yanada oshirish;

milliy sirk san’atini yanada rivojlantirish, boshqa xalqlarning sirk san’ati an’analarini o‘rganish maqsadida ijodiy muloqotlar olib borishni yo‘lga qo‘yish;

madaniy aloqalarni yanada mustahkamlash, sirk san’ati sohasidagi ilmiy o‘rganish va izlanishlarni hamkorlikda amalga oshirish, o‘zaro tajriba almashish, davra suhbatlari, taqdimot va mahorat darslarini tashkil etish.

3. Festival 2021-yildan boshlab har ikki yilda bir marta Toshkent shahrida o‘tkaziladi.

4. O‘zbekiston Respublikasi Madaniyat vazirligi:

Festivalni o‘tkazishning aniq sanasi va muddatini belgilaydi hamda Festival boshlanishidan uch oy oldin ommaviy axborot vositalarida e’lon qiladi;

Festival dasturini ishlab chiqadi, tasdiqlaydi va Festival o‘tkazilishidan uch oy avval uning turizm tashkilotlariga taqdim etilishini, Internet jahon axborot tarmog‘i va ijtimoiy tarmoqlarda joylashtirilishini ta’minlaydi.

5. O‘zbekiston Respublikasi Madaniyat vazirligi hamda Toshkent shahar hokimligi Festival tashkilotchilari hisoblanadi.

6. Festival doirasida quyidagi tadbirlar o‘tkaziladi:

mahalliy va xorijiy sirk ustalari tomonidan ko‘rgazmali namoyishlar, ijodiy uchrashuvlar, sayillar, matbuot konferensiyalari, davra suhbatlari, taqdimot va mahorat darslari, ilmiy-amaliy konferensiya;

sirk ustalarining Xalqaro ko‘rik-tanlovi (keyingi o‘rinlarda ko‘rik-tanlov deb ataladi);

Festival ko‘rik-tanlovning g‘oliblari va sovrindorlari ishtirokida “O‘zbek davlat sirki” davlat muassasasida tantanali taqdirlash marosimi va sirk namoyishlari bilan yakunlanadi.

Festival doirasida mahalliy va xorijiy sirk ustalari tomonidan ko‘rgazmali namoyishlar, ijodiy uchrashuvlar, sayillar, matbuot konferensiyalari, davra suhbatlari, taqdimot va mahorat darslari, ilmiy-amaliy konferensiyani o‘tkazish tartibi O‘zbekiston Respublikasi Madaniyat vazirligi tomonidan belgilanadi.

7. Festivalga O‘zbekiston Respublikasi Madaniyat vazirligi tomonidan tasdiqlangan Xalqaro hay’at a’zolari, faxriy mehmonlar va ishtirokchi sifatida xorijiy mamlakatlardan ijodiy delegatsiyalar taklif etiladi.

8. Ko‘rik-tanlovda namoyish etiladigan sirk dasturlarining musiqalari fonogramma yoki orkestr orqali ijro etiladi.

9. Ko‘rik-tanlovda masxarabozlar ishtirok etishiga yo‘l qo‘yilmaydi. Masxarabozlar tomonidan faqat ko‘rgazmali chiqishlar namoyish etilishi mumkin.

10. Tashkilotchilar taklifiga ko‘ra sirk ustalari, xorijiy davlatlardan taniqli olimlar, mutaxassislar va faxriy mehmonlar Festivalda o‘z hisobidan qatnashishi mumkin.

11. Ko‘rik-tanlovda ishtirok etishni istagan sirk artistlari va sirk jamoalari ko‘rik-tanlovni o‘tkazish sanasidan ikki oy oldin O‘zbekiston Respublikasi Madaniyat vazirligiga quyidagilarni taqdim etishlari lozim:

sirk jamoasi tarkibi va soni, jamoa haqida ma’lumotnoma (rezyume), sirk artisti yakka o‘zi ishtirok etganda, u haqida ma’lumotnoma (rezyume);

hayvonlar uchun tegishli veterinariya xulosasi;

CD hamda DVD diskda taqdimot ijod namunasidan lavhalar;

sug‘urta polisi.

12. Har bir ishtirokchi Festivalda 1 yoki 2 ta sahna ko‘rinishi bilan chiqishi mumkin.

13. Festival ishtirokchilari zimmasiga quyidagi majburiyatlar yuklanadi:

“Veterinariya to‘g‘risida”gi O‘zbekiston Respublikasi Qonuni talablariga muvofiq veterinariya hujjatlarini ro‘yxatdan o‘tkazish;

Yovvoyi fauna va floraning yo‘q bo‘lib ketish xavfi ostida bo‘lgan turlarining xalqaro savdosi haqidagi konvensiya (CITES), hayvonlarni muhofaza qilish va ulardan foydalanish bo‘yicha xalqaro hujjatlar talablariga qat’iy amal qilish;

sirk dasturi ijrosi va mashg‘ulotlar davomida xavfsizlik va mehnat muhofazasi qoidalariga rioya qilish;

Festival davomida O‘zbekiston Respublikasi qonunlariga rioya etish.

Havo-akrobat gimnastlari o‘zlari foydalanadigan chiqish uskuna jihozlariga joriy yilda berilgan texnik sertifikatlarga ega bo‘lishi lozim.

14. Maxsus xavfsizlik vositalarisiz ishtirokchilarning salomatligi va hayotiga xavf tug‘diradigan chiqishlarni ko‘rsatish taqiqlanadi.

