Buyuk davlat arbobi Amir Temurning ijtimoiy-siyosiy merosini, madaniyat va maʼnaviyat taraqqiyotiga qoʻshgan ulkan hissasini chuqur oʻrganish, yosh avlodda milliy iftixor va mustaqil Vatan tuygʻusini shakllantirish maqsadida Vazirlar Mahkamasi qaror qiladi:

1. Respublika ziyolilarining bir guruhi tomonidan Xalqaro Amir Temur jamgʻarmasi tuzilganligini va uning Ustavi Oʻzbekiston Respublikasi Adliya vazirligida roʻyxatdan oʻtkazilganligini eʼtiborga olgan holda, keng jamoatchilikning mazkur jamgʻarmani qoʻllab-quvvatlash toʻgʻrisidagi takliflari maʼqullansin.

2. Xalqaro Amir Temur jamgʻarmasining asosiy vazifalari etib quyidagilar belgilanganligi maʼlumot uchun qabul qilinsin:

buyuk davlat arbobi Amir Temur hayoti va ijtimoiy-siyosiy faoliyatiga doir keng tadqiqotlar olib borish;

Amir Temur faoliyatiga oid tarixiy manbalarni chuqur oʻrganish hamda ularni nashr etish;

temuriylar davri meʼmorchilik yodgorliklarini qayta tiklash va taʼmirlash ishlariga yordam berish;

yosh avlodning maʼnaviy-madaniy kamol topishiga, unda mustaqil Oʻzbekiston Respublikasi istiqbolidan faxrlanish va vatanparvarlik tuygʻusini tarbiyalashga qaratilgan chora-tadbirlarni amalga oshirish;

mamlakatimiz olimlari, adabiyot va madaniyat arboblarining xalqaro hamkorligini rivojlantirish va kengaytirish.

3. Xalqaro Amir Temur jamgʻarmasining Nizomi hamda tashkiliy tuzilishi 1-ilovaga muvofiq maʼqullansin.

4. Oʻzbekiston Respublikasi Tashqi ishlar vazirligi, YUNESKO ishlari boʻyicha Oʻzbekiston Respublikasi milliy komissiyasi, Fanlar akademiyasi Jamgʻarmaga barcha obroʻli xalqaro tashkilotlar bilan aloqalar oʻrnatishda va yaqindan hamkorlik qilishda har tomonlama koʻmaklashsinlar.

5. Qoraqalpogʻiston Respublikasi Vazirlar Kengashi, viloyatlar, Toshkent shahar hokimliklari joylarda Jamgʻarma boʻlinmalarini tashkil etish uchun binolar ajratsinlar.

Toshkent shahar hokimligi Jamgʻarma boshqaruv apparatini bir oy muddatda Abdulla Toʻqay koʻchasi, 1-uydagi binoga joylashtirsin hamda Temuriylar tarixi Davlat muzeyini loyihalash va qurishda Jamgʻarma boshqaruvi apparatini keyinchalik mazkur muzey binosiga joylashtirishni nazarda tutsin.

6. Respublika vazirliklari, davlat qoʻmitalari, konsernlari, korporatsiyalari, korxonalari, xoʻjaliklari, tijorat banklari hamda boshqa homiy tashkilotlarning Amir Temur jamgʻarmasiga moliyaviy va moddiy-texnika yordami 2-ilovaga* muvofiq maʼqullansin.

Oʻzbekiston Respublikasi Moliya vazirligi Vazirlar Mahkamasining zaxira jamgʻarmasidan Xalqaro Amir Temur jamgʻarmasiga 1 mln. soʻm ajratsin.

Jamgʻarma va uning boʻlimlari davlat budjetiga tushadigan davlat soliqlari, bojxona boji hamda boshqa toʻlovlardan 2 yil muddatga ozod qilinsin.

7. Oʻzbekiston Respublikasi Moliya vazirligi Amir Temur jamgʻarmasi boshqaruv apparatiga xizmat koʻrsatish uchun yengil avtotransportga limit ajratsin.

“Toshshaharyoʻlovchitrans” davlat uyushmasi belgilangan tartibda Amir Temur jamgʻarmasiga yengil avtotransport ajratsin.

8. Oʻzbekiston Respublikasi Aloqa vazirligi Amir Temur jamgʻarmasi boshqaruvini shahar va hukumat telefon aloqasi bilan taʼminlasin.

9. Amir Temur jamgʻarmasi raisi va uning oʻrinbosarlariga Oʻzbekiston Respublikasi davlat qoʻmitalari raislari va rais oʻrinbosarlari uchun tegishli ravishda belgilangan moddiy-maishiy hamda tibbiy xizmat koʻrsatish shart-sharoitlari tatbiq etilsin.

10. “Oʻzdavteleradio” kompaniyasi, ommaviy axborot vositalari Jamgʻarma faoliyatini muntazam yoritsinlar.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari S. Saidqosimov zimmasiga yuklansin.

