O‘zbekiston Respublikasi Prezidentining 2018-yil 30-sentabrdagi PQ-3955-sonli “Maktabgacha ta’lim tizimini boshqarishni takomillashtirish chora-tadbirlari to‘g‘risida”gi qaroriga muvofiq buyuraman:

1. Davlat maktabgacha ta’lim tashkilotlarida qo‘shimcha pullik ta’lim-tarbiya xizmatlari ko‘rsatish faoliyatini tashkil etish tartibi to‘g‘risidagi nizom ilovaga muvofiq tasdiqlansin.

2. Mazkur buyruq rasmiy e’lon qilingan kundan e’tiboran kuchga kiradi.

Mazkur Nizom O‘zbekiston Respublikasi Prezidentining 2018-yil 30-sentabrdagi PQ-3955-son “Maktabgacha ta’lim tizimini boshqarishni takomillashtirish chora-tadbirlari to‘g‘risida”gi qaroriga muvofiq davlat maktabgacha ta’lim tashkilotlarida qo‘shimcha pullik ta’lim-tarbiya xizmatlari (bundan buyon matnda qo‘shimcha xizmat deb yuritiladi) ko‘rsatish faoliyatini tashkil etish tartibini belgilaydi.

1. Mazkur Nizom talablari davlat maktabgacha ta’lim tashkilotlari (bundan buyon matnda maktabgacha ta’lim tashkiloti deb yuritiladi) uchun tatbiq etiladi.

2. Qo‘shimcha xizmatlar zarur moddiy-texnik baza hamda tegishli pedagog xodimga ega bo‘lgan yoki tegishli mutaxassis jalb qilingan holda maktabgacha ta’lim tashkilotida tashkil qilinishi mumkin. Bunda qo‘shimcha xizmatlarni ko‘rsatish bolaning maktabgacha ta’lim tashkilotining o‘quv dasturi bo‘yicha olib boriladigan ta’lim-tarbiya jarayoniga xalaqit bermasligi kerak.

3. O‘zbekiston Respublikasi Prezidentining 2018-yil 30-sentabrdagi PQ-3955-son qarori bilan tasdiqlangan 2018-2019-yillarda maktabgacha ta’lim tizimini yanada takomillashtirishga doir qo‘shimcha chora-tadbirlar dasturi hamda 2022-yil 7-martdagi PF-87-son “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi Farmoniga asosan maktabgacha ta’lim tashkilotlari tomonidan quyidagilar bo‘yicha qo‘shimcha pullik xizmatlar ko‘rsatilishi mumkin:

dam olish kunlari va maktabgacha ta’lim tashkilotida ish kuni yakunlangandan keyin bolani parvarishlash, unga qarab turish, uni o‘qitish;

maktabgacha ta’lim tashkilotining o‘quv dasturdan tashqari sport-sog‘lomlashtirish (karate, taekvondo, suzish, shaxmat, shashka, gimnastika, massaj va boshqalar) to‘garaklari, badiiy-estetik (xor, raqs, tasviriy san’at va hokazolar) to‘garaklar, fanlar bo‘yicha to‘garaklar (chet tillari, matematika, aqliy arifmetika, mantiq, informatika va boshqalar);

to‘liq quvvat bilan ishlamayotgan maktabgacha ta’lim tashkilotlarida 2 yoshdan 3 yoshgacha bo‘lgan bolalarga maktabgacha ta’lim va tarbiya xizmatlari.

4. Maktabgacha ta’lim tashkiloti tomonidan ko‘rsatilishi rejalashtirilayotgan qo‘shimcha xizmatlar turlari hamda ular uchun belgilanadigan to‘lovlar miqdori maktabgacha ta’lim tashkilotining kuzatuv kengashi yig‘ilishida muhokama qilinishi shart.

5. Maktabgacha ta’lim tashkilotlari tomonidan ko‘rsatiladigan qo‘shimcha xizmatlarning narxlar preyskuranti tegishli maktabgacha ta’lim tuman (shahar) bo‘linmasi bilan kelishilgan holda maktabgacha ta’lim tashkilotining direktori tomonidan tasdiqlanadi.

6. Qo‘shimcha xizmatlar tegishli maktabgacha ta’lim tuman (shahar) bo‘linmasi bilan kelishilgan holda maktabgacha ta’lim tashkiloti direktorining buyrug‘iga muvofiq quyidagi hujjatlar asosida tashkil etiladi:

ko‘rsatiladigan qo‘shimcha xizmatning ish rejasi;

ko‘rsatiladigan qo‘shimcha xizmatlarning preyskurant narxlari;

ko‘rsatiladigan qo‘shimcha xizmatlar bo‘yicha mashg‘ulotlar jadvali.

7. Ko‘rsatiladigan qo‘shimcha xizmatning ish rejasi maktabgacha ta’lim tashkiloti direktori tomonidan tasdiqlanadi.

8. Tasdiqlangan qo‘shimcha xizmatlarning preyskurant narxlari maktabgacha ta’lim tashkilotining barcha shaxslar kirishi va ko‘rishi mumkin bo‘lgan joyda (joylarda) e’lonlar taxtasiga osib qo‘yiladi.

9. Maktabgacha ta’lim tashkilotida tashkil etilgan qo‘shimcha xizmat ko‘rsatuvchi guruhlarga 3 yoshdan 7 yoshgacha bo‘lgan bolalar, to‘liq quvvat bilan ishlamayotgan maktabgacha ta’lim tashkilotlarida 2 yoshdan 7 yoshgacha bo‘lgan bolalar qabul qilinishi mumkin.

10. Farzandi qo‘shimcha xizmat ko‘rsatuvchi guruhlarda tarbiyalanishini istagan ota-onalar yoki ularning o‘rnini bosuvchi shaxslar tegishli maktabgacha ta’lim tashkilotiga ariza bilan murojaat qiladi.

11. Maktabgacha ta’lim tashkilotining direktori hamda bolaning ota-onasi yoki ularning o‘rnini bosuvchi shaxslardan biri bilan shartnoma tuziladi.

12. Qo‘shimcha xizmat ko‘rsatuvchi guruhlarga bolani qabul qilish uchun tegishli maktabgacha ta’lim tashkiloti direktorining buyrug‘i qabul qilinadi.

Buyruqda bolaning F.I.O., tug‘ilgan yili, qabul qilinayotgan qo‘shimcha xizmat turi va guruhi ko‘rsatilishi lozim.

13. Qo‘shimcha xizmat ko‘rsatuvchi guruhlarda bolalarning soni 25 nafardan ortiq bo‘lishiga yo‘l qo‘yilmaydi.

14. Maktabgacha ta’lim tashkiloti xodimlarini ularning asosiy ish vaqtidan tashqari vaqtlarda kelishuv asosida qo‘shimcha xizmat ko‘rsatuvchi guruhlarga jalb qilish mumkin.

15. Sud hukmi bilan yoki tibbiy xulosaga muvofiq pedagogik faoliyat bilan shug‘ullanishi taqiqlangan shaxslarning qo‘shimcha xizmat ko‘rsatuvchi guruhlarda faoliyat yuritishi taqiqlanadi.

16. Mazkur Nizom talablari buzilishida aybdor bo‘lgan shaxslar qonunchilik hujjatlariga muvofiq javobgar bo‘ladilar.

17. Mazkur Nizom O‘zbekiston Respublikasi Moliya vazirligi bilan kelishilgan.