“O‘zbekiston Respublikasining ayrim qonun hujjatlariga yer to‘g‘risidagi qonun hujjatlarini takomillashtirishga qaratilgan o‘zgartish va qo‘shimchalar kiritish haqida” 2018-yil 24-iyuldagi O‘RQ-487-son O‘zbekiston Respublikasi Qonuniga muvofiq, shuningdek, yer munosabatlarini yanada takomillashtirish maqsadida Vazirlar Mahkamasi qaror qiladi:

1. O‘zbekiston Respublikasi Hukumatining ayrim qarorlariga ilovaga muvofiq o‘zgartirish va qo‘shimchalar kiritilsin.

2. O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi manfaatdor vazirliklar va idoralar bilan birgalikda bir oy muddatda ular tomonidan qabul qilingan normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari — transport vaziri A.J. Ramatov zimmasiga va O‘zbekiston Respublikasi Vazirlar Mahkamasining Agrar va oziq-ovqat sohalarini rivojlantirish masalalari kotibiyatiga yuklansin.

2. Vazirlar Mahkamasining 2011-yil 25-maydagi 146-son qarori bilan tasdiqlangan Yer uchastkalari egalari, foydalanuvchilari, ijarachilari va mulkdorlarining ko‘rgan zararlarini, shuningdek, qishloq xo‘jaligi va o‘rmon xo‘jaligi ishlab chiqarishi nobudgarchiliklarining o‘rnini qoplash tartibi to‘g‘risidagi nizomda (O‘zbekiston Respublikasi QT, 2011-y., 5-son, 40-modda):

a) 18-band quyidagi tahrirda bayon qilinsin:

“18. Qishloq xo‘jaligi va o‘rmon xo‘jaligi ishlab chiqarishi nobudgarchiliklari quyidagi hollarda aniqlanadi va qoplanadi:

qishloq xo‘jaligi va o‘rmon yerlari, shu jumladan, dehqon va xo‘jaligini yuritish uchun jismoniy shaxslarga berilgan yer uchastkalaridagi qishloq xo‘jaligi yerlarini olib qo‘yish, haq to‘lab olish yoki vaqtincha egallab turish hamda ularni qishloq va o‘rmon xo‘jaligini yuritish bilan bog‘liq bo‘lmagan yoki qishloq va o‘rmon xo‘jaligini yuritish bilan bog‘liq bo‘lgan, lekin sug‘oriladigan qishloq xo‘jaligi va o‘rmon yerlarining oborotdan chiqarib yuborilishiga olib keladigan maqsadlar uchun berish;

qurilayotgan suv omborlari, suv ta’minoti manbalari, kurortlar, magistral kanallar va kollektorlar, yo‘llar, quvurlar, elektr energiyasi uzatish va aloqa liniyalari, shuningdek, boshqa obyektlar atrofidagi muhofaza qilinadigan tabiiy hududlar, qo‘riqlash, sanitariya va himoya zonalari chegaralarini belgilagan, qishloq xo‘jaligi va o‘rmon yerlarini oborotdan chiqargan yoki ularni kamroq qiymatli yerga o‘tkazgan holda yer uchastkalari egalari, foydalanuvchilari, ijarachilari va mulkdorlarining huquqlarini cheklash;

yuridik va jismoniy shaxslar faoliyatining ta’siri natijasida yer sifatining yomonlashishi.

Qishloq xo‘jaligi va o‘rmon xo‘jaligi ishlab chiqarishi nobudgarchiliklarining o‘rni yer uchastkalari quyidagilar uchun olib qo‘yilgan holatlarda qoplanmaydi:

yakka tartibdagi va ko‘p kvartirali uylar qurish va ularga xizmat ko‘rsatish;

dafn etish joylarini tashkil qilish, davlat (maktabgacha, umumiy o‘rta, o‘rta maxsus, kasb-hunar) ta’lim va davolash muassasalari, bolalar uylari, “Mehribonlik” uylari, “Saxovat” va “Muruvvat” uylari qurilishi uchun;

suv xo‘jaligi uchun melioratsiya obyektlari va gidrotexnika inshootlari qurish;

muhofaza qilinadigan tabiiy hududlar barpo etish;

mudofaa ehtiyojlari;

O‘zbekiston Respublikasi Davlat chegarasini jihozlash ehtiyojlari.