1. Xalqaro Amir Temur jamgʻarmasi (bundan keyin “Jamgʻarma” deb ataladi) Hukumat tizimiga kirmaydigan xayriya tashkiloti boʻlib, taniqli davlat arbobi va sarkarda Amir Temurning jahon madaniyati tarixiga qoʻshgan hissasini oʻrganish va xolisona targʻib qilish, uning nomi bilan bogʻliq nodir meʼmoriy yodgorliklarni tiklash, taʼmirlash va asrashga yordam berish, Amir Temur va temuriylar merosini oʻrganayotgan xalqaro tashkilotlar, ilmiy markazlar va taniqli olimlar bilan aloqalar oʻrnatishga har tomonlama koʻmaklashish ishiga xizmat qiladi.

2. Jamgʻarma oʻz faoliyatini Oʻzbekiston Respublikasi qonunchiligi va Jamgʻarma ustavi asosida amalga oshiradi.

3. Jamgʻarma butun Oʻzbekiston hududida va uning tashqarisida yagona tashkilot sifatida faoliyat koʻrsatadi, Jamgʻarma unga aʼzo boʻlishni yoki istalgan shaklda baholi qudrat moddiy yordam koʻrsatishni xohlovchi yuridik va jismoniy shaxslar, shuningdek, xorijiy mamlakatlarning yuridik va jismoniy shaxslari uchun ochiqdir.

Jamgʻarma faoliyati xayriya tusida boʻlib, uning mablagʻlari, tushgan manbalaridan qatʼi nazar, Jamgʻarma ustavida koʻrsatilgan maqsad va vazifalarni amalga oshirish uchun sarflanadi.

4. Jamgʻarma yuridik shaxs hisoblanadi, uning bank muassasalarida mustaqil balansi, hisob, valyuta va boshqa schyotlari, muhri, shtampi, ramzi, firma, tovar va faoliyati uchun zarur boʻlgan boshqa belgilari boʻladi.

5. Jamgʻarmaning joylashgan oʻrni: Oʻzbekiston Respublikasi, Toshkent shahri.

6. Quyidagilar Jamgʻarmaning asosiy vazifalari hisoblanadi;

yirik davlat arbobi va atoqli sarkarda Amir Temurning hayoti, ijtimoiy-siyosiy va harbiy faoliyatini chuqur oʻrganishga koʻmaklashish;

shaxsni maʼnaviy, madaniy va jismoniy kamolga yetkazishga doir chora-tadbirlarni amalga oshirish, Amir Temur va uning zamonasi haqidagi bor haqiqatni keng ommaga yetkazish yoʻli bilan mehnatkashlarni mustaqil respublikamiz taqdiri uchun iftixor va vatanparvarlik ruhida tarbiyalash;

jamoat, davlat, ilmiy va ijodiy tashkilotlarning Amir Temur hayoti va faoliyatini, Markaziy Osiyo xalqlarining tarixi va madaniyatini oʻrganish borasidagi ishlarini uygʻunlashtirish;

respublikadagi va xorijiy mamlakatlardagi Temuriylar davriga oid meʼmoriy yodgorliklarni tiklash va taʼmirlashda ishtirok etish;

Amir Temur haqida hujjatli, badiiy va telefilmlar yaratishga yordam berish.

Qayd etilgan vazifalarni amalga oshirish uchun Jamgʻarma quyidagi yoʻnalishlar boʻyicha faoliyat koʻrsatadi:

Temur va temuriylar davri tarixiga oid qadimiy qoʻlyozma asarlarni oʻrganadi;

oʻzining gazeta va jurnalini nashr qiladi, Markaziy Osiyo xalqlari tarixi va madaniyatiga oid qoʻlyozma asarlarni chop etadi;

manfaatdor tashkilotlar bilan birgalikda Temur va Temuriylar davri tarixini oʻrganuvchi jamoat kengashlari, klublar va toʻgaraklar tashkil qiladi. Radio va televideniye orqali eshittirishlar, koʻrsatuvlar uyushtiradi, kechalar, konsertlar va boshqa xayriya ishlarini amalga oshiradi;

oʻz nashriyoti orqali kitoblar, albomlar, bukletlar, plakatlar, taqvimlar va boshqa matbaa mahsulotlarini chiqaradi va ularni omma oʻrtasida tarqatadi;

xorijiy mamlakatlar kutubxonalari, muzeylari va jamgʻarmalaridan Amir Temur va uning avlodi merosini topish yuzasidan ilmiy-qidiruv ishlarini olib boradi, xorijiy mamlakatlarda Temur haqida chop etilgan kitoblarni oʻzbek tiliga tarjima qilib nashr etadi, oʻzbekistonlik mualliflarning shu mavzuda yozgan asarlarini ommalashtirish bilan shugʻullanadi;

Oʻzbekiston Respublikasi zaminida, shuningdek, kelishuv yoʻli bilan bir qator xorijiy mamlakatlarda belgilangan tartibda Jamgʻarmaning boʻlimlari va vakolatxonalarini ochadi;

sharqshunos va tarixchi olimlar oʻrtasida xalqaro hamkorlik oʻrnatishga va uni rivojlantirishga koʻmaklashadi;

Ustav asosida ilmiy muassasalar, turli korxonalar, tashkilot va firmalar, shuningdek, ixtisoslashgan doʻkonlar ochadi, belgilangan tartibda tashqi iqtisodiy aloqalarni amalga oshiradi.

