Oʻzbekiston Respublikasi Prezidentining “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2018-yil 5-martdagi PF-5368-son Farmoni ijrosini taʼminlash, shuningdek, yuqori mahoratli sportchilarni kompleks, shu jumladan olimpiya sport turlari boʻyicha yuqori darajada tayyorlash, aholi, ayniqsa, yoshlar oʻrtasida sogʻlom turmush tarzini keng targʻib qilish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2018-yil 5-martdagi PF-5368-son Farmoniga muvofiq:

Samarqand viloyati Samarqand tumanida universal olimpiya tayyorgarligi va xalqaro musobaqalar oʻtkazish markazi;

Toshkent viloyati Boʻstonliq tumanida milliy terma jamoalarning universal olimpiya tayyorgarligi markazi;

Jizzax viloyati Zomin tumanida gimnastika boʻyicha olimpiya tayyorgarligi markazi;

Namangan viloyati Chortoq tumanida sport oʻyinlari boʻyicha olimpiya tayyorgarligi markazi;

Qashqadaryo viloyati Shahrisabz tumanida sport yakkakurashlari boʻyicha olimpiya tayyorgarligi markazi (keyingi oʻrinlarda markazlar deb ataladi) tashkil etilganligi maʼlumot uchun qabul qilinsin.

Bunda davlat mulki obyektlari Oʻzbekiston Milliy olimpiya qoʻmitasiga begʻaraz muddatsiz foydalanish huquqi asosida berilgan.

Oʻzbekiston Milliy olimpiya qoʻmitasiga yuqorida koʻrsatilgan davlat mulki obyektlarini keyinchalik markazlarga maqsadli foydalanish va xoʻjalik faoliyati yuritish uchun begʻaraz foydalanish (tasarruf etish huquqisiz) uchun berishga ruxsat etilsin.

2. Quyidagilar markazlarning asosiy vazifalari deb belgilansin:

jahon va Osiyo chempionatlarida, Olimpiya, Paralimpiya va Osiyo oʻyinlarida, Universiadalar, boshqa xalqaro va mintaqaviy musobaqalarda Oʻzbekiston sharafini munosib himoya qilishga qodir xalqaro toifadagi sportchilarni, terma jamoalar aʼzolarini tayyorlash uchun zarur sport inventarlari bilan jihozlangan zamonaviy, xalqaro talablar va standartlarga javob beradigan moddiy-texnika hamda oʻquv-mashgʻulot bazasini tashkil etish;

sportning olimpiya turlari boʻyicha Oʻzbekiston milliy terma jamoalari (keyingi oʻrinlarda terma jamoalar deb ataladi) sportchilarini markazlashtirilgan tartibda tayyorgarlik koʻrishini taʼminlash;

olimpiya sport turlari boʻyicha terma jamoalarni, sport zaxirasini tayyorlash maqsadida oʻz faoliyatini taʼminlash uchun oʻzining moddiy-texnika bazasini rivojlantirish;

sportchilar, terma jamoalar aʼzolarining oʻquv-mashgʻulot jarayonini xalqaro standartlar darajasida tashkil etish, xalqaro toifadagi sportchilarni tayyorlash uchun yuqori malakali trener-mutaxassislar, psixologlar va metodistlarni, shu jumladan xorijdan keng jalb qilish hisobiga oʻquv-mashgʻulot jarayoniga ilgʻor xalqaro tajriba inobatga olingan holda yangi ilmiy-uslubiy texnologiyalarni joriy etish orqali ularning nazariy hamda texnik-taktik tayyorgarligi sifatini muntazam oshirish;

trenerlar va sportchilarning professional darajasini oshirish, shu jumladan xorijiy sportchilar va trenerlar uchun pulli asosda oʻquv-mashgʻulot yigʻinlarini oʻtkazish maqsadida tajriba almashish boʻyicha xorijiy sport maktablari, klublari va markazlari bilan hamkorlikni kuchaytirish.

3. Belgilansinki, markazlarning moddiy-texnika bazasini joriy taʼminlash va mustahkamlash Oʻzbekiston Milliy olimpiya qoʻmitasining mablagʻlari, markazlarning xizmatlar koʻrsatishdan tushadigan daromadlari, xayriya mablagʻlari va qonunchilikda taqiqlanmagan boshqa manbalar hisobidan amalga oshiriladi.

4. Oʻzbekiston Milliy olimpiya qoʻmitasi xorijdan yetakchi mutaxassislarni albatta jalb etgan holda, markazlarni yuqori malakali mutaxassislar va trenerlar bilan toʻldirish boʻyicha zarur choralar koʻrsin.