Qonun hujjatlari va O‘zbekiston Respublikasi Vazirlar Mahkamasining qarorlari bilan yuridik va jismoniy shaxslar qishloq xo‘jaligi va o‘rmon xo‘jaligi ishlab chiqarishi nobudgarchiliklarini qoplashdan ozod qilinadigan boshqa holatlar ham belgilanishi mumkin”;

b) 23-bandning birinchi xatboshidagi “bir oy” so‘zlari “besh kun” so‘zlari bilan almashtirilsin;

v) 24-band quyidagi tahrirda bayon qilinsin:

“24. Qishloq xo‘jaligi va o‘rmon xo‘jaligi ishlab chiqarishi nobudgarchiliklarining o‘rnini qoplash uchun hududiy boshqarmalarning maxsus hisob raqamlariga tushgan mablag‘larning 90 foizidan Davrgeodezkadastr qo‘mitasi tomonidan tasdiqlangan xarajatlar smetasiga muvofiq Qoraqalpog‘iston Respublikasi Vazirlar Kengashi, viloyatlar va Toshkent shahar hokimlari tomonidan tasdiqlangan ishchi reja asosida quyidagilar uchun foydalaniladi:

yangi yerlarni o‘zlashtirish va sug‘oriladigan yerlarni kompleks rekonstruksiya qilish;

tuproq unumdorligini oshirish bo‘yicha davlat dasturlarini ishlab chiqish va amalga oshirish, qishloq xo‘jaligi yerlaridan oqilona foydalanish va muhofaza qilish;

kollektor-drenaj tarmog‘ini qurish va qayta qurish, sug‘oriladigan yerlarni kapital rejalashtirish, ularning suv ta’minotini oshirish;

pichanzorlar va yaylovlarni tubdan yaxshilash;

o‘rmonlar va mevali o‘rmonzorlar barpo etish, tiklash;

qumliklar, suv havzalari va daryolarning qirg‘oqbo‘yi mintaqalarini o‘rmonzorlashtirish;

tog‘ yonbag‘irlarida sula olish va eroziyaga qarshi boshqa tadbirlarni amalga oshirish;

yer tuzish, kadastr va o‘rmon barpo etish ishlari;

yaylovlarda sug‘orish punktlarini (burg‘ulangan quduqlar, quduqlar va suv quvurlarini) qurish va jihozlash;

yer tuzish, shu jumladan, fermer xo‘jaliklarining yer uchastkalarini maqbullashtirish, yer kadastri, yer monitoringi va tuproq jihatidan izlanishlar olib borish bo‘yicha loyiha hujjatlarini hamda boshqa hujjatlarni tayyorlash yoki ularga tuzatish kiritish;

buzilgan yerlarni rekultivatsiya qilish;

avtomatlashtirilgan yer-axborot tizimlarini yaratish;

Qoraqalpog‘iston Respublikasi Vazirlar Kengashi Raisi va viloyatlar hokimlarining qarorlariga binoan qishloq xo‘jaligi mahsulotlari yetishtirishni ko‘paytirishga, qishloq xo‘jalik yerlaridan oqilona foydalanish va ularni muhofaza qilishga qaratilgan boshqa tadbirlarni amalga oshirish.

Ushbu bandda ko‘rsatilgan ishlarni bajarish uchun jalb etiladigan pudrat tashkilotlarini melioratsiya, irrigatsiya va yerlarni tekislash ishlari uchun yonilg‘i-moylash materiallari bilan ta’minlash belgilangan tartibda “O‘zdavneftgazinspeksiya” DI tomonidan tasdiqlanadigan rejalashtirilgan hajmlar hisobiga amalga oshiriladi.

Qishloq xo‘jaligi va o‘rmon xo‘jaligi ishlab chiqarishi nobudgarchiliklari o‘rnini qoplash uchun tushgan mablag‘lar hisobidan Davergeodezkadastr qo‘mitasi markaziy apparatiga va uning hududiy boshqarmalariga bittadan shtatdagi xodim ajratiladi, uning vazifasiga yuqorida ko‘rsatilgan ishlarni bajarish, shu jumladan, tashkiliy texnika vositalari, jihozlar va uskunalar xarid qilish ishlarini tashkil etish kiradi.

Yer resurslari va davlat kadastri boshqarmalari tomonidan mablag‘larni sarflash Davergeodezkadastr qo‘mitasi tomonidan tasdiqlangan smeta bo‘yicha amalga oshiriladi.

Qishloq xo‘jaligi va o‘rmon xo‘jaligi ishlab chiqarishi nobudgarchiliklari o‘rnini qoplash hisobiga tushgan mablag‘lardan yer munosabatlari bilan bog‘liq boshqa maqsadlar uchun foydalanish Vazirlar Mahkamasining qarori bo‘yicha amalga oshiriladi”;

g) 24¹-bandning birinchi xatboshidagi “ijtimoiy himoyalashga” so‘zlari “rag‘batlantirish va ijtimoiy himoyalashga” so‘zlari bilan almashtirilsin.