O‘zbekiston Respublikasi Prezidentining “Xususiy tibbiyot tashkilotlarini rivojlantirish bo‘yicha qo‘shimcha shart-sharoitlarni yaratish to‘g‘risida” 2017-yil 29-dekabrdagi PQ-3450-son qaroriga muvofiq, shuningdek, ilg‘or jahon ta’lim standartlariga muvofiq oliy ma’lumotli yuqori malakali mutaxassislar tayyorlashni tashkil etish, yoshlarning, ayniqsa, mamlakat mintaqalaridagi yoshlarning salohiyatini ro‘yobga chiqarish va undan samarali foydalanish uchun shart-sharoitlar yaratish, O‘zbekiston Respublikasining oliy ta’lim sohasidagi xalqaro hamkorligini yanada kengaytirish maqsadida Vazirlar Mahkamasi qaror qiladi:

1. O‘zbekiston Respublikasi Sog‘liqni saqlash vazirligi, Oliy va o‘rta maxsus ta’lim vazirligi hamda “Akfa Medline” mas’uliyati cheklangan jamiyatning (keyingi o‘rinlarda “Akfa Medline” MChJ deb ataladi) Akfa universitetini (keyingi o‘rinlarda Universitet deb ataladi) tashkil etish to‘g‘risidagi taklifi qabul qilinsin.

2. Quyidagilar Universitet faoliyatining asosiy vazifalari va faoliyati yo‘nalishlari etib belgilansin:

respublika iqtisodiyoti real sektorlari tarmoqlarining ehtiyojlarini hisobga olgan holda fundamental, tibbiyot, aniq va gumanitar fanlar sohasida yuqori malakali mutaxassislarni tayyorlash;

yuqori malakali mutaxassislarni, shu jumladan, xorijiy mutaxassislarni, shuningdek, xorijda faoliyat yuritayotgan vatandoshlarimizni jalb etgan holda yetakchi xorijiy oliy ta’lim va ilmiy-tadqiqot muassasalari bilan keng hamkorlikni amalga oshirish;

xodimlarning, jumladan, tibbiyot sohasida malakasini oshirish, malaka amaliyotlarini tashkil etish, xorijning ilg‘or ilmiy-tadqiqot muassasalari bilan hamkorlik qilish asosida tajriba almashish dasturlarini amalga oshirish;

ta’lim jarayoniga zamonaviy pedagogik va axborot-kommunikatsiya texnologiyalarini joriy etish;

mehnat bozorining mavjud muammolari va ehtiyojlarini inobatga olgan holda fundamental, tibbiyot, aniq va gumanitar fanlar sohasida ilmiy-tadqiqot faoliyatini amalga oshirish.

3. Universitetda ta’lim jarayonini ilg‘or pedagogik va axborot texnologiyalari, ilm-fan va texnikaning so‘nggi yutuqlarini qo‘llagan holda tashkil etishga ko‘maklashish bo‘yicha “Akfa Medline” MChJ bilan Gachon universiteti (Koreya Respublikasi) o‘rtasida bitim tuzilganligi ma’lumot uchun qabul qilinsin.

4. Belgilansinki:

Universitet mas’uliyati cheklangan jamiyat shaklidagi nodavlat oliy ta’lim tashkiloti hisoblanadi;

Universitetda o‘quv-metodik rahbarlik qilish va ta’lim jarayonining olib borilishi tuziladigan bitimlar asosida yetakchi xorijiy oliy ta’lim muassasalari (keyingi o‘rinlarda xorijiy hamkorlar deb ataladi) bilan hamkorlikda ta’minlanadi;

Universitetda ta’lim jarayoni xorijiy hamkorlarning o‘quv rejalari va dasturlariga muvofiq, O‘zbekiston Respublikasining oliy ta’lim davlat ta’lim standartlari hamda davlat talablari hisobga olingan holda ingliz tilida tashkil etiladi;

Universitet bitiruvchilariga O‘zbekiston Respublikasida oliy ma’lumot to‘g‘risidagi hujjat sifatida e’tirof etiladigan belgilangan namunadagi diplom beriladi;

Universitetga abituriyentlarni qabul qilish va bitiruvchilarni attestatsiyadan o‘tkazish tartibi va qoidalari Universitet tomonidan xorijiy hamkorlar bilan kelishgan holda belgilanadi;

bakalavriat ta’lim yo‘nalishlari va magistratura mutaxassisliklariga qabul kvotalari respublika mehnat bozori ehtiyojlaridan kelib chiqqan holda Universitet tomonidan belgilanadi;

Universitetda ta’lim olish to‘lov-kontrakt asosida kunduzgi shaklda amalga oshiriladi.

5. O‘zbekiston Respublikasi Oliy va o‘rta maxsus ta’lim vazirligi va Vazirlar Mahkamasi huzuridagi Ta’lim sifatini nazorat qilish davlat inspeksiyasi Universitetga ta’sis hujjatlarini ishlab chiqishda va ular belgilangan tartibda davlat ro‘yxatidan o‘tkazilishida ko‘maklashsin.

6. Universitet Toshkent shahri, Shayxontohur tumani, Ko‘kcha darvoza, 1-boshi berk ko‘cha, 10-uyda joylashgan Shayxontohur tibbiyot kollejining bino va inshootlarida tekin foydalanish huquqi bilan joylashtirilsin.