15. Sug‘urta polisiga ega bo‘lmagan ishtirokchilarning sirk dasturlari ko‘rib chiqilmaydi.

16. Tanlovda ishtirok etish ketma-ketligi Festival rejissori tomonidan belgilanadi.

Festival rejissori O‘zbekiston Respublikasi Madaniyat vazirligi tomonidan belgilanadi.

17. O‘zbek, ingliz va rus tillari festivalning ishchi tillari etib belgilanadi.

18. Festivalni tashkil etish va o‘tkazish bilan bog‘liq sarf-xarajatlar tashkilotchilar tomonidan ishlab chiqilgan va belgilangan tartibda tasdiqlangan smeta asosida quyidagi tartibda:

50 foizi — O‘zbekiston Respublikasi Madaniyat vazirligi huzuridagi Madaniyat va san’atni rivojlantirish jamg‘armasi mablag‘lari;

50 foizi — Toshkent shahar mahalliy budjetining qo‘shimcha manbalari, yuridik va jismoniy shaxslarning homiylik xayriyalari va qonunchilikda taqiqlanmagan boshqa manbalar hisobidan qoplanadi.

19. Festivalning ishtirokchilari va xorijiy mehmonlari, shuningdek, Xalqaro hay’at a’zolari tashkilotchilar tomonidan Festival o‘tkaziladigan davr va hududda yotoqxona, ovqatlanish va belgilangan marshrut bo‘yicha transport bilan ta’minlanadilar.

Festival xorijiy mehmonlarining O‘zbekiston hududidagi alohida mehmonxona va transport xarajatlari ularni taklif etgan mezbon tashkilot va muassasalar yoki mehmonlarning o‘zlari tomonidan qoplanadi.

20. Ko‘rik-tanlov ishtirokchilarining chiqishlarini baholash maqsadida O‘zbekiston Respublikasi Madaniyat vazirligi tomonidan 7 — 9 kishidan iborat tarkibda Xalqaro hay’at tashkil etiladi.

Xalqaro hay’at tarkibiga sirk san’ati yo‘nalishi bo‘yicha yuqori malakali mutaxassislar, taniqli san’at va madaniyat arboblari, olimlar, tadqiqotchilar, xorijiy va mahalliy sirk ustalari, shuningdek, ishtirokchi davlatlardan tegishli sohalar namoyandalari taklif etiladi.

Xalqaro hay’at a’zolari raisni o‘z tarkibidan saylaydi.

Xalqaro hay’at raisiga — 1500 AQSH dollari, hay’at a’zolariga — 1000 AQSH dollari miqdorida gonorar puli to‘lanadi.

21. Ishtirokchilar quyidagi mezonlar asosida baholanadi:

jarayonida sirk san’atining asl xususiyatlari va o‘ziga xosligining aks etishi;

ijrochilarning yuksak ijro va kasbiy mahorati, tryuk repertuarining murakkabligi;

chiqishlarning va ijrochilarning zamonaviyligi hamda o‘ziga xosligi.

22. Xalqaro hay’at tomonidan ko‘rik-tanlov ishtirokchilarining chiqishlari to‘rtta yo‘nalish bo‘yicha baholanadi:

gimnastika;

akrobatlar;

hayvonlar olami;

maxsus (original) chiqishlar.

23. Festival mukofotlarini berish to‘g‘risidagi qaror ochiq ovoz berish yo‘li bilan qabul qilinadi va bayonnoma tuziladi.

24. Xalqaro hay’at qarori Festivalning tantanali yopilish marosimida e’lon qilinadi.

25. Ko‘rik-tanlov g‘oliblari diplom, statuetka va quyidagi pul mukofotlari bilan taqdirlanadi:

I — o‘rin (har bir yo‘nalish bo‘yicha bittadan) 5 000 AQSH dollari;

II — o‘rin (har bir yo‘nalish bo‘yicha bittadan) 3 500 AQSH dollari;

III — o‘rin (har bir yo‘nalish bo‘yicha bittadan) 2 000 AQSH dollari.

Ko‘rik-tanlov sovrindorlari Festivalning tantanali yopilish marosimi dasturida qatnashadilar.

Festivalning har bir qatnashchisiga “Xalqaro sirk san’ati” festivali ishtirokchisi sertifikati beriladi.

26. Tashkilotchi quyidagi huquqlarga ega:

Festival qatnashchilarining ijrolarini efirga uzatish hamda boshqa tashkilotlarga translyatsiya qilishi uchun ruxsatnoma berish;

Festivalni o‘tkazish va uning yakuni davomida tayyorlangan barcha turdagi video, bosma va boshqa turdagi mahsulotlarni ishlab chiqarish va tarqatish;

Festivalda ishtirok etishni istagan jismoniy va yuridik shaxslar tomonidan tashkilotchilarga yuboriladigan materiallardan reklama maqsadida foydalanilishi mumkin;

Festivalga jahondagi sirk san’ati bo‘yicha yetakchi soha mutaxassislari va san’at namoyondalarini jalb etish.

27. Festivalning har bir qatnashchisi o‘z tibbiy sug‘urtasiga ega bo‘lishi lozim.

28. Davlat moliyaviy nazorati inspeksiyasi Festivalni tashkil etish va o‘tkazish uchun ajratilgan budjet mablag‘larining maqsadli ishlatilishi va to‘g‘ri to‘lanishini nazorat qiladi.