5. Oʻzbekiston Milliy olimpiya qoʻmitasi, Jismoniy tarbiya va sport vazirligi, Samarqand, Jizzax, Qashqadaryo, Namangan va Toshkent viloyatlari hokimliklarining:

Samarqand viloyatining Samarqand tumanida universal olimpiya tayyorgarligi va xalqaro musobaqalar oʻtkazish markazini qurish;

Jizzax viloyatining Zomin tumanida gimnastika boʻyicha olimpiya tayyorgarligi markazi, Qashqadaryo viloyatining Shahrisabz tumanida sport yakkakurashlari boʻyicha olimpiya tayyorgarligi markazi, Namangan viloyatining Chortoq tumanida sport oʻyinlari boʻyicha olimpiya tayyorgarligi markazi,Toshkent viloyatining Boʻstonliq tumanida milliy terma jamoalar uchun universal olimpiya tayyorgarligi markazini (keyingi oʻrinlarda obyektlar deb ataladi) rekonstruksiya qilish toʻgʻrisidagi takliflari maʼqullansin.

6. Obyektlarni qurish va rekonstruksiya qilish doirasida:

tegishli hokimliklar huzuridagi “Yagona buyurtmachi xizmati” injiniring kompaniyalari — buyurtmachi;

tender savdolari yakunlari boʻyicha belgilangan tartibda aniqlangan tashkilotlar — bosh loyiha va pudratchi tashkilotlar etib belgilansin.

7. Quyidagilar loyiha-qidiruv va qurilish-montaj ishlarini bajarish, shuningdek, obyektlarning moddiy-texnika bazasini takomillashtirish hamda ularni uskunalar bilan jihozlash borasidagi xarajatlarni moliyalashtirish manbalari etib belgilansin:

a) loyiha-qidiruv hujjatlarini ishlab chiqish, obyektlarni qurish, rekonstruksiya qilish va hududlarni obodonlashtirish boʻyicha — Oʻzbekiston Respublikasi Investitsiya dasturi doirasida davlat budjeti mablagʻlari;

b) moddiy-texnika bazani takomillashtirish, sport uskunalari, anjomlari va kiyimlari bilan taʼminlash boʻyicha — Oʻzbekiston Milliy olimpiya qoʻmitasining mablagʻlari, xayriya mablagʻlari, xalqaro tashkilotlar grantlari va qonunchilikda taqiqlanmagan boshqa manbalar;

v) ularning belgilangan standartlarga muvofiq uzluksiz ishlashini taʼminlash hisobga olinib, tashqi elektr, gaz taʼminoti va aloqa tarmoqlarini qurish va koʻchirish boʻyicha — tegishli viloyatlarning mahalliy budjeti mablagʻlari.

8. Samarqand viloyatining Samarqand tumani hokimligi Samarqand viloyati Injiniring kompaniyasiga “Konigil agrotexservis” MChJ agrofirmasi hududidan universal olimpiya tayyorgarligi va xalqaro musobaqalar oʻtkazish markazini barpo etish uchun umumiy maydoni 15,0 gektar boʻlgan yer uchastkasini belgilangan tartibda ajratgani maʼlumot uchun qabul qilinsin.

9. Oʻzbekiston Milliy olimpiya qoʻmitasi, Samarqand, Jizzax, Qashqadaryo, Namangan va Toshkent viloyatlari hokimliklari:

manfaatdor vazirlik va idoralar bilan birgalikda obyektlarni qurish hamda rekonstruksiya qilish, tashqi muhandislik va transport kommunikatsiyalarini oʻtkazish bilan bogʻliq tashkiliy va texnik masalalarni hal etsin;

bosh loyiha tashkiloti bilan birgalikda loyiha-smeta hujjatlarini ishlab chiqsin va ularni vakolatli davlat ekspertiza organlari bilan kelishishni taʼminlasin;

Jismoniy tarbiya va sport vazirligi, Qurilish vazirligi, buyurtmachi va bosh pudratchi tashkilot bilan birgalikda olimpiya tayyorgarligi markazlarini tashkil etish tadbirlarining ilovaga muvofiq asosiy bosqichlari asosida obyektlarni 2020-yilning oxirigacha foydalanishga topshirsinlar.

10. Oʻzbekiston Respublikasi Qurilish vazirligi obyektlarda qurilish-montaj ishlarining sifati yuzasidan davlat arxitektura-qurilish nazoratini oʻrnatsin.

11. Mazkur qarorning bajarilishi nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Bosh vazir oʻrinbosari A.A. Abduhakimov va Oʻzbekiston Respublikasi Jismoniy tarbiya va sport vaziri Sh.X. Isroilov zimmasiga yuklansin.