7. Belgilab qo‘yilsinki, Universitetning joriy faoliyatini moliyalashtirish uning bino va inshootlarini qurish, rekonstruksiya qilish va kapital ta’mirlash, shuningdek, zarur o‘quv va laboratoriya asbob-uskunalari, mebel, kompyuter texnikasi, o‘quv va metodik adabiyotlar hamda boshqa moddiy-texnik vositalar bilan ta’minlash:

Universitet muassislarining mablag‘lari;

to‘lov-shartnoma asosida talabalarni o‘qitishdan tushgan mablag‘lar;

Universitet tomonidan shartnoma asosida ishlar va xizmatlar amalga oshirilishi;

jismoniy va yuridik shaxslarning xayriya ehsonlari;

xalqaro moliya institutlari va xorijiy tashkilotlar, shu jumladan, xorijiy hamkorlarning moliyaviy mablag‘lari;

qonunchilikda taqiqlanmagan boshqa manbalar hisobiga amalga oshiriladi.

8. Universitetga mavjud talab va ehtiyojni hamda respublikani ijtimoiy-iqtisodiy rivojlantirish istiqbollarini hisobga olib O‘zbekiston Respublikasi Oliy va o‘rta maxsus ta’lim vazirligi bilan kelishgan holda yangi bakalavriat ta’lim yo‘nalishlari va magistratura mutaxassisliklarini xorijiy hamkorlar bilan birgalikda ochishga ruxsat berilsin.

9. O‘zbekiston Respublikasi Sog‘liqni saqlash vazirligi Oliy va o‘rta maxsus ta’lim vazirligi va Toshkent shahar hokimligi bilan birgalikda:

Shayxontohur tibbiyot kolleji o‘quvchilari kontingenti Toshkent iqtisodiyot kolleji binosida joylashtirilgan holda o‘qishni davom ettirishini ta’minlash;

Shayxontohur tibbiyot kollejining ishdan bo‘shayotgan xodimlarini ishga joylashtirish choralarini ko‘rsin.

10. Toshkent shahar hokimligi 2019/2020 o‘quv yili boshlanguniga qadar Universitet faoliyatini yo‘lga qo‘yishni ta’minlagan holda uning bino va inshootlarini rekonstruksiya qilish va kapital ta’mirlash bo‘yicha zarur loyiha-smeta hujjatlarini tayyorlashda, o‘qituvchi va talabalar uchun turar joy binosini qurishda, zarur o‘quv-laboratoriya uskunalari, tibbiyot trenajyorlari, kompyuter texnikasi va kutubxona fondlari bilan jihozlashda Universitetga ko‘maklashsin.

11. O‘zbekiston Respublikasi Tashqi ishlar vazirligi Universitet buyurtmanomalariga ko‘ra ushbu qarorni amalga oshirish doirasida jalb etiladigan xorijiy professor-o‘qituvchilar tarkibi va ma’muriy xodimlarga, shuningdek, ularning oila a’zolariga kirish vizalari konsullik yig‘imlari va boshqa yig‘imlar undirilmasdan belgilangan tartibda rasmiylashtirilishini ta’minlasin.

12. O‘zbekiston Respublikasi Ichki ishlar vazirligi Universitet buyurtmanomalariga ko‘ra Universitetning ushbu qarorni amalga oshirish doirasida jalb qilinayotgan xorijiy professor-o‘qituvchilar tarkibi va ma’muriy xodimlariga, shuningdek, ularning oila a’zolariga davlat boji undirilmasdan ko‘p martalik vizalar berilishini va ko‘p martalik vizalar muddati uzaytirilishini, shuningdek, ular O‘zbekiston Respublikasida yashash joyi bo‘yicha vaqtincha turgan joyi bo‘yicha ro‘yxatga olinishi va muddati uzaytirilishini belgilangan tartibda ta’minlasin.

13. 2022-yil 1-yanvarga qadar:

Universitet barcha turdagi soliqlarni to‘lashdan;

Universitetni jihozlash va faoliyatini tashkil etish uchun belgilangan tartibda shakllantiriladigan ro‘yxatlar bo‘yicha “Akfa Medline” MChJ va Universitet tomonidan olib kelinadigan, O‘zbekistonda ishlab chiqarilmaydigan uskunalar (shu jumladan, laboratoriya uskunalari), kompyuter texnikasi, multimedia mahsulotlari, tibbiyot trenajyorlari, adabiyotlar, qurilish materiallari va inventar bojxona to‘lovlaridan (bojxona rasmiylashtiruvi yig‘imlaridan tashqari) ozod qilinsin.

Belgilansinki, chetdan olib kelinadigan tovarlardan boshqa maqsadlarda foydalanilgan taqdirda imtiyozlar berilishi munosabati bilan to‘lanmagan bojxona to‘lovlari summasi qonun hujjatlarida nazarda tutilgan moliyaviy sanksiyalar qo‘llanilgan holda O‘zbekiston Respublikasi Davlat budjetiga undirib olinadi.

14. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari A.A. Abduxakimov va O‘zbekiston Respublikasi sog‘liqni saqlash vaziri A.K. Shadmanov zimmasiga yuklansin.