Oʻzbekiston Respublikasi fuqarolarining muddatli harbiy xizmatni va safarbarlik chaqiruvi rezervida xizmatni oʻtash tartibini amaldagi qonunchilikka muvofiqlashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar kiritilsin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Moliya vaziri J.A. Qoʻchqorov va Mudofaa vaziri A.A. Azizov zimmasiga yuklansin.

1. Vazirlar Mahkamasining “Oʻzbekiston Respublikasi fuqarolarining safarbarlik chaqiruvi rezervidagi xizmatini tashkil etish chora-tadbirlari toʻgʻrisida” 2003-yil 22-fevraldagi 99-son qarorida (Oʻzbekiston Respublikasi QT, 2003-y., 2-son, 17-modda):

1) 2-bandning beshinchi va oltinchi xatboshilari quyidagi tahrirda bayon etilsin:

“safarbarlik chaqiruvi rezervidagi xizmatga olingan shaxslar tomonidan toʻlanadigan mablagʻlar Mudofaa vazirligining “Safarbarlik chaqiruvi rezervi mablagʻlari” Maxsus hisobraqamida (keyingi oʻrinlarda Maxsus hisobraqam deb ataladi) jamlanadi va muddatli harbiy xizmatni oʻtash nazarda tutilgan tegishli vazirliklar va idoralarning muddatli harbiy xizmat harbiy xizmatchilarini zaxiraga boʻshatishda ularga nafaqa pulini toʻlash, shuningdek, Mudofaa vazirligining moddiy-texnika bazasini mustahkamlashga, shu jumladan qurol-yarogʻ, harbiy-texnik mulk, oʻq-dorilar xarid qilish, binolarni taʼmirlash va qurish, safarbarlik chaqiruvi rezervi xizmatchilari ishtirokida harbiy yigʻinlar oʻtkazish, yigʻinlar maʼmuriyatining taʼminoti bilan bogʻliq xarajatlarni qoplash, safarbarlik chaqiruvi rezervi xizmatchilarining hisobini yurituvchi xodimlarning mudofaa ishlari organlaridagi taʼminotiga maqsadli tartibda yoʻnaltiriladi;

mudofaa ishlari organlarida safarbarlik chaqiruvi rezervi xizmatchilari hisobini yurituvchi xodimlarning qoʻshimcha soni Maxsus hisobraqamning daromadlari va xarajatlari smetasi tasdiqlanayotganda belgilanadi. Bunda yangi moliya yilida Maxsus hisobraqamning daromadlari va xarajatlari smetasi tasdiqlangunicha ularga ish haqi toʻlash oʻtgan moliya yilida belgilangan xodimlar soni doirasida amalga oshiriladi”;

2) 3-bandning uchinchi va toʻrtinchi xatboshilaridagi hamda 7-banddagi “Moliya vazirligining” soʻzlari “Mudofaa vazirligining” soʻzlari bilan almashtirilsin;

3) 4 va 5-bandlar oʻz kuchini yoʻqotgan deb hisoblansin;

4) 6-banddagi “muddatli xizmat harbiy xizmatchilari taʼminotini yaxshilash, ularni buyumlar bilan taʼminlash, qoʻshilmalar va qismlarni sport anjomlari va — trenajyorlar, zamonaviy kompyuter texnikasi, oʻquv materiallari, kutubxona fondi bilan jihozlash uchun” soʻzlari chiqarib tashlansin;

5) 1-ilovada:

2-bandning uchinchi va toʻrtinchi xatboshilari quyidagi tahrirda bayon etilsin:

“safarbarlik chaqiruvi rezervidagi xizmatga olingan shaxslar tomonidan toʻlangan pul badallari summasi Mudofaa vazirligining “Safarbarlik chaqiruvi rezervi mablagʻlari” Maxsus hisobraqamida (keyingi oʻrinlarda Maxsus hisobraqam deb ataladi) jamlanadi va muddatli harbiy xizmatni oʻtash nazarda tutilgan tegishli vazirliklar va idoralarning muddatli harbiy xizmat harbiy xizmatchilarini zaxiraga boʻshatishda ularga nafaqa pulini toʻlash, shuningdek, Mudofaa vazirligining moddiy-texnika bazasini mustahkamlashga, shu jumladan qurol-yarogʻ, harbiy-texnik mulk, oʻq-dorilar xarid qilish, binolarni taʼmirlash va qurish, safarbarlik chaqiruvi rezervi xizmatchilari ishtirokida harbiy yigʻinlar oʻtkazish, yigʻinlar maʼmuriyatining taʼminoti bilan bogʻliq xarajatlarni qoplash, safarbarlik chaqiruvi rezervi xizmatchilarining hisobini yurituvchi xodimlarning mudofaa ishlari organlaridagi taʼminotiga maqsadli tartibda yoʻnaltiriladi.