7. Ustavda belgilangan maqsadlarni amalga oshirish uchun Jamgʻarma Oʻzbekiston Respublikasi qonunlariga muvofiq respublika va xorijiy mamlakatlarda:

davlat va boshqa tashkilotlar, korxona va firmalar bilan birgalikda oʻzining loyihalari va dasturini amalga oshiradi;

soʻm va valyuta bilan qarz oladi va qarz beradi, oʻz nomidan shartnomalar tuzadi, mulkiy huquqqa ega boʻladi;

sudda javobgar va daʼvogar sifatida ishtirok etadi;

yuridik va jismoniy shaxslarga maslahatlar, axborot, marketing xizmatlari va boshqa xizmatlar koʻrsatadi;

ishlab chiqarish, ilmiy va boshqa turdagi tashkilot va firmalar, banklar, sugʻurta kompaniyalari, shuningdek xorijiy sheriklar bilan birga aralash va qoʻshma korxonalar tashkil qiladi;

Ustavda koʻrsatilgan vazifalarni amalga oshirish uchun vaqtinchalik birlashmalar tuzadi;

ilmiy, noshirlik, axborot va madaniy-maʼrifiy faoliyat koʻrsatadi;

sanʼat asarlarining yarmarkalarini va kimoshdi savdolarini, konsert va boshqa tomosha tadbirlarini uyushtiradi;

Jamgʻarmaning maqsadlaridan kelib chiqqan holda koʻrik-tanlovlar oʻtkazadi, mukofotlar belgilaydi;

pul-buyum lotereyalari oʻtkazadi;

xalq amaliy sanʼati mollarini, meʼmoriy yodgorliklarni tiklash va taʼmirlash uchun kerak boʻladigan kulolchilik va boshqa qurilish materiallarini ishlab chiqarishga mablagʻ beradi;

mahalliy va xorijiy sarmoya ishtirokida ishlab chiqarishga hozirgi zamon texnologiyasi va asbob-uskunalarini qoʻllovchi loyihalarni amalga oshirishda ishtirok etadi;

madaniy-maishiy va ishlab chiqarish korxonalari qurilishida, koʻrgazma va yarmarkalar uyushtirish, turizmni rivojlantirish va unga munosib xizmat koʻrsatishda ishtirok etadi;

har qanday mol-mulkni musodara qilish, sotib olish, sotish, almashtirish, balansga qabul qilish, balansdan chiqarish, shuningdek har qanday mol-mulkka egalik qilish va ularni boshqaga oʻtkazish hamda ijaraga berish huquqini amalga oshiradi;

Oʻzbekiston Respublikasida va xorijiy mamlakatlarda belgilangan tartibda shartnomalar, bitimlar tuzadi, shu jumladan, oldi-sotdi, saqlash, sovgʻa qilish, merosga qoldirish, almashtirish va boshqa ishlarni amalga oshiradi. Ularning nomenklaturasi Jamgʻarma faoliyati yoʻnalishlari boʻyicha belgilanadi, yuridik va jismoniy shaxslar bilan amaldagi qonunlarga zid boʻlmagan har qanday huquqiy faoliyat koʻrsatadi;

mol almashtirish, kompensatsiya va oʻzaro kelishuvning boshqa vositalarini qoʻllash yoʻli bilan belgilangan tartibda tashqi iqtisodiy faoliyat bilan shugʻullanadi; qoʻshma va boshqa korxonalar tuzadi; har qanday xalqaro jamoat va ixtisoslashgan tashkilotlarga aʼzo boʻladi; fan va madaniyat namoyondalari bilan amaliy aloqa oʻrnatadi;

Oʻzbekiston Respublikasida va xorijiy mamlakatlarda, shuningdek xorijiy sheriklar uchun Oʻzbekiston Respublikasida yuridik shaxs huquqi bilan oʻz shuʼbalari, boʻlimlari va vakolatxonalarini ochadi;

savdo-sotiq, vositachilik faoliyati bilan shugʻullanadi; oʻz mahsuloti va boshqa mollarni sotish uchun doʻkonlar ochadi.

