Oʻzbekiston Respublikasi Prezidentining 2017-yil 2-sentabrdagi PF-5177-son “Valyuta siyosatini liberallashtirish boʻyicha birinchi navbatdagi chora-tadbirlar toʻgʻrisida”gi, 2018-yil 30-oktabrdagi PF-5564-son “Tovar bozorlarida savdoni yanada erkinlashtirish va raqobatni rivojlantirish chora-tadbirlari toʻgʻrisida”gi farmonlari hamda Vazirlar Mahkamasining 2018-yil 16-avgustdagi 670-son “Dasturiy mahsulotlar va axborot mahsulotlaridan foydalanish huquqini amalga oshirish hamda rasmiylashtirishning bojxona rasmiylashtiruvi (deklaratsiyalash) va buxgalteriya hisobini yuritish tartibi toʻgʻrisidagi nizomni tasdiqlash haqida”gi qaroriga muvofiq Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Tashqi savdo vazirligi, Davlat bojxona qoʻmitasi va Markaziy banki Boshqaruvi qaror qiladilar:

1. Oʻzbekiston Respublikasi Aloqa, axborotlashtirish va telekommunikatsiya texnologiyalari davlat qoʻmitasi, Tashqi iqtisodiy aloqalar, investitsiyalar va savdo vazirligi, Davlat bojxona qoʻmitasi va Markaziy banki Boshqaruvining 2013-yil 25-noyabrdagi 61-mh, 17, 01-02/21-30, 330 V-son qarori (roʻyxat raqami 2549, 2014-yil 8-yanvar) (Oʻzbekiston Respublikasi qonun hujjatlari toʻplami, 2014-y., 2-son, 25-modda) bilan tasdiqlangan Dasturiy taʼminot vositalari eksporti va importi toʻgʻrisida nizomga ilovaga muvofiq oʻzgartirishlar va qoʻshimcha kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 4-band quyidagi tahrirda bayon etilsin:

“4. Milliy reyestrga kiritilgan dasturiy taʼminot vositalari ishlab chiquvchisi tomonidan Internet tarmogʻidagi onlayn doʻkonlar orqali 5 ming AQSh dollarigacha boʻlgan dasturiy taʼminot vositalarini eksport shartnomasisiz xorijiy valyutaga sotish, Tashqi savdo operatsiyalari yagona elektron axborot tizimiga maʼlumot kiritmasdan amalga oshiriladi.

Dasturiy taʼminot vositalarining eksporti 5 ming AQSh dollaridan oshgan taqdirda, dasturiy taʼminot vositalarining eksport shartnomasi boʻyicha maʼlumotlar elektron raqamli imzodan foydalangan holda Interaktiv davlat xizmatlari yagona portali orqali Tashqi savdo operatsiyalari yagona elektron axborot tizimiga kiritiladi.”.

2. 7-band quyidagi mazmundagi xatboshi bilan toʻldirilsin:

“Tushumlarning tushish muddatlari xorijiy onlayn-savdo maydonchasi qoidalariga muvofiq belgilanadi.”.

3. 8-banddagi “vakolatli” degan soʻz “tijorat” degan soʻz bilan almashtirilsin.