Mudofaa vazirligining Maxsus hisobraqami Markaziy bankning Toshkent shahar bosh boshqarmasi hisob-kitob-kassa markazida ochiladi”;

9¹-band quyidagi tahrirda bayon etilsin:

“9¹. Pul badallarini toʻlagan, biroq harbiy yigʻinlardan oʻtmagan safarbarlik chaqiruvi rezervi xizmatchisiga toʻlangan mablagʻlar, agarda u harbiy xizmatga yaroqsiz deb topilganda va unga tibbiy-mehnat ekspertiza komissiyasi (TMEK) tomonidan 27 yoshgacha I, II yoki III guruh nogironligi berilgan holatda belgilangan tartibda qaytarib beriladi.

Safarbarlik chaqiruvi rezervi xizmatchisi vafot etgan taqdirda toʻlangan pul badallari uning yaqin qarindoshiga, merosxoʻriga, vasiysiga yoki homiysiga qaytariladi.

Ortiqcha toʻlangan, shuningdek, Maxsus hisobraqamga yanglishib oʻtkazilgan pul badallari mazkur Nizomning 9² va 9³-bandlarida belgilangan tartibda qaytariladi.

Boshqa holatlarda Maxsus hisobraqamga oʻtkazilgan pul badallari qaytarib berilmaydi”.

9²-bandda:

beshinchi, oltinchi va yettinchi xatboshilar quyidagi tahrirda bayon etilsin:

“Mudofaa ishlari boshqarmasi mudofaa ishlari boʻlimi taqdim etgan hujjatlarni koʻrib chiqqandan soʻng uch ish kuni mobaynida tegishli harbiy okrukka toʻlangan pul badallarini qaytarish haqida iltimosnoma yuboradi.

Harbiy okrug mudofaa ishlari boshqarmasi taqdim etgan hujjatlarni koʻrib chiqqandan soʻng uch ish kuni mobaynida Mudofaa vazirligiga tranzit hisobraqamiga toʻlangan pul badallarini qaytarish haqida xat yuboradi.

Mudofaa vazirligi harbiy okrug taqdim etgan hujjatlarni koʻrib chiqqandan soʻng uch kun muddatda arizada koʻrsatilgan pul summasini, toʻlov taqdimnomasining “Toʻlov tafsilotlari” satrida harbiy okrugdan yuborilgan xatning, tuzilgan shartnomaning sanasi va raqamini, pul mablagʻlarini oluvchining familiyasi, ismi va otasining ismini koʻrsatgan holda, Maxsus hisobraqamdagi pul mablagʻlarini saqlash uchun harbiy okrugning depozit hisobraqamiga qaytaradi”;

sakkizinchi xatboshi chiqarib tashlansin;

toʻqqizinchi — oʻn toʻrtinchi xatboshilar tegishli ravishda sakkizinchi-oʻn uchinchi xatboshilar deb hisoblansin;

9³-bandda:

toʻrtinchi, beshinchi va oltinchi xatboshilar quyidagi tahrirda bayon etilsin:

“Mudofaa ishlari boshqarmasi mudofaa ishlari boʻlimi taqdim etgan hujjatlarni koʻrib chiqqandan soʻng uch ish kuni mobaynida tegishli harbiy okrukka yanglishib oʻtkazilgan pul mablagʻlarini qaytarish haqida iltimosnoma yuboradi.

Harbiy okrug mudofaa ishlari boshqarmasi taqdim etgan hujjatlarni koʻrib chiqqandan soʻng uch ish kuni mobaynida Mudofaa vazirligiga tranzit hisobraqamiga yanglishib oʻtkazilgan pul mablagʻlarini qaytarish haqida xat yuboradi.

Mudofaa vazirligi harbiy okrug taqdim etgan hujjatlarni koʻrib chiqqandan soʻng uch kun muddatda arizada koʻrsatilgan pul summasini, toʻlov taqdimnomasining “Toʻlov tafsilotlari” satrida harbiy okrugdan yuborilgan xatning, tuzilgan shartnomaning sanasi va raqamini, pul mablagʻlarini oluvchi jismoniy shaxsning familiyasi, ismi va otasining ismini (yoki yuridik shaxsning nomini) koʻrsatgan holda, tranzit hisobraqamiga pul mablagʻlari yanglishib oʻtkazilgan Xalq banki tegishli filialining alohida maxsus hisobraqamiga qaytaradi”;

yettinchi xatboshidagi “Moliya vazirligidan” soʻzlari “Mudofaa vazirligidan” soʻzlari bilan almashtirilsin;

13-banddagi “Moliya vazirligining maxsus hisob raqamiga” soʻzlari “Maxsus hisobraqamga” soʻzlari bilan almashtirilsin;

16-banddagi “Birlashgan” soʻzi “Bosh” soʻzi bilan almatshtirilsin;

6) 2-ilovada:

nomidagi va 1-bandagi “Moliya vazirligining” soʻzlari “Mudofaa vazirligining” soʻzlari bilan almashtirilsin;

4-band quyidagi tahrirda bayon qilinsin:

“4. Safarbarlik chaqiruvi rezervidagi xizmat safiga olingan shaxslar toʻlaydigan pul badallari mablagʻlarni jamlash uchun quyidagi hisob raqamlari ochiladi:

tuman (shahar) mudofaa ishlari boʻlimiga — Xalq bankining tegishli tuman (shahar) filialida 29896 “Boshqa majburiyatlar” tranzit hisob raqami (keyingi oʻrinlarda tuman (shahar) tranzit hisob raqami deb ataladi) ochiladi;

viloyat (Qoraqalpogʻiston Respublikasi va Toshkent shahrining) mudofaa ishlari boshqarmasiga — Xalq bankining tegishli viloyat (Qoraqalpogʻiston Respublikasi va Toshkent shahrining) filialida 29896 “Boshqa majburiyatlar” tranzit hisob raqami (keyingi oʻrinlarda viloyat tranzit hisob raqami deb ataladi) ochiladi;

Mudofaa vazirligiga — Markaziy bankning Toshkent shahar bosh boshqarmasi hisob-kitob-kassa markazida 21512 “Safarbarlik chaqiruvi rezervi mablagʻlari” talab qilib olinadigan maxsus (depozit) hisobraqami ochiladi.

7-band quyidagi tahrirda bayon etilsin:

“7. Xalq bankining tuman (shahar) filiallari toʻlangan badallar summasini Xalq banki filiallarining viloyat tranzit hisobraqamlariga, Xalq bankining viloyat filiallari esa toʻlangan badallar summasini Markaziy bankning Toshkent shahar bosh boshqarmasi hisob-kitob-kassa markazidagi Oʻzbekiston Respublikasi Mudofaa vazirligining 21512 “Safarbarlik chaqiruvi rezervi mablagʻlari” talab qilib olinadigan maxsus (depozit) hisobraqamiga keyingi ish kunidan kechiktirmay oʻtkazadi”;

9-bandning ikkinchi xatboshidagi “Moliya vazirligi” soʻzlari “Mudofaa vazirligi” soʻzlari bilan almashtirilsin;

10-banddagi “Xalq bankining viloyat boshqarmasi” soʻzlari “Xalq bankining viloyat filiali” soʻzlari bilan almashtirilsin;

11-band quyidagi tahrirda bayon etilsin:

“11. Mudofaa vazirligi mudofaa ishlari boshqarmalarining har oylik hisobotlarini umumlashtiradi va hisobot davri tugagandan soʻng oʻn ish kunidan kechiktirmay Oʻzbekiston Respublika aksiyadorlik tijorat Xalq banki bilan kelishadi”;

12 va 13-bandlar quyidagi tahrirda bayon etilsin:

“12. Maxsus hisobraqam mablagʻlaridan muddatli harbiy xizmatni oʻtash nazarda tutilgan tegishli vazirliklar va idoralarning muddatli harbiy xizmat harbiy xizmatchilarini zaxiraga boʻshatishda ularga nafaqa pulini toʻlash, shuningdek, Mudofaa vaziriligining moddiy-texnika bazasini rivojlantirish va mustahkamlash, shu jumladan qurol-yarogʻ, harbiy-texnik mulk, oʻq-dorilar xarid qilish, binolarni taʼmirlash va qurish, safarbarlik chaqiruvi rezervi xizmatchilari ishtirokida harbiy yigʻinlar oʻtkazish bilan bogʻliq xarajatlarni qoplash, yigʻinlar maʼmuriyatining taʼminoti, mudofaa ishlari organlaridagi safarbarlik chaqiruvi rezervi xizmatchilarining hisobini yurituvchi xodimlarni taʼminlash uchun foydalaniladi.

Maxsus hisobraqam mablagʻlaridan tasdiqlangan xarajatlar smetasiga (yigʻma va tegishli vazirliklar va idoralar boʻyicha) muvofiq foydalaniladi.

Har bir idora boʻyicha xarajatlar smetalari uning rahbari tomonidan tasdiqlanadi va belgilangan tartibda Mudofaa vazirligida roʻyxatdan oʻtkaziladi.

13. Mudofaa vazirligi har yili 15-martgacha Maxsus hisobraqamga pul badali tushumlaridan kelib chiqqan holda, tegishli hisob-kitoblar va asoslar bilan birga daromadlar hamda mablagʻlarni sarflash smetasini tasdiqlaydi.

Maxsus hisobraqam daromadlari va mablagʻlarini sarflash smetasi tasdiqlanib, Moliya vazirligida belgilangan tartibda roʻyxatdan oʻtkazilgandan soʻng, Mudofaa vazirligi xarajatlar smetalarini ishlab chiqish uchun nazorat raqamlarini muddatli harbiy xizmatni oʻtash nazarda tutilgan tegishli vazirliklar hamda idoralarga yetkazadi”;

16-banddagi “Moliya vazirligiga” soʻzlari “Mudofaa vazirligiga” soʻzlari bilan almashtirilsin;

22-banddagi “Moliya vazirligiga” soʻzlari “Mudofaa vazirligiga” soʻzlari bilan almashtirilsin;

23-banddagi “Moliya vazirligi” soʻzlari chiqarib tashlansin;

25-banddagi “Oʻzbekiston Respublikasi Moliya vazirligining Nazorat-taftish bosh boshqarmasi hamda” soʻzlari chiqarib tashlansin;

7) 3-ilovaning nomidagi “Moliya vazirligining” soʻzlari “Mudofaa vazirligining” soʻzlari bilan almashtirilsin.