8. Jamgʻarmaning taʼsischilari, davlat, jamoat, ilmiy va ijodiy tashkilotlar, banklar, birjalar, aksionerlik jamoalari va uyushmalar, jamgʻarmalar, shuningdek Jamgʻarmaning asosiy vazifalarini bajarishda ixtiyoriy ravishda ishtirok etmoqchi boʻlgan xorijiy mamlakatlarning fuqarolari uning aʼzolari hisoblanadilar.

9. Jamgʻarmaning yuqori boshqaruv organi konferensiya boʻlib, u oʻz faoliyatining asosiy yoʻnalishini Jamgʻarma Ustavi asosida belgilaydi. Konferensiya Jamgʻarma boshqaruvini va boshqaruv raisini, shuningdek uning oʻrinbosarlarini hamda taftish komissiyasini saylaydi.

10. Jamgʻarmaning tashkiliy tuzilishi ilovaga muvofiq belgilanadi.

11. Jamgʻarma raisi va boshqaruv aʼzolari jamoatchilik asosida ish olib boradilar.

Boshqaruv raisi Jamgʻarma faoliyatini boshqaradi. Unga Oʻzbekiston Respublikasining qonunlari asosida Jamgʻarma mablagʻlarini sarflash huquqi beriladi. Boshqaruv raisi boʻlmagan vaqtda va raisning topshirigʻiga binoan uning vazifalarini rais oʻrinbosari bajaradi.

12. Boshqaruv rais rahbarligida quyidagilarni amalga oshiradi:

Jamgʻarma faoliyatining asosiy yoʻnalishlari boʻyicha uning rivojlanishini muvofiqlashtirish;

Jamgʻarmaning direksiyasi, filiallari va vakolatxonalari faoliyatiga umumiy rahbarlik qilish;

muayyan maqsad uchun belgilangan dasturlar tuzish va ularni amalga oshirish;

turli tashkilotlarda, shu jumladan xorijiy mamlakatlarning turli tashkilotlarida Jamgʻarma manfaatlarini himoya qilish.

13. Jamgʻarma va unga qarashli korxonalar, tashkilotlarning moliyaviy va xoʻjalik faoliyatini taftish komissiyasi nazorat qilib boradi.

14. Jamgʻarma xodimlarining umumiy soni 7 kishidan iborat qilib belgilanadi. Ularning maoshi Jamgʻarma mablagʻi hisobidan toʻlanadi. Jamgʻarmaning shtatlar roʻyxati zarurat tugʻilganda Jamgʻarma boshqaruvining qarori bilan oʻzgartiriladi.

15. Jamgʻarmaning asosiy va muomalada boʻlgan mablagʻi, shuningdek boshqa moddiy va moliyaviy boyligi uning mulki hisoblanadi.

16. Jamgʻarma mulki quyidagilar hisobiga tashkil topadi:

taʼsischilar va tashkilotlardan tushgan pul va moddiy ulushlar;

korxonalar, jamoat tashkilotlari va fuqarolardan, shu jumladan xorijdan tushgan xayriya badallari;

Jamgʻarma va uning korxonalari faoliyatidan olinadigan daromadlar;

ijaraga berilgan va sotib olingan asosiy va moddiy boyliklar;

oʻzaro ishonch asosida jalb qilingan uchinchi shaxslarning mablagʻlari;

qonun bilan taqiqlanmagan boshqa manbalar.

17. Jamgʻarma davlat budjeti hisobiga undiriladigan soliqlardan, bojxona bojidan va boshqa toʻlovlardan ozod etiladi.

Amaldagi qonunchilik asosida Jamgʻarma korxonalari va muassasalari, shuningdek daromadining bir qismini Jamgʻarmaga oʻtkazib turadigan korxona va muassasalar ham davlat budjetiga soliq toʻlashdan ozod qilinadilar.

18. Jamgʻarma oʻz majburiyatlari boʻyicha ixtiyoridagi barcha mol-mulk bilan javob beradi.

Davlat Jamgʻarma majburiyatlari boʻyicha, Jamgʻarma esa davlat majburiyatlari boʻyicha javob bermaydi.

19. Jamgʻarmaning mulkiy haq-huquqi Oʻzbekiston Respublikasining jamoat tashkilotlari haqidagi qonunlariga muvofiq himoya qilinadi.

20. Jamgʻarma faoliyati konferensiya qaroriga binoan yoki qonunchilikda belgilangan tartibda tugatiladi.

21. Tugatilgan Jamgʻarmaning mol-mulki, Jamgʻarmaning barcha majburiyatlari boʻyicha hisob-kitob ishlari bajarilgandan keyin, uning taʼsischilari ixtiyoriga beriladi.

Jamgʻarma tomonidan bepul foydalanish uchun yoki ijaraga olingan binolar, asbob-uskunalar va boshqa mol-mulklar egalariga qaytariladi.